गीनती 36

सलोफाद ना सोर्‌या नो वाटो

1युसुफीम ना कुळ मे गेथो गीलाद, जे माकीर नो सोरो अने मनस्‌से ना सोरा नो सोरो हतो, तीना कुळीवेला ना कुळ ना आड़ा-बुड़ा ना घोराणा ना मुख्‌या-मुख्‌या अदमी तीहया मुख्‌याम नी अगळ, मुसान्‌तां ह़ाते जाय्‌न केदा, जे ईस्‌रायली ना आड़ा-बुड़ा ना घोराणा ना मुख्‌या अदमी हता, 2“यहोवा तमने हुकम आपलो हतो, के ईस्‌रायली माणहु ने चीट्‌ठी नाखीन देस ने वाट देजो; अने यहोवा आहयो बी हुकम आपलो के अमारा ह़गला सलोफाद नो वाटो तीमना सोर्‌या ने आप देजो। 3पण कदी तीहयी ईस्‌रायली माणहु ने छोड़ीन बीजा कुळ मे वेवा कर लेय, ता तीमनो वाटो तीहया कुळ नो हय जहे, ता अमारो वाटो कम हय जहे। 4अने जत्‌यार ईस्‌रायली माणहु नो जुबली1 नो साल आवहे, ता सलोफाद ना सोर्‌या नो वाटो जे कुळ मे तीहयी वेवा करहे तीमने ठञकोत जड़ जहे अने अमारा वाटा सी अलग हय जहे।”

5ता मुसो यहोवा ना हुकम ना लारे ईस्‌रायली माणहु ने केदो, “युसुफ ना कुळ जे की र्‌या तीहयु वारु की र्‌या। 6सलोफाद ना सोर्‌या ना बारा मे यहोवा आहयो हुकम आपलो से, के जे अदमी तीमनी नींगा मे वारु लागे तीनी सी वेवा करे; पण आह़फा ना बाह नी कुळी मे वेवा करे। 7अने ईस्‌रायली माणहु नी कुळी नो वाटो बीजी कुळी मे नी भेसकायवा जोवे; ईस्‌रायली माणहु आह़फा-आह़फाम ना बाह नी कुळी ना वाटा मे बणीन रेवा जोवे। 8अने ईस्‌रायली माणहु नी कानी बी कुळी मे कोय नी सोरी हय जे वाटो लेवा वाळी हय, तीहयी काना आह़फा ना बाह ना कुळ ना भायु ह़ाते वेवा करे, आनी लेदे के ईस्‌रायली माणहु आह़फाम ना बाह ना वाटा पोर हक रेय। 9आनी लेदे के बाह ना कुळ नो वाटो बीजी कुळ ना नाम पोर नी हये; ईस्‌रायली माणहु आह़फा-आह़फाम ना कुळी ना वाटा मे बणला रेय।”

10जे हुकम यहोवा मुसा ने आपलो हतो तेमेत सलोफाद नी सोरी करी। 11अने सलोफाद नी सोरी: महला, तीर्‌सा, होग्‌ला, मील्‌का, अने नोवा आह़फा ना काका ना सोरा ह़ाते वेवा कर लेदी। 12तीमना वेवा युसुफ ना सोरा मनस्‌से ना कुळ मे हया, अने तीमनो वाटो तीमना डाहला-बाह ना कुळ ना घोराणा ना अदीकार मेत र्‌यो।

13जे हुकमु अने नेम यहोवा मोवाब ना मयदान मे यरीहोन्‌तां यरदन नंदी ना धेड़े मुसा ना लारे ईस्‌रायली माणहु ने आपलो, तीहया आहया से।