Paliya Bible
गीनती 34
कनान देस नी काकड़
अळी यहोवा मुसा ने केदो, तु ईस्रायली माणहु ने आहयो हुकम आप दे: के जत्यार तमु कनान देस मे पुगो ता जे देस मे तमने आपु तीनी च्यारो-मेर नी जागा आसम रेहे, दखणाव भणी नी काकड़ सीन नाम ना जंगल सी लगाड़ीन एदोम देस ना धेड़े-धेड़े जत रेहे, आहयी उगवणी मरली दर्या ना दखणाव नी काकड़ सी सुरु हयहे; तां गेथी तमारी काकड़ अक्रब्बीम नाम नी घाटी चड़ीन दखणाव भणी वळहे, अने सीन माय्न कादेसबर्ने तक दखणाव भणी जहे। अने हसरद्दार लग बड़ीन अस्मोन लग जहे। अळतेण तीहयी काकड़ अस्मोन गेथी वळीन मीस्र देस ना कोतड़े तक जहे, अने दर्या नी धेड़े तक खत्तम हय जहे।
“तमारी बुडवणी नी काकड़ मोट्ली दर्या रेहे।
“धुराव नी काकड़ दर्या सी लगाड़ीन होर बड़े तक जहे; अने होर बड़ा सी लगाड़ीन हमात तक जहे अने तीहयी सदाद मे खत्तम हयहे; अळतेण तीहयी काकड़ जीपरोन तक जहे, अने हसरेनान मे खत्तम हयहे; आहयी तमारी धुराव नी काकड़ रेहे।
“अळी तमारी उगवणी नी काकड़ हसरेनान सी लगाड़ीन सपाम तक रेहे; अने तीहयी दखणाव नी काकड़ सपाम सी रीबला तक जे एन ना उगवणी ह़ोड़ से, अने तां गेथी कीन्नेरेत दर्या, गलील नी दर्या नी उगवणी धेड़े बड़ा तक; अळी दखणाव नी काकड़ यरदन नंदी ना धेड़े-धेड़े हय्न मरली दर्या तक जहे,
“तमारा देस नी च्यारोव काकड़ आहयीत रेहे।”
ता मुसो ईस्रायली माणहु ने अळी केदो, “जे देस ना तमु चीट्ठी नाखीन अदीकार्या हयहु, यहोवा ते देस ने साड़ी नव कुळ ने आपवा नो हुकम आपलो से, तीहयु आहयुत देस से; पण रुबेन अने गाद ना भायु आपणा-आपणा बाहु ना कुळ ना लारे आपणो-आपणो वाटो ली लेदला से, अने मनस्से ना आदा कुळ ना माणहु बी आपणो-आपणो वाटो ली लेदला से; तीहया ढाय कुळ ना माणहु यरीहो धेड़े यरदन नंदी ना पार उगवणी ह़ोड़, आपणो-आपणो वाटो ली लेदला से।”
जागा ने वाटो पाड़न्या मुख्या
अळी यहोवा मुसा ने केदो, “जे अदमी तमारी लेदे तीहयी जागा नो वाटो पाड़हे तीमना नाम आहया से: एलीयाजार पुंजारो अने नुन नो सोरो यहोसु। अने जागा ने वाटो पाड़वा ना लेदे एक-एक कुळ नो एक-एक मुख्यो बणावजे।” अने तीहया माणहु ना नाम आहया से: यहुदा ना कुळ नो यपुन्ने नो सोरो कालेब, सीमोन ना कुळ नो अम्मीहुद नो सोरो समुएल, बीन्यामीन ना कुळ नो कीसलोन नो सोरो एलीदाद, दान ना कुळ नो मुख्यो योगली नो सोरो बुक्की, युसुफ ना घोराणा मे गेथो मनस्से ना कुळ नो मुख्यो एपोद नो सोरो हनीएल, अने एप्रेम ना कुळ नो मुख्यो सीपतान नो सोरो कमुएल, जबुलुन ना कुळ नो मुख्यो पर्नाक नो सोरो एलीसापन, ईस्साकार ना कुळ नो मुख्यो अज्जान नो सोरो पलतीएल, आसेर ना कुळ नो मुख्यो सलोमी नो सोरो अहीहुद, अने नप्ताली ना कुळ नो मुख्यो अम्मीहुद नो सोरो पदहेल।
जे-जे माणेह ने यहोवा कनान देस नी जागा ने ईस्रायली माणहु मे वाटो पाड़वा नो हुकम आपलो तीहया आहयात से।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.