Bhadrawahi Bible
1 शमूएल 23
दाऊद कीला नगरेरी रक्षा केरते
एक्सां किछ लोकेईं दाऊदे सेइं ज़ोवं कि पलिश्ती सिपाही कीला नगरे सेइं लड़ाई केरि राहोरेन, ते खलाड़न मरां अन्न लूटी राहोरेन। तैखन दाऊदे यहोवा पुछ़ू, “कुन अवं गेइतां पलिश्तन मैरी?” यहोवा दाऊदे सेइं ज़ोवं, “गा, ते पलिश्ती लोकन मार ते कीला नगरे बच़ा।” पन दाऊदेरे सिपैहेईं तैस सेइं ज़ोवं, “अस त इस यहूदा प्रदेशे मां भी डेरतां रहतम, अगर अस कीला नगरे मां गेइतां पलिश्ती केरि सेनारो मुकाबलो केरम, त कुन अस होरे भी जादे न डरेले?” तैखन दाऊदे फिरी यहोवा पुछ़ू, ते यहोवा तैस ई जुवाब दित्तो: “हिम्मत केरतां कीला नगरे जो गा; किजोकि अवं पलिश्ती तेरे हथ्थे मां देलो।” एल्हेरेलेइ दाऊद अपने सिपेहिन साथी नेइतां कीला नगरे जो जेव, ते पलिश्तन सेइं लेड़तां बड़े पलिश्ती मारे, ते तैन केरे जानबर ट्लेइतां आने। एन्च़रे सेइं दाऊदे कीला नगरेरे रानेबाले बच़ाए।
ज़ैखन अहीमेलेकेरू मट्ठू एब्यातार दाऊदे कां कीला नगरे जो नश्शोरू थियूं, तैखन तैन हथ्थे मां एपोद नेइतां जेवरू थियूं।
तैखन शाऊले ई खबर मैल्ही कि दाऊद कीला नगरे जो जेवरोए। ते शाऊले ज़ोवं, “परमेशरे तै मेरे हथ्थे मां कियोरोए; तै त मज़बूत फाटक ते उच्ची दिवारन बाले नगरे मां गेइतां बन्द भोइ जेवरोए।” तैखन शाऊले अपनि सारी सेना लड़ाई केरनेरे लेई कुजाई, कि कीला नगरे मां गेइतां दाऊद ते तैसेरे सिपेहिन घेरन। तैखन दाऊदे समझ़ू कि शाऊल मेरो नुकसान केरनेरी योजना केरि राहोरो थियो; एल्हेरेलेइ तैनी एब्यातार याजके सेइं ज़ोवं, “एपोदे मीं कां आन।” तैखन दाऊदे प्राथना की, “हे इस्राएलेरे परमेशर यहोवा, तेरे दासे सच़्च़े शुनेरूए कि शाऊल मेरे वजाई सेइं कीला नगर नाश केरने एजनू चाते। कुन कीला नगरेरे लोक मीं तैसेरे कब्ज़े मां केरेले? कुन ज़ेन्च़रे तेरे दासे शुनेरूए, तेन्च़रे शाऊल एज्जेलो? हे इस्राएलेरे परमेशर यहोवा, अपने दासे इन ज़ो।” यहोवा ज़ोवं, “हाँ, तै एज्जेलो।” फिरी दाऊदे पुछ़ू, “कुन कीला नगरेरे लोक मीं ते मेरे सिपाही शाऊलेरे कब्ज़े मां केरेलो?” यहोवा जुवाब दित्तो, “हाँ, तैना केरेले।” तैखन दाऊद ते तैसेरे सिपाही ज़ैना लगभग 600 थिये, कीला नगरे मरां निस्सी जे, ते इरां-उरां होरे ज़ैड़ी कोन्च गेइ सखते थिये तैड़ी जे। ते ज़ैखन शाऊले ई खबर दित्ती जेई कि दाऊद कीला नगरे मरां निस्सी जेवरोए, तैखन तैनी तैड़ी गानेरो विचार छ़ेडी दित्तो।
दाऊद एनगदी एरे क़िलन मां
तैखन दाऊद जंगलेरे क़िलन मां राने लगो, ते पहाड़ी प्रदेशेरे जीप नंव्वेरे जंगले मां राव। ते शाऊल तैस रोज़ तोपतो राव, पन यहोवा तै तैसेरे हथ्थे मां न दित्तो एजने। ते दाऊदे समझ़ू कि शाऊल मीं मारनो चाते। ते दाऊद जीप नंव्वेरे सुनसान ठारारे होरेश1 नंव्वेरे ठारी मां थियो; पन शाऊलेरू मट्ठू योनातान उठतां तैस कां होरेशे मां जेव, ते तैस हिम्मत दित्ती कि परमेशर तेरी रक्षा केरेलो। योनाताने तैस सेइं ज़ोवं, “डर न; किजोकि तू मेरे बाजी शाऊलेरे हथ्थे मां न पेलो; ते तू इस्राएलेरो राज़ो भोल्हो, ते अवं तेरे अधीन भोल्हो; ते ऐह गल मेरो बाजी शाऊल भी ज़ानते।” तैखन तैन दूईयेईं यहोवारी कसम खेइतां एक्की होरि सेइं करार कियो; तैखन दाऊद होरेशे मां रुको, ते योनातान अपने घरे च़लो जेव।
तैखन जीप नगरेरे लोक गिबा नगरे मां शाऊले कां गेइतां ज़ोने लगे, “दाऊद त असन कां होरेशेरे क़िलन मांए, मतलब तैस हकीला नव्वेंरी पहैड़ी पुड़ छ़पोरो रहते, ज़ै यशीमोनेरे2 दक्षिणेरे पासे। एल्हेरेलेइ हुनी, हे राज़ा, ज़ैखन तू चातस तैखन एज्जी सकतस; ते तैस अस ट्लुवामेले” शाऊले ज़ोवं, “यहोवारी बरकत तुसन पुड़ भोए, किजोकि तुसेईं मीं पुड़ दया कियोरीए। तुस च़ेलतां हेजू भी पक्को पतो केरा; ते हेरजाच केरा, ते तैसेरे रानेरो पतो केरा कि तै तैड़ी केनि लाहोरोए; किजोकि केन्चे मीं सेइं ज़ोवरूए, कि तै बेड़ी च़लैकी सेइं कम केरते। एल्हेरेलेइ ज़ैड़ी कोन्च तै छ़पोरो रहते तैना सब ठारन हेरतां पिशाना, फिरी पक्को पतो केरतां मीं कां वापस एज्जा। ते अवं तुसन सेइं साथी च़लेलो, ते अगर तै तैस प्रदेशे मां कोन्च भी भोए, त अवं तैस यहूदारे हज़ारन मरां तोपतां कढेलो।”
तैखन तैना लोक च़ेलतां शाऊले करां पेइले जीप नगरे जो जे। पन दाऊद अपने लोकन समेत माओन नंव्वेरे सुनसान ठैरी मां च़ेलि जेवरो थियो, ज़ैन अराबा मां यशीमोनेरे दक्षिणेरे पासे। तैखन शाऊल अपने सिपेहिन साथी नेइतां तैसेरी तलाशी मां जेव। एसेरी खबर मैलतां दाऊद पहाड़े पुड़ेरां ओस्तां माओन सुनसान ठैरी मां राने लगो। इन शुन्तां शाऊले माओन सुनसान ठैरी मां दाऊदेरो पीछो कियो। शाऊल त पहाड़ेरे एक्की पासे, ते दाऊद अपने सिपेहिन समेत पहाड़ेरे होरि पासे गेइ राहोरो थियो; ते दाऊद शाऊले करां डेरतां लूशी गेइ राहोरो थियो; ते शाऊल अपने सिपेहिन समेत दाऊद ते तैसेरे जुवानन ट्लानेरे लेई घेरो देने चातो थियो, कि एक्की मैन्हे शाऊले कां एइतां ज़ोवं, “जल्दी एई; किजोकि पलिश्तेईं मुल्खे पुड़ हमलो कियोरोए।” इन शुन्तां शाऊल दाऊदेरो पीछो छ़ेडतां पलिश्ती केरो मुकाबलो केरनेरे लेई च़लो; एस वजाई सेइं तैस जगारू नवं सेलाहम्म-हलकोत3 पेवं। तैट्ठां दाऊद च़लो जेव ते एनगदी4 क़िलन मां राने लगो।
Source notes (4)
- Footnote होरेश या होरेश नगरे मां
- Footnote यशीमोन इस जो यहूदारी सुनसान ठार भी ज़ोतन।
- Footnote सेलाहम्म-हलकोत मतलब बच़नेरी चट्टान
- Footnote एनगदी अक एरी ठार ज़ै सुनसान ठैरी मां थी ज़ैड़ी ताज़ू ते गर्म पानी थियूं।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.