गीनती 35

लेवीम ना ह़ेर

1अळी यहोवा, मोवाब ना चोवगान मे, यरीहो धेड़े नी यरदन नंदी ना धेड़े मुसा ने केदो, 2“ईस्‌रायली माणहु ने हुकम आप, के तमु आह़फा-आह़फाम ना वाटा नी जागा मे लेवी माणहु ने रेवा ना लेदे ह़ेर आपजो; अने ह़ेर ना च्‌यारो-मेर नी चारवा वाळी जागा बी तीमने आप देजो। 3ह़ेर ते तीमने रेवा ना लेदे अने चारवा नो जागो तीमना गाय-बोळद्‌या अने गाडरा-बोकड़ा, अने तीमना आखा जानवरु ना लेदे रेहे। 4अने ह़ेर नी चारवा नी जागा जीने तमु लेवी ने आपहु तीहयी जागा ह़ेर ना भीतड़ा गेथी बारी च्‌यारो-मेर एक-एक हजार हात1 रेवा जोवे। 5अने ह़ेर गेथा बारा उगवणु, दखणाव, बुडवणु, धुराव भणी, बे-बे हजार हात2 आहयी रीते मापजो के ह़ेर वचा-वच रेय; लेवी कुळ ना एक-एक ह़ेर नी चारवा नी जागा आतरीत रेवा जोवे। 6अने जे ह़ेर तमु लेवी कुळ ने आपहु तीनी मे छोव आसरा ना ह़ेर रेहे, जीने तमने खुनी ने नाहवा ना लेदे ठेराव्‌वा पड़हे, अने आमनी गेथा बीजा बय्‌यालीस गाम बी आपजो। 7जेतरा गाम तमु लेवी माणहु ने आपहु तीहया आखा मेळीन अड़तालीस रेहे, अने तीमनी ह़ाते चारवा ना जागा बी आपहु। 8अने जे ह़ेर तमु ईस्‌रायल ना माणहु नी जागा मे गेथा आपो, तीहया जीमना जादा ह़ेर हय, तीमनी पांह जादा, अने जीमना कम ह़ेर हय, तीमनी पांह कम लीन आपजो; आखा आपणा-आपणा ह़ेरु मे गेथा लेवी माणहु ने आपणा वाटा ना हीसाब सी आपे।”

खुनी जुगु आसरा ना ह़ेर

(वेवस्‌थावीवरन 19:13; यहोसु 20:1-9)

9अळी यहोवा मुसा ने केदो, 10ईस्‌रायली माणहु ने कीदे: के “जत्‌यार तमु यरदन नंदी सेकीन कनान देस मे पुगो, 11ता आसवा ह़ेर ठेरावजो जे तमारी लेदे आसरा ना ह़ेर रेय, के जे कोय काना ने भुल सी मारीन खुनी ठेरलो हय तीहयो तां नाही जाय। 12तीहया ह़ेर तमारो बदलो लेवा वाळा सी बचवा ना लेदे आसरा ना काम मे आवहे, के जत्‌यार तक खुनी नो पंचु मे नीयाव नी हय जाय तत्‌यार तक तीने नी मारे। 13अने आसरा ना ह़ेर तमु आपहु तीहया छोव रेवा जोवे। 14तीन ह़ेर ते यरदन नंदीन आहयी धेड़े, अने तीन कनान देस मे आपजो; आसरा ना ह़ेर आतरात रेवा जोवे। 15आहया छोव ह़ेर ईस्‌रायली माणहु ना अने तीमनी वचमे रेवा वाळा बीजा देस वाळा ना लेदे बी आसरा ना ह़ेरु ठेरे, के जे कोय काना ने भुल सी मार नाखे तीहयो तां नाही जाय।

16“पण कदी कोय काना ने लुहड़ा ना काना हत्‌यार सी आसम देय के तीहयो मर जाय, ता तीहयो खुनी ठेरहे; अने तीहया खुनी ने मार देवा जोवे। 17अने कदीम कोय एवो दगड़ो हात मे लीन, कोय ने देय, के तीहयो मर जाय, ता तीहयो बी खुनी ठेरहे; अने तीहया खुनी ने पक्‌को मार देवा जोवे। 18कदी कोय हात मे कानो मर जाय एवी लाकड़ी लीन काना ने देय, अने तीहयो मर जाय, ता तीहयो बी खुनी ठेरहे; अने तीहया खुनी ने पक्‌का मार देवा जोवे। 19लोय नो बदलो लेवा वाळो खुद तीहया खुनी ने मार नाखे; जत्‌यार बी तीहयो मळे तत्‌यार तीहयो तीने मार नाखे।

20“अने कदी कानो काना ने रीह मे धकल देय, नीता तीनी भणी तीकाय्‌न बहीन तीनी पोर कंय बी आसम नाखे के तीहयो मर जाय, 21नीता दुस्‌मनी सी तीने आह़फा ना हात सी एतरो ठोके के तीहयु मर जाय, जे देदो हय तीने जरुड़ मार नाखहे; तीहयो खुनी ठेरहे; लोय ना बदलो लेवा वाळा ने जत्‌यार बी तीहयो खुनी जड़ जाय तत्‌यारुत तीने मार नाखे।

22“पण कदी कोय काना ने सोच्‌या वगर धेकली देय, नीता तीनी पोर तीकाया वगर नाख देय, 23नीता आसम कोय दगड़ो लीन नाखे, जे दगड़ा सी कानु मर सके, बीजा ने देख्‌या वगर दगड़ो तीनी पोर नाख देय, अने तीहयो मर जाय, पण तीहयो तीनो नी दुस्‌मन हतो अने नी तीने मारवा हींड्‌यो; 24ता नीयाव करवा वाळी पंचु मारवा वाळा अने लोय नो बदलो लेवा वाळा ना वचमे आहया नेम ना लारे नीयाव करे; 25अने मंडळी ना नीयाव करन्‌या तीहया खुनी ने लोय नो बदलो लेवा वाळा ना हात मे गेथो बचाड़ीन तीहया आसरा ना ह़ेर मे जां तीहया पेले नाह ज्‌या हय पुगाड़ देय, अने जत्‌यार तक चोखु करलु तेल वेर अभीसेक करला पुंजारा नी मोत नी हय जाय तत्‌यार तक तांत रेय। 26पण कदी तीहयो खुनी तीहया आसरा ना ह़ेर नी काकड़ सी जीनी मे तीहयो नाही ज्‌यो हय बारो नीकळीन अळी कंखर जत रेय, 27अने लोय नो बदलो लेवा वाळो तीने आसरा ना ह़ेर नी काकड़ गेथो बारो कंखर हात करीन मार नाखे, ता तीहयो खुन नो गुनाळ्‌ळो नी ठेरे। 28काहाके खुनी ने मोट्‌ला पुंजारा नी मोत हयते तक आसरा ना ह़ेर मे रेवा जोवे; अने मोट्‌ला पुंजारा ने मरवान बाद तीहयो आह़फा नी खुद नी जागा मे जाय सके। 29तमारी पीड़ी-पीड़ी मे तमारा आखा रेवा ना जागा मे नीयाव नी आहयीत रीती रेहे।

30“अने जे कोय काना माणेह ने मार नाखे तीने बी गवा ना केवा पोर मार नाखे, पण एकीत गवा नी गवाय सी कोयने बी नी मारे। 31अने जे मारवा वाळो मोत ना डंड नी लायक ठेरे तीनी पांह गेथा मोत ना डंड ना पय्‌हा नी लेजो; तीने पक्‌का मार देवा जोवे। 32अने जे कोय आसरा ना ह़ेर मे नाह्‌यु हय तीनी लेदे आहया मतलब सी पय्‌हा नी लेजो, के तीहयो पुंजारान मरवान पेले अळी आह़फा ना देस मे रेवा करीन पासो आवे। 33करीन जे देस मे तमु रेहु तीने वीटाळजो नी; खुन सी ते देस वीटळ जाय, अने जे देस मे जत्‌यार कोयने मारे ता तीहया मारवा वाळा ने मारवा सीत तीहया देस नो पछतावो हय सके। 34जे देस मे तमु रेहु तीनी वच मे में रेही, तीने वीटाळजो नी; में यहोवा ते ईस्‌रायलीम नी वच मे रेम।”