Bhadrawahi Bible
1 इतिहास 15
पवित्र सन्दूखेरी यरूशलेम नगरे मां वापसी
दाऊद राज़े दाऊदपुरे1 मां अपने लेई मेहल बनाए, ते परमेशरे सन्दूखेरे लेई अक ठार तियार केरतां अक तेम्बु खड़ो कियो। तैखन दाऊदे हुक्म दित्तो, “लेवी केरे अलावा होरि कोन्चे परमेशरेरो सन्दूख छ़ूनेरी अज़ाज़त नईं, किजोकि यहोवा तैना एल्हेरेलेइ च़ुनोरेन कि तैना परमेशरेरो सन्दूख छ़ून ते तैसेरी सेवा हमेशा केरते रान।”2 तैखन दाऊदे सारे इस्राएली यरूशलेम नगरे मां एल्हेरेलेइ अकोट्ठे किये कि यहोवारो सन्दूख तैस जगाई पुड़ पुज़ान ज़ै तैनी तैसेरे लेई तियार कियोरी थी। एल्हेरेलेइ दाऊदे हारूनेरे खानदानेरे लोक ते लेवी अकोट्ठे किये। कहाती लोकन मरां ऊरीएल नंव्वेरो प्रधान ते तैसेरे 120 भियाल च़ुन्ने। मरारी लोकन मरां असायाह नंव्वेरो प्रधान ते तैसेरे 220 भियाल। गेर्शोमी लोकन मरां योएल नंव्वेरो प्रधान ते तैसेरे 130 भियाल। एलीसापानी लोकन मरां शमायाह नंव्वेरो प्रधान ते तैसेरे 200 भियाल। हेब्रोनी लोकन मरां एलीएल नंव्वेरो प्रधान ते तैसेरे 80 भियाल। ते उज्जीएली लोकन मरां अम्मीनादाब नंव्वेरो प्रधान ते तैसेरे 112 भियाल। दाऊदे सादोक ते एब्यातार नंव्वेरे याजक, ते ऊरीएल, असायाह, योएल, शमायाह, एलीएल ते अम्मीनादाब नंव्वेरे लेवी कुजेइतां तैन सेइं ज़ोवं, “तुस त लेवी पूर्वजां केरे घरानेरे प्रधान आथ। एल्हेरेलेइ अपने भियालन समेत अपने-आपे पवित्र केरा, कि तुस इस्राएलेरे परमेशर यहोवारो सन्दूख तैस जगाई पुड़ पुज़ेई सकतथ ज़ै मीं तैसेरे लेई तियार कियोरीए। किजोकि पेइले फेरे तुसेईं तै न थियो छ़ूवरो, एस वजाई सेइं इश्शो परमेशर यहोवा असन पुड़ सेरकोव, किजोकि अस तैसेरी तलाशी मां कानूनेरे मुताबिक न थिये लगोरे।” तैखन याजकेईं ते लेवी लोकेईं अपनो-आप पवित्र कियो, कि इस्राएलेरो परमेशर यहोवारो सन्दूख नेइ सकन। तैखन तैस हुक्मेरे मुताबिक ज़ै मूसा यहोवारो वचन शुनेइतां दित्तोरो थियो, लेवी लोकेईं सन्दूख डण्डां केरि ताकती सेइं अपने कंधन पुड़ छ़ुइतां च़लाव।
तैखन दाऊदे लेवी प्रधान्न हुक्म दित्तो कि अपने भियालन गीतां ज़ोनेबालन च़ुना ताके तैना सैन्गी, सितार ते झ़ेल्ली देइतां बज़ानेरे लेई ते आनन्दे सेइं उच्ची आवाज़ी मां गीतां ज़ोन। तैखन लेवी लोकेईं योएलेरू मट्ठू हेमान, ते तैसेरे भियालन मरां बेरेक्याहेरू मट्ठू आसाप, ते अपने भियालन मरां मरारी लोकन मरां कूशायाहेरू मट्ठू एतान च़ुनू। तैन सेइं तैनेईं दूइयोवं पदेरे अपने भियाल जकर्याह, बेन, याजीएल, शमीरामोत, यहीएल, उन्नी, एलीआब, बनायाह, मासेयाह, मत्तित्याह, एलीपलेह, मिकनेयाह ते ओबेदेदोम ते यीएल ज़ैना भवनेरे पहरदार थिये च़ुने। ते हेमान, आसाप ते एतान नंव्वेरे गीतां ज़ोनेबाले त पितलरी झ़ेल्ली बज़ेई-बज़ेइतां राग च़लानेरे लेई; ते जकर्याह, अजीएल, शमीरामोत, यहीएल, उन्नी, एलीआब, मासेयाह ते बनायाह, अलामोत नंव्वेरे रागे मां सैन्गी बज़ानेरे लेई; ते मत्तित्याह, एलीपलेह, मिकनेयाह ओबेदेदोम, यीएल ते अजज्याह सितार ते खेन्जरी बज़ानेरे लेई रख्खे जे। ते राग उठानेरो अधिकारी कनन्याह नंव्वेरो लेवी केरो प्रधान थियो, तै राग उठानेरे बारे मां शिखालतो थियो, किजोकि तै माहिर थियो। ते बेरेक्याह ते एल्काना सन्दूखेरे पहरदार थिये। ते शबन्याह, योशापात, नतनेल, अमासै, जकर्याह, बनायाह ते एलीएजेर नंव्वेरे याजक परमेशरेरे सन्दूखेरे अग्री-अग्री नरशिंगो बज़ाते च़ले ते ओबेदेदोम ते यहिय्याह तैसेरे पहरदार थिये। दाऊद ते इस्राएली केरे बुज़ुर्ग ते 1000 सिपेही केरे सेनापति ते सारे मिलतां यहोवारे करारेरो सन्दूख ओबेदेदोमेरे घरे मरां आनन्दे सेइं आन्नेरे लेई जे। ज़ैखन परमेशरे लेवी केरि मद्दत की ज़ैना यहोवारे करारेरो सन्दूख छ़ूनेबाले थिये, तैखन तैनेईं सत दांत ते सत हुड़ बलि किये। दाऊद ते यहोवारे करारेरो सन्दूख छ़ूनेबाले सारे लेवी ते गीतां ज़ोनेबाले ते तैन सेइं साथी राग उठाने बालां केरो प्रधान कनन्याह, इन सेभेइं सनेरे कपड़ेरे चोगे लेवरे थिये, ते दाऊदे सनेरे कपड़ेरो एपोद लेवरो थियो। एन्च़रां सेइं सारे इस्राएली यहोवारे करारेरे सन्दूखे जयजयकार केरते, ते नरशिंगे, तुरही ते झ़ेल्ली बज़ाते ते सैन्गी ते सितार बज़ाते च़ले। ज़ैखन यहोवारे करारेरो सन्दूख दाऊदपुरे मां पुज़्ज़ो तैखन शाऊलेरी कुई मीकल3 दैरी मरां तेकतां दाऊद राज़ो छालां मारतो ते उछ़ड़तो लाव, ते तैसां तै अपने दिले मां घटिया समझ़ो।
Source notes (3)
- Footnote दाऊदपुरे यरूशलेम
- Cross-reference गिन. 1:50;व्यव. 10:8.
- Footnote मीकल दाऊदेरी अक कौन्श मीकल भी थी। 1 शमू. 18:17-30
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.