गीनती 14

माणहु नु कुड़कुड़ करनु

1ता आखी मंडळी आड़वा बाज जी; अने आखी रात तीहया माणहु रड़तात र्‌या। 2अने आखा ईस्‌रायली मुसा भणीन अने हारुन भणीन कुड़कुड़ करवा बाज ज्‌या; अने आखी मंडळी तीमने आहयु केवा बाज जी, “भलु हयतु के आमु मीस्‌र देस मेत मर जता! नीता आहया जंगल मेत मर जता! 3यहोवा आमु ने तीहया देस मे ली जाय्‌न काहा तलवार वेर मराड़वा हींडे? अमारा बयरा ने अने सोरा ने ते तीहया लुट लेहे; ह़ु आहयु अमारी जुगु वारु नी हय के आमु मीस्‌र देस मे पासा जत रीया?”1 4अळतेण तीहया एक-बीजा ने केवा बाज ज्‌या, “आवो, आपणु कोयनेन कोयने आपणो मुख्‌यो बणाय लीया, अने मीस्‌र देस मे पासा जत रीया।” 5ता मुसो अने हारुन ईस्‌रायली नी आखी मंडळी अगळ मोडा ना भरहे पड़्‌या। 6अने नुन नो सोरो यहोसु अने यपुन्‌ने नो सोरो कालेब, जे देस ना बारा मे जानकारी लेवा वाळा मे गेथा हता, आह़फा-आह़फाम ना लुगड़ा फाड़ीन, 7ईस्‌रायली नी आखी मंडळी ने केवा बाज ज्‌या, “जे देस ना बारा मे जानकारी लेवा करीन आमु एथान-एथा फीरीन आवला से, तीहया घणा वारु देस से। 8कदीम यहोवा अमारी सी खुस हय, ता आमु ने तीहया देस मे, जीनी मे दुद अने मोद ना झोर वये, पुगाड़ीन तीने आमु ने आप देहे। 9तमु आतरुत करो के तमु यहोवा ना वीरोद मे कुड़कुड़ ना करो;2 अने ना तीहया देस ना माणहु सी बीहो, काहाके तीहया अमारा रोट्‌ला ठेरहे; साहळो तीमनी उपर गेथो सेटो हय जेलो से, अने यहोवा अमारी ह़ाते से, तीमनी सी ना बीहो।” 10ता आखी मंडळी आड़ पड़ी के आमने दगड़ाटो। ता यहोवा नु वीजाळु मेल-मीलाप वाळा तम्‌बु मे आखा ईस्‌रायली पोर उजड़ान हयु।

माणहु जुगु मुसा नी वीन्‌ती

11ता यहोवा मुसा ने केदो, “आहया माणहु कारु तक मारो नीकारो करता रेहे? अने मारा आखा वहराड़न्‌या काम देखीन बी कारु तक मारी पोर भरहो नी करे? 12में तीमने मोट्‌ली गरा सी मारही, अने तीमना खास वाटा मे गेथा तीमने नीकाळ देही, अने तारी सी एक देस बणावही जे तीमनी करते मोटु अने ताकत वाळु रेहे।” 13मुसो यहोवा ने केदो, “ता ते मीस्‌र जीमनी वचमे तु हीम्‌मत देखाड़ीन तीहया माणहु ने नीकाळीन ली आवलो से आहयु ह़मळहे, 14अने आहया देस ना रेवा वाळा ने केहे। तीहया ते आहयु ह़मळला से के तु जे यहोवा से, आहया माणहु नी वचमे रेय; चोखुझण देखाव पड़े, अने तारु वादळु ईमनी पोर उबु हय रेय, अने तु दीहु वादळु ना खम्‌बा मे, अने राते आक्‌ठु ना खम्‌बा मे हय्‌न आमनी अगळ-अगळ चाल्‌या करे। 15एतरे कदीम तु आहया माणहु ने मार नाखे, ता जे कुळ तारा मोट्‌ला काम ना बारा मे ह़मळला से तीहया केहे, 16के यहोवा तीहया माणहु ने तीहया देस मे जीने तीहयो तीमने आपवा नी ह़ाम खादलो हतो पुगाड़ नी सक्‌यो, करीन तीहयो तीमने जंगल मे मार नाख्‌यो। 17एतरे हाव मालीक नी ताखत नी बड़ाय तारु आहयु केणु नी अनसारे हये, 18के यहोवा रीह करवा मे धीरज राखण्‌यो अने घणो दयाळ्‌ळो से, अने अधरम अने गुना ने माफ करवा वाळो से, पण तीहयो गुनाळ्‌ळा ने कानी बी रीते वण-गुनाळ्‌ळो नी ठेरावे, अने तीमना डाह-डाहा नो पाप नो डंड तीमना सोरा, अने तीमना सोरा ना सोरा ने, अने अळी तीमना सोरा ना सोरा ना सोरा ने आपे।3 19हाव आहया माणहु ना अधरम ने तारी मोट्‌ली दया नी अनसारे, अने जेम तु मीस्‌र गेथो लगाड़ीन आञे तक माफ करतो रेलो से तेमेत हाव बी माफ कर दे।”4

20यहोवा मुसा ने केदो, “तारी वीन्‌ती नी अनसारे में तीमने माफ करु; 21आहयु ह़ाचलीन से के में जीवत्‌लो से, अने आखी धरती में मालीक नी बड़ाय सी पुरीन पुरी भराय जहे। 22तीहया आखा माणहु जे मारी बड़ाय मीस्‌र देस मे अने जंगल मे देख्‌या, अने मारा वहराड़न्‌या काम देखवान अळतेण बी दह वार मारी पारख कर्‌या, अने मारी वात नी मान्‌या, 23एतरे जे देस ना बारा मे, में तीमना डाय-डाया ह़ाते ह़ाम खादलो, तीने तीहया कदी देखवा नी जोवे; मतलब जेतरा मारो वाक काडला से तीमनी मे गेथा कोय बी तीने देख नी सके।5 24पण आनीन करते के मारा चाकर्‌या कालेब नी ह़ाते बीजीत आत्‌मा से, अने तीहयो पुरी रीती सी मारी चाल-चाल्‌लो से, में तीने तीहया देस मे जीनी मे तीहयो जी आवलो से पुगाड़ही, अने तीना कुळ वाळा तीहया देस ना हकदार्‌या रेहे।6 25अमालेकी अने कनानी माणहु घाटी मे रेता हता, एतरे तमु फीरीन चाल पड़ो, अने रात्‌ली दर्‌या नी वाटे माय्‌न जंगल मे जावो।”

कुड़कुड़ करवा नो डंड

26अळतेण यहोवा मुसा ने अने हारुन ने केदो, 27“आहयी गांडी मंडळी मारा वीरोद मे कुड़कुड़ कर्‌या करे, आने में कारु तक वेठतो रेम? ईस्‌रायली माणहु जे मारी भणीन कुड़कुड़ करे, आहयु में ह़मळलो से। 28एतरे ईमने कीदे के यहोवा आसम केय के मारी जीवाय नी ह़ाम जे वात तमु मारी ह़मळते केदला से, सणका कर्‌या वगर में तीनीत अनसारे तमारी ह़ाते वेहवार करही। 29तमारा धोड़ आहयात जंगल मे पड़ रेहे; अने तमारी आखा मेना वीह साल ना नीता तीनी गेथा जादा उमर ना जेतरा ने गणला हता, अने मारा वीरोद मे कुड़कुड़ करता हता,7 30तीमनी मे गेथा यपुन्‌ने ना सोरा कालेब अने नुन ना सोरा यहोसु ने छोड़ीन कोय बी तीहया देस मे नी जाय सके, जीना बारा मे में ह़ाम खादलो से के तमु ने तीहया देस मे वहाड़ही। 31पण तमारा सोरा जीमना बारा मे तमु केदला से, के तीमने लुट लेहे, तीमने मे तीहया देस मे पुगाड़ देही; अने तीहया ते देस ने जाण लेहे जीनो तमु नीकारो करला से। 32पण तमारा धोड़ आहयात जंगल मे पड़ रेहे। 33अने जत्‌यार तक तमारा धोड़ जंगल मे नी ह़ड़ जाय तांह तक, मतलब चाळीह साल तक,8 तमारा सोरा जंगल मे तमारु छीनाळु नो डंड भुगत्‌ता जीन गोहरी बण रेहे। 34जेतरा दाड़ा तमु तीहया देस ना बारा मे जानकारी लेता र्‌या, मतलब चाळीह दाड़ा, तीमनी गणती नी अनसारे, दाड़ा पछळ एक साल, मतलब चाळीह साल तक तमु तमारा अधरम नो डंड उचली राखहु, ता तमु जाण लेहु के मारु वीरोद करनु ह़ु से। 35में यहोवा आहयु की देदलो से के आहयी गांडी मंडळी ना माणहु जे मारा वीरोद मे एक्‌ठा हयला से आहयात जंगल मे मर मीटहे; अने में आसमेत करही बी।”

36ता जे माणहु ने मुसो तीहया देस ना बारा मे जानकारी लेवा करीन मोकल्‌लो, अने तीहया पासा आवीन तीहया देस ना बारा मे गलत वात देखाड़ीन आखी मंडळी ने मुसा ना वीरोद मे भड़कावला हता, 37तीहया देस नी गलत खबर देखाड़वा वाळा माणहु यहोवा नी मोट्‌ली गरा सी तीनी अगळ मर ज्‌या। 38पण देस ना बारा मे जाणवा वाळा अदमी मे गेथा नुन नो सोरो यहोसु अने यपुन्‌ने नो सोरो कालेब बेम जीवत्‌ला रेय।

तीहया देस पोर पेल्‌लो हामलो

(वेवस्‌थावीवरन 1:41-46)

39ता मुसो आहयी वात आखा ईस्‌रायली माणहु ने की देदो अने तीहया घण-जबर दुखी हया। 40तीहया ह़वारे उठीन आहयु केता जाय्‌न बड़ा नी चोट्‌ली पोर चड़वा बाज ज्‌या के आमु पाप करला से; पण हाव तीयार से, अने तीहया जागे जहु जीना बारा मे यहोवा वायदो करलो हतो। 41ता मुसो केदो, “तमु यहोवा ना हुकम नो नीकारो काहा करो? आहयु पुरु नी हये। 42यहोवा तमारी वच मे नी हय, हामलो ना करो, नीता तमु तमारा दुस्‌मन सी हार जहु। 43तां तमारी अगळ अमालेकी अने कनानी माणहु से, एतरे तमु तलवार वेर मर जहु; तमु यहोवा गेथा सेटा हय जेला से, करीन तीहयो तमारी ह़ाते नी रेय।” 44पण तीहया माणहु मुसा पोर भरहो नी कर्‌या, अने तीहया उच्‌ला बड़ा भणी ज्‌या; पण मुसो अने यहोवा नो वायदा नो बाक्‌सो ह़ाते नी ज्‌यो पण पड़ावा मेत र्‌यो। 45ता अमालेकी अने कनानी जे तीहया बड़ा पोर रेता हता, तीमनी पोर हामलो कर देदा, अने तीहया ईस्‌रायली माणहु ने होर्‌मा नाम नु ह़ेर तक देता-देता पछळ आया।