Bhadrawahi Bible
1 इतिहास 19
अम्मोनी सेना पुड़ ज़ीत
किछ वक्तेरां बाद अम्मोनी केरो राज़ो नाहाश मेरि जेव, ते तैसेरू मट्ठू तैसेरे जगाई पुड़ राज़ो बनो। ज़ैखन दाऊद राज़े इस बारे मां शुनू त तैने एन सोचू, “हानूनेरे बाजी नाहाशे ज़ै हमदरदी मीं सेइं कियोरी थी, एल्हेरेलेइ अवं भी तैस सेइं हमदरदी केरतां हरेइलो।” तैखन दाऊदे तैसेरे बाजी केरे बारे मां शान्ति देनेरे लेई अधिकारी भेज़े। ते दाऊदेरे अधिकारी अम्मोनी केरे मुल्खे मां हानूने कां तैस शान्ति देने जे। पन अम्मोनी केरे हाकिम हानूने सेइं ज़ोने लगे, “दाऊदे ज़ैना तीं कां शान्ति देनेबाले भेज़ोरेन, तैना कुन तेरी समझ़ी मां तेरे बाजी केरि आदर केरनेरे इरादे सेइं तीं कां भेज़ोरेन? कुन तैसेरे अधिकारी एस इरादे सेइं तीं कां नईं एवरे, कि तेरे मुल्खेरो हाल पतो केरन ते नाश केरन ते भेद घिन्तां गान?” एल्हेरेलेइ हानूने दाऊदेरे अधिकारी ट्लाते, ते तैन केरे बाल कट्टाए, ते तैन केरे लिगड़ां केरो बुनियों हिस्सो केटतां गाने दित्ते। तैखन किछ लोकेईं गेइतां दाऊदे सेइं ज़ोवं कि तैन मड़दन सेइं केरो बर्ताव कियो जेव, ते तैनी तैस सेइं मिलनेरे लेई भेज़े किजोकि तैना मैन्हु बड़े शरमिन्दा थिये, ते दाऊद राज़े तैन जो बिस्तार भेज़ो, “ज़ांतगर तुश्शी दैढ़ी न बेडोन, तांतगर यरीहो नगरे मां रुकोरे राथ, ते बादे मां वापस एज्जा।”
ज़ैखन अम्मोनी लोकेईं हेरू, कि दाऊद ई दुश्मन बनेवरोए, तैखन हानूने ते अम्मोनी लोकेईं लगभग 35000 किल्लो चाँदी, अरम्नहरैम ते अरम्माका ते सोबा जो भेज़ी, ते रथ ते सुवार किरैइये पुड़1 कुजाए। ते तैनेईं 32000 रथ, ते माका मुल्खेरो राज़ो ते तैसेरी सेना किरैइये पुड़ कुजाई, ते तैनेईं एइतां मेदबा नगरेरे सामने अपने डेरे खड़े किये। ते अम्मोनी अपने-अपने नगरन मरां अकोट्ठे भोइतां लड़ने जो आए। एन शुन्तां दाऊदे योआब ते शूरबीरां केरि पूरी सेना लड़नेरे लेई भेज़ी। तैखन अम्मोनी निस्से ते रब्बाह नगरेरे फाटके कां लड़नेरे लेई तियार भोए, ते ज़ैना राज़े एवरे थिये, तैना तैन करां अलग मैइदाने मां लड़नेरे लेई तियार थिये।
एन हेरतां कि अग्रोवं पत्रोवं दूईये पासन इश्शे खलाफ लड़नेरे लेई तियारी कियोरीए, योआबे सारे माहिर इस्राएली शूरबीरन मरां किछ तैलतां अरामी केरे सामने तैना लड़नेरे तियार रख्खे। ते बाकी सिपाही अपने ढ्ला अबीशैरे हथ्थे मां सौंफे, ते तैना अम्मोनी केरे सामने लड़नेरे लेई तियार किये। योआबे ज़ोवं, “अगर अरामी मीं पुड़ भारी भोइ गान, त तू मेरी मद्दत केरां। ते अगर अम्मोनी तीं पुड़ भारी भोन, त अवं तेरी मद्दत केरेलो। तू हिम्मत रख ते अस सारे अपने लोकन ते अपने परमेशरेरे नगरां केरे लेई खातर हिम्मत केरतां लड़म। ते यहोवा ज़ैन तैस रोड़ू लगे तै तैन्ने केरेलो।” एल्हेरेलेइ योआब ते ज़ैना सिपाही तैस सेइं साथी थिये, अरामी सेना सेइं जंग केरनेरे लेई तैन केरे सामने जे, पन अरामी सेना तैन केरे सामनेरां नश्शी। एन हेरतां कि अरामी नेश्शी जेवरेन, अम्मोनी भी तैसेरे ढ्ला अबीशैरे सामनेरां नेशतां अपने नगरे मांजो च़ले जे। तैखन योआब यरूशलेम नगरे जो वापस अव।
फिरी एन हेरतां कि तैना इस्राएली सेना करां हारे, अरामी लोकेईं दूत भेज़तां फरात दरियाएरे पार अरामी सिपाही कुजाए, ते हदादेजेर राज़ेरो सेनापति शोपक अपनो प्रधान बनाव। एसेरी खबर शुन्तां दाऊदे सारे इस्राएली अकोट्ठे किये, ते यरदन दरियारे पार गेइतां तैन पुड़ हमलो कियो, ते तैन केरो मुकाबलो केरनेरे लेई तियार भोए, ते तैखन तैना तैन सेइं लड़ने लगे। पन अरामी इस्राएली सेना करां नेश्शी जे, ते दाऊदे तैन मरां 7000 रथ च़लानेबाले ते 40000 पैदल सिपाही मारे, ते शोपक अरामी सेनापति भी मारो। एन हेरतां कि तैना इस्राएली सेना हारोरेन, हदादेजेरेरे अधिकैरेईं दाऊद राज़े सेइं समझोतो कियो ते तैसेरे अधीन भोइ जे। एल्हेरेलेइ अरामी सेना अम्मोनी केरि मद्दत फिरी न की।
Source notes (1)
- Footnote रथ ते सुवार किरैइये पुड़ पुराने वक्ते मां रथ ते सिपाही लड़नेरे लेई किरैइये पुड़ आने गाते थिये।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.