गीनती 5

वीटळ्‌ळा माणहु ने बाहर करनु

1अळतेण यहोवा मुसा ने केदो, 2ईस्‌रायलीम ने हुकम आप के तीहया आखा कुड़ावा ने, अने जेतरा ने सराव रोग हय, अने धोड़ ना कारण सी वीटळ्‌ळा हय, तीहया आखा ने पड़ावा मे गेथा नीकाळ देय; 3आवा ने भले अदमी हय के भले बयर, पड़ावा मे गेथा नीकाळीन बारा कर देय, कंय माय्‌न आसम नी हय जाय के तमारो पड़ावो, जीमनी वचमे में रेम, तीमना कारण सी वीटळ जाय। 4ईस्‌रायली माणहु आसमेत कर्‌या, मतलब आवा माणहु ने पड़ावा मे गेथा नीकाळीन बारा कर देदा; जेम यहोवा मुसा ने केदलो हतो तीहया तेमेत कर्‌या।

नुकसान ने भरवा नो नेम

5अळतेण यहोवा मुसा ने केदो, 6“ईस्‌रायलीम ने कीदे, के जत्‌यार कोय अदमी नीता बयर कानो एवो पाप करीन जे माणहु कर्‌या करे यहोवा पोर नो भरहो तोड़े, अने तीहयु माणेह गुनाळ्‌ळु हय, 7ता तीहयो आह़फा नो करलो पाप मान लेय; अने पुरु नुकसान ने भरवा मे पांचवो वाटो जोड़ीन आह़फा ना गुना ना बदला मे तीनेत आपे, जीना बारा मे गुनाळ्‌ळो हयो हय। 8पण कदीम तीहया माणेह नु कोय ह़गाय-ह़ाय वाळु नी हय जीने गुना नो बदलो भर देय, ता तीहया गुना नो जे बदलो यहोवा ने भर देय तीहयो पुंजारा नो हय, अने तीहयु तीहया पछतावा वाळु गाडरु करते जादा हय जीनी सी तीनी जुगु पछतावो करे।1 9अने जेतरी चोखी करली चीज ईस्‌रायलीम नी लारे खास भेट करीन पुंजारान्‌तां लावे, तीहयी तीनीत रेय; 10आखा माणहु नी चोखी करली चीज तीनीत ठेरे; कोय जे कंय पुंजारा ने आपे तीहयु तीनुत ठेरे।”

छीनाळु नी जाच

11अळतेण यहोवा मुसा ने केदो, 12“ईस्‌रायली माणहु ने कीदे, के कदीम काना माणेह नी बयर गलत चाल चालीन तीनो भरहो तोड़ीन धोको देय, 13अने कानो माणेह तीनी ह़ाते कंय गलत करे, पण तीहयी वात तीना अदमी सी ह़तायली हय अने तीने मालम नी हय, अने तीहयी वीटळी जी, पण नी ते तीना वीरोद मे कोय गवा हय, नी तीहयी गलत काम करते धरायी हय; 14कदीम अदमी ने तीनी लाडी पोर सण्‌का हय जाय काहाके तीहयी खुद ने वीटाळ देदली से; नीता अदमी आह़फा नी लाडी पोर रीह करवा बाज जाय जीसम के तीने तीनी लाडी पोर सण्‌का हय जाय, पण लाडी खुद ने वीटाळ्‌ळी नी हय। 15ता तीहयो अदमी आह़फा नी लाडी ने पुंजारान्‌तां ली जाय, अने तीनी जुगु एपा नो दहवो वाटो2 जळगम नो मेदो चड़ावो करीन ली आवे; पण तीनी पोर तेल नी नाखे, अने नी लोबान मेके, काहाके तीहयी खीजवाळी अने फोम कराव्‌वा वाळी, मतलब अधरम नी फोम कराव्‌वा वाळी अन बादा रेहे।

16“ता पुंजारो तीहयी बयर ने ली जाय्‌न यहोवा अगळ उबो करे; 17अने पुंजारो कादा नु ठाहरु मे चोखलु पाणी लेय, अने रेवा ना जागा नी जागा पोर नु कादु मे गेथु थोड़ुक लीन तीहयु पाणी मे नाख देय। 18ता पुंजारो तीहयी बयर ने यहोवा अगळ उबो करीन तीना मुंडे ना नीम्‌बाळा ने छोड़ देय, अने फोम कराव्‌वा वाळी अन बादा ने जे रीह वाळी से, तीना हात पोर मेक देय। अने आह़फा ना हात मे पुंजारो कड़वलु पाणी ली रेय जे सराप लगाड़वा नो कारण रेहे। 19ता पुंजारो बयर ने ह़ाम खवाड़ीन केय, के कदीम कोय अदमी तारी ह़ाते गलत काम नी कर्‌यो हय, अने तु खुद ना धणी ने छोड़ीन बीजा भणीन फीरीन वीटळी नी हय, ता तु आहयु कड़वलु पाणी ना गुण सी जे सराप नो कारण रेय तीनी सी बची रेही। 20पण कदीम तु आह़फा ना अदमी ने छोड़ीन बीजा भणीन फीरीन वीटळी हय, अने तारा अदमी ने छोड़ीन कानो बीजो अदमी तारी ह़ाते छीनाळु कर्‌यो हय ता 21पुंजारो तीने सराप देवा वाळी ह़ाम खवाड़ीन केय, यहोवा तारी बच्‌चादानी ने ह़ड़ावे अने तारु पेट ह़ुजाड़े, अने माणहु तारु नाम लीन सराप आपे अने वड्‌या करे; 22मतलब तीहयु पाणी जे सराप नो कारण रेय तारा आतड़ा मे जाय्‌न तारा पेट ने ह़ुजाड़े, अने तारी बच्‌चादानी ने ह़ड़ाय देय। ता तीहयी बयर केय आमीन, आमीन।

23“जत्‌यार पुंजारो सराप ना आहया बोलु कीताप मे लीखीन तीहयु कड़वलु पाणी वेर मीटाड़ीन, 24तीहयी बयर ने तीहयु कड़वलु पाणी पीवाड़े जे सराप नो कारण रेय, अने तीहयु पाणी जे सराप नो कारण रेहे तीहयी बयर ना पेट मे जाय्‌न कड़वु हय जहे। 25अने पुंजारो बयर ना हात मे गेथी रीह वाळी अन नी बादा ने लीन यहोवा अगळ हीलावीन वेदीन्‌तां पुगाड़े; 26अने पुंजारो तीहयी अन नी बादा मे गेथो फोम कराव्‌वा वाळो वाटो, मतलब मुठेक लीन वेदी पोर धपाड़े, अने तीनीन अळतेण बयर ने तीहयु पाणी पीवाड़े। 27अने जत्‌यार तीहयो तीने तीहयु पाणी पीवाड़ देय, ता कदीम तीहयी वीटळ्‌ळी हयी हय अने आह़फा ना धणी नो भरहो तोड़ी हय, ता तीहयु पाणी जे सराप नो कारण रेय तीहयी बयर ना पेट मे जाय्‌न कड़वु हय जहे, अने तीनु पेट ह़ुजहे, अने तीनी बच्‌चादानी ह़ड़ जहे, अने तीहयी बयर नु नाम तीना माणहु नी वचमे सरापीत हयहे। 28पण कदीम तीहयी बयर वीटळ्‌ळी नी हय अने चोखली हय, ता तीहयी वण-गुनाळ्‌ळी ठेरहे अने भारेपोगे हय सकहे।

29“रीह नो नेम आहयोत से, भले कानी बयर आह़फा ना धणी ने छोड़ीन बीजा भणीन जाय्‌न वीटळ जाय, 30भले अदमी ना मन मे रीह पयदा हये अने तीहयो आह़फा नी बयर पोर रीह करवा बाज जाय; ता तीहयो तीने यहोवा अगळ उबो करे, अने पुंजारो तीनी पोर आहया आखा नेम पुरा करे। 31ता माणेह अधरम सी बचीन रेहे, अने बयर आह़फी ना अधरम नो बोज खुद उचलहे।”