Bhadrawahi Bible
2 राज़े 2
एलिय्याहेरू सुर्गे जो नेव गानू
एक्सां यहोवा एलिय्याह नबी बड़े तेज़ बवंडरेरे ज़िरिये सुर्गे मांजो नेनेबालो थियो, तैखन एलिय्याह ते एलीशा नबी दूईये साथी-साथी गिलगाल नगरे मरां च़ले। बत्तां एलिय्याहे एलीशा सेइं ज़ोवं, “यहोवा मीं बेतेल नगरे जो गानेरे लेई ज़ोवरूए एल्हेरेलेइ तू इड़ी रुकोरो रा।” एलीशा ज़ोवं, “यहोवा ते कने तेरी कसम अवं तेरू साथ न छ़डेलो।” एल्हेरेलेइ तैना बेतेल नगरे जो च़ले जे, ते बेतेल नगरेरे नेबी केरि टोली एलीशा कां एइतां पुछ़ने लगी, “कुन तीं पत्तोए कि अज़ यहोवा तेरो गुरू तीं करां उबरे नेलो?” तैनी जुवाब दित्तो, “हाँ, मीं भी पतोए, तुस च़ुप राथ।”
इन गल्लां केरे बाद एलिय्याहे एलीशा सेइं ज़ोवं, “हे एलीशा, यहोवा मीं यरीहो नगरे जो गानेरे लेई ज़ोवरूए; एल्हेरेलेइ तू इड़ी रुकोरो रा।” तैनी ज़ोवं, “यहोवा ते कने तेरी कसम अवं तेरू साथ न छ़डेलो।” ते तैना दूईये यरीहो नगरे जो आए। ते यरीहो नगरेरे नेबी केरि टोली एलीशा कां एइतां ज़ोने लगो, “कुन तीं पत्तोए कि अज़ यहोवा तेरो गुरू तीं करां उबरे नेलो?” तैनी जुवाब दित्तो, “हाँ मीं भी पतोए, तुस च़ुप राथ।”
फिरी एलिय्याहे एलीशा सेइं ज़ोवं, “यहोवा मीं यरदन दरियाए तगर गानेरे लेई ज़ोवरूए, एल्हेरेलेइ तू इड़ी बिश।” तैनी ज़ोवं, “यहोवा ते कने तेरी कसम अवं तेरू साथ न छ़डेलो।” ते तैना दूईये अग्रोवं च़ले। ते नेबी केरि टोली मरां 50 मैन्हु गेइतां तैन केरे सामने दूर खड़े भोए, ते एलिय्याह ते एलीशा दूईये यरदन दरियारे बन्ने पुड़ खड़े भोए। तैखन एलिय्याहे अपनि च़ादर ट्लेइतां पलैट्टी, ते तैस सेइं पैनी पुड़ बाई तैखन तै दरिया दूई हिस्से भोइ जेव; ते तैना दूईये शुकोरी ज़मीनी पुड़मेइं पार च़ले जे। तैन केरे पार पुज़ने पुड़ एलिय्याहे एलीशा सेइं ज़ोवं, “एस करां पेइले कि अवं उबरो उठाव गेईं ज़ैन किछ तू चातस कि अवं तेरे लेई केरीं, तैन मग।” एलीशा ज़ोवं, “तीं मां ज़ै आत्मा आहे, तैसेरो दुगनो हिस्सो मीं मैल्ही गाए।” एलिय्याहे ज़ोवं, “तीं मुश्किल गल मग्गोरीए, फिरी भी अगर तू मीं तैखन लाहेलो ज़ैखन अवं उबरो नेव गानोईं त तेरे लेई एरू भोल्हु; नईं त नईं भोनू।” तैना च़लते-च़लते गल्लां केरने लगोरे थिये, कि अचानक अक अग्गरू रथ ते अग्गी बाले घोड़ेईं तैना अलग-अलग किये, ते एलिय्याह बवंडरे मां भोइतां सुर्गे मांजो च़लो जेव।1 ते तैस एलीशा तकतो ते तैस जो हक देतो राव, “ओ मेरे बाजी! ओ मेरे बाजी! ओ इस्राएलेरे रथ ते सुवारव!”
ज़ैखन तै तैस फिरी लेई न सको, तैखन तैनी अपनो दुख बांदो केरनेरे लेई अपना लिगड़ां छ़िन्दतां दूई हिस्से किये। फिरी तैनी एलिय्याहेरी च़ादर सल्ली ज़ै तैस पुड़ां बिछ़ड़ोरी थी, ते तै वापस जेव, ते यरदन दरियारे बन्ने पुड़ खड़ो भोव। तैखन तैनी एलिय्याहेरी तै च़ादर ज़ै तैस पुड़ बिछ़ड़ोरी थी, ट्लेइतां पैनी पुड़ बाई ते ज़ोवं, “एलिय्याहेरो परमेशर यहोवा कोड़िए?” ज़ैखन तैनी पैनी पुड़ बाई तैखन पानी दूई हिस्से भोइ जेवं ते एलीशा शुकोरी ज़मीनी पुड़मेइं पुड़ दरियाए पार जो जेव।
तैस हेरतां नेबी केरि टोली ज़ैना यरीहो नगरे मां तैसेरे सामने थिये, ज़ोने लगे, “एलिय्याह मां ज़ै आत्मा थी, तैए एलीशा पुड़ उतरी जेवरीए।” ते तैना तैस सेइं मिलने जो आए ते तैसेरे सामने ज़मीनी पुड़ झुकतां मथ्थो टेको। तैखन तैनेईं तैस सेइं ज़ोवं, “शुन तेरे दासन कां 50 ताकतबर मड़दन, तैना गेइतां तेरो गुरू तोपतन, भोइ सकते यहोवारे आत्मा तै छ़ुइतां कोन्ची पहाड़े पुड़ या कोन्ची वैदी मां पुज़ावरो भोए।” तैनी ज़ोवं, “तैन्न न भेज़।” ज़ैखन तैनेईं इड़ी तगर ज़ोर दित्तो कि तै मजबूर भोइ जेव, तैखन तैनी ज़ोवं, “ठीके भेज़ा।” एल्हेरेलेइ तैनेईं 50 मैन्हु भेज़े, ते तैना तैस ट्लाई दिहाड़न तगर एलिय्याह तोपते राए पन तै न मैल्हो। तैस मौके तगर तै यरीहो नगरे मां रुकोरो राव, ते ज़ैखन तैना तैस कां वापस आए, तैखन तैनी तैन सेइं ज़ोवं, “कुन मीं तुसन सेइं न थियूं ज़ोवरू, कि न गाथ?”
एलीशा नेबेरे दूई चमत्कार
एक्सां यरीहो नगरेरे प्रधानेईं एलीशा सेइं ज़ोवं, “हेर, ई नगर बड़े रोड़ी जगाई पुड़ बस्सोरोए, ज़ेन्च़रे मेरो मालिक हेरते पन पानी बुरूए; ते ज़मीन रोड़ी फसल न दे।” तैनी ज़ोवं, “एक्की नंव्वे कुटोरे मां लून छ़ेडतां मीं कां आनां।” तैनेईं तैन तैस कां आनू। तैखन एलीशा पैनेरे नागे कां जेव, ते पैनी मां लून छ़ेडतां ज़ोवं, “यहोवा इन ज़ोते, कि अवं इन पानी ठीक केरताईं, ताके पानी बुरू भोनेरे वजाई सेइं कोई न मरेलो ते ज़मीन रोड़ी फसल देली।” एलीशारे ज़ोनेरे मुताबिक पानी ठीक भोइ जेवं, ते अज़ तगर एरू आहे।
एलीशा यरीहो नगरे मरां निस्तां बेतेल नगरे जो च़लो, ते बत्तरी चड़ैई मां च़लोरो थियो कि नगरेरां निक्कां मट्ठां निस्तां तैसेरो मज़ाक बनाने ते हेसतां ज़ोने लगां, “हे गंजा च़ेढ़ी गा, हे गंजा च़ेढ़ी गा।”
तैखन तैनी पत्रोवं मुड़तां तैन केरे पासे तक्कू ते यहोवारे नंव्वे सेइं तैन्न श्राप दित्तो, तैखन जंगले मरां दूई इछ़नेइं निस्तां तैन मरां 42 मट्ठां मारां। तैट्ठां तै कर्मेले पहाड़े पुड़ जो जेव, ते फिरी तैट्ठां तै सामरिया नगरे जो वापस जेव।
Source notes (1)
- Cross-reference मरक. 16:19;प्रका. 11:12.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.