Bhadrawahi Bible
1 इतिहास 18
दाऊदेरी हमेशा ज़ीत भोनेरे बारे मां ज़िक्र
किछ वक्तेरां बाद दाऊद राज़े पलिश्ती ज़ींतां अपने कब्ज़े मां किये, ते ड्लाव्वन समेत गत नगर भी पलिश्ती केरे हथ्थेरां थुसोड़तां अपने कब्ज़े मां कियूं। फिरी तैनी मोआबी लोक भी ज़ींते, ते मोआबी दाऊदेरे अधीन भोइतां दाऊदे जो लगान देने लगे।
फिरी ज़ैखन सोबा प्रदेशेरो राज़ो हदादेजेर फरात दरियाए तगर राज़ केरनू चातो थियो, तैखन दाऊदे तै हमात नगरे कां हाराव। दाऊदे तैस करां 1000 रथ, 7000 सुवार, ते 20000 पैदल सिपाही ज़ींते, ते दाऊदे सब रथे बाले घोड़ां केरि ज़ैधू केरि पेत्री नस कटाई, पन 100 रथे बाले घोड़े केरि नस न कटाई। ज़ैखन दमिश्क रियासतरे अरामी सिपाही, सोबारे राज़े हदादेजेरी मद्दत केरनेरे लेई आए, तैखन दाऊदे 22000 अरामी सिपाही मारे। तैखन दाऊदे दमिश्केरे अरामे मां सेनारी चौकी बिशैली। एल्हेरेलेइ अरामी दाऊदेरे अधीन भोइतां लगान देने लगे। ते ज़ैड़ी-ज़ैड़ी दाऊद गातो थियो, तैड़ी यहोवा तैस ज़ींत देतो थियो। ते हदादेजेर राज़ेरे सेनारे अधिकैरन कां ज़ैना सोन्नेरी ढालां थी, तैना दाऊदे यरूशलेम नगरे मां ऐनी। ते हदादेजेरेरे तिभत ते कून नंव्वेरे नगरन मरां दाऊदे बड़ी पितल आनी। ते तैस्से सेइं सुलैमाने पितलरां कुण्डां ते खम्भे ते पितलरां भांडां बनावां।
ज़ैखन हमात रियासतरे राज़े तोऊए शुनू कि दाऊदे सोबारे राज़े हदादेजेरेरी सारी सेना ज़ींतोरीए, तैखन तैनी हदोराम नंव्वेरू अपनु मट्ठू दाऊद राज़े कां तैसेरो हाल चाल पुछ़ने ते मुबारक देनेरे लेई भेज़ू, एल्हेरेलेइ कि तैनी हदादेजेरे सेइं लेड़तां तै ज़ींतोरो थियो। (किजोकि हदादेजेर तोऊए सेइं लड़तो रहतो थियो) ते हदोरामे सोन्नू चाँदी ते पितल ते हर किसमेरां भांडां आनोरां थियां। तैना दाऊद राज़े यहोवारे लेई पवित्र केरतां रखां, ते तेन्च़रे तैस सोन्ने-चाँदी सेइं भी कियूं, ज़ैन एदोमी, मोआबी, अम्मोनी, पलिश्ती ते अमालेकी लोकन करां नेवरू थियूं।
फिरी सरूयाहेरे मट्ठे अबीशै लूनेरी वैदी मां 18000 एदोमी सिपाही मारे। तैखन दाऊदे एदोम प्रदेशे मां सेनारी चौकी बिशैली। ते सारे एदोमी दाऊदेरे अधीन भोइ जे। ते दाऊद ज़ैड़ी भी गातो थियो तैड़ी यहोवा तैस ज़ींत देतो थियो। दाऊद सारे इस्राएले पुड़ राज़ केरतो थियो, ते तै अपने सारे लोकन सेइं न्याय ते धार्मिकतारां कम्मां केरतो थियो। प्रधान सेनापति सरूयाहेरू मट्ठू योआब थियूं। इतिहास लिखने बालो अहीलूदेरू मट्ठू यहोशापात थियूं। प्रधान याजक, अहीतूबेरू मट्ठू सादोक, ते एब्यातारेरू मट्ठू अबीमेलेक थियूं, आदालतरो सचिव1 शबशा थियो। करेती ते पलेती लोकां केरो प्रधान यहोयादारू मट्ठू बनायाह थियूं। ते दाऊदेरां बडां मट्ठां तैसेरे खास अधिकारी थिये।
Source notes (1)
- Footnote आदालतरो सचिव राज़ेरो लिखने बालो
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.