Paliya Bible
गीनती 33
मीस्र मे गेथी मोवाब तक नी यात्रा
जत्यार ईस्रायली माणहु मुसा अने हारुन नी अगवाय सी टोळो बणीन मीस्र देस गेथा नीकळ्या, ता तीहया आहया जागा मे पड़ावो नाख्या। यहोवा ना हुकम सी मुसो तीहया जागा ना नाम लीख देदो, अने तीहया आहया से। पेल्ला मयना ना पंदरवा दाड़े ईस्रायली माणहु रामसेस ह़ेर गेथा अगा बड़्या; फसह तीवार ना बीजा दाड़े तीहया आखा मीस्र ना माणहु नी देखणते बीह्या वगर नीकळ ज्या। मीस्र ना माणहु आह़फाम ना आखा गेथा पेल्ला सोरा ने गाड़ता हता, जीमने यहोवा डंड आपलो हतो, मालीक तीमना देवताम ने बी डंड आपलो हतो ईस्रायल ना माणहु रामसेस गेथा नीकळीन सुकोत ह़ेर मे डेरा नाख्या। अने सुकोत गेथा नीकळीन एताम मे डेरा नाख्या, जे उजाड़ी-बड़ा धेड़े हतु। एताम गेथा तीहया बालसपोन गेथु उगवणु पीहहीरोत मे जत र्या, अने मीगदोल ना सामने डेरा नाख्या। तीहया पीहहीरोत गेथा नीकळीन दर्या पार करीन एताम नाम ना उजाड़ी-बड़ा मे ज्या तीन दाड़ा चालवान बाद मारा नाम नी जागा मे डेरा नाख्या। मारा नाम नी जागे गेथा तीहया एलीम मे जाय्न डेरा नाख्या, काहाके तां बारे पाणी ना झोर अने सत्तर खजुर ना झाड़ हता। तीहया एलीम गेथा नीकळीन रात्ली दर्या ना धेड़े डेरा नाख्या। तीहया रात्ली दर्या गेथा नीकळीन सीन नाम ना उजाड़ी-बड़ा मे डेरा नाख्या। अळी तीहया सीन नाम ना उजाड़ी-बड़ा मे गेथा नीकळीन दोपका मे डेरा नाख्या। अने दोपका गेथा नीकळीन आलुस मे डेरा नाख्या। अने आलुस गेथा नीकळीन रपीदीम मे डेरा नाख्या, अने तां तीमने पीवा नु पाणी नी जड़्यु। अने तीहया रपीदीम गेथा नीकळीन सीने ना उजाड़ी-बड़ा मे डेरा नाख्या। अने तीहया सीने ना उजाड़ी-बड़ा मे गेथा नीकळीन कीब्रोथत्तावा मे डेरा नाख्या। अने तीहया कीब्रोथत्तावा मे गेथा नीकळीन हसेरोत मे डेरा नाख्या। अने तीहया हसेरोत मे गेथा नीकळीन रीत्मा मे डेरा नाख्या। अळी तीहया रीत्मा मे गेथा नीकळीन रीम्मोनपेरेस मे डेरा नाख्या। अने तीहया रीम्मोनपेरेस मे गेथा नीकळीन लीबना मे डेरा नाख्या। अने तीहया लीबना मे गेथा नीकळीन रीस्सा मे डेरा नाख्या। अने तीहया रीस्सा मे गेथा नीकळीन कहेलाता मे डेरा नाख्या। अने तीहया कहेलाता मे गेथा नीकळीन सेफेर बड़ान्तां डेरा नाख्या। अळी तीहया सेफेर बड़ा पोर गेथा नीकळीन हरादा मे डेरा नाख्या। अने तीहया हरादा मे गेथा नीकळीन मखेलोत मे डेरा नाख्या। अने तीहया मखेलोत मे गेथा नीकळीन तहत मे डेरा नाख्या। अने तीहया तहत मे गेथा नीकळीन तेरह मे डेरा नाख्या। अने तीहया तेरह मे गेथा नीकळीन मीत्का मे डेरा नाख्या। अळी तीहया मीत्का मे गेथा नीकळीन हसमोना मे डेरा नाख्या। अने तीहया हसमोना मे गेथा नीकळीन मोसेरोत मे डेरा नाख्या। अने तीहया मोसेरोत मे गेथा नीकळीन बने-यकान मे डेरा नाख्या। अने तीहया बने-यकान मे गेथा नीकळीन होरहगीदगाद मे डेरा नाख्या। अने तीहया हर होरहगीदगाद मे गेथा नीकळीन योतबाता मे डेरा नाख्या। अने तीहया योतबाता मे गेथा नीकळीन अबरोना मे डेरा नाख्या। अने तीहया अबरोना मे गेथा नीकळीन एस्योन-गेबेर मे डेरा नाख्या। अने तीहया एस्योन-गेबेर मे गेथा नीकळीन सीन नाम ना उजाड़ी-बड़ा ना कादेस मे डेरा नाख्या। अने तीहया कादेस मे गेथा नीकळीन होर नाम ना बड़ा धेड़े, जे एदोम देस नी काकड़ पोर से, डेरा नाख्या। अने मीस्र देस गेथो ईस्रायली माणहु ना नीकळवान चाळीहवा साल ना पांचवा मयना ना पेल्ला दाड़े, भगवान ना हुकम नी अनसारे पुंजारो हारुन होर बड़ा पोर ज्यो, अने तां तीहयो मर ज्यो। अने जत्यार हारुन होर बड़ा पोर मर ज्यो ता तीहयो एक ह़ो तेवीस साल नो हतो। अने अरात नो कनानी कुळ नो राजा, जे कनान देस ना दखणाव भणी रेतो हतो, तीहयो आहयु ह़मळ्यो के ईस्रायली माणहु आय र्या। ईस्रायली माणहु होर बड़ा पोर गेथा अगा बड़ीन सलमोना मे डेरा नाख्या। अने तीहया सलमोना गेथा नीकळीन पुनोन मे डेरा नाख्या। अने तीहया पुनोन गेथा नीकळीन ओबोत मे डेरा नाख्या। अने तीहया ओबोत गेथा नीकळीन मोवाब नी काकड़ धेड़े ईयीम अबारीम ना जागा डीहो मे डेरा नाख्या। तीहया ईयीम उजाड़ी जागा गेथा नीकळीन तीहया दीबोन-गाद मे डेरा नाख्या। अने तीहया दीबोन-गाद गेथा नीकळीन अलमोनदीबलातेम मे डेरा नाख्या। अने अलमोनदीबलातेम गेथा नीकळीन तीहया अबारीम नाम ना बड़ा मे नबो ना सामने डेरा नाख्या। अळी अबारीम नाम ना बड़ा मे गेथा नीकळीन तीहया मोवाब ना चोवगान मे यरीहो धेड़े यरदन नंदी ना धेड़े डेरा नाख्या। अने तीहया मोवाब ना चोवगान मे बेत्यसीमोत सी लगाड़ीन आबेलसीतीम तक यरदन नंदी ना धेड़े डेरा नाख्या।
कनान पोर हमलो करवा नो हुकम
ता मोवाब ना चोवगान मे, यरीहो धेड़े नी यरदन नंदी ना धेड़े यहोवा मुसा ने केदो, ईस्रायली माणहु ने कीदे: जत्यार तमु यरदन नंदी सेकीन कनान देस मे पुगो, ता तीहया देस मे रेवा वाळा ने तीमना देस मे गेथा नीकाळ देजो; अने तीमना आखा दगड़ा ना बणावला अने धातु ना बणला मुरत्या ने अने आखा पुजा करवा ना उचला जागा ने ओदार देजो। अने तीहया देस ने आह़फाम ना हक मे करीन तां रेजो, काहाके में तीहया देस ने तमनेत आपलो से के तीनी पोर तमारो हक रेय। अने तमु तीहया देस ने चीट्ठी नाखीन वाटी लेजो; अने जे कुळ जादा रेय तीमने जादा वाटो आपजो, अने जे कुळ कम रेय तीमने कम वाटो आपजो जे कुळ नी चीट्ठी जे जागा ना लेदे नीकळे तीहयो जागो तीमनो रेहे; आह़फाम ना आड़ा-बुड़ाम ना कुळ नी लारे आह़फा-आह़फाम नो वाटो ली लेजो। पण कदी तमु तीहया देस मे रेण्या ने तमारी सामने गेथा नी नीकाळो, ता तीमनी मे गेथा जीमने तमु रेवा देहु तीहया तमारा डोळा मे कचरु अने पोगु मे काटान तेम गोपायहे, अने तीहया तमने जे देस मे तमु रेहु तमारी सी झुमायहे। ता में तमारी ह़ाते तेवोत वेहवार करही, जीसम तीमनी ह़ाते करवा चाहतो हतो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.