Bhadrawahi Bible
1 इतिहास 16
सन्दूख तेम्बु मां रख्खो गानो
ज़ैखन लेवी लोकेईं परमेशरेरे करारेरो सन्दूख एन्हतां तैस तेम्बु मां रख्खो ज़ै दाऊदे तैसेरे लेई बनेवरो थियो। ते परमेशरेरे सामने होमबलि ते मेलबलि च़ैढ़ी जेई। ज़ैखन दाऊद होमबलि ते मेलबलि च़ाढ़ी तैखन तैनी यहोवारे नंव्वे सेइं लोकन आशिर्वाद दित्तो। ते तैनी कौन्शन मड़दन सारे इस्राएली लोकन अक-अक रोट्टी ते अक-अक ट्लाड़ोरो टुक्ड़ो मास1 ते किशमिशेरी अक-अक टिकी बेंटतां दुवाई।
तैखन दाऊदे किछ लेवी एल्हेरेलेइ च़ुने, कि यहोवारे सन्दूखेरे सामने सेवा केरते रान, ते इस्राएलेरे परमेशर यहोवारी चर्चा ते तैसेरू शुक्र ते आराधना केरते रान। तैन केरि टोलरो प्रधान त आसाप थियो, ते तैसेरे बाद जकर्याह थियो, फिरी यीएल, शमीरामोत, यहीएल, मत्तित्याह, एलीआब, बनायाह, ओबेदेदोम ते यीएल थिये। ऐन कां त सैन्गी ते सितार बज़ानेबाले थी, ते आसाप झ़ैल्‍लन पुड़ राग बज़ातो थियो। बनायाह ते यहजीएल याजक परमेशरेरे करारेरे सन्दूखेरे सामने रोज़ तुरही बज़ानेरे लेई च़ुने जे।
दाऊदेरे ज़िरिये शुक्रेरू गीत
तैखन तैस्से दिहाड़े दाऊदे यहोवारू शुक्र केरनेरू गीत ज़ोनू आसाप ते बाकी लेवी लोकन दित्तू।
यहोवारू शुक्र केरा, तैस कां प्राथना केरा।
मुल्खे-मुल्खे मां तैसेरे कम्मां केरो प्रचार केरा।
तैसेरां गीतां ज़ोथ, तैसेरी तारीफ़ केरा,
तैसेरे सारे चमत्कारेरे कम्मन पुड़ ध्यान केरा।
तैसेरे पवित्र नंव्वे पुड़ घमण्ड केरा।
ज़ैना यहोवारे तोप्पने बालेन तैन केरो दिल खुश भोए।
यहोवा ते तैसेरी शक्ति तोप्पा;
तैसेरे दर्शनेरे लेई लगातार तलाश केरा।
तैसेरे कियोरां बड्डां कम्मां
ते कियोरे चमत्कार याद केरा।
हे तैसेरे दास इस्राएलेरे खानदानेरे लोकव,
हे याकूबेरे घरानेरे लोक तुस ज़ैना तैसेरे च़ुनोरेथ!
तैए इश्शो परमेशर यहोवा आहे,
तैसेरां न्यायेरां कम्मां सैरी धेरती पुड़ भोतन।
तैसेरो करार हमेशा याद रखा,
ई तैए वचने ज़ै तैनी हज़ार पीढ़ी केरे लेई ठहरावरोए।
तै करार तैनी अब्राहमे सेइं कियो
ते तैसेरे बारे मां तैनी इसहाके सेइं कसम खाई,
ते तैए तैनी याकूबेरे लेई विधि
केरतां ते इस्राएलेरे लेई हमेशारे लेई करार केरतां एन ज़ोइतां मज़बूत कियो,
तैनी ज़ोवं, “अवं कनान मुल्ख तीं देइलो,
तै बन्टने मां तुश्शो अपनो हिस्सो भोल्हो।”
तैस मौके त तुस परमेशरेरे लोक गिनती मां थोड़े थिये,
बल्के बड़े घट थिये ते तैस मुल्खे मां परदेशी थिये।
ते तैना एक्‍की कौमी मरां होरी कौमी मां,
ते एक्‍की रियासती मरां होरी रियासती मां फिरते राए,
पन परमेशरे कोन्ची मैन्हु तैन पुड़ ज़ुलम केरने न दित्तो।
बल्के अपने लोकां केरे लेई तैन राज़न ई धमकी देतो थियो,
“ज़ैना मीं च़ुनोरेन तैन सेइं न हुरा,
ते न मेरे नेबी केरो नुकसान केरा।”
हे सारे दुनियारे लोक यहोवारू गीत ज़ोथ।
रोज़ तैसेरे कियोरे छुटकारेरी खुशखबरी शुनाते राथ।
गैर कौमन मां तैसेरी महिमा केरा,
ते मुल्खां-मुल्खां केरे लोकन मां तैसेरे कियोरे चमत्कारां केरे बारे मां बियान केरा।
किजोकि यहोवा बड़ो महान ते तारीफ़रे काबले,
ते सारे देबतन करां जादे तैसेरो डर मन्ना।
किजोकि मुल्खां-मुल्खां केरे सारे देबते सिर्फ मूरती आन।
पन यहोवा सुर्ग बनेवरूए।
तैसेरे च़ेवरे पासन वैभव ते ऐश्वर्य आहे;
तैसेरे ठारी पुड़ सामर्थ ते आनन्दे।
हे मुल्खां-मुल्खां केरे कुलां केरे लोकव, यहोवारी तारीफ़ केरा,
यहोवारी महिमा ते शक्ति मन्ना।
यहोवारे नंव्वेरी एरी महिमा मन्ना ज़ै तैसेरे नंव्वेरे काबले।
च़ढ़तल घिन्तां तैसेरे सामने एज्जा,
पवित्र भोइतां सेज़तां यहोवारे सामने मथ्थो टेका।
हे सैरी धेरतरे लोकव तैसेरे सामने थरकां!
संसार एन्च़रे टिकोरूए, कि तैन हिलनेरू नईं।
अम्बर खुशी मनाए ते धरती मघन भोए,
ते कौमी-कौमी मां लोक ज़ोन, “यहोवा राज़ोए।”
समुन्दर ते तैस मां ज़ैन आहे गरज़े,
मैइदान ते ज़ैन किछ तैस मांए खुश भोन।
तैस्से वक्ते जंगलेरे बुट यहोवारे सामने जयजयकार केरन,
किजोकि तै धेरतरो न्याय केरने एजनेबालोए।
यहोवारू शुक्र केरा, किजोकि तै भलोए।
ते तैसेरी दया हमेशारीए।
ते इन ज़ोथ, “हे असन मुक्ति देनेबाले परमेशर असन छुटकारो दे,
ते असन अकोट्ठे केर ते गैर कौमन करां छुटा,
कि अस तेरे पवित्र नंव्वेरू शुक्र केरम,
ते तेरी तारीफ़ केरते तेरे बारे मां बडीयाई केरम।2
शुरू करां लेइतां हमेशा तगर इस्राएलेरे
परमेशर यहोवारी तारीफ़ भोए।”
दाऊदेरे ज़ोनेरे बाद सारे लोकेईं “आमीन” ज़ोवं, ते यहोवारी तारीफ़ की। तैखन दाऊदे यहोवारे करारेरे सन्दूखेरे सामने आसाप ते तैसेरे भियाल रख्खे, कि तैना रोज़ेरे ज़रूरतरे मुताबिक तैस सन्दूखेरे सामने रोज़ सेवा केरते रान, ते 68 लेवी खानदानेरे लोकन समेत ओबेदेदोम, ते पहरेदारां केरे लेई यदूतूनेरू मट्ठू ओबेदेदोम, ते होसा च़ुने। फिरी तैनी सादोक याजक ते बाकी याजक यहोवारे तेम्बेरे सामने, ज़ै गिबोन नगरेरे उच्‍ची ठारी रहतो थियो च़ुनो, कि तैना रोज़ झ़ेझ़ां ड्लवझ़ां होमबलि च़ाढ़नेरी वेदी पुड़ यहोवा कां होमबलि च़ाढ़ते रान, ते तैन सेभी केरे मुताबिक केरन, ज़ैन यहोवारे कानूने मां लिखेरूए, ज़ै तैनी इस्राएली लोकन दित्तोरो थियो। ते तैन सेइं साथी तैनी हेमान ते यदूतून ते होरे भी ज़ैना नवं घिन्तां च़ुनोरे थिये ठहराए, कि यहोवारी हमेशा दयारे वजाई सेइं तैसेरू शुक्र केरन। ते तैन सेइं साथी तैनी हेमान ते यदूतून बज़ानेबालां केरे लेई तुरही ते झ़ेल्‍ली ते परमेशरेरां गीतां ज़ोनेरे लेई बाज़े दित्ते, ते यदूतूनेरां मट्ठां फाटकेरी रखवाली केरनेरे लेई च़ुना।
तैखन सारे लोक अपने-अपने घरे जो च़ले जे, ते दाऊद अपने घराने आशिर्वाद देनेरे लेई अपने घरे जो वापस च़लो जेव।
Source notes (2)
- Footnote ट्लाड़ोरो टुक्ड़ो मास इसेरो मतलब खजूरां केरो केक भी भोइ सकते
- Cross-reference भज. 106:47.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.