Paliya Bible
रोमीयो 5
भगवान सी मेळ राखो
अने जत्यार आमु भरहा सी धरमी ठेर्या, ता आपणा मालीक ईसु मसी ना लारे भगवान ह़ाते मेळ राखो। जीना लारे भरहा ना कारण तीहयी दया लग जीनी मे आमु बणला से, अमारी पुग बी हयी, अने भगवान नी बड़ाय नी आह पोर घमंड करो। नीस्तु आहयु नी, बाखीन आमु दुख मे बी घमंड करो, आहयु जाणीन के दुख मे धीरज से। अने धीरज सी खरा नीकळवा, अने खरा नीकळवा सी आह पयदा हये। अने आह सी लाज नी आवे, काहाके जे चोखली आत्मा आमने आप मेली तीना लारे भगवान नो मोंग आपणा मन मे नाख मेल्यो।
काहाके जत्यार आमु कमजोर हता, ता मसी वारु टेमे पापी माणहु ना लेदे मर्यो। काना धरमी जुगु कोय मरे, आहयु ते हय नी सके; पण हय सके के कोय भला माणेह जुगु मरवा नी ह़ेर करे। पण भगवान आपणी पोर मोंग नी भलाय आहयी रीते उजन्ती करे के जत्यार आमु पापीत हता, तत्यार मसी अमारा लेदे मर्यो। अने हाव आमु तीना लोय ना कारण धरमी ठेर्या, ता तीना लारे भगवान नी रीह सी काहा नी बचया? जत्यार वेरी हता ते बी तीना सोरा ना मोत नी लारे भगवान ह़ाते मेळ हयो ता मेळ हय जवा सी तीना जीवाय ना कारण आपणु छुटकारो काहा नी हात करया? नीस्तु आहयुत नी, पण आपणु आपणा मालीक ईसु मसी ना लारे, जीना लारे आपणो मेळ हयलो से, भगवान मे खुस हयला से।
आदम ना लारे मोत मसी ना लारे जीवाय
आनीन करते जीसम एक माणेह ना लारे पाप आहयी कळी मे आयो, अने पाप ना लारे मोत आयी, अने आहयी रीते मोत आखा माणहु मे फेल जी, काहाके आखा पाप करला। कायदा आपवा नी टेम लग पाप कळी मे हतो, पण जां कायदा नी हय तां पाप नी गणाय जाय। ते बी आदम सी लीन मुसा लग मोत तीहया माणहु पोर राज करी, जे बी तीहया आदम, जे तीहया आव्वा वाळा नी सेलाणी से, के गुनान तेम पाप नी कर्या।
पण जीसम गुना नी हालत से, तेम भगवान ना वाटा नी हय। काहाके एकीत माणेह ना गुना नी लारे घणा माणहु मर ज्या, ते बी भगवान नो वाटो एकीत माणेह नी लारे मतलब ईसु मसी नी दया नी लारे आखा ने घण-जबर जड़लो से। अने आहयो वाटो, एकीत माणेह पाप गुना ना मोत ना फोळ ने तेम नी हय; काहाके एकीत जणो पाप कर्यो, अने पाप नो डंड नो दाड़ो टकाय ज्यो, पण ढेरेत पाप करवा सी वाटो पयदा हयो के ढेरेत माणहु धरमी बण जाय तेम। कदीम एकीत माणेह ना पाप नी लेदे मोत राज करवा बाज ज्यो, ता जे माणहु दया अने धरम ना वाटा घण-जबर हात करे, तीहया एकीत जणा नी लारे, मतलब ईसु मसी नी लारे ह़ाचलीनेत जलमकी जीवाय मे राज करहे।
एतरे जीसम एकीत जणा ना पाप नी लेदे आखा गुनाळ्ळा गणाया, तेमेत एकीत जणा ना धरम ना काम नी लारे आखा ने अमरकाय जीवाय आपण्यो धरम नो वाटो जड़ ज्यो।
एतरे जेम एक माणेह हुकम नी पाळवा सी आखा पापी बण ज्या, तेमेत एक माणहे हुकम पाळवा सी आखा धरमी बण ज्या।
अने मुसा नी लारे लीखलो कायदो वच मे आय लाग्यो, अने माणहु मे पाप जादा हयवा बाज ज्यो। पण जां ह़ारीक पाप जादा हयो तां दया बी जादात वदती ज्यी। जेम पाप माणहु मे मोत लावतो जाय्न राज कर्यो, तेमेत आपणा ईसु मसी नी लारे गीण-दया बी अमरकाय जीवाय नी करते माणहु ने धरमी ठेरावीन राज करती जाय तेम।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.