Paliya Bible
रोमीयो 6:23
Verse 23 is marked below, with the whole chapter around it. Read from the start
पाप मे मरला, मसी मे जीवत्ला
ता आमु ह़ु कीया? आमने पाप करतात रेवा जोवे ह़ु के भगवान नी गीण-दया जादा हये? कदी नी! आमु जत्यार पाप ना लेदे मर ज्या ता आनी सी अगा तीनी मे कीसम जीवहु? तमु नी जाणता ह़ु के आपणु आखा जे मसी ईसु ना बपतीस्मा लेदा, तीनी मोत मे बपतीस्मा लेदा। 1अने तीहयी मोत ना बपतीस्मा लेवा सी आपणु तीनी ह़ाते गड़ाय ज्या, काहाके जीसम मसी बाह नी बड़ाय ना लेदे मरला मे गेथो जीवाड़्यो, तीसमेत आपणु बी नवली जीवाय नी चाल चालो।
काहाके कदी आपणु तीनी मोत मे तीनी ह़ाते र्या ता तीनीन तेम पासा जीवता हयवा मे बी तीनी ह़ाते रेहु। आमने मालम से के अमारी पुराणी जीवाय तीनी ह़ाते कुरुस पोर चड़ाय देदी, काहाके पापी डील फालतु हय जाय, अने आमु अगा पाप ना गुलाम नी रीया। काहाके जे मर ज्यु, तीहयु पाप सी छुटीन धरमी ठेर्यु। आनीन करते कदी आमु मसी ह़ाते मर ज्या, ता अमारो भरहो आहयो से के तीनी हाते जीवहु बी। काहाके आहयु जाणये के मसी मरला मे गेथो जीवतो हय्न पासो मरवा नो नी; हाव तीनी पोर मोत नो हक नी रेय। काहाके तीहयो जे मर ज्यो ता पाप ना लेदे एकी कावा मर ज्यो; पण जे जीवत्लो से ता भगवान ना लेदे जीवत्लो से। आसमेत तमु बी खुद नी लेदे ह़मजो के तमु पाप ना लेदे मर ज्या, पण भगवान ना कारण मसी ईसु मे जीवत्ला ह़मजो।
आनीन करते पाप तमारा मरला डील मे राज नी करे, के तमु तीनी हेर ना हक मे रेवो; अने आपणा अंगु ने अधरम नी सेवा ना लेदे पाप ना सुपरत ना करो पण खुद ने मरला मे गेथो पासो जीवतो हयो ह़मजीन भगवान ने ह़ोप देवो, अने आपणा डील ना अंगु ने धरम ना हत्यार ना रुप मे भगवान ना सुपरत कर देवो। तत्यार तमारी पोर पाप नो हक नी रेय, काहाके तमु कायदा ना हक मे नी, पण बरकत ना हक मे से।
धारमीक्ता नो पावोर
ता ह़ु हयु? आमु आनीन करते पाप करीया के आमु कायदा ना हक मे नी पण बरकत ना हक मे से? कदी नी! तमु नी जाणता के कोयना हुकम मानवा करीन तमु आह़फा ने गुलाम ना रुप मे ह़ोप देवो, तीनात गुमाल से, चाहे पाप ना जीनु आखरी मे मरनु से, पण मे भगवान ने तु घणो वारु से केम, के तमु जे पेले पाप ना पावर्या हता, पण ते बी हाव मन सी तीनी ह़ीकापण ने मानवा बाज ज्या, जे ह़ीकापण ना ह़ाचा मे ढाळला से। अने हाव तमु पाप नी गुलामी मे गेथा छुटीन धरम ना पावर्या बण जेला से। मे तमारा डील नी लुलखाय ना लेदे माणहु ना अनसारे केम, जीसम तमु आपणा अंग ने पाप करवा करीन वीटळ्ला काम करवा अने छीनाळा ना गुलाम बणाय्न तीना हात मे आपला हता, तेमेत हाव तमु आपणा अंग ने चोखलो बणाव्वा करीन भगवान ना धरम ना पावर्या बणाय्न तीना हात मे ह़ोप देवो।
जत्यार तमु पाप ना पावर्या हता, ता धरम वगे गेथा तमु छुटला हता। एतरे जे वात सी तमु लजवाय र्या, ता तीहयी वात सी पेले तमने कंय फायदो हयत्लो? काहाके तीनो आखरी फोळ ते मोत से। पण हाव पाप नी गुलामी गेथा छुटीन भगवान ना गुलाम बणीन, तमने आहयो फोळ जड़लो से के तमु चोखला बण जावो, अने आखरी मे अमरकाय जीवाय हात करवु से। काहाके पाप नी दाड़की ते मोत से, पण भगवान नो फोकट्यो वाटो आपणा मालीक ईसु मसी मे अमरकाय जीवाय से।
Source notes (1)
- Cross-reference कुलुस्यो 2:12
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.