Bhadrawahi Bible
2 राज़े 18
यहूदा प्रदेशे मां हिजकिय्याह राज़ो
एलारू मट्ठू इस्राएलेरे राज़े होशेरे राज़ केरनेरे ट्लेइयोवं साले मां यहूदा प्रदेशेरे राज़े आहाजेरू मट्ठू हिजकिय्याह राज़ो बनो। ज़ैखन तै राज़ो बनो तैस वक्ते तैसेरी उमर 25 साल थी, ते तैनी यरूशलेम नगरे मां 29 साल राज़ कियूं। तैसेरी अम्मरू नवं अबी थियूं, तै जकर्याहेरी कुई थी। ज़ेन्च़रे तैसेरे पूर्वज दाऊद राज़े कियोरू थियूं ज़ैन यहोवारी नज़री मां रोड़ू थियूं तेन्च़रे तैने भी कियूं। हिजकिय्याह मूरती पुज़ारी उच्‍ची ठारां डोली, मूरती ट्लोड़ी, अशेरा देबरी मूरती केट्टी छ़ेडी। पितलरो ज़ै सप मूसे बनेवरो थियो, तै तैनी एस्से वजाई सेइं चूर-चूर केरतां छ़डो, कि तैन दिहाड़न तगर इस्राएली लोक तैसेरे लेई धुप बालते थिये; ते हिजकिय्याह तैसेरू नवं नहुशतान1 रख्खू।2 तै इस्राएलेरे परमेशर यहोवा पुड़ भरोसो रखतो थियो, ते तैसेरां बाद यहूदा प्रदेशेरे सब राज़न मां कोई तैस बराबर न भोवं, ते न तैस करां पेइले भी एरहो कोई भोवरो थियो। ते तै यहोवारे लेई हर गल्‍ली मां वफादार राव; ते ज़ैना हुक्म यहोवाए मूसे दित्तोरे थिये, तैन तै मन्तो राव। एल्हेरेलेइ यहोवाए तैस सेइं साथी राव; ते ज़ैड़ी कोन्च तै गानू चातो थियो, तैड़ी तैसेरां कम्मां कामयाब भोतां थियां। ते तैनी अश्शूरेरे राज़े सेइं बगावत की, ते तैसेरे अधीन न राव। तैनी पलिश्ती लोक गाज़ा नगरे ते तैसेरे बन्ने तगर, पहरदार ते गुम्मट ते गढ़े बाले नगरे तगर मारे।
हिजकिय्याहेरे राज़ेरे हुकूमतरे च़ेवरोवं साले मां ज़ै एलारे मट्ठे इस्राएलेरे राज़े होशेरे हुकूमतरे सत्तोवं साले मां थियो, अश्शूरेरे राज़े शल्मनेसेरे सामरिया नगरे पुड़ चढ़ाई केरतां तै च़ेवरे पासना घेरी छ़डो। ते ट्लाई सालां केरे बीतने पुड़ तैनेईं तैस नगरे पुड़ कब्ज़ो कियो। एन्च़रां सेइं हिजकिय्याहेरे राज़ेरे अठारोवं साले मां ज़ै इस्राएलेरो राज़ो होशेरे राज़ेरे नोवोवं साल थियो, सामरिया नगरे पुड़ भी कब्ज़ो कियो। तैखन अश्शूरेरे राज़े इस्राएली लोक गुलाम बनेइतां अश्शूरे मां निये, ते हलह नंव्वेरी जगाई मां ते गोजानेरे दरिया हाबोरे कां ते मादी लोकां केरे नगरन मां तैना बसाए। इसेरी वजा ई थी, कि तैनेईं अपने परमेशर यहोवारी गल न मन्नी, बल्के तैसेरो करार ट्लोड़ो, ते ज़ेत्रे हुक्म यहोवारे दास मूसा दित्तोरे थिये, तैना न मन्ने ते न शुने ते न तैन केरे मुताबिक कियूं।
सन्हेरीबेरी चढ़ाई ते तैसेरे सेनारो विनाश
हिजकिय्याह राज़ेरे हुकूमतरे च़ेवधोवं साले मां अश्शूरेरे राज़े सन्हेरीबे यहूदा प्रदेशेरे सारे गढ़े बाले नगरन पुड़ हमलो केरतां तैन पुड़ कब्ज़ो कियो। तैखन यहूदारे राज़े हिजकिय्याहे अश्शूरेरे राज़े कां लाकीश नगर जो समाद भेज़ो, “मीं करां पाप भोवरोए, मीं करां वापस गा; ते ज़ै बोझ तू मीं पुड़ छ़डेलो तैस अवं छ़ूलो।” त अश्शूरेरे राज़े यहूदारे राज़े हिजकिय्याहेरे लेई 10000 किल्‍लो चाँदी ते 1000 किल्‍लो सोन्नू ठहराव। तैखन ज़ेत्री चाँदी यहोवारे भवने ते राज़ेरे मेहलेरे भण्डारन मां मैल्ही, तै सब हिजकिय्याह तैस दित्ती। तैस वक्ते मां हिजकिय्याहे यहोवारे भवनेरे दारन सेइं ते तैन खम्भन सेइं भी ज़ैन पुड़ यहूदारे राज़े हिजकिय्याहे सोन्नू पलैटेरू थियूं, ते सोन्नू छ़िलतां अश्शूरेरे राज़े जो दित्तू। फिरी भी अश्शूरेरे राज़े तर्त्तान, रबसारीस ते रबशाके अधिकैरन जो बड़ी सेना देइतां, लाकीश नगरेरां यरूशलेम नगरे जो हिजकिय्याह राज़ेरे खलाफ भेज़ी दित्तो। ते तैना यरूशलेम नगरे जो जे ते तैड़ी पुज़तां बेइयें पैनेरे कुण्डेरी नैली कां धोबेरे उडारेरी सड़की कां गेइतां खड़े भोए। ज़ैखन तैनेईं राज़े जो आवाज़ दित्ती, तैखन हिल्किय्याहेरू मट्ठू एलयाकीमे ज़ै राज़ेरे-घरानेरे कम्मे पुड़ अधिकारी थियो, ते शेबना ज़ै मंत्री थियो ते आसापेरू मट्ठू योआह ज़ै इतिहासेरो लिखने बालो थियो, इना ट्लाईए तैन कां बेइर निस्सी जे।
रबशाके तैन सेइं ज़ोवं, “हिजकिय्याहे सेइं ज़ोथ, कि अश्शूरेरो राज़ो इन ज़ोते, ‘तू कैस पुड़ भरोसो रखतस? तू ज़ोतस, कि मीं कां जंगरे लेई योजना ते शक्ति आहे, तै त सिर्फ गल्‍ले आहे। तू कैस पुड़ भरोसो रखतस कि तीं मीं सेइं बगावत कियोरीए? शुन, तू मिस्र मुल्खे पुड़ भरोसो रखतस ज़ै ढ्लेन्च़ोरे निरैठरो ज़ेरो आहे, तैस पुड़ अगर कोई टेक लाए, त तै तैसेरे हथ्थे मां डुबतां छ़िन्देलो। मिस्रेरो राज़ो फ़िरौन तैन सेभी केरे लेई एरहो आहे ज़ैना तैस पुड़ भरोसो रखतन। फिरी अगर तुस मीं सेइं ज़ोथ, कि इश्शो भरोसो अपने परमेशर यहोवाए पुड़े, त कुन ई तै नईं ज़ैनी उच्‍ची ठारां ते वेदी हिजकिय्याहे दूर केरतां यहूदा ते यरूशलेम नगरेरे लोकन सेइं ज़ोवं, कि तुस इस्से वेदी कां सामने ज़ै यरूशलेम नगरे मांए मथ्थो टेका?’ त हुनी मेरे मालिक अश्शूरेरे राज़े कां किछ बन्धे रख, तैखन अवं तीं 2000 घोड़े देइलो, कुन तू तैन पुड़ सुवार च़ैढ़ी सकेलो कि नईं? फिरी तू मेरे मालिकेरे निकड़े करां निकड़े अधिकारी मैन्हे भी ज़ोवरू न मेनतां किजो रथां ते सुवारां केरे लेई मिस्र मुल्खे पुड़ भरोसो रखतो भोए? कुन मीं यहोवारे ज़ोने बगैर, ई ठार उज़ाड़नेरे लेई चढ़ाई कियोरीए? यहोवा मीं सेइं ज़ोवरूए, कि तैस मुल्खे पुड़ हमलो केरतां तैस उज़ाड़” तैखन हिल्किय्याहेरे मट्ठे एलयाकीमे ते शेबना योआहे रबशाके सेइं ज़ोवं, “अपने दासन सेइं अरामी भाषाई मां गल्‍लां केर किजोकि अस तैस समझ़तम ते असन सेइं यहूदी भाषाई मां शहरपनाही पुड़ बिश्शोरे लोकां केरे शुन्ते गल्‍लां न केर।” रबशाके तैस सेइं ज़ोवं, “कुन मेरे मालिके अवं तुश्शे मालिके, या तुसन कां इना गल्‍लां ज़ोने भेज़ोरोईं? कुन तैनी अवं तैन लोकन कां नईं भेज़ोरो, ज़ैना शहरपनाही पुड़ बिशोरेन, ताके तुसन सेइं साथी अपनो मल खानो ते अपनु मुट्ल पीनू पे?”
तैखन रबशाके खड़े भोइतां, यहूदी भाषाई मां ज़ोरे सेइं ज़ोवं, “अश्शूर महाराज़ेरी गल शुना। राज़ो इन ज़ोते, ‘हिजकिय्याह तुसन धोखो न दे, किजोकि तै तुसन मेरे हथ्थे करां बच़ेइ न सकेलो। ते तै तुसन सेइं इन ज़ोइतां यहोवा पुड़ भरोसो न करेई बटे, कि यहोवा सच़्च़े असन बच़ालो ते इन नगर अश्शूरेरे राज़ेरे कब्ज़े न भोल्हु। हिजकिय्याहेरी न शुना। अश्शूरेरो राज़ो ज़ोते कि तोफो भेज़तां मीं खुश केरा, ते मीं कां एज्जा, ते हर अक एपनी-एपनी दाछ़ ते फैगेरे बुट्टेरो फल खातो राए, ते अपने-अपने खुहेरू पानी पीतो राए। तैखन अवं एइतां तुसन एरे मुल्खे मां नेइलो, ज़ै तुश्शे मुल्खेरो ज़ेरो अन्न ते नंव्वे दाछ़रो मुल्ख, रोट्टी ते दाछ़री बागां केरो मुल्ख, ज़ैतून ते गणेरे मैछ़ेरो मुल्खे, तैड़ी तुस न मरेले, ज़ींते राले; ते ज़ैखन हिजकिय्याहे इन ज़ोइतां तुसन टपलाए, कि यहोवा असन बच़ालो, तैखन तैसेरी न शुनथ। कुन होरी कौमां केरे देबतेईं अपनो-अपनो मुल्ख अश्शूरेरे राज़े करां बच़ावरोए? हमात ते अर्पादेतेरे देबते कोड़ि राए? सपर्वैम, हेना ते इव्वा नगरां केरे देबते कोड़ि राए? कुन तैनेईं सामरिया नगर मेरे हथ्थे करां बच़ेवरू आहे, मुल्ख-मुल्खेरे सारे देबतन मरां कौने, ज़ैनी अपनो मुल्ख मेरे हथ्थन करां बच़ावरो भोए? फिरी कुन यहोवा यरूशलेम नगरे मेरे हथ्थे करां बच़ालो।’”
पन सारे लोक च़ुप राए ते तैसेरे जुवाबे मां अक गल भी न ज़ोई, किजोकि राज़ेरो एरहो हुक्म थियो, कि तैस जुवाब न देइयथ। तैखन हिल्किय्याहेरू मट्ठू एलयाकीम ज़ै राज़ेरे घरानेरे कम्मे पुड़ अधिकारी थियो, ते शेबना ज़ै मंत्री थियो, ते आसापेरू मट्ठू योआह ज़ै इतिहास लिखने बालो थियो, दुख बांदो केरनेरे लेई अपना लिगड़ां छ़िंदां, हिजकिय्याह कां गेइतां रबशाकेरी गल्‍लां शुनाई।
Source notes (2)
- Footnote नहुशतान इसेरो मतलब कांस्य ते सप्पे।
- Cross-reference गिन. 21:9.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.