Bhadrawahi Bible
2 राज़े 17
होशेरू इस्राएले पुड़ राज़
यहूदा प्रदेशेरे राज़े आहाजेरे हुकूमतरे बारोवं साले मां एलारू मट्ठू होशे सामरिया नगरे मरां इस्राएले पुड़ राज़ केरने लगू, ते तैनी 9 साल राज़ कियूं। तैनी यहोवारी नज़री मां बुरू कियूं, पन ज़ैना इस्राएलेरे पेइले राज़े थिये तैन बराबर न कियूं। तैस पुड़ अश्शूरेरे राज़े शल्मनेसेरे हमलो कियो, ते होशे तैसेरो गुलाम भोइतां तैस जो चुंगी देने लगो। पन किछ सालेरां बाद अश्शूरे राज़े बुझ़ी छ़डू कि होशे बगावतरी साज़िश कियोरीए, किजोकि तैनी मिस्रेरे राज़े ज़ेसेरू नवं सो थियूं तैस कां मद्दतरे लेई मैन्हु भेज़ोरे थिये ते अश्शूरेरे राज़े कां सालेरी लगान भेज़नी बन्द की। एस वजाई सेइं अश्शूरेरे राज़े तै कैदी बनाव, ते बेड़ी लेइतां कैदखाने मां छ़डो। तैखन अश्शूरेरे राज़े सारे इस्राएल मुल्खे पुड़ चढ़ाई की, ते सामरिया नगरे मां गेइतां ट्लाई सालन तगर तैस घेरो देइतां रख्खो। होशेरे राज़ केरनेरे नंवोवं साले मां अश्शूरेरे राज़े सामरिया नगरे पुड़ कब्ज़ो कियो, ते इस्राएली अश्शूरे मां नेइतां, हलह नगरेरे मां ते गोजानेरे दरिया हाबोरे कां मादी लोकां केरे नगरन मां बसाए।
एसेरी ई वजाए, कि अगर इस्राएली केरो परमेशर यहोवा तैन मिस्र मुल्खेरे फ़िरौन राज़ेरे हथ्थे मरां मिस्र मुल्खेरां केढतां आनोरे थिये, फिरी भी तैनेईं तैसेरे खलाफ पाप कियो, ते बखले देबतां केरि पूज़ा की, ते ज़ैना कौमां यहोवा इस्राएली लोकां केरे सामने मुल्खे मरां केढोरी थी, तैन केरे तरीके पुड़, ते अपने राज़ां केरे च़लेवरी रीतन पुड़ च़लते थिये। इस्राएली लोकेईं अपने परमेशर यहोवारे खलाफ बुरां कम्मां कियां, मतलब पहरेदारां केरे गुम्मटे करां लेइतां क़िले बाले नगरे तगर अपनि सैरी बेसती मां मूरती पुज़ारी उच्ची ठारां बनेई; ते सैरी उच्ची पहैड़न पुड़, ते सब्ज़ बुट्टन हैठ मूरती ते अशेरा देबरी मूरती खड़ी की। एरे उच्चे ठारन मां तैन कौमां केरे ज़ेरे ज़ैना यहोवा तैन केरे सामनेरां केढोरी थी, गुग्गल बालो, ते यहोवा क्रोध सरकानेरां बुरां कम्मां कियां, ते मूरती केरि पूज़ा की, ज़ैन केरे बारे मां यहोवा तैन सेइं ज़ोवरू थियूं, “तुस इन कम न केरथ।” फिरी भी यहोवा सारे नबी ते सारे दर्शी लोकां केरे ज़िरिये इस्राएल ते यहूदारे लोकन जो एन ज़ोइतां खबरदार कियोरे थिये, “अपनि बुरी चाल छ़ेडतां तैस सारे कानूनेरे मुताबिक ज़ै मीं तेरे दादे-पड़दादन दित्तोरो थियो, अपने दास नेबी केरे ज़िरिये तुसन कां पुज़ावरो थियो, मेरे हुक्म ते विधि मन्ना।” पन इस्राएली लोकेईं न मन्नू, बल्के अपने तैन दादे-पड़दादां केरू ज़ेरू, ज़ैनेईं अपने परमेशर यहोवा पुड़ विश्वास न कियो, तैना भी ज़िद्दी बने। तैना तैसेरे विधि ते अपने दादे-पड़दादन सेइं तैसेरो करार, ते ज़ैना हदायतां तैनी तैन दित्तोरी थी, तैना घटिया सेमझ़तां, निकेम्मी मूरतां केरि पूज़ा केरतां; ज़ैन सेइं तैना एप्पु निकम्मे भोइ जे, ते अपने च़ेवरे पासन तैन कौमन पत्ती भी च़ले जे, ज़ैन केरे बारे मां यहोवा तैन हुक्म दित्तोरो थियो कि तैन केरू ज़ेरू कम नईं केरनू। बल्के तैनेईं अपने परमेशर यहोवारे सारे हुक्म मन्ने शारे, ते दूई बछ़ड़ां केरि मूरती बनेई, ते अशेरा देबरी मूरती भी बनाई; ते अम्बरेरे सारे तारां केरि पूज़ा की, ते बाल देबतेरी भी पूज़ा की। तैनेईं अपना मट्ठां-कुइयां अग्गी मां बलि केरतां च़ाढ़ां; ते जैदूगिरन पुछ़ने लगे, ते टूनो केरने लगे; ते ज़ैन यहोवारे नज़री मां बुरू थियूं ज़ैस सेइं तै क्रोधे भोतो थियो, तैन केरनेरे लेई अपने मेर्ज़ी सेइं बिकी जे। एस वजाई सेइं यहोवा इस्राएली लोकन पुड़ बड़ो क्रोधे भोव, ते तैना दुश्मना केरे हवाले किये कि तैना तैन केरे मुल्खे मरां नेन; सिर्फ यहूदारे गोट्लेरे अलावा कोई न बच़ू।
यहूदा प्रदेशेरे लोकेईं भी अपने परमेशर यहोवारे हुक्म न मन्ने, बल्के ज़ैना बुरी रीतां इस्राएली लोकेईं च़लेवरी थी, तैन पुड़ च़लने लगे। तैखन यहोवा इस्राएल ते यहूदारे सारे लोक शारे, ते तैन दुख दित्तो, ते लुटने बालां केरे हथ्थे किये, ते आखरी मां तैना अपने सामनेरां दूर कढे।
ज़ैखन तैनी इस्राएली लोक दाऊदेरे घरानेरे हथ्थेरां छुटाए, त तैनेईं नबातेरू मट्ठू यारोबाम अपनो राज़ो बनाव, ते यारोबामे इस्राएली लोक यहोवारे पत्ती च़लने करां दूर खिचतां तैन करां बड़ो पाप कराव। ते ज़ेरे पाप यारोबामे कियोरे थिये, तेरहे पाप इस्राएली लोक भी केरते राए, ते तैन करां अलग न भोए। आखरी मां यहोवा इस्राएली लोक अपने सामनेरां दूर किये, ज़ेन्च़रे कि तैनी अपने सारे दास नेबी केरे ज़िरिये ज़ोवरू थियूं। एन्च़रां सेइं इस्राएली अपने मुल्खे मरां केढतां अश्शूरे मां पुज़ेइतां छ़डे, ज़ैड़ी तैना अज़्ज़ेरे दिहाड़े तगर रहतन।
इस्राएल मुल्खे मां गैर कौमां केरू बसाव गानू
अश्शूरेरे राज़े बाबेल, कूता, अव्वा, हमात ते सपर्वैम नगरां केरे लोक एन्हतां, इस्राएली केरे जगाई पुड़ सामरिया नगरेरे अलग-अलग जगान मां बसाए; ते तैना सामरियारे अधिकारी भोइतां तैसेरे अलग-अलग जगान मां राने लगे। ज़ैखन तैना तैड़ी पेइले-पेइले राने लगे, तैखन यहोवारो डर न थिये मन्ते, एस वजाई सेइं यहोवा तैन मां शेर भेज़े, ते तैनेईं किछ तैन मरां मारे। एल्हेरेलेइ तैनेईं अश्शूरेरे राज़े जो समाद भेज़ो, कि ज़ैना कौमां तीं तैन केरे मुल्खे मरां केढतां सामरियारे अलग-अलग ठारन मां बसेवरी थी, तैना तैस मुल्खेरे देबतेरी रीतां न ज़ानन, एल्हेरेलेइ तैने तैन मां शेर भेज़ोरेन ज़ैना तैन एल्हेरेलेइ मारतन कि तैना तैस मुल्खेरे देबतेरे रीतन ज़ानतन। तैखन अश्शूरेरे राज़े हुक्म दित्तो, “ज़ैना याजक तुसेईं तैस मुल्खे मरां गुलाम बनेइतां आनोरेन, तैन मरां अक तैड़ी पुज़ाथ; ते तै तैड़ी गेइतां राए, ते तै तैन तैस मुल्खेरे परमेशरेरी रीत शिखाले।” तैखन ज़ैना याजक सामरिया नगरे मरां बन्धी बनेवरे थिये, तैन मरां अक गेइतां बेतेल नगरे मां राने लगो, ते तैन शिखालने लगो कि यहोवारो डर केन्च़रे सेइं मन्नोरो लोड़ते।
फिरी भी बड़े कौमरे लोकेईं अपने-अपने देबतां केरि मूरती बनेइतां, अपने-अपने बसेवरे नगरन मां तैना उच्ची ठारां केरे मन्दरन मां रेखी ज़ैना सामरिया नगरेरे लोकेईं बनेवरे थिये। बाबेलेरे लोकेईं सुक्कोतबनोत देबतेरी मूरती, कूतेरे लोकेईं नेर्गल देबतेरी मूरती, हमातेरे लोकेईं अशीमा देबतेरी मूरती, ते अव्वी लोकेईं निभज देबतेरी मूरती, ते तर्त्ताक देबतेरी मूरती रखी; ते सपर्वैम नगरेरे लोक अपने मट्ठां अद्रम्मेलेक ते अनम्मेलेक देबतां केरे लेई होमबलि केरतां च़ाढ़ने लगे। ते तैना यहोवारो डर मन्ते त थिये, पन सब किसमेरे लोकन मरां उच्चे ठारां केरे मन्दरां केरे लेई याजक भी ठहराते थिये, ज़ैना उच्ची ठारां केरे मन्दरन मां तैन केरे लेई बलि देते थिये। तैना यहोवारो डर मन्ते त थिये, पन तैन कौमां केरे तरीके पुड़, ज़ैन मरां तैना कढोरे थिये, अपने-अपने देबतां केरि भी पूज़ा केरते राए। अज़्ज़ेरे दिहाड़े तगर तैना अपने पुराने रीतन पुड़ भी च़लतन, तैना यहोवारो डर न मन्न। तैना न तैन विधन ते नियमन पुड़ ते न तैस कानूनेरे हुक्मां केरे मुताबिक च़लन, ज़ैना यहोवा याकूबेरे खानदाने दित्तोरे थिये, ज़ेसेरू नवं तैने इस्राएल रख्खू। इस्राएली लोकन सेइं यहोवा करार केरतां तैन ऐह हुक्म दित्तोरो थियो, “तुस होरी देबतां केरो डर न मेन्थ ते न तैन कां मथ्थो टेकथ ते न तैन केरि पूज़ा केरथ ते न तैन जो बलि च़ैढ़थ। पन यहोवा ज़ै तुसन बड़े ताकती ते अग्रोवं कियोरे पैखड़ी सेइं केढतां मिस्र मुल्खे मरां केढतां आने, तुस तैसेरो डर मेन्नथ, ते तैस्से कां मथ्थो टेकथ ते सिर्फ तैस जो बलि च़ैढ़थ। ते तैनी ज़ै-ज़ै विधि ते नियम ते ज़ै कानून ते हुक्म तुश्शे लेई लिखो, तैन तुस हमेशा मन्नेरे लेई तियार रेइयथ; ते होरी देबतां केरो डर न मेन्थ। ते ज़ै करार मीं तुसन सेइं कियोरोए, तैस न बिसरथ ते होरी देबतां केरो डर न मेन्थ। सिर्फ अपने परमेशर यहोवारो डर मेन्थ, तैए तुसन तुश्शे सब दुश्मना केरे हथ्थे करां बच़ालो।” फिरी भी इस्राएली लोकेईं न मन्नू, पन तैना अपने पुराने रीतरे मुताबिक केरते राए।
तैना कौमां यहोवारो डर मेनती त थी, पन अपने बनेवरी मूरती केरि पूज़ा भी केरती रेई, ते ज़ेन्च़रे तैना केरते थिये तेन्च़रे तैन केरू खानदान भी अज़ तगर केरते।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.