गीनती 6

नाजीरो नो नेम

1अळतेण यहोवा मुसा ने केदो, 2ईस्‌रायलीम ने के जत्‌यार कानो अदमी नीता बयर नाजीरा1 नी मान्‌ता, मतलब आह़फा ने यहोवा जुगु ह़ोपवा नी खास मान्‌ता माने, 3ता तीहया अंगुर ना माणला रोह अने ह़रु सी सेटा रेय; तीहया नी अंगुर नो रोह पीय अने नी ह़रु, अने नी अंगुर नो रोह थोड़ोक बी पीय, अने अंगुर बी नी खाय, भले लील्‌ला हय भले ह़ुकला हय।2 4जेतरा दाड़ा तीहयो भगवान जुगु ह़ोपायलो रेहे तेतरा दाड़ा तक बीज सी लगाड़ीन छोतरु तक, जे कंय अंगुर ना वेला सी उगे अने फाले, तीनी मे गेथु कंय बी नी खाय।

5अळतेण जेतरा दाड़ा भगवान ने ह़ोपवा नी मान्‌ता मांग्‌यो हय तेतरा दाड़ा तक तीहयो आह़फा ना मुंडे पावड़ी नी फीरवे; अने जत्‌यार तक तीहया दाड़ा पुरा नी हये, जे दाड़ा मे तीहयो भगवान ने ह़ोपायलो से, तांह तक तीहयो चोखलो ठेरहे, अने आह़फा ना मुंडे ना नीम्‌बाळा मोटा करतो रेय। 6जेतरा दाड़ा तीहयो यहोवा जुगु ह़ोपायलो रेय तेतरा दाड़ा तक काना बी धोड़ ह़ाते नी जाय। 7भले तीनो बाह, नीता आय्‌ह, नीता भाय, नीता बेनेह बी मरे, ते बी तीहयो तीमना कारण सी वीटळे नी; काहाके खुद ना भगवान जुगु ह़ोपायलो रेवा नी सेलाणी3 तीना मुंडा पोर रेहे। 8आह़फा ना ह़ोपला रेवा ना आखा दाड़ा मे तीहयो यहोवा जुगु चोखलो ठेर रेय।

9कदीम तीनी ह़ाते कोय उचकालेत मर जाय, अने तीनी ह़ोपायलो रेवा नी जे सेलाणी4 तीना मुंडा पोर रेहे तीहयी वीटळ जाय, ता तीहयो चोखो हयवा ना दाड़े, मतलब ह़ातवा दाड़े आह़फा नु मुंडु बोड़ावे। 10अने आंठवा दाड़े तीहयो बे पानकुकड़ा नीता पारवा ना बे बच्‌चा मेल-मीलाप वाळा तम्‌बु ना झापले पुंजारान्‌तां ली जाय, 11अने पुंजारो एक ने पापबादा अने बीजा ने होम बादा करीन तीनी जुगु पछतावो करे, काहाके तीहयो धोड़ ना कारण पापी ठेरलो से। अने पुंजारो तीहयात दाड़े तीनु मुंडु अळी चोखु करे, 12अने तीहयो आह़फा ना भगवान ने ह़ोपायलो रेवा ना दाड़ा ने यहोवा जुगु ह़ोपायलो ठेरावे, अने एक साल नु एक गाडरु नु बच्‌चु गुना नी बादा करीन ली आवे; अने जे दाड़ा आनी गेथा पेले वीत जेला तीहया रीकामा गणे, काहाके तीनी ह़ोपायलो रेवा नी सेलाणी5 वीटळी जी। 13“अळतेण जत्‌यार नाजीरा ना ह़ोपायला रेवा ना दाड़ा पुरा हये, तीहयी टेम जुगु तीनो आहयो नेम से; मतलब तीने मेल-मीलाप वाळा तम्‌बु ना झापले पुगाड़े, 14अने तीहयो यहोवा जुगु होम बादा करीन एक साल नु एक पुरी रीते वारलु गाडरु नु बच्‌चु जे गाडरो हय, अने पापबादा करीन एक साल नु एक पुरी रीते वारलु गाडरु नु बच्‌चु जे गाडरी हय, अने मेलबादा जुगु एक पुरी रीते वारलो गाडरो, 15अने एक टोपली भरीन खमीर वगर ना रोट्‌ला, मतलब तेल मे मीलावला मेदा नी पुड़ी, अने तेल मे चोपड़ली खमीर वगर नी पापड़ी, अने तीहयी बादान अन नी बादा अने रेचव्‌वा नी बादा; आहया आखा चड़ावा ह़ाते ली जाय। 16आहयु आखु ने पुंजारो यहोवा अगळ पुगाड़ीन तीनी पापबादा अने होम बादा ने चड़ावे, 17अने खमीर वगर ना रोट्‌ला नी टोपली भेळ गाडरो यहोवा जुगु मेलबादा करीन, अने तीहयी मेलबादा नी अन नी बादा अने रेचव्‌वा नी बादा ने बी चड़ावे। 18ता नाजीरा आह़फा ना ह़ोपायला रेवा नी सेलाणी वाळु मुंडु ने मेल-मीलाप वाळा तम्‌बु ना झापले बोड़ावीन आह़फा ना नीम्‌बाळा ने तीहयु आक्‌ठु पोर नाख देय जे मेलबादान तळे रेहे। 19अळतेण जत्‌यार नाजीरा आह़फा नी ह़ोपायला रेवा नी सेलाणी वाळु6 मुंडु ने बोड़ाय लेय ता पुंजारो गाडरा नो रांदलो खांदो, अने टोपली मे गेथो एक खमीर वगर नो रोट्‌लो, अने एक खमीर वगर नी पापड़ी लीन नाजीराम ना हात पोर मेक देय, 20अने पुंजारो ईमने हीलाव्‌वा वाळी भेट करीन यहोवा अगळ हीलावे; हीलावली छाती अने ह़ातळ्‌यु भेळ आहयु बी पुंजारा जुगु चोखलु ठेरे; आनीन अळतेण तीहयो नाजीरा अंगुर नो माणलो रोह पी सकहे।

21“नाजीरा नी मान्‌ता नो, अने जे चड़ावो तीने आह़फा ना ह़ोपायवा ना कारण सी यहोवा जुगु चड़ाव्‌वा नो रेहे तीनो बी आहयो नेम से। जे चड़ावो तीहयो आह़फा ने बणे तीनी अनसारे चड़ाय सके, तीनी सी जादा जेवी मान्‌ता तीहयो मांग्‌यो हय, तेमेत आह़फा ना ह़ोपायला रेवा ना नेम नी अनसारे तीने करवा पड़हे।”7

पुंजारा नी संयबरकत आपवा नी रीती

22अळतेण यहोवा मुसा ने केदो, 23हारुन अने तीना सोरा ने के तमु ईस्‌रायली ने आहया बोलु सी संयबरकत आप्‌या करजो: 24यहोवा तने बरकत आपे अने तारी रखवाळी करे; 25यहोवा तारी पोर आह़फा ना मोडा नु वीजाळु चमकाड़े। अने तारी पोर दया करे; 26यहोवा आह़फा नु मोडु तारी भणीन करे, अने तने सांती आपे। 27“आहयी रीते तीहया मारु8 नाम ने ईस्‌रायली मे लेय, अने में ईमने बरकत आप्‌या करही।”