Bhadrawahi Bible
1 शमूएल 28
किछ वक्तेरां बाद पलिश्तेईं इस्राएले सेइं लड़नेरे लेई अपनि सेना अकोट्ठी की तैखन आकीश राज़े दाऊदे सेइं ज़ोवं, “ई गल तू ज़रूर ज़ान कि तीं अपने सेना समेत मीं सेइं साथी जंगी मां गानू भोल्हु।” दाऊदे आकीशे सेइं ज़ोवं, “एस वजाई सेइं तू सेमझ़ी गालो कि तेरो दास कुन केरेलो।” आकीशे दाऊदे सेइं ज़ोवं, “एल्हेरेलेइ अवं तीं अपनो रक्षा केरनेबालो ठहरालो।”
शाऊल ते भूत साधने बाली कौन्श
शमूएल त मेरि जेवरो थियो, ते सारे इस्राएली लोकेईं तैसेरे लेई अफ़सोस कियो, ते तै तैसेरे नगर रामाह मां दब्बो जेव। ते शाऊले जैदू टूनो केरनेबाले ते भूत साधने बाले मुल्खे मरां कढोरे थिये।
ज़ैखन पलिश्तेईं अकोट्ठे भोइतां शूनेम नगरे मां डेरे लाए, त शाऊले सारे इस्राएली अकोट्ठे किये, ते तैनेईं गिलबो पहाड़े पुड़ डेरे लाए। पलिश्ती केरि सेना लेहितां शाऊल डेरि जेव, ते तैसेरो दिल डेरतां बड़ो धड़कने लगो। ते ज़ैखन शाऊले यहोवा पुछ़ू, तैखन यहोवाए सुपनेरे ज़िरिये तैस जुवाब दित्तो, ते न ऊरीमेरे ज़िरिये, ते न नेबी केरे ज़िरिये। तैखन शाऊले अपने अधिकैरन सेइं ज़ोवं, “मेरे लेई कोन्ची भूत साधने बाली कौन्श तोप्पा, कि अवं तैस कां गेइतां तैस पुछ़ी।” तैसेरे नौकरेईं तैस सेइं ज़ोवं, “एनदोर नगरे मां अक भूत साधने बाली कौन्श रहतीए।”
तैखन शाऊले अपनु रूप बदलू, ते होरां लिगड़ां लां, ते दूई मैन्हु साथी नेइतां, रातो-रात च़ेलतां तैस कौन्शी कां गेइतां तैस सेइं ज़ोवं, “अपने भूत साधने सेइं मेरे लेई पुछ़, ते ज़ेसेरू नवं अवं ज़ोइलो तैस कुजा।” कौन्शां तैस सेइं ज़ोवं, “तू ज़ानस कि शाऊल राज़े कुन कियोरूए, कि तैनी जैदू टूनो केरनेबाले ते भूत साधने बाले मुल्खे मरां कढोरेन। फिरी तू मेरे प्राणा केरे लेई किजो फंदो लातस कि मीं मारास।” शाऊले यहोवारी कसम खेइतां तैस सेइं ज़ोवं, “यहोवारे ज़िन्दगरी कसम, एस गल्लरे वजाई सेइं सज़ाह न मैल्हेली।” तैखन कौन्शां पुछ़ू, “अवं तेरे लेई कैस कुजेई?” तैनी जुवाब दित्तो, “शमूएले मेरे लेई कुजा।” ज़ैखन कौन्शां शमूएल लाव, तैखन ज़ोरे सेइं तैसां चिन्डां मैरी; ते शाऊले सेइं ज़ोवं, “तीं मीं किजो धोखो दित्तो? तू त शाऊलस।” राज़े तैस सेइं ज़ोवं, “न डर; तीं कुन लेइहोते?” कौन्शां शाऊले सेइं ज़ोवं, “मीं अक देबतो धरती मरां निस्तो लेइहोते।” तैनी तैस पुछ़ू, “तैसेरू केरहु ज़ेरू रूपे?” तैसां ज़ोवं, “अक बुढो मड़द चोगो पलेटतां उबरो एइते।” तैखन शाऊले पक्कू याकीन भोवं कि तै शमूएले, ते क्रोड़रे भारे ज़मीनी पुड़ झुकतां मथ्थो टेको।
शमूएले शाऊले पुछ़ू, “तीं अवं बह कुजेइतां किजो परेशान कियो?” शाऊले जुवाब दित्तो, “अवं बड़े मुसीबती मां फसोरोइं; किजोकि पलिश्ती मीं सेइं लड़ाई केरनेबालेन, परमेशरे अवं शारोरोईं, ते हुनी मीं न त नेबी केरे ज़िरिये जुवाब मैल्हे, ते न सुपने मां; एल्हेरेलेइ मीं तू कुजव कि तू मीं सेइं ज़ोस कि अवं कुन केरीं।” शमूएले ज़ोवं, “ज़ैखन यहोवा तीं छ़ेडतां तेरो दुश्मन बेनि जेवं, तैखन तू मीं करां किजो पुछ़तस? यहोवा त ज़ेन्च़रे मीं करां ज़ुवावरू थियूं तेरहो तैनी बर्ताव कियोरोए; तैनी तेरे हथ्थे मरां हुकूमत थुसोड़तां दाऊदे जो दित्तोरीए। तीं ज़ै यहोवारी गल न मन्नी, ते अमालेकी लोकन पुड़ तैसेरे भड़कोरे क्रोधेरे मुताबिक सज़ाह न थी दित्तोरी, एस वजाई सेइं यहोवा तीं सेइं अज़ एरहो बर्ताव कियो। फिरी यहोवा इस्राएली लोकन समेत तीं पलिश्ती लोकां केरे हथ्थे मां छ़डेलो; ते तू अपने मट्ठन समेत कालां मीं साथी भोल्हो; ते इस्राएली सेना भी यहोवा पलिश्ती केरे हथ्थे मां छ़डेलो।”
तैखन शाऊल अकदम तुत्तरेरे भारे ज़मीनी पुड़ झुकी जेव, ते शमूएलेरे गल्लां केरे वजाई सेइं बड़ो डेरि जेव; तैनी पूरे दिहाड़ी ते राती रोट्टी न खाइ, एस सेइं तैस मां ज़ोर किछ भी न राव। तैखन तै जैदूगिर कौन्श शाऊले कां जेई, ते तैस खूब हैरान परेशान हेरतां तैस सेइं ज़ोवं, “शुन, तेरी दैसां त तेरी गल मन्नी; ते मीं अपनि जान खतरे मां छ़ेडतां तेरी गल्लां शुनी ज़ैना तीं मीं सेइं ज़ोई। त हुनी तू भी अपनि दैसरी गल मन; ते अवं तीं खाने जो रोट्टी देतीं; तू तैस खा, कि ज़ैखन तू अपने बत्तां गास तैखन तीं मां हिम्मत एज्जी गाए।” तैनी इन्कार केरतां ज़ोवं, “अवं न खेइलो” पन तैसेरे दास ते कौन्शां मिलतां इड़ी तगर तै मजबूर कि तै तैन केरि गल्लां मेनतां खड़ो उठतां खट्टी पुड़ बिश्शो। तैस कौन्शरे घरे मां त अक निगर बछ़ड़ू थियूं, तैसां लूश केरतां तैन मारू, फिरी अट्टू नेइतां सन्नू, ते बगैर खमीरे रोट्टी बनेइतां शाऊल ते तैसेरे दासन खाने जो दित्ती; ते तैनेईं खई। तैखन तैना उठतां तैस्से राती निस्तां च़ले जे।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.