Paliya Bible
गीनती 7
मुख्या नी भेट
अळतेण जत्यार मुसो रेवा ना जागा ने उबो कर्यो अने आखु ह़मान भेळ तीनु अभीसेक करीन तीने चोखु कर्यो अने आखु ह़मान भेळ वेदी नु बी अभीसेक करीन तीने चोखु कर्यो, ता ईस्रायली ना मुख्या जे आह़फा-आह़फाम ना आड़ा-बुड़ाम ना घोराणा ना मुख्या अदमी, अने कुळ ना बी मुख्या बणीन गणती करवा ना काम नी जुगु टाळला हता, तीहया यहोवा अगळ भेट ली आया, अने तीमनी भेट छो ढुपा-गाडी अने बारे बोळद्या हता, मतलब बे-बे मुख्या भणी गेथी एक-एक गाडी, अने एक-एक मुख्या भणी गेथो एक-एक बोळद्यो; आमने तीहया रेवा ना जागा अगळ यहोवा ह़ाते ली ज्या। ता यहोवा मुसा ने केदो, “तीहयु ह़मान ने तु ईमनी पांह गेथु ली ले के मेल-मीलाप वाळा तम्बु नी सेवा ना काम आवे, करीन तु ईमने लेवीम नु खास सेवा नु काम नी अनसारे ईमने वाट दे।” अने मुसो तीहया आखा गाड्या ने, अने बोळद्या ने लीन लेवीम ने आप देदो। गेर्सोनीयो ने ईमनी सेवा नु काम नी अनसारे तीहयो बे गाडी अने च्यार बोळद्या आप्यो; अने मरारीम ने तीमनी सेवा नु काम नी अनसारे तीहयो च्यार गाडी अने आंठ बोळद्या आप्यो; आहयु आखु ने हारुन पुंजारा ना सोरा ईतामार ना हक मे कर्या। पण कहातीम ने तीहयो कंय बी नी आप्यो, काहाके तीमनी जुगु चोखली चीज नु उचलवा नु आहयु सेवा नु काम आपलु हतु।
अळतेण जत्यार वेदी नु अभीसेक हयु ता मुख्या तीमनी ह़ोपवा नी भेट वेदीन्तां ली ज्या। काहाके यहोवा मुसा ने केदलो हतो, “वेदी ने ह़ोपवा नी जुगु मुख्या माणहु आह़फा-आह़फाम नी भेट एक-एक दाड़े एक-एक जणो चड़ावे।” एतरे जे अदमी पेल्ला दाड़े आह़फा नी भेट ली ज्यो तीहयो यहुदा ना कुळ वाळा अम्मीनादाब नो सोरो नहसोन हतो; तीनी भेट आहयी हती, मतलब चोखला जागा ना सेकेल ना हीसाब सी एक ह़ो तीस सेकेल1 नी एक चांदी नी परात, अने सत्तर सेकेल2 नो एक चांदी नो कटवरो, आहया बेम ठाहरा अन नी बादा जुगु तेल मे भेसकायला मेदा वेर भरला हता; अने अळतेण धुप वेर भरलु दह सेकेल3 ह़ोना नु एक धुप देवा नु ठाहरु; होम बादा जुगु एक वाछड़ु, एक गाडरो अने एक साल नु गाडरु नु बच्चु; पापबादा जुगु एक बोकड़ो; अने मेलबादा जुगु बे बोळद्या, अने पांच गाडरा, अने पांच बोकड़ा, अने एक-एक साल ना पांच गाडरा ना बच्चा। अम्मीनादाब ना सोरा नहसोन नी आहयीत भेट हती। बीजा दाड़े ईस्साकार नो मुख्यो सुवार नो सोरो नतनेल भेट ली आयो; तीहयी आहयी हती, मतलब चोखला जागा ना सेकेल ना हीसाब सी एक ह़ो तीस सेकेल चांदी नी एक परात, अने सत्तर सेकेल नो एक चांदी नो कटवरो, आहया बेम अन नी बादा जुगु तेल मे भेसकायला मेदा वेर भरला हता; अळतेण धुप वेर भरलु दह सेकेल ह़ोना नु धुप देवा नु ठाहरु; होम बादा जुगु एक वाछड़ु, एक गाडरो अने एक साल नु एक गाडरु नु बच्चु; पापबादा जुगु एक बोकड़ो; मेलबादा जुगु बे बोळद्या, अने पांच गाडरा, अने पांच बोकड़ा, अने एक-एक साल ना पांच गाडरा ना बच्चा। सुवार ना सोरा नतनेल नी आहयीत भेट हती।
तीसरा दाड़े जबुलुनीयो नो मुख्यो हेलोन नो सोरो एलीयाब आहयी भेट ली आयो, मतलब चोखला जागा ना हीसाब सी एक ह़ो तीस सेकेल चांदी नी एक सेकेल परात, अने सत्तर सेकेल चांदी नो एक कटवरो, आहया बेम अनबादा जुगु तेल मे भेसकायला मेदा वेर भरला हता; अळतेण धुप वेर भरलु दह सेकेल नु एक धुप देवा नु ठाहरु; होम बादा जुगु एक वाछड़ु, एक गाडरु, अने एक साल नु एक गाडरु नु बच्चु; पापबादा जुगु एक बोकड़ो; मेलबादा जुगु बे बोळद्या, अने पांच गाडरा, अने पांच बोकड़ा, अने एक-एक साल ना पांच गाडरा ना बच्चा। हेलोन ना सोरा एलीयाब नी आहयीत भेट हती। चोवथा दाड़े रुबेनीम नो मुख्यो सदेउर नो सोरो एलीसुर आहयी भेट ली आयो, मतलब चोखला जागा ना हीसाब सी एक ह़ो तीस सेकेल चांदी नी एक परात, अने सत्तर सेकेल चांदी नो एक कटवरो, आहया बेम अनबादा जुगु तेल मे भेसकायला मेदा वेर भरला हता; अळतेण धुप सी भरलु दह सेकेल ह़ोनु नु धुप देवा नु ठाहरु; होम बादा जुगु एक वाछड़ु अने एक गाडरु, अने एक साल नु एक गाडरु नु बच्चु; पापबादा जुगु एक बोकड़ो; अने मेलबादा जुगु बे बोळद्या, अने पांच गाडरा, अने पांच बोकड़ा अने एक-एक साल ना पांच गाडरु ना बच्चा। सदेउर ना सोरा एलीसुर नी आहयीत भेट हती।
पांचवा दाड़े सीमोनीयो नो मुख्यो सुरीसद्दे नो सोरो सलुमीएल आहयी भेट ली आयो, मतलब चोखला जागा नी सेकेल ना हीसाब सी एक ह़ो तीस सेकेल चांदी नी एक परात, अने सत्तर सेकेल चांदी नो एक कटवरो, आहया बेम अनबादा जुगु तेल मे भेसकायला मेदा वेर भरला हता; अळतेण धुप सी भरलु दह सेकेल ह़ोना नु एक धुप देवा नु ठाहरु; होम बादा जुगु एक वाछड़ु, अने एक गाडरु, अने एक साल नु एक गाडरु नु बच्चु; पापबादा जुगु एक बोकड़ो; अने मेलबादा जुगु बे बोळद्या, अने पांच गाडरा, अने पांच बोकड़ा, अने एक-एक साल ना पांच गाडरा ना बच्चा। सुरीसद्दे ना सोरा सलुमीएल नी आहयीत भेट हती। छटवा दाड़े गादीम नो मुख्यो दुएल नो सोरो एल्यासाप आहयी भेट ली लायो, मतलब चोखला जागा नी सेकेल नी हीसाब सी एक ह़ो तीस सेकेल चांदी नी एक परात, अने सत्तर सेकेल चांदी नो एक कटवरो, आहया बेम अनबादा जुगु तेल मे भेसकायला मेदा वेर भरला हता; अळतेण धुप सी भरलु दह सेकेल ह़ोना नु एक धुप देवा नु ठाहरु; होम बादा जुगु एक वाछड़ु, अने एक गाडरु, अने एक साल नु एक गाडरु नु बच्चु; पापबादा जुगु एक बोकड़ो; अने मेलबादा जुगु बे बोळद्या, अने पांच गाडरा अने पांच बोकड़ा, अने एक-एक साल ना पांच गाडरा ना बच्चा। दुएल ना सोरा एल्यासाप नी आहयीत भेट हती।
ह़ातवा दाड़े एप्रेमीयो नो मुख्यो अम्मीहुद नो सोरो एलीसामा आहयी भेट ली आयो, मतलब चोखला जागान सेकेल ना हीसाब सी एक ह़ो तीस सेकेल चांदी नी एक परात, अने सत्तर सेकेल चांदी नो कटवरो, आहया बेम अनबादा जुगु तेल मे भेसकायला मेदा वेर भरला हता; अळतेण धुप सी भरलु दह सेकेल ह़ोना नु एक धुप देवा नु ठाहरु; होम बादा जुगु एक वाछड़ु, अने एक गाडरो, अने एक साल नु एक गाडरु नु बच्चु; पापबादा जुगु एक बोकड़ो; अने मेलबादा जुगु बे बोळद्या, अने पांच गाडरा अने पांच बोकड़ा, अने एक-एक साल ना पांच गाडरा ना बच्चा। अम्मीहुद ना सोरा एलीसामा नी आहयीत भेट हती।
आंठवा दाड़े मनस्से ना कुळ नो मुख्यो पदासुर नो सोरो गम्लीएल आहयी भेट ली आयो, मतलब चोखला जागान सेकेल ना हीसाब सी एक ह़ो तीस सेकेल चांदी नी एक परात, अने सत्तर सेकेल चांदी नो एक कटवरो, आहया बेम अन नी बादा जुगु तेल मे भेसकायला मेदा वेर भरला हता; अळतेण धुप सी भरलु दह सेकेल ह़ोना नु एक धुप देवा नु ठाहरु; होम बादा जुगु एक वाछड़ु, अने एक गाडरो, अने एक साल नु एक गाडरु नु बच्चु; पापबादा जुगु एक बोकड़ो; अने मेलबादा जुगु बे बोळद्या, अने पांच गाडरा अने पांच बोकड़ा, अने एक-एक साल ना पांच गाडरा ना बच्चा। पदासुर ना सोरा गम्लीएल नी आहयीत भेट हती।
नव्वा दाड़े बीन्यामीन नो मुख्यो गीदोनी नो सोरो अबीदान आहयी भेट ली आयो, मतलब चोखला जागान सेकेल ना हीसाब सी एक ह़ो तीस सेकेल चांदी नी एक परात, अने सत्तर सेकेल चांदी नो एक कटवरो, आहया बेम अनबादा जुगु तेल मे भेसकायला मेदा वेर भरला हता; अळतेण धुप सी भरलु दह सेकेल ह़ोना नु एक धुप देवा नु ठाहरु; होम बादा जुगु एक वाछड़ु, अने एक गाडरो, अने एक साल नु एक गाडरु नु बच्चु; पापबादा जुगु एक बोकड़ो; अने मेलबादा जुगु बे बोळद्या, अने पांच गाडरा अने पांच बोकड़ा, अने एक-एक साल ना पांच गाडरा ना बच्चा। गीदोनी ना सोरा अबीदान नी आहयीत भेट हती।
दहवा दाड़े दानीयोम नो मुख्यो अम्मीसद्दे नो सोरो अहीएजेर आहयी भेट ली आयो, मतलब चोखला जागान सेकेल ना हीसाब सी एक ह़ो तीस सेकेल चांदी नी एक परात, अने सत्तर सेकेल चांदी नो एक कटवरो, आहया बेम अनबादा जुगु तेल मे भेसकायला मेदा वेर भरला हता; अळतेण धुप सी भरलु दह सेकेल ह़ोना नु एक धुप देवा नु ठाहरु; होम बादा जुगु एक वाछड़ु, अने एक गाडरो, अने एक साल नु एक गाडरु नु बच्चु; पापबादा जुगु एक बोकड़ो; अने मेलबादा जुगु बे बोळद्या, अने पांच गाडरा अने पांच बोकड़ा, अने एक-एक साल ना पांच गाडरा ना बच्चा। अम्मीसद्दे ना सोरा अहीएजेर नी आहयीत भेट हती।
ग्यारवा दाड़े आसेरीयाम नो मुख्यो ओक्रान नो सोरो पगीएल आहयी भेट ली आयो, मतलब चोखला जागान सेकेल ना हीसाब सी एक ह़ो तीस सेकेल चांदी नी एक परात, अने सत्तर सेकेल चांदी नो कटवरो, आहया बेम अन नी बादा जुगु तेल मे भेसकायला मेदा वेर भरला हता; अळतेण धुप सी भरलु दह सेकेल ह़ोना नु एक धुप देवा नु ठाहरु; होम बादा जुगु एक वाछड़ु, अने एक गाडरो, अने एक साल नु एक गाडरु नु बच्चु; पापबादा जुगु एक बोकड़ो; अने मेलबादा जुगु बे बोळद्या, अने पांच गाडरा अने पांच बोकड़ा, अने एक-एक साल ना पांच गाडरा ना बच्चा। ओक्रान ना सोरा पगीएल नी आहयीत भेट हती।
बारवा दाड़े नप्तालीयोम नो मुख्यो एनान नो सोरो अहीरा आहयी भेट भेळ आयो, मतलब चोखला जागान सेकेल ना हीसाब सी एक ह़ो तीस सेकेल चांदी नी एक परात, अने सत्तर सेकेल चांदी नो एक कटवरो, आहया बेम अनबादा जुगु तेल मे भेसकायला मेदा वेर भरला हता; अळतेण धुप सी भरलु दह सेकेल ह़ोना नु एक धुप देवा नु ठाहरु; होम बादा जुगु एक वाछड़ु, अने एक गाडरो, अने एक साल नु एक गाडरु नु बच्चु; पापबादा जुगु एक बोकड़ो; अने मेलबादा जुगु बे बोळद्या, अने पांच गाडरा अने पांच बोकड़ा, अने एक-एक साल ना पांच गाडरा ना बच्चा। एनान ना सोरा अहीरा नी आहयीत भेट हती।
वेदी ना अभीसेक नी टेमे ईस्रायल ना मुख्या भणीन गेथी तीनी ह़ोपवा नी भेट आहयी हती, मतलब चांदी नी बारे परात, चांदी ना बारे कटवरा, अने ह़ोना ना बारे धुप देवा ना ठाहरा। एक-एक चांदी नी परात एक ह़ो तीस सेकेल नी, अने एक-एक चांदी नो कटवरो सत्तर सेकेल नो हतो; अने चोखला जागा ना सेकेल ना हीसाब सी आहया आखा चांदी ना ठाहरा बे हजार च्यार ह़ो सेकेल4 ना हता। अळतेण धुप सी भरला ह़ोना ना बारे धुप देवा ना ठाहरा जे चोखला जागा ना सेकेल ना हीसाब सी दह-दह सेकेल ना हता, तीहया आखा धुप देवा ना ठाहरा एक ह़ो वीह सेकेल5 ह़ोनु ना हता। अळतेण होम बादा जुगु आखु मेळीन बारे वाछड़ा, बारे गाडरा, अने एक-एक साल ना बारे गाडरा ना बच्चा, आह़फा-आह़फाम नी अन नी बादा भेळ हता; अने अळतेण पापबादा जुगु बारे बोकड़ा हता; अने मेलबादा जुगु आखा मेळीन चोवीस बोळद्या, अने साट गाडरा, अने साट बोकड़ा, अने एक-एक साल ना साट गाडरा ना बच्चा हता। वेदी नु अभीसेक हयवान अळतेण तीनी ह़ोपवा नी भेट आहयीत हयी। अने जत्यार मुसो यहोवा ह़ाते वात करवा करीन मेल-मीलाप वाळा तम्बु मे ज्यो, ता तीहयो पछतावा नु ढाकणु पोर गेथो, जे गवा नी चीट्ठी ना बाक्सा पोर हतु, तीहया बेम घुवड़ नी वचमे गेथी तीनी अवाज ह़मळ्यो जे तीनी ह़ाते वात करतो हतो; अने तीहयो यहोवा तीनी ह़ाते वात कर्यो।
Source notes (5)
- Footnote डेड़ कीलो नी आड़े-धेड़े
- Footnote आंठ ह़ो ग्राम नी आड़े-धेड़े
- Footnote एक ह़ो दह ग्राम नी आड़े-धेड़े
- Footnote मतलब 28 कीलो नी आड़े-धेड़े
- Footnote मतलब एक कीलो चाळीह ग्राम नी आड़े-धेड़े
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.