Bhadrawahi Bible
1 शमूएल 29
पलिश्ती लोक दाऊदे रद केरतन
पलिश्ती लोकेईं अपनि सारी सेना अपेक नगरे मां अकोट्ठी की; ते इस्राएली लोकेईं यिज्रेल पैनेरे1 नागे कां डेरे लेवरे थिये। तैखन पलिश्ती केरे राज़े अपने-अपने शौव ते हज़ारां सिपेहिन सने अग्रोवं च़ले जे, ते सेना पत्ती-पत्ती आकीश राज़े सेइं साथी दाऊद ते तैसेरी सेना भी च़ली। तैखन बाकी पलिश्ती सेनापतिएईं पुछ़ू, “एन इब्रानी लोकां केरू इड़ी कुन कम्मे?” आकीशे पलिश्ती सेनापतिन सेइं ज़ोवं, “कुन तै इस्राएलेरो राज़ो शाऊलेरो सिपाही दाऊद नईं, ज़ै बड़े वक्तेरो देंतो मीं सेइं साथी रहते, ते ज़ेइसेरो देंतो तै शाऊले करां नशोरोए, तैखन करां अज़ तगर मीं तैस मां कोई बुराई नईं मैल्होरी।” पन पलिश्ती सेनापति आकीशे जो सेरकोए; ते तैस सेइं ज़ोरे सेइं ज़ोवं, “तैस मड़दे वापस भेज़, कि तै तैस जगाई पुड़ गाए ज़ै तीं तैसेरे लेई रख्खोरीए; तै असन साथी जंगी मां न एज्जी बटेलो, कोन्च एरू न भोए कि तै जंगी मां इश्शो मुखालफ बेनि गाए। फिरी कुन तै अपने मालिक शाऊले सेइं सिपेही केरि क्रोड़ी केटतां न मिलेलो? कुन ई तैए दाऊद नईं, ज़ेसेरे बारे मां इस्राएली कौन्शां नच़ती ते गीतां ज़ोती एक्की होरि सेइं ज़ोती थी,
‘शाऊले हज़ारेईं दुश्मन,
पन दाऊदे लखेइं दुश्मन मारोरेन?’”
तैखन आकीश राज़े दाऊद कुजेइतां तैस सेइं ज़ोवं, “यहोवारे ज़िन्दगरी कसम तू त सिद्धो आस, ते सेनाई मां तेरू मीं साथी एजनू गानू भी मीं रोड़ू लगते; किजोकि ज़ेइसेरो देंतो तू मीं कां एवरोस तेइसेरो देंतो अज़ तगर मीं त तीं मां कोई बुराई न मैल्ही। फिर भी बाकी राज़े तीं न चान। एल्हेरेलेइ हुनी तू सुखे सेइं वापस गा; एरू न भोए कि पलिश्ती प्रधान तीं सेइं नाराज़ भोन।” दाऊदे आकीशे सेइं ज़ोवं, “मीं कुन कियोरूए? ते ज़ेइसेरो देंतो अवं तीं कां एवरोईं तेइसेरो देंतो अज़ तगर तीं अपने सेवके मां कुन मैल्होरूए कि अवं अपने मालिक राज़ेरे दुश्मन्न सेइं लेड़ी न बटेलो?” आकीशे दाऊदे जुवाब देइतां ज़ोवं, “हाँ, ई मीं पतोए, तू मेरी नज़री मां त परमेशरेरे भेज़ोरे मैन्हु केरे ज़ेरो बेकसूर लगतस; फिरी भी बाकी पलिश्ती राज़ेईं ज़ोवरूए, ‘तै असन सेइं साथी जंगी मां न गेइ बटेलो।’ एल्हेरेलेइ हुनी तू अपने मालिकेरे सेवकन ज़ैना तीं सेइं साथी एवरेन नेइतां झ़ेझ़ां सुबेले उठ; ते लौ भोंते च़लो गेइयां।” एल्हेरेलेइ दाऊद अपने सेना सने झ़ेझ़ां उठतां पलिश्ती केरे मुल्खे जो वापस जेव। ते पलिश्ती सेना यिज्रेले पुड़ हमलो केरने जेई।
Source notes (1)
- Footnote यिज्रेल पैनेरे यिज्रेल वैदी
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.