Bhadrawahi Bible
2 राज़े 3
यहोराम राज़ेरी हुकूमतरी शुरुआत
यहूदा प्रदेशेरे राज़े यहोशापातेरे हुकूमतरे अठारोवं साले मां अहाबेरू मट्ठू यहोराम सामरिया नगरे मरां इस्राएले पुड़ राज़ केरने लगू, ते तैनी 12 साल राज़ कियूं। तैनी यहोवारे नज़री मां बुराई की पन अपने बाजी अहाबेरी ते अपने अम्मा ईजेबेलरी ज़ेरि न की, बल्के अपने बाजी केरे बनेवरे बाल देबतेरे खम्भे हटाए। पन तै नबातेरे मट्ठे यारोबामेरे ज़ेरे पाप केरतो राव ज़ैना तैनी इस्राएली लोकन करां करवाए।
मोआब मुल्खेरे राज़े मेशा कां बड़ां गब्बां थियां, ते इस्राएलेरे राज़े जो अक लख गबड़ां ते अक लख हुड़ां केरि उन्ना केरो कर देतो थियो। पन ज़ैखन अहाब राज़ो मेरि जेव, तैखन मोआब मुल्खेरे राज़े इस्राएलेरे राज़े योरामे सेइं बगावत की। एक्सां यहोराम राज़े सामरिया नगरे मरां निस्तां सारे इस्राएली सिपेही केरी गिनती की। ते तैनी गेइतां यहूदा प्रदेशेरे राज़े यहोशापाते कां ई समाद भेज़ो, “मोआबेरे राज़े मेरे खलाफ बगावत कियोरीए कुन तू मीं सेइं साथी मोआबे सेइं लड़ने च़लेलो?” तैनी ज़ोवं, “हाँ अवं च़लेलो, ज़ेरो तू आस तेरहो अवं आईं, ज़ेरी तेरी सेना आहे तेरही मेरी सेना आहे, ते ज़ेरे तेरे घोड़े तेरहे मेरे घोड़े आन।” फिरी तैनी पुछ़ू, “अस कोस बत्तां गाम?” तैनी जुवाब दित्तो, “एदोम प्रदेशेरे सुनसान ठैरी मांमेइं भोइतां गाथ।”
तैखन इस्राएल मुल्खेरो राज़ो ते यहूदा प्रदेशेरो राज़ो, ते एदोम प्रदेशेरो राज़ो च़ले ते ज़ैखन सत दिहाड़न तगर घुमतां च़लते जे, तैखन सेना ते तैसेरे पत्ती-पत्ती च़लनेबाले जानबरां केरे लेई कोई पानी न मैल्हू। ते इस्राएलेरे राज़े योरामे ज़ोवं, “ओहो! यहोवा इना ट्लाई राज़े एल्हेरेलेइ अकोट्ठे किये, कि तैन मोआब मुल्खेरे हवाले केरे।” पन यहूदा प्रदेशेरे राज़े यहोशापाते ज़ोवं, “कुन इड़ी यहोवारो कोई नबी नईं, ज़ेसेरे ज़िरिये अस यहोवा पुछ़म?” इस्राएलेरे राज़ेरे कोन्ची अधिकैरे जुवाब देइतां ज़ोवं, “हाँ, शापातेरू मट्ठू एलीशा आहे ज़ै एलिय्याहेरो सेवक थियो।” तैखन यहोशापाते ज़ोवं, “यहोवा तैसेरे ज़िरिये गल केरते।” तैखन इस्राएलेरो राज़ो ते यहोशापात ते एदोमेरो राज़ तैस कां जे। तैखन एलीशा नेबे इस्राएलेरे राज़े सेइं ज़ोवं, “तू मीं कां किजो एवरोस? अपने अम्मा बाजी केरे नेबन कां गा।” इस्राएलेरे राज़े तैस जुवाब दित्तो, “एन्च़रे न ज़ो, किजोकि यहोवाए अस ट्लाई राज़े एल्हेरेलेइ अकोट्ठे कियोरेम, कि मोआब मुल्खेरे राज़ेरे हथ्थे मां केरे।” एलीशा ज़ोवं, “सेनां केरो यहोवा ज़ेसेरे सामने अवं हाज़र रहताईं, तैसेरी कसम अगर अवं यहूदा प्रदेशेरे राज़े यहोशापातेरी इज़्ज़त न केरेथो, त अवं न त तेरे पासे तुत्तर फिरेइयेथो ते न तीं पुड़ नज़र केरेथो। हुनी कोई सितार बज़ानेबाले मीं कां आनां।” ज़ैखन बज़ाने बालो सितार बज़ाने लगो, तैखन यहोवारी शक्ति एलीशा पुड़ अई। ते तैनी ज़ोवं, “इड़ी नाले मां तुस एत्रू घड़ा, कि एसमां गत्तां ही गत्तां भोइ गान। किजोकि यहोवा इन ज़ोते, ‘तुश्शे सामने न त हवा च़लेली, ते न झ़ड़ी भोल्ही; फिरी भी ई दरिया पैनी सेइं भेरोई गालो; ते तुस ते तुश्शां गोरू ते जानबरन पानी पीले। ते ई यहोवारी नज़री मां निकड़ी ज़ेरि गल्‍ले; यहोवा मोआब मुल्ख भी तुश्शे कब्ज़े मां केरेलो। तैखन तुस सारे क़िले बाले ते रोड़े नगरन नाश केरथ, ते सारे रोड़े बुट्टन केटथ, ते पैनेरे सारे नागन बन्द केरथ, ते सारे रोड़े उडारन मां घोड़न सेइं भेरथ ताके किछ न बेडोए।’” होरसां झ़ेझ़ां अन्नबलि च़ाढ़नेरे मौके एदोम प्रदेशेरे पासेरां पानी अऊं, ते मुल्ख पैनी सेइं भेरोई जेव।
मोआबी सिपैहेईं एन शुन्तां कि राज़ेईं असन सेइं लड़ाई केरनेरे लेई चढ़ाई कियोरीए, ज़ेत्रे मोआबी सिपाही हथियार च़लानेरे काबल थिये, तैना सारे कुजेइतां अकोट्ठे किये, ते सरहद्दी पुड़ खड़े भोए। होरसां झ़ेझ़ां ज़ैखन तैना खड़े उठे तैस मौके दिहाड़ेरी किरणा तैस पैनी पुड़ एरी पेई कि तैन मोआबी सिपाही केरे सामने एरी पेई की तैन खूनेरू ज़ेरू लाल भोवं। त तैना एक्‍की होरि सेइं ज़ोने लगे, “ऐह त खून भोल्हो, पक्‍के तैना राज़े एक्‍की होरी मैरतां नाश भोइ जेवरेन, एल्हेरेलेइ हुनी हे मोआबी लोकव ज़ैन किछ तैन केरू बच़ोरूए तैस लुटतां नेथ।” ते ज़ैखन तैना इस्राएली केरे डेरन कां नेड़े एवरे थिये, कि इस्राएली उठतां मोआबी सिपेहिन मारने लगे ते तैना तैन केरे सामनेरां नेश्शी जे। ते तैना मोआबी सिपेहिन मारते-मारते तैन केरे मुल्खे मां पुज़्ज़ी जे। ते इस्राएली लोकेईं मोआबी नगर बिछ़ोड़ी दित्ते, ते सारे रोड़े उडारन मां अक-अक मड़द अपनो-अपनो घोड़ छ़ेडतां तैन भेरि दित्तू; ते पैनेरे सारे नाग भेरि छ़डे; ते सारे रोड़े-रोड़े बुट केट्टी छ़डे, आखरी मां राजधानी कीरहरासत बाकी रेई जेई, पन तै भी च़ेवरे पासना छ़िंगलोट च़लाने बालेईं हमलो कियो। एन हेरतां कि अस जंगी मां हारने लगोरेम, मोआबेरे राज़े 700 तलवार च़लानेबाले सिपेहिन सेइं साथी नेइतां एदोम प्रदेशे तगर मोरच़ो बेन्धतां पुज़नेरी कोशिश की पन कामयाब न भोव। तैखन मोआबेरे राज़े अपनु बड्डू मट्ठू ज़ैन तैसेरे ठारी पुड़ राज़ केरनेबालू थियूं ट्लेइतां शहरपनाही पुड़ होमबलि च़ाढ़ू। एस वजाई सेइं इस्राएले पुड़ बड़ो क्रोध भड़को, एल्हेरेलेइ तैना तैस तैड़ी छ़ेडतां अपने मुल्खे जो वापस जे।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.