Bhadrawahi Bible
1 इतिहास 9
यरूशलेम नगरे मां रानेबालां केरो इंतज़ाम
एन्च़रे सेइं सारे इस्राएली एपनी-एपनी वंशावेलरे मुताबिक, ज़ै इस्राएलेरे राज़ां केरि किताबरी मां लिखोरीए, गिनती कीजेई। ते यहूदी लोक बाबेल मुल्खेरे गुलैमी मां पुज़ाए जे किजोकि तैनेईं परमेशरेरे खलाफ पाप कियो। गुलैमी मरां वापस एइतां ज़ैना लोक अपने नगरन मां बस्सोरे थिये, तैना इस्राएली, याजक, लेवी ते भवनेरे सेवक थिये। यरूशलेम नगरे मां किछ यहूदी; किछ बिन्यामीनी, ते किछ एप्रैमी, ते किछ मनश्शेई लोक रहते थिये। तैना इनां आन, यहूदारे मट्ठे पेरेसेरे खानदाने मरां अम्मीहूदेरू मट्ठू ऊतै, ज़ैन ओम्रीएरू मट्ठू, ते इम्री एरू पोट्लड़ू ते बानीएरू पड़पोट्लड़ू थियूं। ते शीलोई लोकन मरां तैसेरू बड्डू मट्ठू असायाह ते तैसेरां मट्ठां। जेरहेरे खानदाने मरां यूएल, ते तैन केरे भियाल, ज़ैना 690 थिये। फिरी बिन्यामीनेरे खानदाने मरां सल्लू ज़ैन मशुल्लामेरू मट्ठू, होदव्याहेरू पोट्लड़ू, ते हस्सनूआरू पड़पोट्लड़ू थियूं। यिबनायाह ज़ैन यरोहामेरू मट्ठू थियूं, ते एला ज़ैन उज्जीएरू मट्ठू, ते मिक्री एरू पोट्लड़ू थियूं, ते मशुल्लाम ज़ैन शपत्याहेरू मट्ठू थियूं, रूएलेरू पोट्लड़ू, ते यिब्निय्याहेरू पड़पोट्लड़ू थियूं। ते इन केरे भियाल ज़ैना अपने-अपने खानदानेरे मुताबिक 956 मड़द थिये ज़ैना अपने-अपने पूर्वजां केरे घरानेरे प्रधान थिये।
यरूशलेम नगरे मां रानेबाले याजक
याजकन मरां यदायाह, यहोयारीब ते याकीन, ते अजर्याह ज़ै परमेशरेरे भवनेरो प्रधान ते हिल्किय्याहेरू मट्ठू थियूं, हिल्किय्याह मशुल्लामेरू मट्ठू थियूं, मशुल्लाम सादोकेरू, सादोक मरायोतेरू, मरायोत अहीतूबेरू मट्ठू थियूं।
ते अदायाह ज़ैन यरोहामेरू मट्ठू थियूं, यरोहाम पशहूरेरू, पशहूर मल्किय्याहेरू, मल्किय्याह मासैरू, मासै अदीएलेरू, अदीएल यहजेरारू, यहजेरा मशुल्लामेरू, मशुल्लाम मशिल्लीतेरू, मशिल्लीत इम्मेरू मट्ठू थियूं। ते एन केरे भियाल थिये ज़ैना अपने-अपने पूर्वजां केरे घरान्न मां 1760 प्रधान थिये, तैना परमेशरेरे भवनेरे सेवारे कम्मे मां बड़े काबल थिये। फिरी लेवी केरे मरारी खानदाने मरां शमायाह ज़ैन हश्शूबेरू मट्ठू, ते अज्रीकामेरू पोट्लड़ू, ते हशब्याहेरू पड़पोट्लड़ू थियूं। ते बकबक्कर, हेरेश ते गालाल ते आसापेरे खानदाने मरां मत्तन्याह ज़ैन मीकारू मट्ठू, ते जिक्री एरू पोट्लड़ू थियूं। ते ओबद्याह ज़ैन शमायाहेरू मट्ठू, ते गालालेरू पोट्लड़ू ते यदूतूनेरू पड़पोट्लड़ू थियूं। ते बेरेक्याह ज़ैन आसारू मट्ठू, ते एल्कानारू पोट्लड़ू थियूं, ज़ै नतोपाई लोकां केरे ड्लाव्वन मां रहतो थियो।
लेवी ज़ैना भवनेरे पहरदार थिये
लेवेरे खानदाने मरां ज़ैना भवनेरे पहरदार थिये तैना इना थिये, शल्लूम, अक्कूब, तल्मोन ते अहीमन, इन मां प्रधान त शल्लूम थियो। ते तै अज़ तगर नगरेरे पूर्वेरे पासे राज़ेरे फाटके पुड़ पहरदारी केरतो थियो। लेवी केरे पहरदार इनां थिये। ते शल्लूम ज़ैन कोरेरू मट्ठू थियूं, एब्यासापेरू पोट्लड़ू, ते कोरहेरू पड़पोट्लड़ू थियूं, ते तैसेरे ढ्ला ज़ैना कोरही थिये, तैना इस कम्मेरे अधिकारी थिये कि तैना यहोवारे तेम्बेरे पहरदार भोन। तैन केरे खास त यहोवारे डेरां केरे अधिकारी ते फाटकेरे पहरदार थिये। पुराने ज़माने मां एलीआजरेरू मट्ठू पीनहास, ज़ैस सेइं साथी यहोवा रहतो थियो, तै तैन केरो प्रधान थियो। मशेलेम्याहेरू मट्ठू जकर्याह मिलापे बाले तेम्बेरो पहरदार थियो। इन सब ज़ैना भवनेरी पहरदारी केरनेरे लेई च़ुने जेवरे थिये, तैना 212 थिये। इनां ज़ैन केरे पूर्वजन दाऊद ते शमूएल नेबे वफादार ज़ैनतां रखोरे थिये, तैना अपने-अपने ड्लाव्वन मां एपनी-एपनी वंशावेलरे मुताबिक गने जे। तैना ते तैन केरू खानदान यहोवारे भवनेरे फाटकन पुड़ पहरदारी बैरी-बैरी सेइं केरते थिये। पहरदार भवनेरे पूर्व, पश्चिम, उत्तर, दक्षिण, च़ेवरे पासां केरि पहरदारी केरते थिये। ते तैन केरे भियाल ज़ैना ड्लाव्वन मां रहते थिये, तैन्न सत-सत दिहैड़ना बाद पहरदारी केरनेरे लेई तैन सेइं साथी पहरदारी केरनेरे लेई एजनू पेतू थियूं। किजोकि च़ेवरे प्रधान पहरदार ज़ैना लेवी थिये, तैना वफादार सेमझ़तां परमेशरेरे भवनेरे कमरां ते भण्डारां केरे अधिकारी रख्खे जेवरे थिये। तैना परमेशरेरे भवनेरे आसे-पासे एल्हेरेलेइ राती पहरदारी केरते थिये कि तैसेरी रखवाली तैन सौंफोरी थी, ते रोज़ झ़ेझ़ां खोलनू तैन केरू कम थियूं।
लेवी लोकां केरि बाकी ज़िमेवारी
तैन मां किछ यहोवारे भवने मां इस्तेमाल भोनेबाले चीज़ां केरे अधिकारी थिये, इनां चीज़ां गेनतां केढी गैती थी ते गेनतां रेखी गैती थी। ते तैन मरां किछ सामानेरे, ते पवित्र ठारारे भांडां केरे, ते मैदे, दाछ़रो रस, तेल, लोबान ते खुशबूदार चीज़ां केरे अधिकारी रख्खे जे। पन याजकां केरे मट्ठन मरां किछ खुशबूदार चीज़ां तियार केरनेरू कम केरते थिये। ते मत्तित्याह नंव्वेरो अक लेवी ज़ैन कोरही शल्लूमेरू बड्डू मट्ठू थियूं तैन वफादार सेमझ़तां तव्वन पुड़ बनेवरी च़ाढ़नेरे लेई रोट्टी केरू अधिकारी रख्खू जेवं। कहात कुले मरां किछ लेवी त च़ैढ़ोरी रोट्टी केरे अधिकारी थिये, कि हर आरामेरे दिहाड़े तैस तियार केरन।
इनां गीतां ज़ोनेबाले थिये ज़ैना लेवी पूर्वजां केरे घरानेरे प्रधान थिये, ते भवनेरे कमरन मां रहते थिये, ते बाकी सेवारे कम्मे करां छुटोरे थिये। किजोकि तैना रात दिहैड़ी अपने कम्मे मां लगोरे रहते थिये। एना एपनी-एपनी पीढ़ी मां लेवी लोकां केरे पूर्वजां केरे घरानेरे प्रधान थिये, एना यरूशलेम नगरे मां रहते थिये।
शाऊल राज़ेरी खानदानी
यीएल गिबोन नगर बसाने बालो थियो ते तै गिबोन नगरे मां रहतो थियो, तैसेरी कौन्शरू नवं माका थियूं। तैसेरू बड्डू मट्ठू अब्दोन थियूं, फिरी सूर, कीश, बाल, नेर, नादाब, गदोर, अह्यो, जकर्याह ते मिक्लोत; ते मिक्लोतेरू मट्ठू शिमाम थियूं, तैना अपने भियालन सेइं साथी यरूशलेम नगरे मां रहते थिये। नेरेरू मट्ठू कीश, कीशेरू मट्ठू शाऊल, शाऊलेरां मट्ठां योनातान, मल्कीशूअ, अबीनादाब ते एशबाल थियां। ते योनातानेरू मट्ठू मरीब्बाल थियूं, ते मरीब्बालेरू मट्ठू मीका थियूं। ते मीकारां मट्ठां पीतोन, मेलेक, तह्रे ते आहाज थियां। ते आहाजेरू मट्ठू यारा, ते यारारां मट्ठां आलेमेत, अज्मावेत ते जिम्री थियां, ते जिम्री एरू मट्ठू मोसा, ते मोसारू मट्ठू बिना, ते बिनारू मट्ठू रपायाह, रपायाहेरू मट्ठू एलासा ते एलासारू मट्ठू आसेल थियूं। ते आसेलेरां शा मट्ठां भोआं तैन केरां नंव्वां इनां आन: अज्रीकाम, बोकरू, इश्माएल, शरायाह, ओबद्याह ते हानान।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.