Bhadrawahi Bible
1 शमूएल 26
दाऊदे फिरी शाऊल ज़ींतो हथरां छ़डो
एक्सां फिरी जीपी लोक गिबा नगरे मां शाऊले कां गेइतां ज़ोने लगे, “कुन दाऊद तैस हकीला नव्वेंरी पहैड़ी पुड़े ज़ै यशीमोनेरे सामने छ़पोरो न राए?”1 तैखन शाऊल उठतां इस्राएलेरे 3000 माहिर सिपाही लड़नेरे लेई साथी नेइतां जेव कि दाऊदे जीपेरे सुनसान ठैरी मां तोप्पे। ते शाऊले अपने डेरे बत्तरे ड्लखोरां हकीला नव्वेंरी पहैड़ी पुड़ लाए ज़ै यशीमोनेरे सामने। पन दाऊद सुनसान ठैरी मां राव; ते तैस पतो लग्गो, कि शाऊल मेरो पीछो केरतां सुनसान ठैरी मां एवरोए; तैखन दाऊदे जासूस भेज़तां पक्कू कियूं कि शाऊल सच़्च़े एज्जी राहोरोए। एल्हेरेलेइ दाऊद उठतां तैस जगाई पुड़ जेव ज़ैड़ी शाऊल रुकोरो थियो; ते दाऊदे तै जगाह हेरी ज़ैड़ी शाऊल ते तैसेरो सेनापति नेरेरू मट्ठू अब्नेर झ़ुलोरू थियूं, शाऊल त अपने डेरे मां झ़ुलोरो थियो ते तैसेरी सेना तैसेरे च़ेवरे पासन डेरे लेइतां झ़ुलोरी थी।
तैखन दाऊदे हित्ती अहीमेलेक ते सरूयाहेरे मट्ठे योआबेरे ढ्ला अबीशै सेइं ज़ोवं, “मीं सेइं साथी तैन डेरन मां शाऊलेरे नेड़े कौन च़लेलो?” अबीशै ज़ोवं, “तीं साथी अवं च़लेलो।” तैस्से राती दाऊद ते अबीशै तैन लोकन कां जे, ते कुन हेरतन कि शाऊल त अपने डेरे मां झ़ुलोरोए, ते तैसेरो भालो तैसेरे शिरेइंते तल्ले मां डोबोरोए; ते अब्नेर ते सेनारे जुवान तैसेरे च़ेवरे पासन झ़ुलोरेन। तैखन अबीशै दाऊदे सेइं ज़ोवं, “परमेशरे अज़ तेरो दुश्मन तेरे हथ्थे मां दित्तोरोए; एल्हेरेलेइ हुनी अवं तैस एक्की बार एरहो बैईं कि भालो तैस कोश्तां ज़मीनी मां चुभी गाए, ते मीं तैस दूइयोवं बार बानी न पे।” पन दाऊदे अबीशै सेइं ज़ोवं, “तैस न मैरां; किजोकि ज़ेसेरू अभिषेक यहोवा कियोरू तैस मैरतां कौन बेकसूर रेई सखते।” फिरी दाऊदे ज़ोवं, “यहोवारे ज़िन्दगरी कसम यहोवा तैस मारेलो; या तै एपनी मौती सेइं मरेलो; या तै लड़ैई मां गेइतां मरेलो। यहोवा न केरे कि ज़ेसेरू अभिषेक यहोवा कियोरू तैस पुड़ अवं अपनो हथ खड़ो केरि; हुनी तैसेरे शिरेइंते पुड़ेरां भालो ते पैनेरी गड़बी छ़ुइतां ने, ते अस इट्ठां च़ले गामेले।” तैखन दाऊदे भालो ते पैनेरी गड़बी शाऊलेरे शिरेइंते पुड़ेरां नी; ते तैना च़ले जे। ते केन्चे एन न लावं, ते कोन्ची पतो न च़लो, ते न कोई बींझ़ो; किजोकि तैना सारे एस वजाई सेइं झ़ुलोरे थिये, कि यहोवारे तरफां तैन्न मां भारी निड्ल एवरी थी।
तैखन दाऊद वादी लेंघतां पार गेइतां दूर एक्की पहाड़ेरी च़ोटी पुड़ खड़ो भोव, ते दूईयां केरे मझ़ाटे बड़ो फासलो थियो; ते दाऊदे तैन सिपेहिन जो, ते नेरेरे मट्ठे अब्नेरे जो हक देइतां ज़ोवं, “हे अब्नेर कुन तू न शुनस?” अब्नेरे जुवाब देइतां ज़ोवं, “तू कौनस ज़ै राज़े जो हक देतस?” दाऊदे अब्नेरे सेइं ज़ोवं, “कुन तू बड्डो योद्धा नईं? इस्राएले मां तेरे बराबर कौने? तीं अपने मालिक राज़ेरी हिफाज़त कि न की? अक मैन्हु त तेरे मालिके राज़े मारनेरे लेई डेरे मां एवरो थियो। ज़ैन कम तीं कियूं तैन रोड़ू नईं। यहोवारे ज़िन्दगरी कसम तुस लोक मारे गांनेरे काबलथ, किजोकि तुसेईं अपने मालिक, ज़ेसेरू अभिषेक यहोवा कियोरूए तैसेरी हिफाज़त न की। ते हुनी हेर, राज़ेरो भालो ते पैनेरी गड़बी ज़ै तैसेरे शिरेइंते थी तै कोड़िए?”
तैखन शाऊले दाऊदेरी आवाज़ पिशैनतां ज़ोवं, “हे मेरे मट्ठां दाऊद, कुन तू लगोरोस ज़ोने?” दाऊदे ज़ोवं, “हाँ, मेरे मालिक राज़ा, अव्वें लगोरोइं ज़ोने।” फिरी तैनी ज़ोवं, “मेरो मालिक अपने दासेरो पीछो किजो केरतस? मीं कुन कियोरूए? ते मीं करां कौ ज़ेरि बुराई भोवरीए?”
“हुनी मेरो मालिक राज़ो, अपने दासेरी गल्लां शुने। अगर यहोवा तू मेरे खलाफ भड़कावरो भोस, तैखन त तै बलिदान मन्ज़ूर केरे; पन अगर मैन्हेइं एरू कियोरू भोए, त तैना यहोवारे तरफां लानती भोन, किजोकि तैनेईं हुनी अवं कढोरोईं कि अवं यहोवारे अपने हिस्से मरां न रेईं, ते तैनेईं ज़ोवरू, ‘गा बखले देबतां केरि पूज़ा केर।’ एल्हेरेलेइ हुनी मेरो खून यहोवारे हज़ूरी करां दूर मुल्खे मां बगाव न गाए; इस्राएलेरो राज़ो त अक ट्लीव्वें तोप्पने एवरोए, ज़ेरो कि कोई पहाड़न पुड़ तितरां केरो शिकार केरतो भोए।”
तैखन शाऊले ज़ोवं, “मीं पाप कियोरोए, हे मेरे मट्ठां दाऊद वापस एई; मेरे प्राण अज़्ज़ेरे दिहाड़े तेरी नज़री मां कीमतीन, एस वजाई सेइं अवं फिरी तेरो किछ नुकसान न केरेलो; शुन, मीं बेवकूफी की, ते मीं करां बड़ी गलती भोवरीए।” दाऊदे जुवाब देइतां ज़ोवं, “हे राज़ा, भालो हेर, तुसन मरां कोई सिपाही इरां एइतां इस नेइतां गाए। यहोवा हर एक्की अपने-अपने धार्मिकतारो ते सच़्च़ैई अरो फल देलो; हेर, अज़ यहोवा तू मेरे हथ्थे मां दित्तोरो थियो, पन मीं यहोवारे अभिषिक्ते पुड़ अपनो हथ खड़ो केरनो जाइज़ न समझ़ो। एल्हेरेलेइ ज़ेन्च़रे तेरे प्राण अज़ मेरी नज़री मां ट्लारेन, तेन्च़रे मेरे प्राण भी यहोवारी नज़री मां ट्लारेन, ते तै मीं सारे मुसीबतन करां छुटाए।” शाऊले दाऊदे सेइं ज़ोवं, “हे मेरे मट्ठां दाऊद तू धन आस! तू बड्डां-बड्डां कम्मां केरेलो ते तेरां कम्मां कामयाब भोल्हां।” तैखन दाऊद तैट्ठां च़लो जेव, ते शाऊल भी अपने घरे जो वापस जेव।
Source notes (1)
- Cross-reference 1 शमू. 23:19.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.