Bhadrawahi Bible
2 राज़े 15
यहूदा प्रदेशे पुड़ अजर्याहेरू राज़
इस्राएलेरे राज़े यारोबामेरे हुकूमतरे सताइयोवं साले मां यहूदा प्रदेशेरे राज़े अमस्याहेरू मट्ठू अजर्याह राज़ो बनू। ज़ैखन तै राज़ केरने लगो, तैखन तैसेरी उमर 16 साल थी, तैनी यरूशलेम नगरे मां 52 साल राज़ कियूं। तैसेरी अम्मरू नवं यकोल्याह थियूं, तै यरूशलेम नगरेरी रानेबाली थी। ज़ेन्च़रे तैसारो बाजी अमस्याह केरतो थियो ज़ैन यहोवारी नज़री मां रोड़ू थियूं, तेन्च़रे तै भी केरतो थियो। फिरी भी उच्ची ठारां बिछ़ोड़ी न जेई; प्रजारे लोक तैस वक्ते भी तैन पुड़ बलि च़ाढ़ते थिये, ते गुग्गल बालते राए। यहोवा तै राज़ो एन्च़रे मारो, कि तै मरनेरे दिहाड़न तगर कोढ़ी राव, ते तै अलग एक्की घरे मां रहतो थियो। योताम नंव्वेरू राज़ेरू अक मट्ठू तैसेरे घरानेरे कम्मे पुड़ अधिकारी भोइतां मुल्खेरे लोकां केरो न्याय केरतू थियूं। अजर्याहेरां बाकी सब कम्मां ज़ैना तैनी कियां, तैना यहूदा प्रदेशेरे राज़ां केरे इतिहासेरे किताबी मां लिखोरन। आखरी मां अजर्याह अपने दादे-पड़दादां केरो ज़ेरो मेरि जेव ते दाऊदपुरे मां ज़ैड़ी तैसेरे दादे-पड़दादे दब्बोरे थिये तै भी तैड़ी दब्बो जेव, ते तैसेरू मट्ठू योताम तैसेरे ठैरी पुड़ राज़ो बनो।
जकर्याहेरू राज़
यहूदा प्रदेशेरे राज़े अजर्याहेरे राज़ेरे अठेतियोवं साले मां यारोबामेरू मट्ठू जकर्याह इस्राएले पुड़ सामरिया नगरे मरां राज़ केरने लगू, तैनी शा महीने राज़ कियूं। तैनी अपने दादे-पड़दादां केरू ज़ेरू यहोवारे नज़री मां बुरू कियूं, तैनी नबातेरे मट्ठे यारोबामे ज़ैनी इस्राएले करां पाप करेवरो थियो, तैसेरे पापेरे मुताबिक केरतो राव, ते तैन करां तै अलग न भोव। ते याबेशेरे मट्ठे शल्लूमे तैस सेइं बगावत केरतां तै लोकां केरे सामने मारो, ते तैस मैरतां तैसेरे जगाई पुड़ राज़ो बनो। जकर्याहेरां बाकी कम्मां इस्राएलेरे राज़ां केरे इतिहासेरे किताबी मां लिखोरन। ज़ै वाधो यहोवा येहू सेइं कियोरो थियो तै पूरो भोव, “तेरे पड़पोट्लड़ेरे मट्ठे तगर तेरी औलाद इस्राएलेरे तखते पुड़ बिशती राहेली।” ते तेन्च़रे भोवं।
शल्लूमेरू राज़।
यहूदा प्रदेशेरे राज़े उज्जियाहेरे हुकूमत केरनेरे उनतैलियोवं साले मां याबेशेरू मट्ठू शल्लूम राज़ केरने लगू, ते तैनी अक महीनो सामरिया नगरे मरां इस्राएले पुड़ राज़ कियूं। किजोकि गादीएरे मट्ठे मनहेमे, तिर्सा नगरे मरां सामरिया नगरे मां गेइतां याबेशेरू मट्ठू शल्लूम तैड़ी मारू, ते तैस मैरतां तैसेरे जगाई पुड़ राज़ो बनो। शल्लूमेरां बाकी कम्मां ते ज़ै तैनी बगावत केरनेरी साज़िश की, इन सब इस्राएलेरे राज़ां केरे इतिहासेरे किताबी मां लिखेरूए। तैखन मनहेमे तिर्सा नगरे मां गेइतां, सारे रानेबाले ते आसे-पासेरे मुल्खे सने तिप्सह नगरे पुड़ एस वजाई सेइं हमलो कियो, कि तिप्सह नगरेरे लोकेईं तैसेरे लेई फाटक न थिये खोलोरे, एस वजाई सेइं तैनी तैना मारे, ते तैन मां ज़ेत्री भी दोज़ींती कौन्शां थी, तैन सेभी केरां पेटां च़ीरां।
मनहेमेरू राज़
यहूदा प्रदेशेरे राज़े अजर्याहेरे हुकूमतरे उनतैलियोवं साले मां गादीएरू मट्ठू मनहेम इस्राएले पुड़ राज़ केरने लगू, ते तैनी 10 साल सामरिया नगरे मरां इस्राएले पुड़ राज़ कियूं। तैनी यहोवारे नज़री मां बुरू कियूं, तैनी नबातेरे मट्ठे यारोबामे ज़ैनी इस्राएले करां पाप कराव, तैसेरे पापेरे मुताबिक तैन केरतो राव, ते तैन करां तै ज़िन्दगी भर अलग न भोव। अश्शूरेरे राज़े ज़ेसेरू नवं पूल थियूं तैनी इस्राएल मुल्खे पुड़ हमलो कियो, ते मनहेमे तैस जो 35000 किल्लो चाँदी इस उमीदी सेइं दित्ती, कि तै तैसेरो मद्दत केरनेबालो भोइतां राज़ तैसेरे हथ्थे मां मज़बूत रख्खे। ई चाँदी अश्शूरेरे राज़े जो देनेरे लेई मनहेमे बड़े-बड़े अमीर इस्राएली लोकन करां नियोरी थी, हर एक्की अधो किल्लो चाँदी देनी पेई; तैखन अश्शूरेरो राज़ो इस्राएल मुल्ख छ़ेडतां वापस जेव। मनहेमेरां तैना सारां कम्मां ज़ैना तैनी कियां, तैना इस्राएलेरे राज़ां केरे इतिहासेरे किताबी मां लिखोरन। आखरी मां मनहेम मेरतां अपने दादे-पड़दादन मां मिली जेव ते तैसेरू मट्ठू पकहयाह तैसेरे जगाई पुड़ राज़ो बनू।
पकहयाहेरू राज़
यहूदा प्रदेशेरे राज़े अजर्याहेरे हुकूमतरे पज़ाहवं साले मां मनहेमेरू मट्ठू पकहयाह सामरिया नगरे मरां इस्राएले पुड़ राज़ केरने लगू, ते तैनी दूई साल राज़ कियूं। तैनी यहोवारे नज़री मां बुरू कियूं, ते नबातेरे मट्ठे यारोबामे ज़ैनी इस्राएले करां पाप कराव, तैसेरे पापेरे मुताबिक तै भी केरतो राव, ते तैन करां तै ज़िन्दगी भर अलग न भोव। तैसेरे अधिकारी रमल्याहेरे मट्ठे पेकहे तैसेरे खलाफ बगावत की, सामरिया नगरेरे राज़दरबारे गुम्मटे मां ज़ैन मां तै ते तैस सेइं साथी अर्गोब ते अर्ये मारो; ते पेकहे सेइं साथी 50 गिलादी मैन्हु थिये, ते तै तैस मैरतां तैसेरे जगाई पुड़ राज़ो बनो। पकहयाहेरां बाकी सब कम्मां ज़ैना तैनी कियां, तैना इस्राएलेरे राज़ां केरे इतिहासेरे किताबी मां लिखोरन।
पेकहेरू राज़
यहूदा प्रदेशेरे राज़े अजर्याहेरे हुकूमतरे बुनजावं साले मां रमल्याहेरू मट्ठू पेकह सामरिया नगरे मरां इस्राएले पुड़ राज़ केरने लगू, ते तैनी 20 साल राज़ कियूं। तैनी यहोवारे नज़री मां बुरू कियूं, ते नबातेरे मट्ठे यारोबामे ज़ैनी इस्राएले करां पाप कराव, तैसेरे पापेरे मुताबिक तै भी केरतो राव, ते तैन करां तै ज़िन्दगी भर अलग न भोव।
इस्राएलेरो राज़े पेकहेरे राज़ केरनेरे दिहाड़न मां अश्शूरेरो राज़ो तिग्लत्पिलेसेरे एइतां इय्योन, आबेल्वेत्माका, यानोह, केदेश ते हासोर नंव्वेरे नगरन ते गिलाद ते गलील, बल्के नप्ताली एरे पूरे प्रादेशे पुड़ कब्ज़ो कियो, ते तैट्ठेरे लोक गुलाम बनेइतां अश्शूरे जो च़लो जेव। उज्जियाहेरे मट्ठे योतामेरे बिहोवं साले मां एलारू मट्ठू होशे रमल्याहेरे मट्ठे पेकहेरे खलाफ साज़िश केरतां तै मारो, ते तै मैरतां तैसेरे जगाई पुड़ राज़ो बेनि जेवं। पेकहेरां बाकी कम्मां ज़ैना तैनी कियां, तैना इस्राएलेरे राज़ां केरे इतिहासेरे किताबी मां लिखोरन।
योतामेरू राज़
रमल्याहेरां मट्ठे इस्राएलेरे राज़े पेकहेरे हुकूमतरे दूइयोवं साले मां यहूदा प्रदेशेरे राज़े उज्जियाहेरू मट्ठू योताम राज़ो बनू। ज़ैखन तै राज़ केरने लगो, तैस वक्ते तैसेरी उमर 25 साल थी, ते तैनी यरूशलेम नगरे मां 16 साल राज़ कियूं। ते तैसेरी अम्मरू नवं यरूशा थियूं ज़ै सादोकेरी कुई थी। योतामे यहोवारे नज़री मां रोड़ू कियूं, ज़ेन्च़रे तैसेरे बाजे उज्जियाहे कियोरू थियूं, तेन्च़रे तैने भी कियूं। फिरी भी उच्ची ठारां न बिछ़ोड़ी जेई, प्रजारे लोक तैन पुड़ तैस मौके भी बलि च़ाढ़ते ते गुग्गल बालते राए। यहोवारे भवनेरे उच्चे फाटक तैन्ने बनावावरां थिये। योतामेरां बाकी सारां कम्मां ज़ैना तैनी कियां, तैना यहूदारे राज़ां केरे इतिहासेरी किताबी मां लिखोरेन। तैन दिहाड़न मां यहोवा अरामेरे राज़े रसीने, ते रमल्याहेरां मट्ठे पेकहे जो, यहूदा प्रदेशेरे खलाफ भेज़ने लगो। आखरी मां योताम अपने दादे-पड़दां केरो ज़ेरो मेरि जेव, ते अपने पूर्वज दाऊदेरे नगरे मां ज़ैड़ी तैसेरे दादे पड़दादे दब्बोरे थिये तै भी तैड़ी दब्बो, ते तैसेरू मट्ठू आहाज तैसेरे जगाई पुड़ राज़ो बनू।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.