Paliya Bible
रोमीयो 9
मे ईसु मसी मे ह़ाचलीनेत केम, मे झुट नी मेल्तो, अने मारु मन बी चोखली आत्मा भेळतु गवा देय; के मे घण-जबर दुखी से, अने मारु मन बी एक रंगु दुख्तु रेय। काहाके मारी आहयी हेर से, के मे मारा भाय-बेटा जुगु, जे डील ना अनसारे भाय-बेटा से, ईसु मसी गेथो आग्ये हयवा नी हेर कर र्यो। तीहया ईस्रायली से; खोळे लेवायवा नो हक, अने बड़ाय, अने वायदो, अने कायदो, अने भगवान नी भक्ती करवा ना हक नी बोली भगवान ईमनी ह़ाते करलो से। डाह-डाहा बी ईमनी ह़ाते जोड़ायला से, अने ईसु मसी बी डील ना मान सी ईमनी मेत पयदा हयलो से, जे आखाम नो भगवान से, अने पीड़ीडीट आखाम नी पोर राज करे जे जलम जुगाळु से।
पण आसम नी हयु के भगवान नी करली बोली टळ जी, काहाके ईस्रायली अवल्यात मे आखा ईस्रायली नी हय। अने आखा अब्राहम नी कुळी मे पयदा हया करीन आखा तीनीत अवल्यात नी हय, पण लीखलु से के “ईसाक ना लारेत तारो वेल वदहे।” मतलब डील ना अनसारे पयदा हयवा वाळी अवल्यात भगवान नी अवल्यात नी हय, पण भगवान नी बोली ना अनसारे पयदा हयली अवल्यातेत भगवान नी अवल्यात गीणाय। काहाके वायदा नी बोली आहयी से, के “मे वारु टेम ना अनसारे पासो आवही, अने तीहयी टेमे सारा नो एक सोरो हय रेहे।”
अने एतरुत नी, पण रीबीका लग एकीत अदमी ना लारे भारेपोगे हयी, अने तीना बे सोरा हया जे आपणो बाह हतो अने तीनु नाम ईसाक हतु। अने हजु लग सोरा पयदा नी हयला हता, अने तीहया भलु-बुरु नी करला हता, तीहयी टेमे भगवान पेले गेथो केदो, “मोट्लो भाय, नान्ला भाय नी गुलामी करहे।” एतरे भगवान नी मरजी तीना टाळला नी अनसारे हये, जे माणेह काम ना अनसारे टेकलो नी रेय, पण बोलाव्वा वाळा भगवान ना लारे टेकलो रेहे। आनीत अनसारे रीबीका ने केदलु हतु “तारो मोट्लो सोरो, तारा नान्ला सोरा नी सेवा-चाकरी करहे।” खरला सास्तर मे लीखलु से: “मे एसाव सी याकुब ने जादा मोंग कर्यो।”
एतरे आपणु ह़ु कीया? भगवान अगळ नीयाव नी हये ह़ु? कदी नी! काहाके भगवान मुसा ने केय, “जीनी पोर दया करवा लागे तीनी पोर दया करही, अने जीनी पोर गीण करवा लागे तीनी पोर गीण करही।” एतरे आहयी वात हेर करन्या माणहु पोर टेकली नी हय, अने मेहनत करवा वाळा पोर बी टेकली नी हय, पण दया करवा वाळा भगवान पोर टेकली से। काहाके खरला सास्तर मे फीरोन ने केदलु हतु, के “मे तने आनीन करते टाळलो से, के मे तारी पोर मारी ताखत देखाड़ु, अने आसम करीन मारा नाम नो परच्यार आखी कळी मे हये।”1 एतरे तीने जीनी पोर दया करवा लागे तीनी पोर दया करे; अने जीने एकहीट्यो बणाव्वा लागे तीने एकहीट्यो बणाय देय।
भगवान नी रीह अने दया
आहयु ह़मळीन तु आहयु केही के “ता भगवान बीजा नो वाक काहा काडे? जरीक वीच्यार करो! भगवान नी मरजी नो वीरोद कोय कर सके?” ए माणेह तु कोय से जे भगवान ने ह़ाम्बो जपाप आप देय? घड़ली चीज घड़न्या ने आहयु की सके ह़ु, तु मने आसम काहा घड़्यो? ह़ु कुमार ने कादा पोर हक नी हय ह़ु? के तीहयो कादा ना एकी लोये करीन एक ठाहरु वारु कामे लगाड़वा करीन अने एक ठाहरु खराब काम मे लगाड़वा करीन घड़े।
पेल्ना वारा नो भगवान आह़फा नी रीह देखाड़वा अने आह़फा नी सक्ती देखाड़वा करीन रीह लागे एवा माणहु नी वेठ लेदो, जे जलमका खुटवा करीन घड़ायला हता। अने दया आवे एसवा माणहु नो फायदो करवान करते तीहयो तीमनी वेठ लेदो, तीमने भगवान आह़फा नी बड़ाय देखाड़वान करते घड़लो हतो। दया आवे एसवा माणहु आपणुत हता, तीहया युहदी मे ना एतरात नी हता, पण आड़जात्या माणहु मे ना बी हता। जीसम के तीहयो होसे नाम नी कीताप मे बी केय,
“जे मारा असामी नी हता तीमने मे मारा असामी केही,
अने जे मारा मोंगाळ्ळा नी हता तीमने मे मारा मोंगाळ्ळा केही।”
अने जे जागा पोर तीमने आहयु केदलु हतु, “तमु मारा माणहु नी हय”
तीहयात जागा मे तीहया जीवत्ला भगवान नी अवल्यात केवायहे।
अने यसायो ईस्रायली माणहु ना बारा मे आड़ीन केय, “भले ईस्रायली माणहु नी गीनती दर्या नी बालु रेत ना काकरान तेम हहे, ते बी तीमनी मे थोड़ाक बचहे। काहाके भगवान धरती पोर तीनो डंड नो हुकम ममार पुरो करहे।” जीसम यसायो पेले बी केतो हतो, “कदीम मेळा नो भगवान आपणी जुगु थोड़ीक अवल्यात नो वेल नी सोड़तो ता आपणु सदोम अने अमोरा ह़ेर ने तेम हय जता।”
ईस्रायल नो वण-भरहो
हाव ह़ु केवा जोवे? आहयु केवा जोवे के आड़जात्या जे भगवान ना धरम नी हेर नी करत्ला तीमने भगवान नो धरम जड़ ज्यो मतलब तीहया धरम ने जे भरहा नी लारे से। पण ईस्रायली माणहु मुसा ना कायदा ना लारे जीवीन धरमी बणवा नी ह़ेर करत्ला। पण तीमने मुसा ना कायदा ना अनसारे जीवीन धरमी नी बणायु। तीमने आनीन करते धरमी नी बणायु काहाके तीहया मुसा ना कायदा भगवान पोर भरहो करीन नी पाळ्या पण कायदा पाळीन धरमी बणवा नी हेर कर्या अने तीहया ते ढाटड़े ठेहवाया जे तीमने पाड़ देय। सास्तर मे लीखलु से:
“देखो मे सीयोन मे एक ठेह लागवा नो दगड़ो,
अने ठोकर खावा ना चाफर्या मेकु,
अने जे कोय तीनी पोर भरहो करहे।
तीहयो लाजे नी पड़े।”2
Source notes (2)
- Cross-reference नीरगमन 9:16
- Cross-reference यसाया 28:16
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.