गीनती 15

बादा ना बारा मे नेम

1अळतेण यहोवा मुसा ने केदो, 2“ईस्‌रायली माणहु ने कीदे, के जत्‌यार तमु तमारा रेवा ना देस मे पुगो, जे में तमने आपु, 3अने यहोवा जुगु ह़ु होम बादा, ह़ु मेलबादा, हवन चड़ावो, भले तीहयो खास मान्‌ता पुरी करवा करीन हय के भले ईच्‌छा सी बादा करीन हय, भले तमारी टाकली टेम नो हय, नीता गाय-बोळद्‌या नीता गाडरा-बोकड़ा मे नो हय, जीनी सी यहोवा जुगु वारु गंदायण्‌यो गंद हये; 4अळतेण जे माणेह यहोवा जुगु भेट लावे तीहयो यहोवा जुगु बे कीलो तेल मे भेसकायलो एपा नो दहवो वाटो मेदो अनबादा करीन चड़ावजे, 5अने होम बादा नी लेदे हरेक गाडरा ना बच्‌चा भेळ बे लीटर अंगुर नो रोह रेचव्‌वा नी बादा करीन चड़ावजे। 6अने एक गाडरा ह़ाते ढाय लीटर तेल मे बे कीलो भेसकायला मेदा ने अनबादा करीन चड़ावजे। 7तमु रेचव्‌वा नी बादा नी लेदे ढाय लीटर अंगुर नो रोह चड़ावजो। आहयु यहोवा जुगु वारु गंदायवा वाळो गंद रेहे। 8अने जत्‌यार तु यहोवा ने होम बादा नीता कानी खास मान्‌ता पुरी करवा करीन बादा नीता मेलबादा करीन वाछड़ु चड़ावे, 9ता वाछड़ु ने चड़ाव्‌वा वाळो तीनी ह़ाते ढाय कीलो मेदो जे साड़ी तीन लीटर तेल मे भेसकायलो रेहे अनबादा करीन चड़ावे। 10अने रेचव्‌वा नी बादा मे साड़ी तीन लीटर अंगुर नो रोह चड़ावजे, तीहयु यहोवा ने वारु गंदायण्‌यो गंद आपवा वाळो हवन रेहे।

11“एक-एक वाछड़ु, नीता गाडरा, नीता गाडरा ना बच्‌चा, नीता बोकड़ा ना बच्‌चा ह़ाते आहयीत बादा चड़ावे। 12तमारा बादा ना जानवरु नी जेतरी गणती हये, तीनीत अनसारे एक-एक ह़ाते आसमेत कर्‌या करजो। 13जेतरा देस ना माणहु हय तीहया यहोवा ने वारु गंदायण्‌यो गंद आपवा वाळो हवन चड़ाव्‌वा नी टेमे आहया काम आहयीत रीते कर्‌या करे। 14अने कदीम बीजा देस वाळो तमारी ह़ाते रेतो हय, नीता तमारी पीड़ी मे तमारी वचमे कोय रेवा वाळो हय, अने तीहयो यहोवा ने गंदायण्‌यो गंद आपवा वाळो हवन चड़ाव्‌वा हींडे, ता जे रीते तमु करो तीहयीत रीते तीहया बी करे। 15मंडळी जुगु, मतलब तमारी अने तमारी ह़ाते रेवा वाळा बीजा देस वाळा बेम जुगु एकीत रीती रेय; तमारी पीड़ी सी पीड़ी तक आहयी सदा नी रीती ठेरे के जेवा तमु से तेमेत बीजा देस वाळा बी यहोवा जुगु ठेरे। 16तमारी जुगु अने तमारी ह़ाते रेवा वाळा बीजा देस वाळा ना जुगु एकीत वेवस्‌था अने एकीत नेम से।”1

17अळतेण यहोवा मुसा ने केदो, 18“ईस्‌रायली माणहु ने मारो आहयो बोल ह़मळाव, के जत्‌यार तमु तीहया देस मे पुगो जां मे तमने ली जाम, 19अने तीहया देस नी मेर नु अन खावो, ता यहोवा जुगु भेळी करली भेट चड़ावजो। 20आह़फाम ना कोहणला लोट नो पेल्‌नो रोट्‌लो यहोवा ने भेट मे चड़ावजो; जेम तमु खळा मे गेथा ह़ोरहु तेमेत तीने बी भेळु करीन चड़ावजो। 21तमारी पीड़ी सी पीड़ी तक कोहणला लोट मे गेथो यहोवा ने भेट कर्‌या करजे।2

22“अळतेण जत्‌यार तमु आहया आखा हुकम मे गेथा जीमने यहोवा मुसा ने आपलो से कोय नो नीकारो भुल सी करो, 23मतलब जे दाड़े गेथो यहोवा हुकम आपवा बाज ज्‌यो, अने अगी नी तमारी पीड़ी सी पीड़ी मे तीहया दाड़े गेथो तीहयो जेतरा हुकम मुसा नी लारे आपलो से, 24तीनी मे कदी भुलचुक मे पाप हय ज्‌यो हय अने मंडळी ने नी मालम हय, ता आखी मंडळी यहोवा ने वारु गंदायण्‌यो गंद आपवा वाळी होम बादा करीन एक वाछड़ु, अने तीनी ह़ाते नेम नी अनसारे तीनी अनबादा अने रेचव्‌वा नी बादा चड़ावे, अने पापबादा करीन एक बोकड़ो चड़ावे। 25ता पुंजारो ईस्‌रायली माणहु नी आखी मंडळी जुगु पछतावो करे, अने तीनी माफी जड़हे; काहाके तीमनो पाप भुलचुक मे हयो, अने तीहया आह़फाम नी भुलचुक नी लेदे आह़फाम नो चड़ावो, मतलब यहोवा जुगु हवन अने आह़फाम नी पापबादा तीमनी अगळ चड़ाया। 26करीन ईस्‌रायलीम ने आखी मंडळी नो, अने तीमनी वचमे रेवा वाळा बीजा देस नो बी, तीहयो पाप माफ करहे, काहाके तीहयो आखा माणहु मे अंजाण्‌या मे हयो।

27“अने कदीम कानो माणेह भुलचुक मे पाप करे, ता तीहयो एक साल नी बोकड़ी पापबादा करीन चड़ावे। 28अने पुंजारो भुलचुक मे पाप करवा वाळा माणेह जुगु यहोवा अगळ पछतावो करे; अने आहया पछतावा ना कारण सी तीहयो तीनो पाप माफ हय जहे।3 29जे कोय भुलचुक मे कंय करे, भले तीहयो ईस्‌रायल मे देस वाळो हय नीता तमारी वच मे बीजा देस वाळो रेतो हय, आखा जुगु तमारो एकीत नेम रेवा जोवे। 30पण ह़ु देस वाळा ह़ु बीजा देस वाळा जे ठटाय करीन पाप करे, तीहयो मारो यहोवा नो वाक काडण्‌यो ठेरहे, अने तीहयु माणेह ने आह़फा ना माणहु मे गेथो अलग कर देहे। 31तीहयो जे यहोवा ना बोल ने नीकारो करे, अने तीना हुकम ने नी मानवा वाळो हय, करीन तीहया माणेह ने पक्‌को अलग कर देहे; तीनो पाप तीनात मुंडा पोर पड़हे।”

अराम ना दाड़ा ना नेम ने नी मानवा नो डंड

32जत्‌यार ईस्‌रायली माणहु जंगल मे रेता हता, तीहया दाड़ा मे एक माणेह अराम ना दाड़े लाकड़ा एक्‌ठा करत्‌लु जड़्‌यु। 33अने जीमने तीहयु लाकड़ा एक्‌ठा करत्‌लु जड़्‌यु, तीहया तीने मुसा अने हारुन, अने आखी मंडळीन्‌तां ली ज्‌या। 34तीहया तीने धरीन राख्‌या, काहाके एवा माणहु ह़ाते ह़ु करवा जोवे तीहयु पक्‌कु नी हयलु हतु। 35ता यहोवा मुसा ने केदो, “तीहयु माणेह ने पक्‌का मार देवा जोवे; आखा मंडळी ना माणहु पड़ावान बाहर तीने दगड़ाटे।” 36आहयी रीते जेम यहोवा मुसा ने हुकम आपलो हतो तीनीत अनसारे आखी मंडळी ना माणहु तीने पड़ावा गेथा बारा ली जाय्‌न तीने दगड़ाट्‌या, अने तीहयु मर ज्‌यु।

झालर ना बारा मे नेम

37अळी यहोवा मुसा ने केदो, 38“ईस्‌रायली ने कीदे, के आह़फाम नी पीड़ी सी पीड़ी तक खुद ना लुगड़ा नी कोर पोर झालर लगाड़्‌या करजो, अने एक-एक कोर नी झालर पोर एक लील्‌लु कापड़ु लगाड़्‌या करजो;4 39अने तीहयी तमारी जुगु एवी झालर ठेरे, जीनी सी जत्‌यार-जत्‌यार तमु तीने देखो ता-ता यहोवा ना आखा हुकम तमने फोम आय जाय; अने तमु तीने मानो, अने आह़फा-आह़फाम नी नींगा ना हक मे हय्‌न छीनाळु नी करता फीरो जेम पेले करता आवला से, 40पण तमु यहोवा ना आखा हुकम ने फोम करीन तीने मानो, अने खुद ना भगवान जुगु चोखला बणो। 41में यहोवा तमारो भगवान से, जे तमने मीस्‌र देस मे गेथो नीकाळ लायो के तमारो भगवान ठेरु; में तमारो भगवान यहोवा से।”