Bhadrawahi Bible
2 शमूएल 14
अबशालोमेरू यरूशलेम नगरे मां वापस एजनू
सरूयाहेरू मट्ठू योआब सेमझ़ी जेव कि दाऊद राज़ेरो दिल अबशालोमेरे पासे लगोरोए। एल्हेरेलेइ योआबे तकोआ नगरे मां दूत भेज़तां तैट्ठां अक अक्लमन्द कौन्श कुजाई, ते तैस सेइं ज़ोवं, “शोग केरनेरां लिगड़ां लेइतां शोग केरनेबाली बन, ते तेल न लेइयां; पन एरी कौन्श बन ज़ै बड़ी च़रोक्नी देंती मुओरे मैन्हेरे लेई शोग केरती भोए। तैखन राज़े कां गेइतां एरी-एरी गल्लां ज़ोइयां।” ते योआबे तैस ज़ैन किछ ज़ोनू थियूं तैन शिखालू।
ज़ैखन तकोआ नगरेरी तै कौन्श राज़े कां जेई, तैखन तुत्तरेरे भारे ज़मीनी पुड़ मथ्थो टेकतां ज़ोने लगी, “हे राज़ा मेरी मद्दत केर।” राज़े तैस पुछ़ू, “तीं कुन लोड़ते?” तैसां ज़ोवं, “सच़्च़े अवं विधवा आईं, मेरो मुन्श मेरि जेवरोए। ते तेरी दैसी दूई मट्ठां थियां, ते तैन दूईयां केरि मैइदाने मां लड़ाई भोइ; ते तैन छुटानेबालो कोई न थियो, एक्की होरि एन्च़रे बाई ते मेरि जेव। हुनी शुन, सारे कुलेरे लोक तेरी दैसरे खलाफ खड़े उठतां इन ज़ोतन, ‘ज़ैनी अपनो ढ्ला मारोरोए तैस असन सौंफी दे, कि अस तैस तैसेरे मारोरे ढ्लाएरे बदले मां मौतरी सज़ाह देम;’ ते एन्च़रां सेइं तैस बारसे भी खतम केरेले। एन्च़रां सेइं तैना मेरे मूरोएं ज़ैन बच़ोरूए हिशाले, ते मेरे मुन्शेरू नवं त औलाद ज़मीनी पुड़ेरां मिटेई छ़डेले।”
राज़े कौन्शी सेइं ज़ोवं, “अपने घरे गा, ते अवं तेरे बारे मां हुक्म देइलो।” तैखन तकोआरी तैस कौन्शां राज़े सेइं ज़ोवं, “हे मेरे मालिक, हे राज़ा, दोष मीं त मेरे बाजी केरे घराने लग्गे; ते राज़ो अपने तखते समेत बेकसूर राए।” राज़े ज़ोवं, “ज़ै कोई तीं सेइं किछ ज़ोए तैस मीं कां आन, तैखन तै फिरी तेरू किछ न केरि सकेलो।” तैसां ज़ोवं, “राज़ो अपने परमेशर यहोवाए याद केरे, कि खूनेरो बदलो नेनेबालो होरी नाश न केरी सखे, ते मेरे मट्ठे नाश न केरी बटे।” राज़े ज़ोवं, “यहोवारे ज़िन्दगरी कसम, तेरे मट्ठेरो अक बाल भी ज़मीनी पुड़ बिछ़ड़ी न बटेलो।”1
कौन्श लगी ज़ोने, “तेरी दासी अपने मालिक राज़े सेइं किछ ज़ोई सकतीए?” तैने ज़ोवं, “हाँ ज़ो।” कौन्श ज़ोने लगी, “फिरी तीं परमेशरेरे लोकां केरे नुक्सानेरे लेई एरी योजना किजो की? राज़े ज़ै ऐह गल ज़ोई, एस सेइं त तै दोषी ज़ेरो लगते, किजोकि राज़ो अपने कढोरे वापस न आने। असेईं सेभेइं एक्की दिहाड़े मरनुएं, ते अस ज़मीनी पुड़ डुलोरे पैनेरे ज़ेरे भोमेले, ज़ैन फिरी सलहु न गाए; फिर भी परमेशर प्राण न ने, बल्के एरी योजना केरते कि कढोरो तैस करां कढोरो न राए। किजोकि लोकेईं अवं डरेवरी थी; एल्हेरेलेइ अवं अपने मालिक राज़े कां ऐह गल ज़ोने अई, ते तेरी दैसां इन सोचू, अवं राज़े कां मिन्नत केरेली, ते भोइ सकते राज़ो अपने दैसरी मिन्नत पूरी केरेलो। ते राज़ो शुन्तां ज़रूर एपनी दैसी तैस मैन्हेरे हथ्थे करां बच़ालो, ज़ै मीं ते मेरे मट्ठे दूईने परमेशरे हिस्से मरां नाश केरनो चाते। आखर तेरी दैसां सोचू, ‘मेरे मालिक राज़ेरे ज़ोने सेइं शान्ति मैल्हे;’ किजोकि मेरो मालिक राज़ो परमेशरेरे कोन्ची दूतेरो ज़ेरो रोड़े बुरे मां पतो केरि सकते; एल्हेरेलेइ तेरो परमेशर यहोवा तीं सेइं साथी राए।”
राज़े जुवाब देइतां तैस कौन्शी सेइं ज़ोवं, “ज़ै गल अवं तीं पुछ़ताई तैस मीं करां न छ़ुपा।” कौन्शां ज़ोवं, “मेरे मालिक राज़ो ज़ोए।” तैखन राज़े ज़ोवं, “तेरी इन गल्लन मां योआबेरो हथ्थे?” कौन्शां जुवाब देइतां ज़ोवं, “हे मेरे मालिक, हे राज़ा, तेरी ज़िन्दगरी कसम, ज़ैन किछ मेरे मालिक राज़े ज़ोवरूए, तैस करां न कोई देइने पासे फिरी सके ते न बांए पासे। तेरे दास योआबे मीं हुक्म दित्तोरोए, ते इना सैरी गल्लां तैन्नी तेरी दैसी शिखैलोरिन। तेरे दास योआबे इन कम एल्हेरेलेइ कियोरूए कि गल छ़ुपाए। ते मेरो मालिक, परमेशरेरे एक्की दूतेरो ज़ेरो अक्लमन्दे, इड़ी तगर कि ज़मीनी पुड़ ज़ैन किछ भोते तैन सब तै ज़ानते।”
तैखन राज़े योआबे जो सन्देश भेज़ो ते तैस सेइं ज़ोवं, “शुन, मीं ऐह गल मन्नोरीए; तू गेइतां तैस जुवाने अबशालोमे वापस आन।” तैखन योआबे ज़मीनी पुड़ तुत्तरेरे भारे झुकतां राज़े आशिर्वाद दित्तो; ते योआब ज़ोने लगो, “हे मेरे मालिक, हे राज़ा, अज़ तेरे दासे पतो लग्गो कि मीं पुड़ तेरी सिद्धी नज़रे, किजोकि राज़े अपने दासेरी बिनती शुनोरीए।” तैसेरां पत्ती योआब उठतां गशूर प्रदेशे जो जेव, ते अबशालोम यरूशलेम नगरे मां आनो। तैखन राज़े ज़ोवं, “तै अपने घरे गेइतां राए; ते मीं सेइं न मिली सके।” तैखन अबशालोम अपने घरे च़लो जेव, ते राज़ेरे सामने न अव।
अबशालोमेरू राज़ेरे सामने गानू
सारे इस्राएली लोकन मां अबशालोम अपने खूबसूरतरे वजाई सेइं बड़ो मुशूर थियो। तैसेरो ज़ेरो कोई खूबसूरत न थियो। बल्के पव्वन करां लेइतां दोग्गे तगर तैस मां कोई नुक्स न थियो। तै सालेरे आखरी मां अपनो दोग कटातो थियो; (तैसेरे बाल तैस भारी लगते थिये, एस वजाई सेइं तै तैन कटातो थियो) ते ज़ैखन तै दोग कटातो थियो तैन केरो वज़न राज़ेरे तोलेरे मुताबिक 200 शेकेल2 भोतो थियो। अबशालोमेरां ट्लाई मट्ठां, ते तामार नव्वेंरी अक कुई थी; ते तै बड़ी खूबसूरत थी।
अबशालोम यरूशलेम नगरे मां दूई साल राव, पन तैनी राज़ो न लेही बटो। तैखन अबशालोमे योआबे जो समाद भेज़ो कि तैस दाऊद राज़े कां भेज़े; पन योआबे तैस कां एजनेरे लेई इन्कार कियो। ते तैनी तैस कांजो दूइयोवं बार समाद भेज़ो, पन फिरी भी तैनी एजने करां इन्कार कियो। तैखन अबशालोमे अपने सेवकन सेइं ज़ोवं, “शुना, योआबेरू अक ऊडार मेरे उडारेरे नेड़े, ते तैस मां जौआं केरी फसल पकोरीए; तुस गेइतां तैस मां अग लाथ।” ते अबशालोमेरे सेवकेईं तैस उडारे मां अग लाई। तैखन योआब खड़ो भोव, ते अबशालोमेरे घरे तैस कां गेइतां तैस पुछ़ने लगो, “तेरे सेवकेईं मेरे उडारे मां किजो अग लेवरीए?” अबशालोमे योआबे सेइं ज़ोवं, “मीं त तीं कां ई समाद भेज़ोरो थियो, ‘इड़ी एजां कि अवं तीं राज़े कां एन ज़ोने भेज़ी, “अवं गशूर प्रदेशे मरां किजो अव? अवं हुन्ना तगर तैड़ी रहतो भोथो त रोड़ू थियूं।” एल्हेरेलेइ हुनी अवं राज़े हेरनो चाताईं; ते अगर अवं दोषी आईं, त तै मीं मारे।’” तैखन योआबे राज़े कां गेइतां तैस ऐह गल शुनाई; ते राज़े अबशालोम कुजव। ते तै तैस कां जेव, ते तैसेरे सामने ज़मीनी पुड़ तुत्तरेरे भारे झुको ते राज़े अबशालोमे फुम्मड़ी दित्ती।
Source notes (2)
- Cross-reference गिन. 35:19;1 राज़. 1:52.
- Footnote 200 शेकेल लगभग 2 किल्लो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.