Bhadrawahi Bible
1 राज़े 19
एलिय्याह नबी उदास भोते
ज़ैखन अहाब राज़े अपनि कौन्श ईजेबेली सेइं एलिय्याह नेबेरे कम्मां केरो सारो बिस्तार शुनाव, कि तैनी बाल देबतेरे सारे नबी तलवारी सेइं कोस तरीके सेइं मारे। तैखन ईजेबेलां एलिय्याह नेबी कां मैन्हु भेज़तां ऐह समाद भेज़ो, “अगर अवं कालां इस्से मौके तगर तीं न मैरी त देबतो मीं मारे ज़ेन्च़रे तीं तैना नबी मारोरे थिये।” इन हेरतां एलिय्याह डेरि जेव ते अपनि जान बच़ांनेरे लेई नेश्शी जेव, ते यहूदा प्रदेशेरे बेर्शेबा नगरे मां पुज़तां अपनो सेवक भी तैट्ठी छ़डो।
ते एलिय्याह नबी एप्पु सुनसान ठैरी मां एक्की दिहाड़ेरे सफरे मां च़लतो एक्की झाऊ नंव्वेरे बुट्टे हैठ बिश्शी जेव, तैड़ी एन ज़ोइतां प्राथना की, “हे यहोवा प्रभु बस, हुनी मेरे प्राण कढ, किजोकि अवं अपने दादे-पड़दादन करां रोड़ो नईं।” तै तैड़ी झाऊ बुट्टे हैठ झ़ुल्ली जेव, ते हेरा कि एक्की स्वर्गदूते एइतां तैस जो ज़ोवं, “उठ ते खा।” तैनी हेरू कि तैसेरे शिरेइंते घोड़न पुड़ अक पकोरी रोट्टीए, ते अक पैनेरू भांडे; तैखन तैनी रोट्टी खाई ते पानी पियूं ते फिरी झ़ुल्लो। दूइयोवं फेरे स्वर्गदूत अव ते तैनी तैस सेइं हुरतां ज़ोवं, “उठ ते खा, किजोकि तीं हेजू बड़ू लम्मू सफर केरनू आहे।” तैखन तैनी उठतां खाऊं पियूं, ते तैस खाने सेइं तैस एत्री ताकत मैल्ही कि तै 40 दिहाड़े ते 40 रात सफर केरतो-केरतो परमेशरेरे पहाड़े होरेबे पुड़ पुज़्ज़ो!
तैड़ी तै एक्की कुढी मां गेइतां बिश्शी जेव, ते यहोवा तैस पुछ़ू, “हे एलिय्याह तू इड़ी कुन केरने लगोरोस?” तैनी जुवाब दित्तो, “सेना केरे यहोवा परमेशरेरे लेई मीं बड़ी जलन भोवरीए, किजोकि इस्राएली लोकेईं तेरो करार ट्लोड़ोरोए, ते तेरी वेदी भी बिछ़ोड़ोरिन, ते तेरे नबी तलवारी सेइं मारोरेन, ते अवें अकैल्लो राहोरोइं; ते तैना मीं भी मारनेरी कोशिश केरने लगोरेन।” यहोवा तैस जुवाब दित्तो, “बेइर निस ते सामने पहाड़े पुड़ खड़ो भो।” तैखन यहोवा तैलमेइं च़लो ते तैसेरे सामने अक बड़ी आँधी च़ली ते पहाड़ां हिलने लगां ते शफड़ां बिछ़ड़ने लेग्गी, फिरी भी यहोवा तैस ऐंधी मां न थियो; ऐंधरां बाद अक भुंज़ल अव, पन यहोवा तैस भुंज़ले मां न भी थियो। फिरी भुंज़लेरां बाद अग लेइहोने लगी, पन यहोवा तैस अग्गी मां भी न थियो; फिरी अग्गरां बाद अक पोल्ली ज़ेरि आवाज़ शुनोने लगी। तै आवाज़ शुनते एलिय्याहे अपने तुत्तरे पुड़ छ़ूँ छ़डू, ते बेइर गेइतां कुढरे दारे पुड़ खड़ो भोव। फिरी तैनी अक एरी आवाज़ शुनी, “हे एलिय्याह तू इड़ी कुन लगोरोस केरने?” एलिय्याह जुवाब दित्तो “सेनां केरे परमेशर यहोवारे लेई मीं बड़ी जलन भोवरीए, किजोकि इस्राएली लोकेईं तेरो करार ट्लोड़ोरोए, ते तेरी वेदी भी बिछ़ड़ोरिन, ते तेरे नबी तलवारी सेइं मैरी छ़डोरेन, ते अवें अकैल्लो बच़ोरोई; ते तैना मीं भी मारनेरी कोशिश केरने लगोरेन।”1 तैखन यहोवा तैस सेइं ज़ोवं, “वापस दमिश्केरे सुनसान ठैरी मां गा, ते तैड़ी पुज़तां अरामेरो राज़ो बनानेरे लेई हजाएलेरू, ते इस्राएलेरो राज़ो बनानेरे लेई निमशीएरे पोट्लड़े येहूएरू, ते एपनी ठैरी नबी भोनेरे लेई आबेल-महोलारे शापातेरे मट्ठे एलीशारू अभिषेक केरां। ते हजाएलेरी तलवारी करां ज़ै कोई बेंच़ी गालो त येहू तैस मारेलो; ते ज़ै येहूएरी तलवारी करां बेंच़ी गालो तैस एलीशा मारेलो। पन फिरी भी अवं 7000 इस्राएली लोकन बच़ेइतां रखेलो। एना त तैना लोकन, ज़ैनेईं न त बाल देबतेरी पूज़ा कियोरीए, ते न तैसेरी मूरतन फुम्मड़ी दित्तोरिए।” तैखन एलिय्याह तैट्ठां च़लो जेव, ते शापातेरू मट्ठू एलीशा तैस मैल्हू तैनी 12 जोड़ी दांतन एप्पु अग्री कियोरे एप्पु बारोवं सेइं साथी हल लेइतां थियो, तैस कां गेइतां एलिय्याहे अपनि च़ादर तैस पुड़ छ़डी। तैखन तै दांत शैरतां एलिय्याह नेबी पत्ती दौड़ो, ते ज़ोने लगो, “मीं अपने अम्मा बाजी फुम्मड़ी देने दे, तैखन अवं तीं पत्ती च़लेलो।” तैनी ज़ोवं, “वापस गा, अवं तीं न रोकी।”2 तैखन एलीशा तैस पत्ती गाने करां वापस अव, ते अक जोड़ी दांत नेइतां बलि किये, ते दांतां केरू सामान फुकतां मास बनेइतां अपने लोकन दित्तू, ते तैनेईं खावं; तैखन तै मझ़ बेन्धतां एलिय्याह पत्ती च़लो, ते तैसेरी सेवा केरने लगो।3
Source notes (3)
- Cross-reference रोम. 11:3.
- Cross-reference मत. 8:21;लूक. 9:61.
- Footnote बाकी ज़मीनदार ते एलीशारू टब्बर ते तैसेरे दोस्त तैस भेज़नेरे लेई तैस कां आए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.