Bhadrawahi Bible
2 शमूएल 19
दाऊद यरूशलेम नगरे जो वापस एइते
तैखन योआबे केन्चे ई खबर दित्ती, “राज़ो अबशालोमेरे लेई लेरां देइ राहोरोए ते मातम केरि राहोरोए।” एल्हेरेलेइ तैस दिहाड़े ज़ींत सारे सिपाही केरे लेई मातमेरि वजा बनी; किजोकि सिपैहेईं तैस दिहाड़े शुनू, कि राज़ो अपने मट्ठेरे लेई अफ़सोस केरि राहोरोए। एल्हेरेलेइ तैस दिहाड़े लोक अपनु तुत्तर छ़ुपेइतां महनैम नगरे मां जे, ज़ेन्च़रे सिपाही जंगी मरां नेशतां शरमरे मारे तुत्तर छ़ुपातन। ते राज़े तुत्तर ढेकतां चिन्डां मैरी-मैरी ज़ोई राहोरोए,
“ओ मेरा मट्ठा अबशालोम! ओ अबशालोम, मेरा मट्ठा, मेरा मट्ठा!” तैखन योआब घरे मां राज़े कां गेइतां ज़ोने लगो, “तेरे सेवकेईं अज़्ज़ेरे दिहाड़े तेरी, ते तेरे मट्ठां कुइयां ते तेरी कौन्शां ते रखैलां केरि जान त बच़ेवरीए पन तीं अज़्ज़ेरे दिहाड़े तैना बेइज़्ज़त किये; एल्हेरेलेइ कि तू अपने दुश्मन्न सेइं प्यार ते अपने प्यार केरनेबालन सेइं बैर रखतस। तीं अज़ एन बांदू कियूं कि तीं हाकिमां केरि ते सेवकां केरि कोई फिक्र नईं; बल्के मीं अज़ मीं इस गल्लरो पतो लगो, कि अगर अस सारे अज़ मरोरे भोथे ते अबशालोम ज़ींतो राथो, त तू बड़ो खुशी भोनो थियो। एल्हेरेलेइ हुनी उठतां बेइर गा, ते अपने सेवकां केरो होसलो बधा; नईं त अवं यहोवारी कसम खेइतां ज़ोताईं, कि अगर तू बेइर न गालो, त अज़ राती अक मैन्हु भी तीं सेइं साथी न रालो; ते तेरे बचपने करां लेइतां हुन्ना तगर ज़ेत्री मुसीबतां तीं पुड़ एवरी थी तैन मां सेभन करां ई बड़ी मुसीबत भोल्ही।”
तैखन राज़ो उठतां फाटके पुड़ गेइतां बिश्शो। ज़ैखन सेभी लोकन सेइं एन ज़ोवं, कि राज़ो फाटके पुड़ बिशोरोए; तैखन सारे लोक राज़े कां सामने आए। एल्हेरेलेइ सारे इस्राएली अपने-अपने डेरे जो नश्शोरे थिये। इस्राएलेरे सारे गोट्लां केरे लोक एप्पु मांमेइं एन ज़ोइतां लड़ते थिये, “राज़े असां इश्शे दुश्मन्न करां बच़ावरे थिये, ते पलिश्तन करां भी तैन्नी छुटेवरे थिये; पन हुनी तै अबशालोमे करां डेरतां मुल्ख शैरतां नशोरोए। अबशालोम ज़ै असेईं अपनो राज़ो बन्नेरे लेई च़ुनोरो थियो, तै लड़ैई मां मेरि जेवरोए। त हुनी तुस किजो च़ुप राहोरेथ? ते राज़ो वापस आन्नेरी चर्चा किजो न केरथ?”
तैखन राज़े दाऊदे सादोक ते एब्यातार याजकन कां ऐह समाद भेज़ो, “यहूदी बुज़ुर्ग लोकन सेइं ज़ोथ, ‘तुस लोक राज़ेरे मेहले मां पुज़ानेरे लेई सेभन करां पत्ती किजो भोतथ हालांकि सारे इस्राएली लोकां केरी गल-बात राज़ेरे शुन्ने मां एवरीए, कि तैस मेहले मां पुज़ाम। तुस लोक त मेरे भियाल आथ, बल्के मेरी हड्डी ते मास आथ त तुस राज़े वापस आन्नेरे लेई सेभन करां पत्ती किजो भोतथ?’ फिरी अमासा सेइं इन ज़ोथ, ‘कुन तू मेरी हड्डी ते मास नईं? ते अगर तू योआबेरी जगाई पुड़ हमेशारे लेई सेनापति न रास, त परमेशर मीं सखते करां सखत सज़ाह दे।’” एन्च़रां सेइं तैनी सारे यहूदा प्रदेशेरे लोकां केरे दिल अपने पासे किये; ते तैनेईं अक भोइतां राज़े कां सन्देश भेज़ो, “कि तू अपने सारे सेवकन साथी वापस एई।” तैखन राज़ो वापस एइतां यरदन दरियाए तगर अव; ते यहूदा प्रदेशेरे रानेबाले गिलगाल नगरे तगर जे कि राज़े सेइं मिलतां तैस यरदन दरियाए पार आनम।
शिमी माफ़ कियूं गानू
बिन्यामीन कुलेरे गेरारे मट्ठे शिमी ज़ैन बहूरीम नगरे मां रहतू थियूं, जल्दी तियारी की। तै यहूदा प्रदेशेरे लोकन सेइं साथी दाऊद राज़े सेइं मिलनेरे लेई अव। तैस सेइं साथी 1000 बिन्यामीनी मैन्हु थिये ते शाऊलेरे घरानेरो सेवक सीबा अपने 15 मट्ठन ते 20 दासन सेइं साथी थियो, ते तै राज़ेरे सामने यरदन दरियारे पार पैदल च़लो जेव। ते अक किश्ती राज़ेरे टब्बरे पार आन्ने, ते ज़ैस कम्मे मां तै तैस लाने चाहे तैस्से मां लगनेरे लेई तै पार जेव। ज़ैखन राज़ो यरदन दरियाए पार गानेबालो थियो, तैखन गेरारू मट्ठू शिमी राज़ेरे पव्वन पुड़ बिशतां, तैस सेइं ज़ोने लगो, “मेरो मालिक मेरे पापेरो हिसाब न ने, ते ज़ैस दिहाड़े मेरो मालिक राज़ो यरूशलेम नगर छ़ेडतां अव, तैस दिहाड़े तेरे दासे ज़ै बुराई कियोरीए, तैस याद न केरे ते न राज़ो तैस अपने ध्याने मां रख्खे। किजोकि तेरो दास अवं ज़ानताईं कि मीं पाप कियोरोए; हेर, अज़ अपने मालिक राज़े सेइं मिलनेरे लेई यूसुफेरे सारे घराने मरां सेभन करां पेइले अवें एवरोईं।” पन सरूयाहेरे मट्ठे अबीशै ज़ोवं, “शिमी ज़ैनी यहोवारे अभिषिक्ते लानत दित्तोरी थी, एस वजाई सेइं कुन तै मारोरो न लोड़े?” पन दाऊदे ज़ोवं, “हे सरूयाहेरां मट्ठव, मीं तुसन सेइं कुन कम, कि तुस अज़ मेरे मुखालफ भोवरेथ? त अज़ कुन इस्राएले मां कोन्ची मौतरी सज़ाह दित्ती गाली? कुन अवं न ज़ैनी कि अज़ अवं इस्राएलेरो राज़ो बनोरोईं?” फिरी राज़े शिमी सेइं ज़ोवं, “तीं मौतरी सज़ाह न दित्ती गाली।” ते राज़े तैस सेइं कसम भी खई।
मपीबोशेते पुड़ दाऊदेरी महरबानी
तैखन शाऊलेरो पोट्लड़ो मपीबोशेत राज़े सेइं मिलनेरे लेई अव; तैनी राज़ेरे च़ले गांनेरे दिहाड़े करां लेइतां तैसेरे सुखे सेइं फिरी वापस एजनेरे दिहाड़े तगर तैनी अपने पव्वां केरे नोहो न कट्टे, ते न अपनि दाढ़ी बनाई, ते न अपना लिगड़ां धुवावरां थियां। ज़ैखन तै यरूशलेम नगरे मरां राज़े सेइं मिलनेरे लेई जेव, तैखन राज़े तैस पुछ़ू, “हे मपीबोशेत, तू मीं सेइं साथी कि न थियो जेवरोए?” तैनी ज़ोवं, “हे मेरे मालिक, हे राज़ा, ते अवं तेरो दास टोन्टो आईं। एल्हेरेलेइ मीं सोचू, ‘अवं गधे पुड़ काठी लुवेइतां तैस पुड़ च़ेढ़तां राज़े सेइं साथी च़लो गेइलो, पन मेरे सेवके मीं धोखो दित्तोरो थियो।’ ते मेरे सेवके मेरे मालिक राज़ेरे सामने मेरी चोगली लेवरी थी। पन मेरो मालिक राज़ो परमेशरेरे दूतेरो ज़ेरोए; ते ज़ैन किछ तीं ठीक लग्गे तैन्ने मीं सेइं केर। मेरे बाजी केरो सारो घरानो तेरी तरफां मौतरे सज़ारे काबल थियो; पन तीं अपने दासे एप्पु सेइं साथी खाने बालन मां गनोरोईं। मीं कुन हक्के कि अवं राज़े कां बिनती केरि?” राज़े तैस सेइं ज़ोवं, “तू एपनी गल्लरी चर्चा किजो केरतो रहतस? मेरो हुक्म ईहीए, कि तैस ज़मीनी तुस ते सीबा दूईये एप्पु मांमेइं बेंटतां नेथ।” मपीबोशेते राज़े सेइं ज़ोवं, “मेरो मालिक राज़ो ज़ै सुखे सेइं अपने घरे एवरोए, एल्हेरेलेइ सीबा सब किछ ने।”
बर्जिलै पुड़ दाऊदेरी महरबानी
तैखन गिलाद प्रदेशेरो रानेबालो बर्जिल्लै रोगलीम नगरे मरां अव, ते राज़े सेइं साथी यरदन दरियाए पार जेव, कि तैस यरदनेरे पार पुज़ाए। बर्जिल्लै त 80 सालां केरो सियानो मैन्हु थियो। ज़ेइस तगर दाऊद राज़ो महनैम नगरे मां रहतो थियो तैखन तगर तै तैसेरी देखभाल केरतो राव; किजोकि तै बड़ो धनी थियो। तैखन राज़े बर्जिल्लै सेइं ज़ोवं, “मीं सेइं साथी यरदन दरियारे पार च़ल, ते अवं तीं यरूशलेम नगरे मां एप्पु कां रेखतां तेरी देखभाल केरेलो।” पन बर्जिल्लै राज़े सेइं ज़ोवं, “मीं केत्रे दिहाड़े ज़ींतू रानूए, कि अवं राज़े सेइं साथी यरूशलेम नगरे जो गेईं? अज़ मेरी उमर 80 साले, कुन अवं रोड़े बुरेरो फर्क केरि सकताईं? कुन तेरो दास ज़ैन किछ खाते पीते तैसेरो सुवाद पिशैनी सकते? कुन मीं गीतां ज़ोने बालां ते ज़ोने बैली केरि आवाज़ शुनोतीए? तेरो दास हुनी अपने मालिक राज़ेरे लेई किजो बोझ बने? तेरो दास राज़े सेइं साथी यरदन दरियारे पारे तगर गालो। राज़ो इसेरो एरहो बड़ो बदलो मीं किजो दे? अपने दासे वापस गाने दे, कि अवं अपने नगरे मां अपने अम्मा बाजी केरे कब्रसतानेरे नेड़े मेरि। पन तेरो दास मेरू मट्ठू किम्हाम हाज़रे; मेरे मालिक राज़े सेइं साथी तै पार गाए; ते ज़ेरू तीं ठीक लग्गे तेन्च़रे तैस सेइं बर्ताव केरां।” राज़े ज़ोवं, “हाँ, किम्हाम मीं सेइं साथी पार च़लेलो, ते ज़ेरो तू चास तेरहो अवं तैस सेइं बर्ताव केरेलो बल्के ज़ैन किछ तू मीं करां चालो तैन्ने अवं तेरे लेई केरेलो।” तैखन सारे लोक ते राज़ो यरदन दरियारे पार जेव; तैखन राज़े बर्जिल्लै फुम्मड़ी दित्ती तैसेरे बरकतरे लेई परमेशरे कां प्राथना की, ते तै अपने घरे जो वापस जेव। तैखन राज़ो गिलगाल नगरेरे पासे पार जेव, ते तैस सेइं साथी किम्हाम भी जेव; ते सारे यहूदी लोकेईं ते अध्धे इस्राएली लोकेईं राज़ो पार पुज़व। तैखन सारे इस्राएली सिपाही राज़े कां आए, ते राज़े सेइं ज़ोने लगे, “कुन वजाए कि इश्शे यहूदी ढ्लाएईं तू छ़ेपतां आनो, ते राज़ेरू सारू टब्बर ते तैसेरे सारे मैन्हु भी यरदन दरियाए पार आने।” सारे यहूदी मड़देइं इस्राएली मड़दन जुवाब दित्तो, “वजा ईहीए कि राज़ो इश्शे गोट्लेरोए। ते तुस लोक एस गल्ली सेइं किजो रुशोरेथ? कुन असेईं राज़ेरू दित्तोरू किछ खेवरूए? या तैनी असन किछ इनाम दित्तोरूए?” इस्राएली मड़देइं यहूदी मड़दन जुवाब दित्तो, “कि राज़ेरी हुकूमती मां इश्शे दश हिस्सेन; ते दाऊदे मां इश्शो हिस्सो तुश्शे हिस्से करां जादे। त फिरी तुसेईं असां किजो निकम्मे समझ़े? कुन अपनो राज़ो वापस आन्नेरी चर्चा पेइले असेईं न थी कियोरी?” ते यहूदी मड़देइं इस्राएली मड़दन सेइं जादे सखत गल्लां ज़ोई।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.