Bhadrawahi Bible
2 शमूएल 21
गिबोनी लोकेईं बदलो घिन्नो
दाऊदेरे राज़ केरनेरे दिहाड़न मां ट्लाई सालन तगर लगातार काल पेव; त दाऊदे यहोवा करां प्राथनाई मां पुछ़ू। यहोवा जुवाब दित्तो, “एन शाऊल ते तैसेरे खूनी घरानेरे वजाई सेइं भोवं, किजोकि तैनी गिबोनी लोक मारावरे थिये।” तैखन दाऊद राज़े गिबोनी लोक कुजेइतां तैन सेइं गल्लां की। गिबोनी लोक त इस्राएलन मरां न थिये, तैना बच़ोरे एमोरी लोकन मरां थिये; ते इस्राएली लोकेईं तैन सेइं कसम खेवरी थी, पन शाऊले ज़ै इस्राएली ते यहूदी लोकां केरे लेई जलन भोवरी थी, तांए तैनी तैना मारनेरी कोशिश कियोरी थी। तैखन दाऊदे गिबोनी लोकन पुछ़ू, “अवं तुश्शे लेई कुन केरीं? ते कुन हरज़ानो देईं, कि तुस यहोवारे लोकन आशिर्वाद देथ?” गिबोनी लोकेईं तैस सेइं ज़ोवं, “इश्शे ते शाऊल या तैसेरे घराने मां रुपेइये पेइंसां केरि कोई लड़ाई नईं; ते न अस कोन्ची इस्राएली मारने चाम।” दाऊदे ज़ोवं, “ज़ैन किछ तुस ज़ोथ, तैन्ने अवं तुश्शे लेई केरेलो।” तैनेईं राज़े सेइं ज़ोवं, “ज़ैनी मैन्हें असां नाश किये, ते इश्शे खलाफ एरी योजना बनाई कि इश्शो एरहो सत्यानाश भोए, कि अग्रोवं जो इस्राएल मुल्खे मां न रेई बटम, तैसेरे खानदानेरे सत मैन्हु इश्शे हवाले किये गान, ते अस तैन यहोवारे लेई यहोवारे च़ुनोरे शाऊलेरे गिबा नंव्वेरे नगरे मां फांसी देमेले।” राज़े ज़ोवं, “अवं तैन्न तुश्शे हवाले केरेलो।”
पन दाऊदे ते शाऊलेरे मट्ठे योनाताने एप्पु मांमेइं यहोवारी कसम खेवरी थी, एस वजाई सेइं राज़े योनातानेरू मट्ठू मपीबोशेत ज़ै शाऊलेरो पोट्लड़ो थियो बच़ेइतां रख्खो। पन अर्मोनी ते मपीबोशेत नंव्वेरो, अय्यारी कुई रिस्पारां दूईये मट्ठां ज़ैना शाऊले सेइं पैदा भोवरां थियां; ते शाऊलेरी कुई मीकलरां पंच़े मट्ठां, ज़ैना तैस महोल नगरेरे रानेबाले बर्जिल्लैरे मट्ठे अद्रीएलेरे पासेरे थिये, तैना राज़े ट्लुवेइतां गिबोनी लोकां केरे हथ्थे हावाले किये, ते तैनेईं तैन्न पहाड़े पुड़ यहोवारे सामने फांसी दित्ती, ते सत्ते साथी मेरि जे। फसल कटनेरे पेइले दिहाड़न मां, जौआं केरि फसल कटनेरे शुरुआती मां तैना मारे जे।
तैखन अय्यारी कुई रिस्पा टाट पलेटतां, फसल कटनेरे शुरू करां लेइतां ज़ांतगर अम्बरे मरां तैस पुड़ खूब झ़ड़ी न भोइ, तांतगर चट्टानी पुड़ तैसां एप्पु हैठ बछ़ेइतां रख्खू; ते न त दीसां अम्बरेरां च़ुड़ोलू, ते न राती जंगली जानबर तैसां हुरने दित्ते। ज़ैखन अय्यारी कुइये शाऊलेरी रखैल रिस्पा एस कम्मेरी खबर दाऊदे मैल्ही, तैखन दाऊदे गेइतां शाऊल ते तैसेरे मट्ठे योनातानेरी हेड्डी गिलादी याबेशेरे लोकन करां एन्हीं, ज़ैना तैनेईं बेतशान नगरेरे चौके मरां च़ोरतां एन्होरी थी, ज़ैड़ी पलिश्ती लोकेईं तै तैस दिहाड़े टंगोरो थियो, ज़ैखन तैनेईं शाऊल गिलबो पहाड़े पुड़ मारोरो थियो; दाऊदेरे मैन्हेइं तैट्ठां शाऊल ते तैसेरे मट्ठे योनातानेरी हेड्डी याबेश नगरे मरां एन्हीं; ते ज़ैन फांसी दित्तोरी थी तैन केरि हेड्डी भी अकोट्ठी की। ते शाऊल ते तैसेरे मट्ठे योनातानेरी हेड्डी बिन्यामीन प्रदेशेरे जेला नगरे मां शाऊलेरे बाजी कीशेरे कब्रस्ताने मां देबी; ते दाऊदेरे हुक्मेरे मुताबिक सब कम कियूं। तैसेरां बाद परमेशरे मुल्खेरे लेई प्राथना शुनी।
दाऊद पलिश्ती लोकन पुड़ ज़ींत हासिल केरते
पलिश्तेईं फिरी इस्राएलिन सेइं जंग की, ते दाऊद अपने सेनाई सने गेइतां पलिश्तन सेइं लड़ने लगो; पन दाऊद थेकी जेव। तैखन यिशबोबनोब, ज़ै रापारे खानदाने मरां थियो, ते तैसेरे भालेरे फालेरो वज़न लगभग सड़े ट्लाई किल्लो पितलरो थियो, ते तैस कां नंव्वी तलवार थी, तैसेरो मकसद दाऊद मारनो थियो। पन सरूयाहेरे मट्ठे अबीशै दाऊदेरी मद्दत केरतां पलिश्ती गोलियत एन्च़रे मारो कि तै मेरि जेव। तैखन दाऊदेरे सिपैहेईं कसम खेइतां तैस सेइं ज़ोवं, “तू फिरी असन सेइं साथी जंगी मां न गेइ सकस, एरू न भोए कि तेरे मरने सेइं इस्राएलेरो दीयो हिश्शी गाए।”
एसेरे बाद पलिश्तन सेइं गोब नगरे मां फिरी जंग भोइ; तैस वक्ते हूशाई सिब्बकै रापाई खानदानेरो सप नंव्वेरो मैन्हु मारो। गोब नगरे मां पलिश्तन सेइं फिरी जंग भोइ; तैस मां बैतलहम नगरेरे रानेबाले यारयोरगीमेरे मट्ठे एल्हनाने गत नगरेरो रानेबालो गोलियतेरो ढ्ला1 मारो, ज़ेसेरो भालो ज़ुलाहेरे डोंगी बराबर थियो। फिरी गत नगरे मां भी जंग भोइ, ते तैड़ी बड़े डील-डोल बालो रापाई खानदाने मरां अक मड़द थियो, तैसेरे हथ पव्वन, शा-शा एंगलोई, एन्च़रे सेइं तैस 24 एंगलोई थी। ज़ैखन तैनी इस्राएली सेना ललकारी, तैखन दाऊदेरे ढ्ला शिमआहेरे मट्ठे योनाताने तै मारो। एन्ना च़ेवर गत नगरे मां तैस रापा सेइं पैदा भोवरे थिये; ते तैना दाऊद ते तैसेरे सिपैहेईं मारे।
Source notes (1)
- Footnote गोलियतेरो ढ्ला इब्रानी मां गोलियते।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.