Bhadrawahi Bible
2 राज़े 4
एलीशा नबी गरीब कौन्शरी मद्दत केरते
एक्सां नेबी केरे टोली मरां एक्केरी कौन्शां एलीशा नेबी कां बिनती केरतां ज़ोवं, “तेरो दास मेरो मुन्श मेरि जेवरोए, ते तीं पतोए कि तै यहोवारो डर मन्ने बालो थियो, ते ज़ेसेरो तैस कर्ज़ो देने जो थियो तै एवरोए कि तै मेरे दूईये मट्ठन अपने गुलाम बनानेरे लेई ने।” तैखन एलीशा तैस कौन्शी पुछ़ू, “अवं तेरे लेई कुन केरीं? मीं सेइं ज़ो कि तेरे घरे मां कुने?” तैसा जुवाब दित्तो, “तेरी दैसरे घरे मां एक्की भांडे मां तेलेरे अलावा होरू किछ भी नईं।” एलीशा ज़ोवं, “तू बेइर गेइतां अपने सैरी पड़ोसी लोकन करां खाली भांडां मग, ते थोड़ां ज़ेरां भांडां न एना। फिरी तू अपने मट्ठन समेत अपने घरे मां गा, ते दार बंद केरतां तैन सेभी भांडन मां तेल उलटेइयां, ते ज़ैना भेरोई गान तैन अलग रेखां।” तैखन तै एलीशा नेबी करां च़ली जेई, ते अपने मट्ठन सेइं साथी अपने घरे गेइतां दार बंद कियूं; तैखन तैसेरां मट्ठां तैस कां भांडां आनतां जेआं ते तै तैन मांजो तेल भरती जेई। ज़ैखन भांडां भेरोई जेआं, तैखन तैसा अपने मट्ठे सेइं ज़ोवं, “मीं कां अक होरू भांड भी आन;” तैनी तैस सेइं ज़ोवं, “होरां भांडां त नईं हुनी।” तैखन तेल रुकी जेव। तैखन तैस कौन्शां गेइतां परमेशरेरे नेबी सेइं ई गल ज़ोई। ते तैनी ज़ोवं, “गा तेल बेच़तां कर्ज़ो मुका; ते ज़ै तेल रेई गाए, तैस सेइं तू अपने मट्ठन सेइं साथी अपनो गुज़ारो केरां।”
एलीशा नबी अक मट्ठू ज़ींतू केरते
फिरी एक्की दिहाड़ेरी गल्ले कि एलीशा नबी शूनेम नगरे जो जेव, तैड़ी अक अमीर कौन्श रहती थी, ते तैसा तै रोट्टी खानेरे लेई मिन्नत केरतां मजबूर कियो। तैसेरां बाद ज़ैखन भी तै तैलमेइं गातो थियो, तैखन तै तैड़ी रोट्टी खानेरे लेई गातो थियो। एक्सां तैस कौन्शां अपने मुन्शे सेइं ज़ोवं, “शुन ई ज़ै बार-बार इश्शे इलमेइं गाते मीं लगते कि ऐह परमेशरेरो कोई पवित्र भक्ते। अस लाए पुड़ अक निकड़ो कमरो बनाम, ते तैस मां तैसेरे लेई अक खट, अक मेज़, अक कुर्सी ते अक लौअरे लेई दीयो रखम, कि ज़ैखन भी तै इश्शे कां एज्जे, तैखन तैस कमरे मां बिश्शे।”
एक्सां एरू भोवं, कि एलीशा तैस बेहीं छती तैस कमरे मां रुको ते तैस मां आराम केरनेरे लेई लेटो। ते एलीशा अपने सेवक गेहजी सेइं ज़ोवं, “तैस शूनेमिन कौन्शी कुजा।” तैनी तै कुजाई ते तै तैसेरे कुजाने सेइं तैसेरे सामने एइतां खड़ी भोइ। तैखन तैनी गेहजी सेइं ज़ोवं, “एस सेइं ज़ो, कि तीं इश्शे लेई एत्री बड़ी फिक्र कियोरीए, त ज़ो तेरे लेई कुन कियूं गाए? कुन तेरी चर्चा राज़े या प्रधान सेनापति सेइं की गाए?” तैस कौन्शां जुवाब दित्तो, “मीं एरी कोई ज़रूरत नईं ते अवं अपने लोकन मां खुश आईं।” फिरी एलीशा गेहजी पुछ़ू, “त एसेरे लेई कुन कियूं गाए?” गेहजीए जुवाब दित्तो, “तैस कोई मट्ठू नईं ते तैसेरो मुन्श भी बुढो आहे।” तैनी ज़ोवं, “तैस कुजा।” ते ज़ैखन तैनी तै कुजाई त तैखन तै दारे मां खड़ी भोइ। तैखन तैनी ज़ोवं, “नेलाह तू इस वक्त अपनो बच्चो कुम्मे मां ट्लाली।” पन कौन्शां ज़ोवं, “हे मेरे मालिक! हे परमेशरेरे नबी एरू न भोइसखे, अपने दैसी धोखो न दे।” किछ महीनां केरे बाद तै कौन्श दोज़ींती भोइ, ते नेलाह ज़ैस वक्तेरे बारे मां तैस सेइं एलीशा नेबे ज़ोवरू थियूं, तैस्से वक्ते ज़ैखन दिहाड़े पूरे भोए, तैखन तैस मट्ठू भोवं।
ज़ैखन तैसारू मट्ठू बड्डू भोइ जेवं, तैखन एक्सां तैन अपने बाजी सेइं साथी फसल लुन्ने बालन कां जेवं। ते तैनी अपने बाजी सेइं ज़ोवं, “ओ! मेरो दोग, ओ! मेरो दोग।” तैखन तैसेरे बाजी अपने सेवके सेइं ज़ोवं, “एस एसेरी अम्मा कां पुज़ाथ।” तैनी तैन छ़ुइतां तैसेरी अम्मा कां नेव, तैन दुपहरन तगर एपनी अम्मरे कुम्मे मां रावं, ते फिरी मेरि जेवं। तैखन तैसां बेइयें छती गेइतां तैन मट्ठू परमेशरेरे नेबेरी खट्टी पुड़ लेटावं, ते दार बन्द केरतां बुन अई। तैखन तैसां अपनो मुन्श कोई भेज़तां कुजव, “मीं कां अक सेवक ते अक गधी लूशी भेज़ कि अवं परमेशरेरे नेबी कां लूशी गेइतां वापस एज्जी।” तैनी ज़ोवं, “अज़ तीं तैसेरे कां किजो गानूए? अज़ त न नंव्वी चैंदनरी दिहाड़ीए, ते न थैकरी दिहाड़ीए;” तैसां अपने मुन्शे सेइं ज़ोवं, “भलू भोल्हु।” तैखन तैस कौन्शां गेधी पुड़ काठी लेइतां अपने सेवके सेइं ज़ोवं, “दौड़ते च़ला; ते मेरे ज़ोने बगैर दौड़ने मां ढिलाई न केरा।” ते तै च़लते-च़लते कर्मेल पहाड़े पुड़ परमेशरेरे नेबी कां नेड़े पुज़्ज़ी। तै दूरेरां लेइतां परमेशरेरे नेबे अपने सेवक गेहजी सेइं ज़ोवं, “हेर, उड़ी त तै शूनेमिन कौन्शे। हुनी तू तैस सेइं मिलने दौड़तां गा, ते तैस पुछ़, कि तू ठीक आस? तेरो मुन्श भी ठीके? ते मट्ठू भी ठीके?” तैने गेइतां पुछ़ू, ते कौन्शां जुवाब दित्तो, “हाँ सब ठीके।” तै पहाड़े पुड़ परमेशरेरे नेबे कां पुज़्ज़ी, ते तैसेरे पव ट्लाने लगी, तैखन गेहजी तैस कां नेड़े जेव, कि तैस धक्के देइतां हटाए, पन परमेशरेरे नेबे एलीशा ज़ोवं, “राने दे, तैसेरो मन उदासे; पन यहोवा मीं सेइं नईं ज़ोवरू, पन छ़ुपेइतां रखेरूए।” तैखन तै कौन्श एलीशा नेबी सेइं ज़ोने लगी, “कुन मीं अपने मालिके करां मट्ठू थियूं मगोरू? कुन मीं न थियूं ज़ोवरू मीं धोखो न दे?” तैखन एलीशा गेहजी सेइं ज़ोवं, “अपनि कमरबन्ध, ते मेरी सोटी हथ्थे मां नेइतां च़लो गा, बत्ती मां अगर कोई तीं मैल्हे त तैसेरो हाल न पुछ़ा, ते कोई तेरो हाल पुछ़े, त तैसेरो जुवाब न देइयां, ते मेरी ई सोटी तैस मट्ठेरे तुत्तरे पुड़ रेखां।”1 तैखन मट्ठेरी अम्मा एलीशा नेबी सेइं ज़ोवं, “यहोवा ते तेरी कसम अवं तीं करां दूर न भोल्ही।” त एलीशा उठतां तैस सेइं साथी तैसारे घरे जो च़लो। तैन करां पेइले पुज़तां गेहजीए तै सोटी तैस मट्ठेरे तुत्तरे पुड़ रखी, पन कोई आवाज़ न शुनोई, ते न तैस मां कोई हिलजुल भोइ, तैखन तै एलीशा सेइं मिलनेरे लेई वापस अव, ते तैस सेइं ज़ोवं, “मट्ठू नईं बींझ़ोरू।”
ज़ैखन एलीशा तैसारे घरे पुज़्ज़ो, तैखन कुन हेरू, कि मट्ठू मेरि जेवरूए ते तैसेरी खट्टी पुड़ पेवरूए। तैखन तैनी अकैल्ले अन्तर गेइतां दार बन्द केरतां यहोवा कां प्राथना की।2 तैखन तै खट्टी पुड़ च़ेढ़तां मट्ठे पुड़ एन्च़रां सेइं लेटो कि अपनु आशी तैसेरे ऐशी मां ते एपनी एछ़्छ़ी तैसेरी एछ़्छ़न सेइं ते अपने हथ तैसेरे हथ्थन सेइं मिलाए ते तैस मट्ठे पुड़ लेटी जेव, तैखन मट्ठेरी जान गर्म भोने लगी। एलीशा तैस छ़ेडतां कमरे मां इरां-उरां हंठने लगो, ते फिरी च़ेढ़तां मट्ठे पुड़ लेटी जेव; तैखन मट्ठे सत बार छ़िक्कू, ते एपनी एछ़्छ़ी खोल्ली। तैखन एलीशा गेहजी कुजेइतां ज़ोवं, “शूनेमिन कौन्शी कुजा।” ज़ैखन तैसेरे कुजाने सेइं तै तैस कां आई, “तैखन तैनी ज़ोवं, अपने मट्ठे छ़ुइतां ने।”3 तै अन्तर जेई, ते एलीशारे पव्वन पुड़ पेइतां प्रणाम कियूं; फिरी अपने मट्ठे छ़ुइतां च़ली जेई।
एलीशा नबी खानेरी चीज़ां शुद्ध केरते
तैखन एलीशा नबी गिलगाल नगरे जो वापस जेव। तैस मौके तैस प्रदेशे मां काल पेवरो थियो, एक्सां नेबी केरि टोली तैसेरे सामने बिशोरी थी, ते तैनी अपने सेवके सेइं ज़ोवं, “पतीलो च़ैढ़तां नेबी केरि टोली केरे लेई किछ खाने जो बना।” तैखन अक नबी उडारे मां शाग ट्लोड़ने जेव, ते तैस जंगली डाल मैल्हो ते तै अपनि च़ादर भेरतां जंगली फल ट्लोड़तां अव, ते केटतां बनानेरे लेई नेइतां पतीले मां छ़डो, ते तैना तैस न थिये पिशानते। तैखन तैनेईं तैन मैन्हु केरे खानेरे लेई पतीले मरां बन्टू। खाते बार तैना चिन्डां मैरतां एलीशा सेइं ज़ोने लगे, “हे परमेशरेरे नबी पितीले मां ज़ेहर आहे;” ते तैनेईं तैस मरां न खेइ बटु। तैखन एलीशा ज़ोवं, “ठीके, थोड़ू ज़ेरू अट्टू आनां।” तैखन तैनी तैन पतीले मां छ़ेडतां ज़ोवं, “तैन लोकन खानेरे लेई बेन्टी दे।” फिरी पितीले मां किछ नुक्सानेरी कोई चीज़ न राई।
एलीशा नबी 100 मैन्हन रोट्टी खुवाते
एक्सां अक ज़मीनदार बालशालीशा नगरे मरां, ज़ेठे उगोरे जौआं केरि 20 रोट्टी, ते अपनि बोरी मां सब्ज़ शिल्लां परमेशरेरे नेबी कां आनां; त एलीशा ज़ोवं, “तैन नेबी केरे टोलन खानेरे लेई दे।” पन एलीशारे सेवके पुछ़ू, “कुन अवं 100 मैन्हन खानेरे लेई सिर्फ एत्रू खाने जो देईं?” एलीशा ज़ोवं, “लोकन दे कि तैना खान, किजोकि यहोवा इन ज़ोते, ‘तैन केरे खानेरां पत्ती किछ बेच़ी भी गालू।’” तैखन तैनी तैन्न खाने जो दित्तू, ते ज़ेन्च़रे यहोवा ज़ोवरू थियूं तैन केरे खानेरां पत्ती किछ बेंच़ी भी जेवं।4
Source notes (4)
- Cross-reference लूक. 10:4;12:35.
- Cross-reference मत. 6:6.
- Cross-reference लूक. 7:15.
- Cross-reference मत. 14:20;लूक. 9:17.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.