Bhadrawahi Bible
2 राज़े 16
आहाजेरू राज़
रमल्याहेरां मट्ठां पेकहेरे हुकूमतरे सतारोवं साले मां यहूदा प्रदेशेरे राज़े योतामेरू मट्ठू आहाज राज़ो बनो। ज़ैखन आहाज राज़ो बनो, तैखन तैसेरी उमर 20 साल थी, ते तैनी 16 साल यरूशलेम नगरे मां राज़ कियूं। ते तैनी अपने पूर्वज दाऊदेरू ज़ेरू कम न कियूं, ज़ैन तैसेरे परमेशर यहोवारे नज़री मां ठीक थियूं। पन तै इस्राएलेरे राज़ां केरि ज़ेरि चाली पुड़ च़लतो राव, बल्के तैन कौमां केरे भिट्टे कम्मां केरे मुताबिक, ज़ैना यहोवा इस्राएली केरे सामने मुल्खे मरां कढोरे थिये, तैने अपनु मट्ठू भी अग्गी मां बलि कियूं। तै उच्चे ठहरन पुड़, ते पहाड़न पुड़, ते सब सब्ज़ बुट्टन हैठ, बलि च़ाढ़तो ते गुग्गल बालतो थियो।
तैखन अरामेरो राज़ो रसीन, ते रमल्याहेरे मट्ठे इस्राएलेरे राज़े पेकहे लड़नेरे लेई यरूशलेम नगरे पुड़ चढ़ाई की, ते तैनेईं आहाज घेरी छ़डो, पन लड़ाई केरतां तैन करां किछ बेनि न बटु। तैस मौके अरामेरे राज़े रसीने, एलत नगर अरामेरे अधीने मां केरतां, यहूदी लोकेईं तैना तैट्ठां केढी छ़डे; तैखन अरामी लोक एलत नगरे जो जे, ते अज़्ज़ेरे दिहाड़े तगर तैड़ी रहतन। ते आहाजे मैन्हु भेज़तां अश्शूरेरे राज़े तिग्लत्पिलेसेरे कां समाद भेज़ो, “मीं अपनो दास, बल्के मट्ठू सेमझ़तां चढ़ाई केर, ते मीं अरामेरे राज़े ते इस्राएलेरे राज़ेरे हथ्थेरां बच़ा ज़ैना मेरे खलाफ खड़े भेवरेन।” आहाजे यहोवारे भवने मां ते मेहलेरे खज़ानन् मां ज़ेत्रू सोन्नू-चाँदी मैल्हू तैन अश्शूरेरे राज़े कांजो तोफो केरतां भेज़ी दित्तू। तैसेरी शुन्तां अश्शूरेरे राज़े दमिश्क नगरे पुड़ हमलो कियो, ते तैस नेइतां तैसेरे लोक कैदी बनेइतां, कीर नगरेरे पुड़ कब्ज़ो कियो, ते रसीन राज़ो मारो।
तैखन राज़ो आहाज अश्शूरेरे राज़े तिग्लत्पिलेसेरे सेइं मिलनेरे लेई दमिश्क नगरे जो जेव, ते तैट्ठेरी वेदी हेरतां तैसेरी सब बनावटरे मुताबिक तैसेरो नकशो ऊरिय्याह याजके कां नकल केरतां भेज़ो। ठीक तैस्से नकलरे मुताबिक ज़ै आहाज राज़े दमिश्क नगरेरां भेज़ोरो थियो, ऊरिय्याह याजके आहाज राज़ेरे दमिश्क नगरे मरां एजने तगर अक वेदी बनावाई। ज़ैखन राज़ो दमिश्क नगरे मरां वापस अव तैखन तैनी तै वेदी हेरी, ते तैस कां गेइतां तैस पुड़ बलि च़ाढ़ी। तैस्से वेदी पुड़ तैनी अपनि होमबलि ते अन्नबलि भी फुक्की, ते पीनेरी बलि दित्ती ते मेलबेलि केरो खून छ़िड़को। ते पितलरी ज़ै वेदी यहोवारे भवनेरे सामने थी तै तैनी भवनेरे सामनेरां मतलब अपनि बनेवरी वेदी ते यहोवारे भवनेरे मझ़ाटेरां हटेइतां, तैस वेदरे उत्तरेरे पासे रेखी। तैखन आहाज राज़े ऊरिय्याह याजके जो ई हुक्म दित्तो, “झ़ेझ़री होमबलि ते ड्लवझ़ी अन्नबलि, राज़ेरी होमबलि ते तैसेरी अन्नबलि, ते सारे आम लोकां केरि होमबलि ते पीनेरी च़ढ़तल बेड्डी वेदी पुड़ च़ाढ़, ते होमबलि ते मेलबलि केरो सारो खून तैस पुड़ छ़िड़क; ते पितलरी वेदी अवं यहोवा करां पुछ़नेरे लेई इस्तेमाल केरेलो।” आहाज राज़ेरे इस हुक्मेरे मुताबिक ऊरिय्याह याजके तैन्ने कियूं।
फिरी आहाज राज़े कुर्सी केरि पेटरी केट्टी छ़ेडी, ते हौदी तैन पुड़ेरां ओसेली, ते बड्डे हौवज़ पितलरे दांतन पुड़ां ज़ैना तैस हैठ थिये ओसैलतां, घोड़ां केरे फर्शे पुड़ रख्खे। आरामेरे दिहाड़ेरे लेई ज़ै छावरी ठार भवने मां छत देइतां बनेवरी थी, ते राज़ेरे बेइरां अन्तर एजनेरू दार तैनी अश्शूरेरे राज़ेरे वजाई सेइं यहोवारे भवने करां अलग कियूं। आहाजे बाकी सब कम्मां ज़ैना तैनी कियां, तैना यहूदारे राज़ां केरे इतिहासेरे किताबी मां लिखोरन। आहाज अपने दादे-पड़दादां केरो ज़ेरो मेरि जेव ते तै दाऊदपुरे मां दब्बो जेव ज़ैड़ी तैसेरे दादे-पड़दादे दब्बोरे थिये, ते तैसेरू मट्ठू हिजकिय्याह तैसेरे जगाई पुड़ राज़ो बनो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.