Paliya Bible
रोमीयो 8:38
Verse 38 is marked below, with the whole chapter around it. Read from the start
चोखली आत्मा ना लारे जीवाय
हाव जे मसी ईसु मे से, तीमनी पोर डंड नो हुकम नी हय। काहाके चोखली आत्मा नो कायदो मसी ईसु ना लारे जीवाय आपे, मने पाप अने मोत ना कायदा सी सोड़ाय लेदी। काहाके जे काम कायदा डील नी कमजोरी ना कारण सी नी कर सक्यो, तीने भगवान कर्यो, अने आह़फा ना सोरा ने पापी डील मे हय्न अने पाप ना लेदे मरवा करीन मोकल्यो, डील मे पाप पोर डंड नो हुकम आप्यो। आनीन करते कायदा नो नेम अमारी मे जे डील ना अनसारे नी पण आत्मा ना अनसारे चाले अने पुरी करे। काहाके डील नु माणेह डील नी वात पोर मन लगाड़े; पण आतमीक माणेह आत्मा नी वात पोर मन लगाड़े। डील पोर मन लगाड़वा ते मोत से, पण आत्मा पोर मन लगाड़वा जीवाय अने सांती से। काहाके डील पोर मन लगाड़वा ते भगवान सी रीह करवा से, काहाके नी ते भगवान ना कायदा मे हय, अने नी ते हय सके। अने जे डील नी हालत मे से, तीहया भगवान ने खुस नी कर सके।
पण जत्यार के भगवान नी आत्मा तमारी मे बहे, ता तमु डील नी हालत मे नी पण आत्मा नी हालत मे से। कदी काना मे मसी नी आत्मा नी हय, ता तीहयो मसी नो नी हय। कदी मसी मे तमु हय, ता डील पाप ना कारण मरलु से; पण आत्मा धरम ना कारण जीवत्ली से। 1अने कदी तीनीत आत्मा जे ईसु ने मरला मे गेथो जीवाड़लो तीनीत आत्मा तमारी मे रेय, ता जे मसी ने मरला मे गेथो जीवाड़लो, तीहयो आह़फा नी आत्मा ना लारे जे तमारी मे रेय, तमारा मरवा वाळा डील ने बी जीवाड़हे।
आनीन करते ए भायु, आपणु डील ना करजाळ्ळा नी, के डील ना अनसारे दाड़ा काटये। काहाके कदी तमु डील ना अनसारे दाड़ा काटहु ता मरहु, कदी आत्मा सी डील ना काम ने मारहु ता जीवत्ला रेहु। आनीन करते के जेतरा माणहु भगवान नी आत्मा चलाड़े तेम चाले, तीहयात भगवान नी अवल्यात से। 23काहाके तमने पावोर नी आत्मा नी जड़ी, के अळी बीह जाय पण तीनी अवल्यात हयवा नी आत्मा जड़ली से, जीनी सी आमु ओ डायला बाह, ओ बाह कीन आड़ीया। आत्मा खुद अमारी आत्मा ह़ाते गवाय देय, के आमु भगवान ना अवल्यात से। अने सोरो से ता वारीस बी, पण भगवान नो वारीस अने मसी नो ह़ाती वारीस से, के जत्यार आमु तीनी ह़ाते दुख झेलहु ता तीनी ह़ाते बड़ाय बी हयहे।
अगी उजन्ती हयवा वाळी बड़ाय
काहाके मे आहयु ह़मजु के आहयी टेमे वाळा दुख अने वेला, आव्वा वाळी टेम अमारी पोर उजन्ती हयवा वाळी बड़ाय अगळ फीका से। काहाके आहयी कळी घण-जबर आह करीन भगवान ना सोरा ने उजन्तो हयवा नी डोळा फाट वाट जोय र्या। काहाके आहयी कळजुग ने आह़फा नी मरजी सी बगाड़वा वाळा ना हात मे नी आप्यो, पण जे कब्जा मे कर देय तीना वगे गेथी आहयी आह सी बगाड़वा वाळा ना हात मे आप देदलो से। के आहयी कळजुग बी आह़फोत बगाड़ीन गुलामी मे गेथो छुटकारो हात करे तेम, अने भगवान नी अवल्यात नी बड़ाय नो छुटकारो बी हात करे तेम। काहाके आपणु ने मालम से के आखी धरती हमणे लग कंजारीन वेला करीन फपड़ी री। 4हीयीत एतरीत नी फपड़ती, पण आपणु बी वेला कर र्या, जीमने भगवान नी आत्मा नो पेलो फोळ जड़ र्यो, आह़फात कंजारी र्या; अने खोळे लेदला सोरा बणवा नु, मतलब आपणा डील ना छुटकारा नी वाट जोय र्या। आह नी लारेत आपणो छुटकारो हयलो से, पण जे चीज नी आपणु आह करया, अने तीहयीत चीज देखवा मे आवे, ता तीहयी चीज आह नी केवाय? काहाके जे चीज ने कोय देखवा बाज र्यो हय, ता तीहयो ते चीज नी आह काहा करहे? पण जे चीज ने आपणु नी देखया, कदीम तीहयीत चीज नी आह करया, ता गम खाय्न डोळा फाट वाट बी जोवया।
आहयीत रीते भगवान नी आत्मा बी आपणी लुलखाय मे आपणु ने सात देय, काहाके आपणु ने आहयु नी मालम हय के आपणु ने कीकम भगवान ह़ाते वीन्ती करवा जोवे; पण भगवान नी आत्मा आह़फीत डहका लीन आपणी ह़मज गेथी बारी हय्न भगवान ह़ाते वीन्ती करे। अने आपणु मन ने पारखवा वाळो भगवान जाणे के भगवान नी आत्मा नी मरजी ह़ु से? काहाके तीहयो भगवान नी आत्मा चोखला माणहु जुगु भगवान नी मरजी ना अनसारे भगवान ह़ाते वीन्ती करे।
अने आपणु ने मालम से के जे भगवान ने मोंग करे, तीमनी जुगु आखी वात भलाय नेत उबजाड़े, मतलब तीहया माणहु जुगु भलाय उबजाड़े जे भगवान नी मरजी ना अनसारे भगवान ना बोलावला से। काहाके जीमने तीहयो पेले गेथोत जाण लेदो, तीमने तीहयो पेले गेथो ठेराय बी देदो, आनीन करते के तीहया भगवान ना बेटा ना सीका मे बण जाय अने भगवान नो बेटो ढेरेत भाय-बेन्या मे पेलखोळ्यो बेटो बण जाय तेम। आसम करीन भगवान जीमने पेले गेथो ठेरायो, तीमने बोलायो बी, अने जीमने बोलायो तीमने धरमी बी ठेरायो, अने जीमने धरमी ठेरायो तीमने बड़ाय मे बी भेसकी देदो।
मसी ईसु मे भगवान नो मोंग
एतरे ए भायु! आहयी वात ने जाणीन आमु ह़ु कीया? आहयु कीया के कदीम भगवान अमारी वगो से, ता अमारो वीरोद कोय करहे? कोय नी करे। भगवान आह़फा ना बेटा ने लग आपणीन करते मरवा करीन आप देदो: ता तीनी ह़ाते आपणु ने अळी आखु कंय काहा नी आपे? आपहेन आपहे। भगवान जीमने टाळलो से, तीमनी पोर कोय गुनो ढाळहे? कोय नी ढाळे। भगवान ते आह़फोत तीमने धरमी ठेराव्वा वाळो से। ता आसम कोय से, जे तीमने डंड नो हुकम आपहे? ईसु मसी डंड नो हुकम आपहे ह़ु? नी आपे। काहाके तीहयो ते मर ज्यो, अने मर्या-ह़र्या मे गेथो जीवतो हय्न बठो बी हय ज्यो, अने भगवान ना जमणी धेड़े बह र्यो, अने आपणी जुगु भगवान ह़ाते वीन्ती बी कर्या करे। आपणु ने ईसु मसी ना मोंग गेथा सेटा करवा नी हीम्मत कोय पांह से? वेला आंग्ये करहे ह़ु, नीता काळ आंग्ये करहे ह़ु, नीता नांगरला रेहु ता आंग्ये हय जहु ह़ु, नीता आफत आवहे ता आंग्ये हय जहु ह़ु, तलवार सी मारवा आवहे ता आंग्ये हय ह़ु? जीसम खरला सास्तर मे लीखलु बी से:
तारी जुगु आमु दाड़ीन मोत ना हात मे अपाय जीया।
आमु ते तीहया गाडरान तेम गीणाये, जे गाडरा ने मार नाखे।
पण ते बी आमु भगवान ना लारे जे आमु ने मोंग कर्यो जीक गेथा बी अगा सेकीन से। काहाके मने भरहो से के कोय बी चीज आमने तीना मोंग सी अलग नी कर सके, नी ते मोत अने नी ते जीवाय, नी ते ह़रगदुत अने नी ते बुरो मुख्यो, नी ते हमणे अने नी अळतेण, अने नी ताखत, नी उचाय अने नी उंडाय अने नी कंय कळी मे बणावली चीज, आमने भगवान ना मोंग सी, जे अमारा मालीक मसी ईसु मे से अलग कर सके।
Source notes (4)
- Cross-reference 1 कुरन्थी 3:16
- Cross-reference गलातीयो 4:5-7
- Cross-reference मरकुस 14:36; गलातीयो 4:6
- Cross-reference 2 कुरन्थी 5:2-4
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.