Bhadrawahi Bible
1 राज़े 11
सुलैमानेरो दिल परमेशरे करां दूर भोते
सुलैमान राज़ो फ़िरौनेरी कुइये, ते बड़े गैर इस्राएली कौन्शन सेइं प्यार केरतो थियो। इन मां मोआबी, अम्मोनी, एदोमी, सीदोनी ते हित्ती कौन्शां थी। तैना तैन कौमां केरि थी, ज़ैन केरे बारे मां यहोवा इस्राएलन जो हुक्म दित्तोरो थियो कि, “तुस तैन सेइं ड्लाह न बनेइयथ, ते न तैना तुसन सेइं ड्लाह बनान, तैना ज़रूर तुश्शे मन अपने देबतां केरे पासे बेदली देली;” पन फिरी भी सुलैमान तैन सेइं प्यार केरने लगो।1 सुलैमान राज़ेरी 700 रैनी ते 300 रखैलां थी ते तैनेईं तैसेरो दिल यहोवा करां दूर कियो। ज़ैखन सुलैमान बुढो भोइ जेव, तैखन तैसेरी कौन्शेइं तैसेरो मन बाकी देबतां केरे पासे बदलो, ते तैसेरो मन अपने बाजी दाऊदेरो ज़ेरो अपने परमेशर यहोवा पुड़ पूरे तरीके सेइं लगोरो न राव। सुलैमान त सीदोनी केरि अश्तोरेत देबी, ते अम्मोनी केरि मिल्कोम भिट्टे देबतेरी पूज़ा केरने लगो। एस तरीके सेइं सुलैमाने तैन कम कियूं ज़ैन यहोवारी नज़री मां बुरू थियूं, ते ज़ेन्च़रे तैसेरो बाजी दाऊद यहोवारे लेई वफादार राव तै तेन्च़रे न राव। तैन दिहाड़न मां सुलैमाने यरूशलेम नगरेरे सामनेरे पहाड़े पुड़ मोआबी लोकां केरे कमोश भिट्टे देबतेरे लेई ते अम्मोनी लोकां केरे मोलेक भिट्टे देबतेरे लेई अक-अक वेदी बनाई ते तैनी अपने सारे गैर इस्राएली कौन्शां केरे लेई भी एन्च़रे कियूं, ज़ैना अपने-अपने देबतन कां गुग्गल बैलति थी, ते बलिदान च़ैढ़ती थी।
तैखन यहोवा सुलैमाने पुड़ सेरकोव, किजोकि तैसेरो मन इस्राएलेरे परमेशर यहोवा करां दूर भोइ जेवरो थियो ज़ैनी तैस दूई बार दर्शन दित्तोरू थियूं। ते तैने इस्से गल्लरे बारे मां हुक्म दित्तोरो थियो, कि बाकी देबतां केरि पूज़ा न केरां, फिरी भी तैने यहोवारो हुक्म न मन्नो। एल्हेरेलेइ यहोवा सुलैमाने सेइं ज़ोवं, “तीं एन ज़ैन कम कियोरूए, ते मेरो कियोरो करार ते दित्तोरी विधि पूरी न की, एल्हेरेलेइ अवं तेरू राज़ तीं करां थुसोड़तां तेरे एक्की अधिकैरी देइलो। पन फिरी भी तेरे बाजी दाऊदेरे वजाई सेइं तेरे ज़ींते दम्में एन न केरेलो; पन तेरे मट्ठेरे हथ्थे मरां राज़ थुसोड़तां नेइलो। फिर भी अवं पूरू राज़ न थुसोड़ेलो, सिर्फ अपने दास दाऊदेरे वजाई सेइं ते यरूशलेम नगरेरे वजाई सेइं ज़ैन मीं च़ुनोरूए, अवं तेरे मट्ठेरे हथ्थे मां एक्की गोट्ल छ़ेडी देलो।” तैखन यहोवा एदोमी हदद ज़ै एदोमी राज़ेरे खानदाने मरां थियो, सुलैमानेरो दुश्मन बनाव। किजोकि ज़ैखन दाऊद एदोम प्रदेशे मां थियो, ते योआब सेनापति मारोरे लोकन दबने जेवरो थियो। (योआब त सारे इस्राएली सेना सेइं साथी तैड़ी शा महीने राव, ज़ांतगर तैनी एदोम प्रदेशेरे सारे मड़द नाश न किये)
तैखन हदद ज़ैन निकड़ू मट्ठू थियूं, अपने बाजी केरे किछ एदोमी अधिकैरन सेइं साथी मिस्र मुल्खे जो गानेरे इरादे सेइं नश्शू। ते तैना मिद्यान प्रदेशे मरां निस्से ते पारान सुनसान ठैरी मां पुज़्ज़े, ते पारान नंव्वेरे सुनसान ठैरी मरां किछ लोक साथी नेइतां मिस्र मुल्खे मां फ़िरौन राज़े कां जे, ते फ़िरौने तैस घर ते किछ ज़मीन भी दित्ती, ते खानेरी चीज़ां दित्ती। ते फ़िरौन हददे पुड़ एत्रो महरबान भोव, कि तैनी अपनि साली ज़ै तहपनेस रैनरी बेइन थी तैस जेई ड्लाही। ते तहपनेसरी बेइनी गनूबत नंव्वेरू अक मट्ठू भोवं, ते तहपनेसां तैसेरू पालन पोशन फ़िरौनेरे मेहले मां कियूं। तैखन गनूबत फ़िरौनेरे मेहले मां तैसेरे मट्ठन सेइं साथी रहतू थियूं। ज़ैखन हददे मिस्र मुल्खे मां एन शुनू, कि दाऊद अपने दादे-पड़दादां केरो ज़ेरो मेरि जेव, ते योआब सेनापति भी मेरि जेवरोए, तैखन तैनी फ़िरौने सेइं ज़ोवं, “मीं हुक्म दे कि अवं अपने मुल्खे जो च़लो गेईं!” पन फ़िरौने तैस सेइं ज़ोवं, “किजो? इड़ी तीं कुन कमी भोइ कि तू अपने मुल्खे जो च़लू गानू चातस?” तैनी जुवाब दित्तो, “मीं कोई कमी नईं भोवरी, फिरी भी मीं गानेरी अज़ाज़त दे।”
फिरी यहोवा एल्यादारू मट्ठू रजोन सुलैमानेरो अक होरो दुश्मन बनाव, तै त अपने मालिक सोबारे राज़े हदादेजेरे करां नश्शोरो थियो; ज़ैखन दाऊदे सोबारी सेना हरावरी थी, तैखन रजोने एप्पु कां किछ मैन्हु अकोट्ठे केरतां, एक्की जथेरो प्रधान बेनि जेव, ते तै दमिश्क नगरे मां गेइतां राने लगो, ते तैड़ी राज़ केरने लगो। तैस नुक्सानेरे साथी-साथी ज़ै हददे कियोरो थियो, रोजन भी सुलैमानेरे ज़िन्दगी भर इस्राएलेरो दुश्मन बनोरो राव; ते तै इस्राएले सेइं नफरत केरतो अरामे पुड़ राज़ केरतो थियो। फिरी नबातेरे मट्ठे यारोबामे सुलैमान राज़ेरे खलाफ बगावत की, तै सुलैमानेरे अधिकैरन मरां अक थियो ज़ै एप्रैमेरे गोट्ले मरां सरेदा नगरेरो रानेबालो थियो, ते तैसेरी अम्मरू नवं सरूआह थियूं ज़ै विधवा थी। यारोबामे राज़ेरे खलाफ एल्हेरेलेइ बगावत की, कि सुलैमान ज़ैखन मिल्लो बनेई राहोरो थियो ते अपने बाजी दाऊदेरे नगरेरी दिवारां केरि मरम्मत केरने लगो। यारोबाम बड़ो शूरबीर थियो, ते सुलैमाने ज़ैखन तै जुवान लाव, कि ऐह बड़ो मेहनती आहे, त तैनी तै यूसुफेरे घरानेरे सैरी मज़दूरां केरो अधिकारी बनाव। एक्सां ज़ैखन यारोबाम यरूशलेम नगरे मरां च़लोरो थियो, कि शीलो नगरेरो रानेबालो अहिय्याह नबी तैस बत्ती मां मैल्हो, तैनी नंव्वी च़ादर पलैटोरी थी, ते सिर्फ तैना दूईये एक्की मैइदाने मां थिये। तैखन अहिय्याहे तै नव्वीं च़ादर ट्लाई ते छ़िंदतां तैसेरे 12 टुक्ड़े बनाए। तैखन तैनी यारोबामे सेइं ज़ोवं, “दश टुक्ड़े ने: किजोकि इस्राएलेरो यहोवा एन ज़ोते, ‘शुन, अवं राज़ सुलैमानेरे हथ्थे मरां थुसोड़तां दश गोट्ल तेरे हथ्थे मां केरेलो। पन अवं अपने दास दाऊदेरी वजाई सेइं ते यरूशलेम नगरेरे वजाई सेइं ज़ै मीं इस्राएलेरे सारे गोट्लन मरां च़ुनोरोए, तैस कां सिर्फ अक गोट्ल रालू। एसेरी वजा ई आहे कि तैनेईं अवं शैरतां सीदोनी लोकां केरि देबी अश्तोरेत ते मोआबी लोकां केरो देबतो कमोश, ते अम्मोनी लोकां केरो देबतो मिल्कोमे कां मथ्थो टेकतन, ते मेरी बत्ती पुड़ न च़ले। ते ज़ैन मेरी नज़री मां ठीके, तैन न कियूं, ते मेरे विधन ते मेरे नियम न मन्ने कि ज़ेन्च़रे तैसेरो बाजी दाऊद मन्तो थियो। फिरी भी अवं तैसेरे हथ्थेरां सारू राज़ न नेइलो, पन मेरो च़ुनोरो दास दाऊद ज़ै मेरे हुक्मन ते विधन मनतो राव, तैसेरे वजाई सेइं अवं तैस ज़िन्दगी भर प्रधान बनेइतां रखेलो। पन अवं तैसेरे मट्ठेरे हथ्थे मरां दश गोट्ल एन्हतां तीं देइलो। ते अवं तैसेरे मट्ठे अक गोट्ल देलो, एल्हेरेलेइ कि यरूशलेम नगरे मां ज़ैन मीं अपने लेई च़ुनोरूए, मेरे दास दाऊदेरो दीयो मेरे सामने हमेशा बनोरो रालो। पन अवं तीं ठहरेइलो, ते तू अपने मेर्ज़ी सेइं इस्राएले पुड़ राज़ केरेलो। ते अगर तू मेरे दास दाऊदेरे ज़ेरे मेरे सारे हुक्म मन्नेलो, ते मेरे बत्तन पुड़ च़लेलो, ते ज़ैन कम मेरी नज़री मां ठीके, तैन्ने केरेलो, ते मेरी विधि ते हुक्मे मनतो रालो, त अवं तीं सेइं साथी रालो, ते त अवं तीं इस्राएलेरो राज़ो बनेइलो ते तेरां बाद तेरू खानदान राज़ केरेलू, ज़ेन्च़रे मीं दाऊदे सेइं कियूं। एस पापेरे वजाई सेइं अवं दाऊदेरे खानदाने सज़ाह देइलो, पन हमेशा तगर नईं।’” एल्हेरेलेइ सुलैमाने यारोबाम मारनेरी कोशिश की, पन यारोबाम नेशतां मिस्र मुल्खेरे राज़े शीशके कां जेव, ते सुलैमानेरे मरने तगर तैड़ी राव। सुलैमानेरी तैना सैरी गल्लां ते सारां कम्मां ते तैसेरे अक्लमन्द भोनेरे बारे मां इतिहासेरे किताबी मां लिखेरूए। सुलैमाने यरूशलेम नगरे मां सारे इस्राएल मुल्खे पुड़ 40 साल राज़ कियूं। ते सुलैमान अपने दादे-पड़दादां केरो ज़ेरो मेरि जेव, ते तै तैसेरे बाजी दाऊदेरे नगरे मां दब्बो जेव, ते तैसेरू मट्ठू रहबाम तैसेरी जगाई पुड़ राज़ो बनू।
Source notes (1)
- Cross-reference निर्ग. 34:16;व्यव. 7:3-4.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.