Paliya Bible
वेवस्थावीवरन 1
होरेब बड़े गेथा जवा नो हुकम
जे वात मुसो यरदन नंदी नी ह़ेली धेड़े जंगल मे, मतलब सुप नी सामने ना अराबा मे अने पारान अने तोपेल नी वचे, अने लाबान हसेरोत अने दीजाहाब ह़ेरु मे, आखा ईस्रायल ना माणहु ने केदलो तीहयी आहयी से। होरेब गेथी कादेसबर्ने तक सेईर बड़ा नी वाट ग्यारे दाड़ा नी से। चाळीह साल ना ग्यारवा मयना ना पेल्ला दाड़े जे कंय यहोवा मुसा ने ईस्रायली माणहु ने केवा नो हुकम आपलो हतो, तीनी अनसारे मुसो तीमने आहयी वात केवा बाज ज्यो। मतलब जत्यार मुसो एमोरीयो ना राजा हेसबोन मे रेवा वाळा सीहोन ने अने बासान ना राजा असतारोत मे रेवा वाळा ओग ने एद्रेई मे हराय नाख्यो, अने आनीन अळतेण यरदन नंदी नी ह़ेली पार मोवाब देस मे तीहयो नेम ना बारा मे चोखुझण देखाड़वा बाज ज्यो, “अमारो भगवान यहोवा होरेब ने तां आमने केदलो हतो, तमुने आहया बड़ान्तां रेत्ला ढेरेत दाड़ा हय जेला से; एतरे हाव आञे गेथा चालो, अने एमोरीयो ना बड़ा मे ना देस ने, अने ह़ु अराबा मे, ह़ु बड़ा मे, ह़ु हेट्लु देस, ह़ु दखणाव देस मे, ह़ु दर्या धेड़े, मतलब लबानोन बड़ा तक अने परात नाम नी मोट्ली नंदी तक रेवा वाळा कनानीयो ना देस मे जत रेवो। ह़मळो, में तीहया देस ने तमारी सामने कर देम; जे देस ना बारा मे यहोवा अब्राहम, ईसाक, अने याकुब, तमारा आड़ा-बुड़ा ह़ाते ह़ाम खाय्न केदलो हतो के में आने तमुने अने तमारी बाद तमारी अवल्यात ने आपही, हीने हाव जाय्न आह़फाम ना हक मे कर लेवो।”
मुसा नी लारे नीयाव करवा वाळा ने टाळनु
(नीरगमन 18:13-27)
अळतेण तीहयीत टेमे, में तमने केदो, “में तमारो भार एखलो नी उचली सकतो; काहाके तमारो भगवान यहोवा तमुने आञे तक वदाड़लो से के तमु गीनती मे आज ह़रग ना तारान तेम गीणाये नी एतरा हय जेला से। तमारा आड़ा-बुड़ा नो भगवान तमुने हजार गुणा अळी बी वदाड़े, अने आह़फा ना वायदा नी अनसारे तमुने बरकत बी आपतो रेय! पण तमारी वेला, अने भार, अने झगड़ा-रगड़ा ने में एखलो कां तक वेठ सकु? एतरे तमु आह़फा-आह़फाम ना घोराणा मे गेथा अक्कल वाळा अने ह़मजदार अने जानकार माणहु ने टाळ लेवो, अने में तीमने तमारी पोर मुख्यो ठेरावही। आना जपाप मे तमु मने केदा, जे कंय तु आमने केय तीने करवा वारु से। एतरे में तमारा घोराणा ना मुख्या माणहु ने जे अक्कल वाळा अने जानकार माणेह हता टाळीन तमारी पोर मुख्या ठेरायो, मतलब हजार-हजार, ह़ोव-ह़ोव, पचाह-पचाह अने दह-दह ना उपर डायला अने तमारा घोराणा ना मुख्या ने टाळ्या।
“अने तीहयी टेमे में तमारा नीयाव करवा वाळा ने हुकम आप्यो, तमु आह़फाम ना भायु ना मुकदमा ह़मळ्या करो, तीमनी वचे अने तीमनी धेड़े वाळा अंजाण्या माणहु नी वचे बी खराय सी नीयाव करजो। नीयाव करती टेमे कोयनी वगे नी वळजो; जेम मोट्ला नी ह़मळे तेमेत नान्ला माणहे नी बी ह़मळजो; कोय नु मोडु देखीन नी बीहजो, काहाके नीयाव भगवान नु काम से; अने जे मुकदमो तमारी जुगु काठो से, तीहयो मारी पांह ली आवजो, अने में तीने ह़मळही। जे-जे काम तमुने करवा हतु, तीहया आखाम ने करवा नो हुकम मे तीहयी टेमे तमने आपलो हतो।
ह़ाचली झुट्ली ने जाणवा वाळा ने कादेसबर्ने मे मोकलवा
(गीनती 13:1-33)
“आमु होरेब गेथा चालीन आपणा भगवान यहोवा ना हुकम नी अनसारे तीहया आखा मोट्ला अने खतरनाक बड़ा मे हय्न ज्या, जीने तमु एमोरीयो ना बड़ा ना देस नी वाट्ये देख्या, अने आमु कादेसबर्ने तक आया। तां में तमने केदो, तमु एमोरीयो ना बड़ा ना देस तक आय जेला से जीने अमारो भगवान यहोवा आमु ने आप र्यो। देखो, तमारो मालीक भगवान तमारी सामने आहयु देस करलो से। जावो, अने आपणा आड़ा-बुड़ा ना मालीक भगवान ना बोल नी अनसारे तीनी पोर हक कर लेवो। ना बीहो, अने नी तमारु मन कमजोर करो।
“पण तमु आखा मारीन्तां आया अने केदा, आपणु आपणी अगळ थोड़ाक माणहु मोकली देता, जे तीहया देस नो पतो लगाड़ीन आमु ने आहयी खबर आपे, के कानी वाट्ये हय्न चालवा पड़हे अने काना-काना ह़ेर मे भरायवा पड़हे?
“आहयी वात मारी नींगा मे वारु लागी के मे बारे माणहु मतलब एक-एक घोराणा मे गेथा एक-एक माणेह ने टाळ लेदो। तीहया अगा बड़्या अने बड़ा ना देस पोर चड़ ज्या, अने एसकोल नाम ना कोतड़ा तक पुगीन तीहया देस ना बारा मे जाण्या। तीहया आह़फा-आह़फाम ना हात मे तीहया देस ना फोळ लीन अमारीन्तां, पासा आया, अने तीहया अमारी पांह खबर बी लाया, ‘जे देस अमारो भगवान मालीक आमु ने आप र्यो, तीहयु वारु से।’
“ते बी तमु तां जवा सी नीकारो कर्या, अने आपणा भगवान ना हुकम नो वीरोद कर्या। तमु आह़फाम ना तम्बु मे बक-बक कर्या अने केदा, मालीक अमारी ह़ाते वेर राखे, एतरे तीहयो आमने मीस्र देस सी नीकाळीन लावलो से के एमोरी माणहु ना हात मे सोप देय, अने आहयी रीते आमु ने खत्तम कर देय। आमु कां जीया? खुद अमारा भाय आहयु कीन अमारा मन ने कमजोर कर देदा के, ‘तां वाळा माणहु अमारी सी जादा उचा अने जादा ताखत वाळा से। तीमना ह़ेर मोट्ला से, जीमना भीतड़ा ह़रग सी वात करे, अने अनाक कुळ ना मोट्ला माणहु ने बी देख्या।’
“में तमने केदो, तमु तीमनी सी ना बीहो अने ना घबरावो। तमारो भगवान यहोवा जे तमारी अगळ-अगळ चाले, तीहयो तमारी जुगु लड़ाय करहे, जीसम तीहयो तमारा डोळा अगळ मीस्र देस मे कर्यो; अळतेण तमु बड़ा मे बी देख्या के जे रीते कानो माणेह आह़फा ना सोरा ने उचलीन चाले, तीहयी रीते तमारो भगवान यहोवा बी तमुने ली ज्यो। जत्यार तक तमु आहया जागा पोर नी पुग ज्या, तां लग तीहयो तमुने तीहयी आखी वाट्ये उचलीन ली ज्यो जीनी पोर तमु ज्या। आहयी वात पोर बी तमु आह़फाम ना भगवान यहोवा पोर भरहो नी कर्या, जे तमारी अगळ-अगळ आनीन करते चालतो र्यो के तमारी जुगु पड़ावो नाखवा नो जागो ह़ोदे, अने राते आक्ठा मे अने दीहु वादळा मे हय्न चाल्यो के तमने तीहयो वाट देखाड़े जे वाट्ये तमु चाल सको।”
ईस्रायल ने डंड जड़वा
(गीनती 14:20-45)
“पण तमारी तीहयी वात ह़मळीन यहोवा ने रीह लाग आयी, अने तीहयो आहयी ह़ाम खादो, पक्का आहयी बुरी पीड़ी ना माणहु मे गेथा एक बी माणेह तीहया वारला देस ने नी देख सके, जीने में तीमने आपवा नी ह़ाम खादलो हतो। यपुन्ने नो सोरो कालेब एतरोत तीने देखहे। जे जागा पोर तीना पोग पड़ला से, तीहयी जागा मे तीने अने तीनी अवल्यात ने आपही; काहाके तीहयो मारी पसळ पुरी रीती सी आवलो से।” अने मारी पोर बी यहोवा तमारा कारण सी खीजवायलो से, अने आहयु केदो, तु बी तां नी जाय सके; नुन नो सोरो यहोसु जे तारी सामने उबो रेय, तीहयो तां जाय सकहे; एतरे तु हीने हीम्मत आप, काहाके तीहया देस ने ईस्रायलीम ना हक मे कर देहे।
अळतेण में तमारा सोरा-सोरी जीमनी बारा मे तमु केवो के आहया लुट मे जत रेहे, अने तमारा जे नान्ला सोरा हमणे जे वारली-भुंड्ली वात ने नी जाणता, तीहया तां जत रेहे, अने में तीहयु देस आपही, अने तीहया ते देस ना हकदार्या हयहे। पण तमु फीरीन चालो, अने रात्ली दर्या नी वाट्ये माय्न जंगल भणी जावो।
तत्यार तमु मने केदा, आमु यहोवा ना वीरोद मे पाप करला से; हाव आमु आपणा भगवान यहोवा ना हुकम नी अनसारे हामलो करहु अने लड़ाय करहु। तत्यार तमु आह़फा-आह़फाम ना हत्यार बांदीन बड़ा पोर सोच्या-ह़मज्या वगर चड़वा तीयार हय ज्या।
तत्यार मालीक मने केदो, तु तीमने आहयु कीदे के तमु ना चड़ो, अने ना लड़ाय करो, काहाके में तमारी वचे नी हय; कंखर माय्न आसम नी हय जाय के तमु आह़फाम ना वेरी सी हार जावो। आहयी वात में तमने की देदो, पण तमु नी मान्या; अने वीरोद करीन यहोवा ना हुकम ने नी मानीन बड़ा पोर चड़ ज्या। तत्यार तीहया बड़ा ना देस मे रेवा वाळा एमोरी माणहु तमारो सामनो करवा करीन मोद ना मोखड़ान तेम तमारी पछळ आया, अने सेईर देस ना होर्मा ह़ेर तक तमने मारता-मारता आया। तत्यार तमु पासा आवीन यहोवा अगळ रड़वा बाज ज्या। पण मालीक तमारी वात नी ह़मळ्यो, अने नी तमारी भणी धीयान देदो।
अने तमु कादेस मे ढेरेत दाड़ा लग र्या आञे लग के एक पीड़ी हय जी,
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.