Bhadrawahi Bible
1 राज़े 10
शेबारी रानी सुलैमान राज़ेरी तारीफ़ केरतीए
एक्सां ज़ैखन शेबा मुल्खेरी रैनां शुनू कि यहोवारे वजाई सेइं सुलैमान केत्रो मुशूर भोवरोए, तैखन तै मुश्किल-मुश्किल सवाल घिन्तां तैसेरी अज़मैइश केरनेरे लेई अई।1 तै अपने बड़े अधिकारी साथी एन्हतां यरूशलेम नगरे मां पुज़्ज़ी, तैसारे ऊँटन पुड़ मसाले ते बड़ू सोन्नू ते मणि लद्दोरी थी, ते तै सुलैमान राज़े कां अई; ते तैन सैरी गल्लां केरे बारे मां ज़ैना तैसारे मने मां थी तैस सेइं गल्लां केरने लगी। सुलैमान राज़े तैसारे सेभी सवालां केरो जुवाब दित्तो, कोई भी सवाल एरहो न थियो ज़ेसेरो जुवाब तै न देइ सको। ज़ैखन शेबा मुल्खेरी रैनां सुलैमान राज़ेरी सारी अक्लमन्दी ते तैसेरो बनेवरो तै भवन, ते तैसेरे मेज़े पुड़ खानेरी चीज़ां हेरी, ते तैसेरे अधिकारी केन्च़रे बिशोरेन, ते तैसेरे अधिकारी केन्च़रे खड़ेन ते तैनेईं केरहां-केरहां लिगड़ां लेवरन, ते तैसेरे पियाने बाले केरहे आन, ते केरू तै बलिदान यहोवारे भवन मां च़ाढ़ते, इन सब लेइतां तै हैरान भोइ।
तैखन तैसां सुलैमान राज़े सेइं ज़ोवं, “तेरे कम्मां केरि ते अक्लरी ज़ै मुशूरी मीं अपने मुल्खे मां शुनोरी थी, तै सच़्च़े। पन ज़ांतगर मीं एप्पु एइतां अपने एछ़्छ़ेईं न लाव, तांतगर मीं तैन गल्लन पुड़ विश्वास न कियो, पन ज़ैन-ज़ैन मीं इड़ी एइतां लाऊं, मीं तैसेरो अध्धो हिस्सो भी शुनोरो न थियो; तेरी अक्लमन्दी ते तेरी धन-दौलत तैस मुशूरी करां भी बेद्धतां आहे, ज़ै मीं शुनोरी थी।2 धन आन तेरे लोक! धन आन इना तेरे अधिकारी! ज़ैना हर वक्त तीं कां खड़े रहतन, ते तेरी अक्लमन्द गल्लां शुन्तन। तेरे परमेशर यहोवारी तारीफ़ भोए! ज़ै तीं पुड़ एत्रो खुश भोव कि तू इस्राएलेरे तखते पुड़ बिशालो, यहोवा इस्राएले सेइं हमेशा प्यार केरते। एल्हेरेलेइ तैनी तू न्याय ते धार्मिकता केरनेरे लेई राज़ो बनेवरोस।” तैसां सुलैमान राज़े 4000 किल्लो सोन्नू, ते बेड़ी खुशबूदार चीज़ां ते मणि दित्ती; ज़ेत्री चीज़ां शेबा मुल्खेरे रैनां सुलैमान राज़े दित्ती, तेत्रू फिरी सुलैमान राज़े कधी केन्चे न दित्तू।
फिरी हीराम राज़ेरां ज़िहाज़ां भी ज़ैन मां ओपीर नगरे मरां सोन्नू आनते थिये, तैन मां चन्दनेरी बड़ी लकड़ी ते मणि भी आनी। ते सुलैमान राज़े चन्दनेरी लेकड़ी सेइं यहोवारो भवन ते अपने मेहलेरे लेई खम्भे ते गीतां ज़ोने बालां केरे लेई सितार, सैन्गी बनावेई; एत्री चन्दनेरी लकड़ी अज़ तगर फिरी कधी न अई, ते न कधी लेइहोई।
सुलैमान राज़े शेबा मुल्खेरी रैनी तैन सब किछ दित्तू ज़ैन किछ तैसां चावं, राज़े तैस खुल्ले दिले सेइं बड़ू किछ दित्तू, फिरी तै अपने अधिकैरन सेइं साथी अपने मुल्खे जो वापस च़ली जेई। ज़ैन सोन्नू हर साल सुलैमान राज़े कां एइतू थियूं, तैसेरो वज़न लगभग 22000 किल्लो थियो। इसेरे अलावा सौदागिर्न करां ते बुपैरी केरे लेन देने करां ते अरब मुल्खेरे सारे राज़न करां, ते अपने मुल्खेरे हाकिमन करां बड़ू किछ मैलतू थियूं। सुलैमान राज़े सोन्नेरी 200 बेड्डी-बेड्डी ढालां बनावेई; ते हर एक्की ढाली मां लगभग 7-7 किल्लो सोन्नू लग्गू। फिरी तैनी सोन्ने सेइं 300 निक्की ढालां भी बनावेई; ते हर एक्की ढाली मां लगभग दूई-दूई किल्लो सोन्नू लग्गू ते राज़े तैना लबानोनेरे बन नंव्वेरे मेहले मां रखेई। फिरी सुलैमान राज़े हाथी दांतां केरो अक बड्डो तखत भी बनावव, ते तैस पुड़ खालिस सोन्नू पलैटावं। तैस तखते मां शा पेवड़ी थी; ते तैसेरो पेत्रियों हिस्सो बेहीं पासेरां गोल थियो, ते बिशनेरी ठारारे दूईये पासन टेकां लेगोरी थी, ते दूईये टेकन कां अक-अक शेर खड़ो बनेवरो थियो। ते शाइये पेवड़ी केरे दूईये पासन अक-अक शेर खड़ो बनोरो थियो, सारे 12 शेर बनोरे थिये। कोन्ची रियासती मां एरहो तखत कधी न बनो;
सुलैमान राज़े कां पीनेरां भांडां सब सोन्नेरां थियां, ते लबानोनेरे बन नंव्वेरे मेहले मां सब भांडां खालिस सोन्नेरां थियां, चैंदरू भांड कोई भी न थियूं, सुलैमानेरे हुकूमत केरनेरे दिहाड़न मां लोक चैंदरी कीमत किछ न थिये समझ़ते। किजोकि समुन्दरे पुड़ हीराम राज़ेरे ज़िहाज़न सेइं साथी सुलैमान राज़ो भी तर्शीशेरे समुन्दरी ज़िहाज़ रखतो थियो, ते ट्लेइ-ट्लेइ सालन पुड़ तर्शीशेरे ज़िहाज़ सोन्नू, चाँदी, हाथी दांत, बांदरां ते मोर आनते थियां।
एन्च़रे सेइं सुलैमान राज़ो दौलत ते अक्ली मां दुनियारे सैरी राज़न करां जादे बेद्धतां भोइ जेव। ते सैरी दुनियारे लोक तैसेरी अक्लमन्द गल्लां शुन्नेरे लेई ज़ैना परमेशरे तैसेरे मने मां छ़ेडोरी थी, सुलैमानेरू दर्शन केरनू चाते थिये। ते तैना हर साल च़ढ़तलरे लेई चाँदी ते सोन्नू ते सोन्नेरां भांडां, लिगड़ां, हथियार, खुशबूदार चीज़ां, घोड़े, ते खचरां देनेरे लेई आनते थिये।
एन्च़रे सेइं सुलैमान राज़े रथ ते सुवार अकोट्ठे किये, ते तैस कां 1400 रथां ते 12000 सुवार भोइ जे, ते तैना तैनी रथां केरे नगरन मां ते यरूशलेम नगरे मां एप्पु कां रख्खे। ते राज़े चाँदी यरूशलेम नगरे मां हछी भोनेरे वजाई सेइं एन्च़रे की ज़ेन्च़रे घोड़ ते गैइड़ बुनीयें मुल्खे मां गूलरेरे बुट। ते ज़ैना घोड़े सुलैमान रखतो थियो, तैना मिस्र मुल्खे मरां एइते थिये, ते राज़ेरे बुपारी एक्की-एक्की झुण्डेरी रख्खोरी कीमत देइतां आनते थिये। अक रथ त सत किल्लो चैंदी मां एइतू थियूं, ते अक घोड़ो लगभग दूई किल्लो मां मिस्रे मरां एइतो थियो, ते एस्से कीमती पुड़ तैना हित्ती लोकां केरे ते अरामेरे सारे राज़ां केरे लेई बुपैरी केरे ज़िरिये आनते थिये।
Source notes (2)
- Cross-reference मत. 6:29.
- Cross-reference लूक. 12:27.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.