Paliya Bible
गीनती 32
यरदन नंदी नी उगवणी ह़ोड़ वहला कुळ
(वेवस्थावीवरन 3:12-22)
रुबेन अने गाद कुळ पांह घणा जानवर हता। जत्यार तीहया याजेर अने गीलाद देस ने देखीन वीच्यार कर्या, के आहया जानवर लायक देस से, अने तीहया मुसा अने एलीयाजार पुंजारो अने मंडळी ना मुख्यान्तां जाय्न केदा, “अतारोत, दीबोन, याजेर, नीम्रा, हेसबोन, एलाले, सबाम, नबो, अने बोन ह़ेरु ना देस जीनी पोर यहोवा ईस्रायल नी मंडळी ने जीताड़लो से, तीहयो जानवर ना लेदे वारु जागो से; अने तारा पावर्या पांह घणा जानवर से।” तीहया अळी केदा, “कदी तारी दया अमारी पोर हय, ता आहयु देस आमने आप दे, आहयो जागो अमारो हये; आमने यरदन नंदी नी ह़ेली पार ना ली जाय।” मुसो गाद अने रुबेन नी कुळ ने केदो, “जत्यार तमारा भाय लड़ाय करवा जहे ता तमु आञे बही रेहु ह़ु? अने जे देस यहोवा ईस्रायली माणहु ने आपलो से तीमने तां जवा करीन काहा तीमना मन ने तमु कमजोर कर र्या? जत्यार मे तमारा आड़ा-बुड़ा ने कादेसबर्ने गेथा कनान देस ने देखवा करीन मोकल्लो, ता तीहया बी आसमेत करला हता। तीहया एसकोल नाम नी घाटी तक जाय्न देस ने देख्या, पण जे देस यहोवा ईस्रायली माणहु ने आपलो तां जवा देवा सी तीहया तीमनु मन ने कमजोर कर देदा। तीहया दाड़े यहोवा खीजवायो अने ह़ाम खादो, जे माणेह मीस्र देस गेथा नीकळी आवला से तीमनी मे गेथा, जेतरा बी वीह साल ना या तीनी जादा उमर ना से, तीहया ते देस ने नी देखी सके, जीने आपवा नो वायदो में अब्राहम, ईसाक, अने याकुब सी करलो से, काहाके तीहया मारी वात नी मान्या; पण कनज यपुन्ने नो सोरो कालेब, अने नुन नो सोरो यहोसु, आहया बेम मारी पछळ पुरी रीती सी हय लेदला से आहया एतरात ते देस ने देख सकहे। यहोवा ईस्रायली माणहु पोर खीजवाय पड़्यो, अने जत्यार तक तीहयी पीड़ी ना माणहु मरी नी ज्या, जे यहोवा नी नींगा मे बुरु करला हता, तां तक, चाळीह साल तक तीमने जंगल मे भटकाड़तो र्यो। अने तमु, जे पापी माणहु नी अवल्यात से, ईस्रायली माणहु पोर यहोवा ने अळी जादा खीजवाड़वा करीन तमारा आड़ा-बुड़ा ना जागा पोर पयदा हयला से। कदी तमु तीनी वात नी मानीन तीनी पछळ चालवा छोड़ देवो, ता एक कावा अळी आपणु आखा ने जंगल मे छोड़ देहे, अने तीमनी मोत ना जीम्मेदार तमु रेहु।” ता तीहया मुसान्तां आवीन केदा, “आमु अमारा जानवरु ना लेदे आञेत कोड़्या बणावहु, अने अमारा सोरा-सोरीम ना लेदे आञेत गाम वहाड़हु, पण आमु ईस्रायली माणहु ने तीमना जागा पोर तक नी पुगाड़ दीया तांह तक आमु हत्यार बंद तीमनी अगळ-अगळ चालहु; पण अमारा सोरा-सोरी आहया देस ना बीक ना कारण सी कीला वाळा ह़ेर मे रेहे। पण जत्यार तक ईस्रायली आखा माणहु नो जागा पोर आह़फा-आह़फाम नो हक नी हय जाय, तां तक आमु अमारा घोर नी जीया। आमु तीमनी ह़ाते यरदन नंदी नी ह़ेली धेड़े अमारो वाटो नी लीया, काहाके अमारो वाटो यरदन नंदी नी आहयी धेड़े उगवणी ह़ोड़ जड़लो से।” तत्यार मुसो तीमने केदो, “कदी तमु जे केय, अने तीसमेत करो, ता आञे यहोवा नी अगळ-अगळ लड़ाय करवा जवा नी लेदे तीयार हय जावो, अने आखा हत्यार बंद माणहु यरदन नंदी पार तक जाय, जत्यार तक यहोवा आपणा दुस्मन ने हराय नी देय। अने देस यहोवा ना हक मे नी हय जाय; ता तीनी पसळ तमु आञे पासा आवहु, अने यहोवा अने ईस्रायल नी लेदे वण-गुनाळ्ळा ठेरहु; अने आहयु देस यहोवा नी लेदे तमारी खुद नी जागा ठेरहे। अने तमु आसम नी करो, ता यहोवा ना वीरोद मे पाप करहु; अने आहयु जाण लेवो के तमारा पाप नो डंड जड़हे। तमु तमारा सोरा-सोरीन लेदे गाम वहाड़ो, अने आह़फाम ना जानवरु ना लेदे कोड़्या बणावो; अने जीसम तमारा मोडा सी नीकळ्यु तेमेत करो।” ता गाद अने रुबेन नी अवल्यात मुसा ने केदी, आमु जीसम तु हुकम आपही मालीक तेमेत करहु। अमारा सोरा-सोर्या, बयरा, अने गाडरा-बोकड़ा, अने जानवरु, आञे गीलाद ना ह़ेर मे रेहे; पण आमु आखा यहोवा ना हुकम ना लारे लड़ाय नी लेदे यरदन नंदी नी पार जवा करीन हत्यार बंद तीयार से। ता मुसो तीमना बारा मे एलीयाजार पुंजारो, अने नुन नो सोरो यहोसु अने ईस्रायली ना कुळ ना आड़ा-बुड़ाम ना घोराणा ना मुख्या-मुख्या अदमी ने आहयो हुकम आप्यो, “कदी गाद अने रुबेन ना आखा अदमी लड़ाय नी लेदे हत्यार-बंद तमारी ह़ाते यरदन नंदी पार जाय, अने देस तमारा हक मे हय जाय, ता तमु गीलाद देस ने तीमनी खुद नी जागा हयवा ना लेदे आप देजो। पण कदी तीहया तमारी ह़ाते हत्यार-बंद यरदन पार नी जाय, ता तीमनी खुद नी जागा तमारी वचमे कनान देस मे रेहे।” तत्यार गाद अने रुबेनी माणहु की पड़्या, “यहोवा जीसम तारा चाकर्या ने केवाड़लो से तेमेत आमु करहु। आमु हत्यार-बंद यहोवा ना अगळ-अगळ ह़ेली पार कनान देस मे जहु, पण अमारी खुद जागा यरदन नंदी नी आहयीत धेड़े रेहे।” तत्यार मुसो गाद अने रुबेनी माणहु ने, अने मनस्से नी अरदी अवल्यात ने एमोर्या ना राजा सीहोन अने बासान ना राजा ओग, बेम ना राज्य ना देस, ह़ेरु अने तीमनी च्यारो-मेर नी जागा समेत आप देदो। ता गादी दीबोन, अतारोत, अरोएर, अत्रोत-सोपान, याजेर, योगबहा, बेतनीर्मा, अने बेथारान नाम ना गामु ने मजबुत कर्यो, अने तांह गाडरा-बोकड़ा ना लेदे कोड़्या बणायो। अने रुबेनी माणहु हेसबोन, एलाले, अने कीर्यातेम, अळी नबो अने बालमोन ना नाम बदलीन तीमने, अने सीबमा ने मजबुत कर्यो; अने तीहया आह़फाम ना मजबुत करला ह़ेरु ना अळी नवला नाम पाड़्या। अने मनस्से ना सोरा माकीर नी अवल्यात गीलाद देस मे जाय्न तीने ली लेदी, अने जे एमोरी माणहु तां रेता हता तीमने नीकाळ देदा। ता मुसो मनस्से ना सोरो माकीर नी अवल्यात ने गीलाद देस आप देदो, अने तीहया तीनी मे रेवा बाज ज्या। अने मनस्से नो सोरो याईर जाय्न गीलाद ना केतरा गाम हापकी लेदो, अने तीमना नाम हव्वोत्याईयर राख्यो। अने नोबह बी जाय्न गामु समेत कनात ने हापकी लेदो, अने तीमना नाम बी आह़फा ना नाम पोर नोबह राख्यो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.