Bhadrawahi Bible
2 शमूएल 13
अम्नोनेरो कुकर्म
तामार नव्वेंरी अक खूबसूरत कुई ज़ै दाऊदेरे मट्ठे अबशालोमेरी बेइन थी, दाऊदेरू मट्ठू अम्नोन तैस पुड़ फिदा भोवं। अम्नोन तामारी एत्रो चातो थियो कि तै तैसेरे बारे मां सोची-सोची बिमार भोइ जेव; किजोकि तै अड्लाई थी, ते तैस सेइं किछ केरनू अम्नोने बड़ू मुश्किल लगतू थियूं। पन अम्नोनेरो अक योनादाब नंव्वेरो दोस्त थियो, ज़ैन दाऊदेरे ढ्ला शिमआहेरू मट्ठू थियूं, ते तै बड़ो च़लाक थियो। तैनी अम्नोने सेइं ज़ोवं, “हे राज़ेरा मट्ठा, कुन वजाए कि तू रोज़ कमज़ोर भोतो च़लोरोस कुन तू मीं सेइं न ज़ोलो?” अम्नोने तैस सेइं ज़ोवं, “मीं त अपने ढ्ला अबशालोमेरी बेइन तामारी सेइं प्यार भोवरोए।” योनादाबे तैस सेइं ज़ोवं, “अपने बिछ़ाने मां झ़ुल ते बिमार भोनेरो बहानो ला; ते ज़ैखन तेरो बाजी तीं हेरने एज्जे, तैखन तैस सेइं ज़ोइयां, ‘महरबानी केरतां मेरी बेइन तामार मीं कां एजने दे, ते रोट्टी मेरे सामने बनाए, ते अवं हेरतां तैसारे हथ्थे रोट्टी खेइं।’” एल्हेरेलेइ अम्नोन बिमार भोनेरो बहानो लेइतां लेटो; ते ज़ैखन राज़ो तैस हेरने अव, तैखन अम्नोने राज़े सेइं ज़ोवं, “महरबानी केरतां मेरी बेइन तामारी एजने दे कि तै मेरे हेरते दूई पूरी बनाए, कि अवं तैसारे हथ्थे सेइं रोट्टी खेइं।”
तैखन दाऊदे अपने घरे तामारी कां ऐह समाद भेज़ो, “अपने ढ्ला अम्नोनेरे घरे गेइतां तैसेरे लेई रोट्टी बना।” तैखन तामार अपने ढ्ला अम्नोनेरे घरे जेई, ते तै लेटोरो थियो। तैखन तैसां अट्टू सन्नू, ते तैसेरे हेरते पूरी पकेई। तैखन तैसां थाली नी, ते तैस रोट्टी खाने जो दित्ती, पन तैनी रोट्टी खाने करां इन्कार कियो। तैखन अम्नोने अपने सेवकन सेइं ज़ोवं, “मेरे आसे-पासेरां सारे लोकन कढा।” तैखन सारे लोक तैस करां च़ले जे। तैखन अम्नोने तामारी सेइं ज़ोवं, “रोट्टी कमरे मां आन, कि अवं तेरे हथ्थे सेइं खेइं।” तैखन तामार अपनि बनेवरी पूरी घिन्तां अम्नोनेरे कमरे मां जेई। ज़ैखन तै रोट्टी नेइतां तैसेरे खानेरे लेई नेड़े जेई, तैखन अम्नोने तैस ट्लेइतां ज़ोवं, “मीं सेइं साथी झ़ुल्ल।” तैसां ज़ोवं, “हे मेरे ढ्ला, मीं सेइं ज़बरदस्ती न केर; किजोकि इस्राएली लोकन मां एरू कम न लोड़े भोवरू; एरू बेवकूफरू कम न केर। फिरी अवं अपनि बदनामी घिन्तां कोरहां गाली? ते तू इस्राएली लोकन मां अक बेअक्ल गनो गालो। तू राज़े सेइं गल-बात केर, तै मेरो ड्लाह तीं बनाने करां इन्कार न केरेलो।” पन तैनी तैसारी न शुनी; ते तै तैस करां जादे ताकतबर थियो तैस वजाई सेइं तैनी तैस सेइं ज़बरदस्ती कुकर्म कियो।
तैसेरां बाद अम्नोने तैस सेइं बड़ी नफरत भोइ। ज़ेत्रो तै पेइलो तैस सेइं प्यार केरतो थियो, तैस करां जादे तैस सेइं तैस नफरत भोइ। तैखन तैनी तैस जो ज़ोवं, “उठतां च़ली गा।” तैसां ज़ोवं, “एरू न केर, किजोकि ज़ै ज़ुलम तीं मीं सेइं कियो तैस करां जादे ज़ुलम ईए कि तू मीं कढने लगोरोस।” पन तैनी तैसारी न शुनी। तैखन तैनी अपने सेवक कुजेइतां ज़ोवं, “इस कुइये मीं करां बेइर कढ, ते तैसेरां बाद चिटकनी ला।” तैनी सेवके तै बेइर कढी ते दारे चिटकनी दित्ती। तैसां त रंगबरंगां लिगड़ां लेवरां थियां; किजोकि ज़ैना राज़ेरी कुइयां अड्लाई भोती थी तैना एरां लिगड़ां लैती थी। तैखन तामारां अपने दोग्गे पुड़ दुख बांदो केरनेरे लेई मांज़न छ़डी, ते अपना रंगबरंगां लिगड़ां छ़िन्दतां छ़डां; ते दोग्गे पुड़ हथ रेखतां चिन्डां मारती च़ली जेई।1
ज़ैखन तैसारे ढ्ला अबशालोमे तै लाही तैने तैस पुछ़ू, “कुन तेरो ढ्ला अम्नोन तीं सेइं साथी राहोरोए? पन हुनी, हे मेरी बेइन, च़ुप रा, तै त तेरो ढ्लाए; एस गल्लरी फिक्र न केर।” तैखन तामार अपने ढ्ला अबशालोमेरे घरे राने लगी। तै दुखी परेशान राने लगी। ज़ैखन दाऊद राज़े इना सब गल्लां शुनी, तैखन तैस बड़ी भारी सरक अई। ते अबशालोमे अम्नोने जो भलू-बुरू किछ न ज़ोवं, किजोकि अम्नोने तैसेरी बेइन तामारारी सेइं कुकर्म कियोरो थियो, एस वजाई सेइं अबशालोम तैस सेइं नफरत केरतो थियो।
अम्नोनेरो कत्ल
दूई सालां केरे बाद अबशालोमे एप्रैम नगरेरे नेड़े बाल्हासोर पहाड़ी इलाके मां एपनी भैड्डां केरी उन्ना बरधेई ते अबशालोमे सब राजकुमारन जो धाम ज़ोई। तै राज़े कां गेइतां ज़ोने लगो, “मिन्नत ईए, कि तेरे दासे भैड्डां केरी उन्ना बरधेवरिन, एल्हेरेलेइ राज़ो अपने सेवकन सने अपने दासे सेइं साथी च़ले।” दाऊद राज़े अबशालोमे सेइं ज़ोवं, “हे मेरे मट्ठां, एरू नईं; अस सारे न गामेले, एरू न भोए कि तीं जादे तकलीफ भोए।” तैखन अबशालोमे बड़ी बिनती की, पन राज़े गाने करां इन्कार कियो, फिरी भी तैस तैनी आशिर्वाद दित्तो। तैखन अबशालोमे ज़ोवं, “अगर तू न एजस त मेरे बड्डे ढ्ला अम्नोने असन सेइं साथी एजने दे।” राज़े तैस पुछ़ू, “तै तीं सेइं साथी किजो गाए?” पन ज़ैखन अबशालोम ज़िद केरने लगो त तैनी अम्नोन ते होरे राजकुमार तैस सेइं साथी भेज़ी छ़डे। तैखन अबशालोमे अपने सेवकन हुक्म दित्तो, “ध्याने सेइं मेरी गल शुना। ज़ैखन अम्नोन दाछ़रो रस पीतां नशे मां मसत भोइ गाए, ते अवं तुसन सेइं ज़ोइलो, ‘अम्नोने मारा।’ कुन ई हुक्म देनेबालो अवं नईं? हिम्मती सेइं कम केरा ते बहादर बना।” एल्हेरेलेइ अबशालोमेरे सेवकेईं अम्नोने सेइं अबशालोमेरे हुक्मेरे मुताबिक सलूख कियो। तैखन बाकी राजकुमार खड़े भोए, ते एपनी-एपनी खचरी पुड़ च़ेढ़तां नेश्शी जे।
तैना हेजू बत्ते थिये, कि दाऊदे ई खबर मैल्ही, “कि अबशालोमे सारे राजकुमार मारोरेन, ते तैन मरां अक भी नईं बच़ोरो।” तैखन दाऊदे उठतां दुखेरे मारे अपना लिगड़ां छ़िन्दां, ते ज़मीनी पुड़ बिछ़ड़ी जेव, ते तैसेरे सारे सेवक लिगड़ां छ़िंदतां तैस कां खड़े राए। तैखन दाऊदेरे ढ्लाए शिमआहेरे मट्ठे योनादाबे ज़ोवं, “मेरो मालिक इन न समझ़े कि सारे राजकुमार मारे जेवरेन, सिर्फ अम्नोन मारो जेवरोए; किजोकि ज़ैस दिहाड़े अम्नोने अबशालोमेरी बेइन तामारी सेइं कुकर्म कियोरो थियो, तैस्से दिहाड़े करां अबशालोमे ई योजना बनेवरी थी। एल्हेरेलेइ हुनी मेरो मालिक राज़ो अपने मने मां इन सेमझ़तां कि सारे राजकुमार मेरि जेवरेन उदास न भो; किजोकि सिर्फ अम्नोने मेरि जेवरोए।”
अबशालोमेरू नश्शनू
एत्रे मां अबशालोम नेश्शी जेव। ते ज़ै जुवान पहरो देतो थियो तैनी हेरू, कि पुतोरां पहाड़ेरी बत्तरे पासेरां बड़े लोक एवरेन। तैखन योनादाबे राज़े सेइं ज़ोवं, “हेर, राजकुमार त एवरेन; ज़ैन तेरे सेवके ज़ोवरू थियूं तैन्ने भोवं।” ज़ेरू तैने ज़ोवं, कि राजकुमार पुज़्ज़े, ते चिन्डां मैरी-मैरी लेरां देने लगे; ते राज़ो भी अपने सारे अधिकैरन सेइं साथी हुस्बुकैइं-हुस्बुकैइं लेरां देने लगो।
अबशालोम त नेशतां गशूर प्रदेशेरे राज़े अम्मीहूदेरे मट्ठे तल्मै कां जेव। ते दाऊद अपने मट्ठे अम्नोनेरे लेई रोज़ लेरां देंतो राव। अबशालोम नेशतां गशूर प्रदेशे जो जेवरो थियो, ते तै तैड़ी ट्लाई साल राव। दाऊदेरे मने मां अबशालोमे कां गांनेरे लेई बड़ी इच्छा राई; किजोकि अम्नोन ज़ै मेरि जेवरो थियो, तैसेरे वजाई सेइं हुनी तै दुखी न थियो।
Source notes (1)
- Cross-reference यहो. 7:6;अय्यू. 2:12.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.