Paliya Bible
रोमीयो 7
वेवा हयला जीवाय नो उदारण
ए भायु तमु नी जाणता ह़ु मे कायदा ने जाणवा वाळा ने केम, के जत्यार लग माणेह जीवत्लो रेय, तत्यार लग तीनी पोर कायदा नो राज रेहे? काहाके लाडा वाळी बयर कायदा ना अनसारे आपणा लाडा सी तीहयो जीवत्लो रेय तां लग बंदायली रेय, पण लाडो मर जाय, ता तीहयी लाडा ना कायदा सी छुट जी। आनीन करते कदी लाडा ना जीवतेत तीहयी बीजा माणेह नी हय जाय ता तीहयी छीनाळ्याण केवायहे, पण कदी लाडो मर जाय, ता कायदा सी छुट जी, आञे लग के कदी बीजा माणेह नी हय जाय ते बी छीनाळ्याण नी ठेरे। तेमेत ए मारा भायु, तमु बी मसी ना डील ना लारे कायदा ना लेदे मरला बण ज्या, के तीहया बीजा ना हय जावो, जे मरला मे गेथो जीवी उठ्यो: काहाके आमु भगवान ना लेदे फोळ लावये। काहाके जत्यार आमु डील ना हता, ता पाप नी लालच जे कायदा ना लारे हती, मोत ना फोळ पयदा करवा करीन आपणा डील मे काम करती हती। पण जीना हक मे आमु हता तीना लेदे मरीन, हाव कायदा सी छुट ज्या, के लीखायलु नी पुराणी रीती पोर नी पण आत्मा नी नवली रीती पोर सेवा कर र्या।
कायदा अने पाप
ता आमु ह़ु कीया? ह़ु कायदा पाप से? कदी नी! पण बीना कायदा नो मे पाप ने नी ओळखतो: कायदो कदी नी केतो, के लालच ना कर, ता मे लालच नी जाणतो। पण पाप मोखो देखीन हुकम ना लारे मारी मे आखा लालच पयदा कर्यो, काहाके बीना कायदा सी पाप मरलो से। मे ते कायदा वगर नो पेले जीवत्लो हतो, पण जत्यार हुकम आयो, ता पाप जीवी ज्यो, अने मे मर ज्यो। अने तीहयोत हुकम जे जीवाय ना लेदे हतो, मारा लेदे मोत नो कारण ठेर्यो। काहाके पाप मोखो देखीन हुकम ना लारे मने धोको देदो, अने तीना लारे मने मारी बी नाख्यो।
आनीन करते कायदो चोखलो से, अने हुकम बी चोखलो, वारु अने धरमी से अने वारलो से। ता तीहयी वात जे वारु हती मारी लेदे मोत नो कारण बणी? कदी नी! पण पाप तीहयी वारली चीज ना लारे मारा लेदे मोत ने पयदा करवा वाळो बण्यो के तीनो पाप हयवा उजन्तो हये, अने हुकम ना लारे पाप घणो पापी बण्यो।
पाप अने कायदा
आमु जाणये के कायदा ते आत्मीक से, पण मे कळी अने पाप ना हाते वेचायलो चाकर्यो से। 1जे मे करु तीने नी जाणतो; काहाके जे मे चाहु तीहयु नी करतो, पण जीनी सी मने ह़ीगी आवे तीहयुत करु। अने कदी, मे नी चाहु तीहयुत करु, ता मे मान लेम के कायदो भलो से। ता आवी हालत मे तीनो करवा वाळो मे नी, पण पाप से जे मारी मे बहलो से। काहाके मे जाणु के मारी मे अने मारा डील मे वारलु नी रेय, हेर ते मारी मे से, पण भला काम करवा नी मारी मे ताखत नी हय। काहाके जे वारला काम नी मे हेर करु तीहया ते नी करु, पण जे बुराय नी हेर नी करु, तीनेत कर्या करु। अने कदी मे तीहयुत कर्या करु जीनी हेर नी करु, ता तीनो करवा वाळो मे नी, पण पाप जे मारी मे बह र्यो।
जत्यार मने कायदो जड़्यो ता पतो चाल्यो के जत्यार भलाय करवा नु हेर करु, ता बुरायत करु। काहाके मे मोय ना मन सी ते भगवान ना कायदा सी घणो खुस रेम। पण मारा डील ना अंगु मे बीजा भाती ना कायदा नी जानकारी करु, जे मारा मन ना कायदा सी झुमाय अने मने पाप ना कायदा ना कब्जा मे नाख देय जे मारा अंग मे रेय। मे केवो नीकम्मो माणेह से! मने आहयी मोत ना डील सी कोय सोड़ावहे? अमारा मालीक ईसु मसी ना लारे भगवान ने घणो वारु से केम। आनीन करते के मे मन मे ते भगवान ना कायदा नो, पण डील सी पाप ना कायदा नी सेवा करु।
Source notes (1)
- Cross-reference गलातीयो 5:17
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.