Bhadrawahi Bible
1 शमूएल 24
दाऊद शाऊले न मारे
ज़ैखन शाऊल पलिश्ती लोकन सेइं लड़ाई केरतां वापस अव, तैखन तैस ई खबर मैल्ही, कि दाऊद एनगदी नंव्वेरे सुनसान ठैरी मांए। तैखन शाऊले सारे इस्राएलन मरां 3000 माहिर सिपाही तैलतां दाऊद ते तैसेरे सैथन जंगली थाव्वां केरि शफड़न मां तोप्पने जेव। ज़ैखन तै बत्ती मरां भैड्डां केरे बाड़े कां नेड़े पुज़्ज़ो। तैड़ी अक कुढ थी, तैखन शाऊल तैस कुढी मां बड़े अन्तर बेइरोवं बिशने मां जेव। ते तैस्से कुढरे कूने पुड़ दाऊद ते तैसेरे सिपाही छ़पोरे थिये। तैखन दाऊदेरे सिपैहेईं शाऊल लेइतां बल्हे सेइं ज़ोवं, “शुन, अज़ तैए दिहाड़ीए ज़ैसारे बारे मां यहोवा तीं सेइं ज़ोवरू थियूं अवं तेरे दुश्मने तेरे हथ्थे मां केरेलो कि तू तैस सेइं अपनि मेर्ज़रे मुताबिक बर्ताव केरस।” तैखन दाऊदे उठतां शाऊलेरे चोगेरो कूनेरो अक निकड़ो टुक्ड़ो छ़ेपतां कट्टो। एसेरे बाद दाऊदे शाऊलेरे चोगेरो कूनो कटने करां पशतावं। तै अपने सिपेहिन सेइं ज़ोने लगो, “यहोवा न केरे कि अवं अपने मालिके सेइं ज़ेसेरू अभिषेक यहोवारे तरफां भोवरूए एरू कम केरीं, कि तैस पुड़ अपनो हथ खड़ो केरीं, किजोकि तैसेरू अभिषेक यहोवा कियोरूए।” एरी गल्लां ज़ोइतां दाऊदे अपने सैथन समझ़ावं ते तैन्न शाऊले पुड़ हमलो केरने न दित्तो। फिरी शाऊल उठतां कुढी मरां निस्सो ते अपने बत्तां च़लो जेव।
तैसेरां पत्ती दाऊद भी उठतां कुढी मरां निस्सो ते शाऊले जो पुतोरां हक देइतां ज़ोवं, “हे मेरे मालिक, हे राज़ा।” ज़ैखन शाऊले पत्रोवं फिरतां तक्कू, तैखन दाऊदे ज़मीनी पुड़ क्रोड़ी झुकेइतां मथ्थो टेको। ते दाऊदे शाऊले सेइं ज़ोवं, “ज़ैना मैन्हु ज़ोतन, कि दाऊद तेरो नुकसान चाते तैन केरि तू किजो शुन्तस? हेर, अज़ तीं अपनि एछ़्छ़न सेइं हेरू कि यहोवा अज़ कुढी मां तू मेरे हथ्थे मां कियोरो थियो; ते किछेईं मेरे मैन्हेइं त मीं तीं मारनेरे लेई ज़ोवं, पन मीं तीं पुड़ दया अई; ते मीं ज़ोवं, ‘अवं अपने मालिके पुड़ हथ खड़ो न केरीं; किजोकि तै यहोवारो अभिषिक्ते।’ फिरी, हे मेरे बाजी, अपने चोगेरो अक कूनो मेरे हथ्थे मां हेर; मीं तेरे चोगेरो अक कूनो त कट्टो, पन तू न मारो; इन पक्कू ज़ान, कि मेरे मने मां कोई बुराई या गलत सोच नईं। मीं तेरे खलाफ कोई पाप नईं कियोरो, पन तू मीं मारनेरे लेई खड़ोस। यहोवा मेरो ते तेरो न्याय केरे, ते यहोवा तीं करां मेरो बदलो ने; पन मेरो हथ तीं पुड़ तेरो नुकसान केरनेरे लेई न उठेलो। पुराने वक्तेरी कहावतां केरे मुताबिक कि ‘बुराई बुरे लोकन करां भोतीए;’ पन मेरो हथ तीं पुड़ तेरो नुकसान केरनेरे लेई न उठेलो। इस्राएलेरो राज़ो केसेरो पीछो केरनेरे लेई निसोरोए? ते केस पत्ती पेवरोए? एक्की मरोरे कुतरे पत्ती! एक्की ट्लीव्वें पत्ती! एल्हेरेलेइ यहोवा न्यायी भोइतां मेरो ते तेरो न्याय केरे, ते विचार केरतां मेरो मुकदमो लड़े, ते न्याय केरतां मीं तेरे हथ्थे करां बच़ाए।”
ज़ैखन दाऊदे शाऊले सेइं इना गल्लां ज़ोई, तैखन शाऊले ज़ोवं, “हे मेरे मट्ठां दाऊद, कुन ई तेरी आवाज़े?” तैखन शाऊल ज़ोरे-ज़ोरे लेरां लगो देने। फिरी तैनी दाऊदे सेइं ज़ोवं, “तू मीं करां जादे धर्मीस; मीं त तीं सेइं बुराई कियोरीए, पन तीं मीं सेइं साथी भलियाई कियोरीए। ते तीं अज़ इन बांदू कियोरूए, कि तीं त मीं सेइं भलियाई कियोरीए, कि ज़ैखन यहोवा अवं तेरे हथ्थे मां दित्तोरो थियो, तैखन तीं अवं न मारो। भला! कुन कोई मैन्हु अपने दुश्मने मैलतां ज़ींतो छ़ेडतां भेज़ते? एल्हेरेलेइ ज़ैन तीं अज़ मीं सेइं कियूं, एसेरे बदले यहोवा तेरू भलू केरे। ते हुनी, मीं पतो लग्गो कि तू पक्को राज़ो बनेलो, ते इस्राएलेरी हुकूमत तेरे हथ्थे मां भोल्ही। हुनी मीं सेइं यहोवारी कसम खा, कि तू मेरे खानदाने मेरे बाद खतम न केरेलो, ते मेरे बाजी केरे घराने मरां मेरू नवं न मिटालो।” तैखन दाऊदे शाऊले सेइं एरी कसम खाइ। तैखन शाऊल अपने घरे जो जेव; ते दाऊद अपने सिपेहिन सेइं साथी अपने छ़पनेरे ठारन मांजो च़लो जेव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.