Paliya Bible
गीनती 31
मीद्यानी माणहु सी बदलो लेणु
अळी यहोवा मुसा ने केदो, “मीद्यानी माणहु ह़ाते ईस्रायली माणहु नो बदलो ले; अळतेण तु तारा आड़ा-बुड़ा मे जाय्न भेसकाय जही।” ता मुसो माणहु ने केदो, “तमु तमारी मे गेथा अदमड़ा ने झुमायवा ना लेदे हत्यार लीन तीयार करो, के तीहया मीद्यानी माणहु पोर हमलो करीन तीमनी सी यहोवा नो बदलो लेय। ईस्रायल ना आखी कुळ ना एक-एक हजार अदमड़ा ने झुमायवा ना लेदे मोकलो।” ता एक-एक कुळ मे गेथा एक-एक हजार अदमी टाळ्या, अने आखा हय्न बारे हजार अदमी झुमायवा नी लेदे तीयार कर्या। मुसो तीमने झुमायवा मोकल्यो तीमनी ह़ाते पुंजारा एलीयाजार नो सोरो पीनहास हतो, तीना हात मे चोखला जागा ना ठाहरा अने तीहया फेपार्या हता जे ह़ाह़ ली-लीन वगाड़ता हता। जे हुकम यहोवा मुसा ने आपलो हतो, तीनी अनसारे तीहया मीद्यानी माणहु ह़ाते झुमाया अने आखा अदमड़ा ने मार नाख्या। अने तीहया मारला माणहु ह़ाते मीद्यान ना आहया पांचोव राजाम ने बी मार नाख्या; मतलब एवी, रेकेम, सुर, हुर, अने रेबा ने; अने तीहया बोर ना सोरो बीलाम ने बी तलवार वेर मार नाख्या। अने ईस्रायल ना माणहु मीद्यानीम ना बयरा-सोरा धर लेदा अने तीमना गाय-बोळद्या, गाडरा-बोकड़ा अने आखु धन लुट लेदा। अने जे ह़ेर मे तीहया रेता हता, तीमना आखा डेरा ने आक्ठु सी धपाड़ देदा। ता तीहया लुटलु ह़मान ने अने बांदीन राखला माणहु ने अने जानवरु ने लीन जत र्या। अने तीमने मुसा अने एलीयाजार पुंजारो अने ईस्रायली माणहु नी मंडळीन्तां ली आया जे यरीहो ना ह़ाते यरदन नंदी धेड़े मोवाब ना मयदान मे पड़ावो नाखला हता।
सेना नु पासु आवणु
ता मुसो अने पुंजारो एलीयाजार अने मंडळी ना आखा मुख्या पड़ावा गेथा बारा तीमने ह़ाम्बा लेवा जवा करीन नीकळ्या। मुसो झुमाय्न पासा आवला सेना ना मुख्या पोर अने हत्यारु ना मुख्या पोर खीजवाय्न केदो, तमु आखा बयरा ने जीवत्ला छोड़ देदला से ह़ु? देखो, आहयात बयरा बीलाम नी राजी सी, पोर ना बारा मे ईस्रायली माणहु सी यहोवा सी धोको कराया, अने आनी लेदे यहोवा नी गरा मंडळी मे फेली। आनी लेदे हाव आखा सोरा-सोरा ने, अने तीहया आखा बयरा ने जे अदमी ह़ाते सवसार कर लेदी हय, मार नाखो। पण जेतरा सोर्या अदमी ह़ाते सवसार नी कर्या, तीमने आखी ने तमु आपणी लेदे जीवत्ली रेवा देवो। अने तमु ह़ात दाड़ा तक डेरा गेथा बारा रेजो, दुस्मन ने मारवा वाळा अने मरला ने छीमला हय, तीहया आखा जीमने तमु धर लावला से तीमनी भेळ तीसरा अने ह़ातवा दाड़ा मे खुद ने अने तीमने चोखा करे। अने तमु आखा लुगड़ा, अने चामड़ा नी आखी बणली चीज, अने बोकड़ा ना नीम्बाळा सी बणली अने लाकड़ा सी बणली आखी चीज ने तमु चोखी करो। ता एलीयाजार पुंजारो झुमाय्न पासा आवला आखा अदमड़ा ने केदो, “यहोवा जे नेम नी रीती नो हुकम मुसा ने आपलो तीहयो आहयो से: ह़ोनु, चांदी, पीतळ, लुहड़ु, पतरा, अने काच, आहयु आखु ने आक्ठा मे नाखो, ता तीहयु चोखलु ठेरहे, ते बी तीने वीटळ सी चोखु करवा नु पाणी वेर चोखु करे; पण जे कंय आक्ठु मे नी बच सके तीने पाणी सी चोखी करजो। अने ह़ातवा दाड़े तु तारा लुगड़ा धोवजे, ता तु चोखो हय जही; तीनी बाद तु डेरा मे आवजे।”
लुटला माल नो वाटो पाड़णु
अळी यहोवा मुसा ने केदो, “एलीयाजार पुंजारो अने मंडळी ना बाहु ना घोराणा ना मुख्या-मुख्या अदमी ने ह़ाते लीन लुटला माणहु नी अने जानवर नी गीनती कर; ता तीमना बे वाटा पाड़ीन एक वाटो मंडळी ने आप दे अने एक वाटो जे झुमायवा जेला तीमने आप दे। अळतेण तु जे सीपायड़ा झुमायवा जेला तीमना वाटा मे गेथो यहोवा ना लेदे, माणहु, गाय-बोळद्या, गदड़ा, गाडरा-बोकड़ा, ईमनी मे गेथा हर पांच ह़ो पछळ एक-एक ने अलग करीन; एलीयाजार पुंजारा ने यहोवा नी भेट ना रुप मे आप देवो। अळी ईस्रायली माणहु ना वाटा मे गेथा, माणहु, गाय-बोळद्या, गदड़ा, गाडरा-बोकड़ा, हर पचाह पछळ एक ने लीन यहोवा ना घोर नी रखवाळी करन्या लेवी माणहु ने आप देवो।” जेम हुकम यहोवा मुसा ने आप्यो तेमेत मुसो अने एलीयाजार पुंजारो कर्या। जे लुट सीपायड़ा ना माणहु आह़फाम ना लेदे लुटला हता; तीमनी जादा लुट आहयी हती; छो लाख पीचोत्तर हजार गाडरा-बोकड़ा, सत्तर ने बे हजार गाय-बोळद्या, ईकसट हजार गदड़ा, अने माणहु मे गेथी कुवारली सोरी बत्तीस हजार हती। अने लड़ाय करवा जेला सीपायड़ा ना आदा वाटा मे गाडरा-बोकड़ा तीन लाख संयतीस हजार पांच ह़ो हता। तीनी मे गेथा छो ह़ोव पीचोत्तर गाडरा-बोकड़ा यहोवा नी भेट हती। अने गाय-बोळद्या छत्तीस हजार हता जीनी मे गेथा बहोत्तर यहोवा नी भेट हता। अने गदड़ा तीस हजार पांच ह़ो हता तीमनी मे गेथा ईकसट यहोवा नी लेदे भेट हता। ह़ोळ्ळे हजार माणहु हता तीमनी मे गेथा बत्तीस यहोवा नी लेदे भेट हता। मुसो यहोवा ना लेदे अलग करली भेट एलीयाजार पुंजारा ने आप देदो, जीसम यहोवा मुसा ने हुकम आपलो हतो।
ईस्रायली नी मंडळी नो अरदो वाटो जीने मुसो लड़ाय करवा वाळा अदमीम ने तां गेथो अलग करलो हतो। तीन लाख संयतीस हजार पांच ह़ो गाडरा-बोकड़ा, छत्तीस हजार गाय-बोळद्या, तीस हजार पांच ह़ो गदड़ा, ह़ोळ्ळे हजार माणहु हता। मुसो ईस्रायली माणहु ना अरदा वाटा मे गेथो माणहु अने जानवरु मे गेथा पचाह पछळ एक-एक अलग करलो हतो, तीने यहोवा ना घोर नी रखवाळी करन्या लेवी माणहु ने आप देदो, जीसम यहोवा मुसा ने हुकम आपलो हतो। ता जे हत्यार ना अने सेना ना मुख्या सीपायड़ा ने हुकम आपला हता तीहया मुसान्तां आया। अने मुसा ने केदा, आमु तारा केवा ना लारे सीपायड़ा नी गीनती कर्या, तीमनी मे गेथा एक बी कम नी हया। आनी लेदे आमु ह़ोना नु रकम, पींजण्या, कड़ा, वीट्या, टोकर्या, अने बाजीबंद, लावला से। जे अमारी मे गेथा आखा ली लेदला से। आमु तीने पछतावा ना रुप मे यहोवा ने भेट कर र्या। ता मुसो अने एलीयाजार पुंजारो तीमनी पांह गेथु घटाळ्ळु तीहयु आखु ह़ोना नु रकम ली लेदा। हत्यार ना अने सेना ना मुख्या नु यहोवा ने भेट करलु आखु ह़ोनु ह़ोळ्ळे हजार ह़ात ह़ोव पचाह सेकेल1 हतु। हत्यार अने सेना ना मुख्या हता तीहया आपणी-आपणी लुट ली लेदला हता। ता मुसो अने एलीयाजार पुंजारो तीहयु ह़ोनु ने तीमनी पांह गेथु लीन मेळ करावण्या तम्बु मे ली आया के यहोवा ईस्रायली माणहु नी रखवाळी करे।
Source notes (1)
- Footnote ह़ोळ्ळे हजार ह़ात ह़ोव पचाह सेकेल मतलब,एक ह़ोव नब्बे कीलो नी आड़े-धेड़े
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.