Bhadrawahi Bible
1 शमूएल 25
शमूएलेरी मौत
शमूएल मेरि जेव; ते सारे इस्राएली लोक अकोट्ठे भोइतां तैसेरे लेई छाती पिटने लगे, ते तैसेरे घरे मां ज़ैन रामाह नगरे मां1 थियूं तै दब्बो जेव। तैखन दाऊद उठतां पारान सुनसान ठैरी जो च़लो जेव। माओन नगरे मां अक मैन्हु रहतो थियो ज़ेसेरो कारोबार कर्मेल नगरे मां थियो। ते तै मैन्हु बड़ो धनी थियो, ते तैस कां 3000 भैड्डां, ते 1000 छ़ेल्ली थी; ते तै एपनी भैड्डां केरि उन्ना बरधांने लगोरो थियो। तैस मैन्हेरू नवं नाबाल थियूं, ते तैसेरी कौन्शरू नवं अबीगैल थियूं। अबीगैल त अक्लमन्द ते बड़ी खूबसूरत थी, पन नाबाल सखत, ते बुरां-बुरां कम्मां केरनेबालो थियो; तै कालेबेरे खानदाने मरां थियो। ज़ैखन दाऊदे सुनसान ठारी मां खबर मैल्ही, कि नाबाल एपनी भैड्डां केरि उन्ना बरधांने लगोरोए; तैखन दाऊदे दश जुवान तैड़ी भेज़े, ते दाऊदे तैन जुवानन सेइं ज़ोवं, “कर्मेले मां नाबाले कां गेइतां मेरी तरफां तैस सेइं तैसेरो हाल चाल पुछ़ा। ते तैस सेइं इन ज़ोथ, ‘तेरी उमर लम्मी भोए, तेरू भलू भोए, ते तेरू टब्बर सुखे सेइं राए, ते ज़ैन किछ तेरूए तैन सुखे सेइं राए। मीं शुनेरूए, कि ज़ैना तू उन्ना बरधांने लगोरोस; तेरे पुहाल असन लोकन कां राए, ते न त असेईं तैन केरो किछ नुकसान कियो, ते न तैन केरू किछ हिरावं। अपने पुहालन करां ऐह गल पुछ़, ते तैना तीं सेइं ज़ोले। आखरी एन जुवानन पुड़ तेरे दयारी नज़र भोए; अस त आनन्देरे मौके एवरेम, एल्हेरेलेइ महरबानी केरतां ज़ैन किछ तेरे हथ्थे मांए तैन अपने दासन ते दाऊदे जो दे ज़ैन तेरे मट्ठेरू ज़ेरूए।’”
दाऊदेरे जुवान गेइतां एना गल्लां तैसेरे तरफां नाबाले शुनेइतां तैसेरे जुवाबेरो इंतज़ार केरने लगे। नाबाले दाऊदेरे जुवानन जुवाब दित्तो, “दाऊद कौने? यिशैरू मट्ठू कौने? अज़ काल बड़े दास अपने-अपने मालिके करां नेश्शी गातन। कुन अवं अपनि रोट्टी-पानी ते ज़ैना जानबर मीं अपने बरधांने बालां केरे लेई मारोरेन नेइतां एरे लोकन देईं, ज़ैन अवं न ज़ैनी कि तैन केरू घर कोड़िए?” तैखन दाऊदेरे जुवान वापस एइतां इना सब गल्लां ज़ेरि तैने ज़ोवरी थी दाऊदे शुनेई। इना गल्लां शुन्तां दाऊदे अपने सिपेहिन सेइं ज़ोवं, “अपनि-अपनि तलवार बन्धा।” तैखन तैनेईं अपनि-अपनि तलवार बन्धी; ते दाऊदे भी अपनि तलवार बन्धी; ते लगभग 400 सिपाही दाऊदे पत्ती-पत्ती च़ले, ते 200 सिपाही सामाने राए।
पन नाबालेरे एक्की सेवके तैसेरी लैड़ी अबीगैल सेइं ज़ोवं, “दाऊदे सुनसान ठैरी मरां इश्शे मालिके आशिर्वाद देनेरे लेई दूत भेज़ोरे थिये; ते तैनी तैन केरि बेइज़्ज़ती की। पन तैना मैन्हु असन सेइं बड़ो रोड़ो बर्ताव रखते थिये, ते ज़ांतगर अस मैइदाने मां रहते ते तैन कां एंइते गांते रहते थिये, तांतगर न त इश्शो किछ नुकसान भोव, ते न इश्शू किछ हेरोवं; ज़ैखन तगर अस तैन सेइं साथी भैड्डां-छ़ेल्ली च़ारते राए, तैखन तगर तैना रात दिहाड़ी इश्शी हिफाज़त केरते राए। एल्हेरेलेइ हुनी सोच विचार कियोरो लोड़े; किजोकि तैनेईं इश्शे मालिकेरो ते तैसेरे सारे टब्बरेरो नुकसान केरनेरे लेई थापेरू भोल्हु, इश्शो मालिक त एरहो दुष्टे कि तैस सेइं कोई गल भी न केरि सखे।”
तैखन अबीगैलां लूशी 200 रोट्टी, ते दूई मसकां दाछ़रो रस, ते पंच़ भैड्डां केरू मास, ते लगभग 17 किल्लो अन्नेरी किछ ट्लोड़ोरी चीज़ां, ते 100 गुच्छे किशमिश, ते अंजीरेरी 200 टिकी नेइतां गधन पुड़ लदेई। ते अबीगैलां अपने सेवकन सेइं ज़ोवं, “तुस मीं अग्री-अग्री च़ला, अवं तुसन पत्ती-पत्ती एइतीं।” पन तै कुन केरने लगोरीए तैसां अपने मुन्शे नाबाले सेइं किछ न ज़ोवं। तै गधे पुड़ च़ैढ़तां पहाड़ेरी आड़ी मां ओसने लगोरी थी, ते दाऊद अपने जुवानन समेत तैसेरे सामने उतरी राहोरो थियो; ते तै तैन मैल्ही। दाऊदे त सोचोरू थियूं, “मीं त सुनसान ठैरी मां तैसेरे सारे मालेरी एरी हिफाज़त की कि तैसेरू किछ भी न हेरोवं, इन बेकार भोवं; किजोकि तैनी भलियाई केरनेरे बदले मीं सेइं बुराई कियोरीए। अगर झ़ेझ़ां लौ भोने तगर तैसेरे घराने मरां अक मट्ठू भी अवं ज़ींतू छ़ेडी, त परमेशर मीं सखते करां सखत सज़ाह दे।”
दाऊदे हेरतां अबीगैल जल्दी गधे पुड़ेरां ओस्सी, ते दाऊदेरे सामने तुत्तरेरे भारे ज़मीनी पुड़ झुकतां मथ्थो टेको। फिरी तै तैसेरे पव्वन पुड़ झुकतां ज़ोने लगी, “हे मेरे मालिक, ज़ै पाप मेरे मुन्शे कियो तैसेरी ज़िमेवारी अवं केरतीं; तेरी दासी तीं सेइं किछ ज़ोनू चातीए, ते तू एपनी दैसरी गल्लां शुन। मेरो मालिक तैस दुष्ट नाबाले पुड़ ध्यान न दे; किजोकि ज़ेरू तैसेरू नंव्वे तेरहो तै एप्पु भी आहे। तैसेरू नवं नाबाले, ते सच़्च़े तैस मां बेवकूफी आहे; पन मीं तेरी दैसां अपने मालिकेरे जुवान ज़ैना तीं भेज़ोरे थिये न थिये लेवरे। ते हुनी, हे मेरे मालिक, यहोवारे ज़िन्दगरी कसम ते तेरे ज़िन्दगरी कसम, कि यहोवाए ज़ैनी तू खून केरने ते अपने हथ्थेरे ज़िरिये अपनो बदलो नेने करां रोकतां रखोरोस, एल्हेरेलेइ हुनी तेरे दुश्मन ते मेरे मालिकेरो नुकसान चानेबाले नाबालेरे ज़ेरे भोन। ते हुनी ई तोफो ज़ै तेरे दैसां अपने मालिके कां आनोरोए, तैन जुवानन दित्तो गाए ज़ैना मेरे मालिके सेइं साथी च़लतन। एपनी दैसरो पाप माफ़ केर; किजोकि यहोवा ज़रूर मेरे मालिकेरू घर बसालो ते मज़बूत केरेलो, एल्हेरेलेइ कि मेरो मालिक यहोवारे तरफां लड़ते; ते ज़िन्दगी भर तीं मां कोई बुराई न मैल्हेली। ते अगर कोई मैन्हु तेरो पीछो केरने ते तीं मारनेरे लेई खड़ो भोवरोए, फिरी भी मेरे मालिकेरी जानरी हिफाज़त तेरो परमेशर यहोवा केरेलो, ज़ेन्च़रे कोई खज़ाने सुमैलतां रखते ते तेरे दुश्मना केरे प्राण एन्च़रे नाश केरेलो ज़ेन्च़रे कोई छ़िंगलोटे मां रेखतां घोड़ शारते। एल्हेरेलेइ ज़ैखन यहोवा मेरे मालिकेरे लेई ई सारी भलियाई केरेलो ज़ै तैनी तेरे बारे मां ज़ोवरीए, ते तीं इस्राएले पुड़ प्रधान ठहरालो, तैखन तीं एस वजाई सेइं पसतानू न पेलू, या मेरे मालिकेरो दिल दुखी न भोल्हो कि तीं बगैर वजां खून कियो, ते मेरे मालिके अपनो बदलो एप्पु नियो। फिरी ज़ैखन यहोवा मेरे मालिके सेइं भलियाई केरे तैखन अपने दैसी याद केरां।”
तैखन दाऊदे अबीगैली सेइं ज़ोवं, “इस्राएलेरो परमेशर यहोवारी तारीफ़ भोए, ज़ैनी अज़्ज़ेरे दिहाड़े मीं सेइं मिलनेरे लेई तू भेज़ी। ते तेरी समझ़रे लेई परमेशरेरी तारीफ़ भोए, कि तीं अवं अज़्ज़ेरे दिहाड़े खून केरने ते अपनो बदलो एप्पु नेने करां रोकतां रख्खो। किजोकि सच़्च़े इस्राएलेरो परमेशर यहोवा, ज़ैनी अवं तेरो नुकसान केरने करां रोको, तैसेरी कसम, अगर तू लूश केरतां मीं सेइं मिलने न भोथी एवरी, त इस मां कोई शक नईं झ़ेझ़ां लौ भोने तगर नाबालेरू कोई मट्ठू न थियूं बच़नू।” तैखन दाऊदे तैसेरी भेंट कबूल की, ज़ैन तैसां आनोरू थियूं; फिरी तैनी तैस सेइं ज़ोवं, “सुखे सेइं अपने घरे जो गा; शुन, मीं तेरी गल मन्नोरीए ते तेरी बिनती कबूल कियोरीए।”
तैखन अबीगैल नाबाले कांजो वापस जेई; ते कुन हेरतीए, कि तै घरे राज़ेरो ज़ेरो धाम खेइ राहोरोए। ते नाबालेरो दिले मघन भोवरोए, ते तै नशे मां मसत भोइ जेवरोए; एल्हेरेलेइ झ़ेझ़री लौ भोने करां पेइलू तैसां तैस सेइं दाऊदेरे बारे मां किछ भी न ज़ोवं। होरसां झ़ेझ़ां ज़ैखन नाबालेरो नशो उतरी जेव, तैखन तैसेरी कौन्शां तैस सेइं सब किछ ज़ोवं, तैखन नाबाले दिलेरो दौरो पेव, ते तै बेहोश भोइतां घोड़ेरो ज़ेरो भोइ जेव। ते दश दिहाड़ां केरे बाद यहोवा नाबाल मारो।
नाबालेरो मरनेरो हाल शुन्तां दाऊदे ज़ोवं, “यहोवारी तारीफ़ भोए ज़ैनी नाबाले सेइं मेरी बेइज़्ज़तरो मुकदमो लेड़तां अपनो दास बुरैई करां रोकतां रख्खो; ते यहोवा नाबालेरी बुराई तैसेरे दोग्गे पुड़ छ़डी।” तैखन दाऊदे लोक अबीगैली कां एल्हेरेलेइ भेज़े कि तैस सेइं ड्लाह बनानेरी गल-बात केरन। ते ज़ैखन दाऊदेरे दास कर्मेले मां अबीगैल कां पुज़्ज़े, तैखन तैस सेइं ज़ोने लगे, “दाऊदे अस तीं कां एल्हेरेलेइ भेज़ोरेम कि तू तैसेरी लाड़ी बनस।” तैखन तै उठी, ते तुत्तरेरे भारे ज़मीनी पुड़ झुकतां ज़ोवं, “तेरी दासी अपने मालिकेरे दासां केरे पव धोनेरे लेई दासी बने।” तैखन अबीगैल लूशी उठी, ते गधे पुड़ च़ढ़ी, ते तैसारी पंच़ दैसी तैस पत्ती-पत्ती च़ेलि; ते तैना दाऊदेरे भेज़ोरे दूतन पत्ती-पत्ती जेई; ते तैसेरी लाड़ी भोइ जेई।
ते दाऊदे यिज्रेल नगरेरी अहीनोअमी सेइं भी ड्लाह बनावरो थियो, त तैना दूईये तैसेरी लैड़ी भोइ जेई। पन शाऊले अपनि कुई दाऊदेरी लाड़ी मीकल लैशरे मट्ठे गल्लीम नगरेरे रानेबाले पलती जो ड्लेइतां दित्तोरी थी।
Source notes (1)
- Footnote रामाह नगरे मां या तैसेरे घरेरे बागी मां। (2 राज़. 21:18)
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.