Bhadrawahi Bible
1 शमूएल 30
दाऊदेरी अमालेकी लोकन सेइं लड़ाई
ट्लेइयोवं दिहाड़े ज़ैखन दाऊद अपने सेना सने सिकलग नगरे मां पुज़्ज़ो, तैखन तैनेईं हेरू, कि तैन केरे एजने करां पेइले अमालेकी लोकेईं यहूदा प्रदेशेरे दक्षिण ते सिकलग नगरे पुड़ हमलो कियो। तैनेईं तैन नगर बरबाद कियूं ते तैस अग लाई। तैनेईं कौन्शां निक्के-बड्डे सब बन्धी बनेइतां निये; तैनेईं तैन मरां कोई त न मारो, पन तैना नेइतां एपनी बत्तां च़ले। ज़ैखन दाऊद अपने सेना समेत सिकलग नगरे मां पुज़्ज़ो, तैखन नगर त फुकोई जेवरू थियूं, ते कौन्शां ते बच्चे बन्धी बनेइतां घिन्नी जेवरे थिये। तैखन दाऊद ते ज़ैना सिपाही तैस सेइं साथी थिये तैनेईं चिन्डां मैरतां एत्री लेरां दित्ती, कि फिरी तैन मां लेरां देनेरे लेई हिम्मत न राई। दाऊदेरी दूईये कौन्शां, यिज्रेल नगरेरी अहीनोअम, ते अबीगैल ज़ै पेइली कर्मेली नाबालेरी कौन्श थी, बन्धी बेनि जेवरी थी। ते दाऊद बड़े मुसीबती मां पेई जेव; किजोकि सिपाही अपने मट्ठां-कुइयां केरे वजाई सेइं बड़े परेशान भोइतां तैस पुड़ घोड़ेईं बानेरी एप्पु मांमेइं चर्चा केरि राहोरे थिये। पन दाऊदे अपने परमेशर यहोवा याद केरतां हिम्मत की।
तैखन दाऊदे अहीमेलेकेरे मट्ठे एब्यातार याजके सेइं ज़ोवं, “एपोदे मीं कां आन।” तैखन एब्यातारे एपोद दाऊदे कां आनू। ते दाऊदे यहोवा पुछ़ू, “कुन अवं एन लोकां केरो पीछो केरीं? कुन तैस गेइतां ट्लेइं?” यहोवा जुवाब दित्तो, “पीछो केर; किजोकि तू ज़रूर तैस ट्लालो, ते सब बन्धी छुटेइतां आनेलो;” तैखन दाऊद अपने 600 सिपाही साथी नेइतां बसोर नाले तगर पुज़्ज़ो; किछ सिपाही रुके। दाऊद त 400 सिपेहिन समेत पीछो केरतां च़लो जेव; पन 200 ज़ैना थेकी जेवरे थिये, ते बसोर नाले पार न गेइ सखे ते तैट्ठी राए।
तैन अक मिस्री मैन्हु मैइदाने मां मैल्हो, तैनेईं दाऊदे कां नेइतां तैस रोट्टी दित्ती; ते तैनी तै खाई, फिरी तैस पानी पीने जो दित्तू, फिरी तैनेईं तैस अंजीरां केरे टिक्की केरो अक टुक्ड़ो ते दूई गुच्छे किशमिश दित्ती। ते ज़ैखन तैनी खावं, तैखन तैसेरे जानी मां जान अई; तैनी ट्लाई दिहाड़े ते ट्लाई रात न त रोट्टी खेवरी थी ते न पानी पीयोरू थियूं। तैखन दाऊदे तैस पुछ़ू, “तू केसेरो सेवक आस? ते कोड़ि रहतस?” तैनी जुवाब दित्तो, “अवं त मिस्री ते अक अमालेकी मैन्हेरो सेवकाई; ते ट्लाई दिहाड़े भोए कि अवं बिमार आईं, ते मेरो मालिक मीं शैरतां च़लो जेवरोए। असेईं लोकेईं करेती लोकां केरे दक्षिण पासे, ते यहूदारे प्रदेशे मां, ते कालेबेरे दक्षिण प्रदेशेरे पासे हमलो कियोरोए; ते सिकलग नगर अग लेइतां फुकोरूए।” दाऊदे तैस पुछ़ू, “कुन तू मीं तैस जथे कां पुज़ालो?” तैनी ज़ोवं, “मीं सेइं परमेशरेरी ई कसम खा, कि तू मीं जाना त न मारेलो, ते न मेरे मालिकेरे हथ्थे देलो, तैखन अवं तीं तैस जथे कां पुज़ालो।”
ज़ैखन तैनी तै पुज़व, तैखन हेरने मां अऊं कि तैना सारे ज़मीनी पुड़ फैलोरेन ते खाते पीते, ते तैस बड़ी लूटरे वजाई सेइं, ज़ै तैनेईं पलिश्ती केरे मुल्खेरां ते यहूदा प्रदेशे मरां आनोरी थी, नच़ते जशन मनाने लगोरे थिये। एल्हेरेलेइ दाऊद तैन रातरे पेइले पहरे करां लेइतां दूइयोवं दिहाड़ेरे ड्लवझ़ी तगर मारतो राव; तैनेईं सारे लोक मारे, सिर्फ 400 सिपाही ज़ैना ऊँटन पुड़ च़ेढ़तां नश्शोरे थिये, तैना बंच़े। ते ज़ैन किछ अमालेकी लोकेईं नियेरू थियूं तैन सारू दाऊदे छुटावं; ते दाऊदे अपनि दूईये कौन्शां भी छुटेई। पन तैन केरे कुन निकड़े, कुन बड्डे, कुन मट्ठां, कुन कुइयां, कुन लूटरो माल, सब किछ ज़ैन अमालेकी लोकेईं नियोरू थियूं, तैस मरां कोई चीज़ न राई ज़ै तैनेईं न छुटेवरी भोए; किजोकि दाऊदे सब किछ वापस आनोरू थियूं। ते दाऊदे सैरी भैड्डां-छ़ेल्ली, ते बेछ़ी-दांत भी लुटतां ऐनी; ते एन सिपाही इन ज़ोते अपने जानबरां केरे अग्गर च़लते जे, कि इन दाऊदेरू लुटेरूए।
तैखन दाऊद तैन 200 सिपेहिन कां अव, ज़ैना एरे थकोरे थिये कि दाऊदे पत्ती-पत्ती न गेइ सखे, ते बसोर नाले कां शारोरे थिये; ते तैना दाऊदे सेइं ते तैन सेइं मिलने च़ले; ते दाऊदे तैन कां पुज़तां तैन केरो हाल पुछ़ो। पन तैन लोकन मरां ज़ैना दाऊदे सेइं साथी जेवरे थिये सारे दुष्ट ते घटिया लोकेईं ज़ोवं, “इना मैन्हु असन सेइं साथी नईं एवरे, एस वजाई सेइं अस तैन अपने छुटेवरे ते लूटरे माले मरां किछ न देले, सिर्फ एक्की-एक्की मैन्हु तैसेरी कौन्श ते बाल बच्चे देमेले, कि तैना नेइतां च़ले गान।” पन दाऊदे ज़ोवं, “हे मेरे ढ्लाव, तुस तैस माले सेइं ज़ै यहोवा असन दित्तोरोए एन न केरि सकत; ते तैनी इश्शी हिफाज़त की, ते तैस टोली ज़ैसां असन पुड़ हमलो कियोरो थियो इश्शे हथ्थे मां कियोरीए। ते इस बारे मां तुश्शी कौन शुनेलो? लड़ैई मां गाने बालां केरो ज़ेरो हिस्सो भोल्हो, सामाने कां बिशने बालां केरो भी तेरहो हिस्सो भोल्हो।” ते दाऊदे इस्राएली केरे लेई एरहो तरीको ते नियम ठहराव, ते तै तैस दिहाड़े करां लेइतां अज़्ज़ेरे दिहाड़े तगर बनोरोए।
सिकलग नगरे मां पुज़तां दाऊदे यहूदी बुज़ुर्ग लोकन कां ज़ैना तैसेरे दोस्त थिये लूटरे माले मरां तैन जो किछ-किछ सामान भेज़ू, ते ई भी सन्देश भेज़ो, “यहोवारे दुश्मना केरि लूटरे माले मरां तुश्शे लेई इना तोफेन।” दाऊदे इन नगरां केरे बुज़ुर्गन जो लूटरो माल भेज़ो, बेतेलेरे दक्षिण मुल्खेरे रामोत, यत्तीर, अरोएर, सिपमोत, एश्तमो, राकाल, यरहमेली लोकां केरे नगर, केनी लोकां केरे नगर, होर्मा, कोराशान, अताक, हेब्रोन मतलब ज़ेत्रे ठारन मां दाऊद अपने सिपेहिन समेत फिरां केरतो थियो, तैन सेभी केरे सियानन कांजो तैनी किछ-किछ सामान भेज़ू।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.