गीनती 13

कनान देस मे बारे होगात जानकारी लेवा वाळा ने मोकलनु

(वेवस्‌थावीवरन 1:19-33)

1अळी यहोवा मुसा ने केदो, 2“कनान देस जीने मे ईस्‌रायली माणहु ने आपु तीना बारा मे जानकारी लेवा करीन माणहु ने मोकल; तीहया तीमना आखा कुळ मे गेथा एक-एक मुख्‌या माणहु रेवा जोवे।” 3यहोवा पांह गेथो आहयो हुकम लीन मुसो एवा माणहु ने पारान जंगल मे मोकल देदो, जे आखान आखा ईस्‌रायल ना मुख्‌या हता। 4तीमना नाम आहया से: रुबेन ना कुळ मे गेथो जक्‌कुर नो सोरो सम्‌मु; 5सीमोन ना कुळ मे गेथो होरी नो सोरो सापात; 6यहुदा ना कुळ मे गेथो यपुन्‌ने नो सोरो कालेब; 7ईस्‌साकार ना कुळ मे गेथो योसेप नो सोरो यीगाल; 8एप्‌रेम ना कुळ मे गेथो नुन नो सोरो होसे; 9बीन्‌यामीन ना कुळ मे गेथो रापु नो सोरो पलती; 10जबुलुन ना कुळ मे गेथो सोदी नो सोरो गद्‌दीएल; 11युसुफ ना कुळ मे गेथो, मतलब मनस्‌से ना कुळ मे गेथो सुसी नो सोरो गद्‌दी 12दान ना कुळ मे गेथो गमल्‌ली नो सोरो अम्‌मीएल; 13आसेर ना कुळ मे गेथो मीकाएल नो सोरो सतुर; 14नप्‌ताली ना कुळ मे गेथो बोप्‌सी नो सोरो नहुबी; 15गाद ना कुळ मे गेथो माकी नो सोरो गुएल। 16जे माणहु ने मुसो देस ना बारा ने जाणवा करीन मोकल्‌लो हतो तीमना नाम आहयात से। अने नुन ना सोरा होसे नु नाम मुसो यहोसु पाड़्‌यो।

17तीमने कनान देस ना बारा मे जाणवा करीन मोकलवा नी टेमे मुसो केदो, “आंखर गेथा, मतलब नेगेब मे माय्‌न बड़ा वाळा देस मे जावो, 18अने बड़ा वाळा देस मे जाय्‌न तीहया देस ने देख लेवो के केवु से, अने तीनी मे रेवा वाळा माणहु ने बी देखो के तीहया ताखत वाळा से के कमजोर से, अने कम से के, ढेरका, 19अने जे देस मे तीहया री र्‌या तीहयु केवु से, वारलु के बुरु, अने तीहया केवा-केवा फळ्‌या मे री र्‌या, अने तम्‌बु मे रेय के कीला मे रेय, 20अने तीहयु देस केवु से, मेर पकाड़न्‌यु के पड़त्‌यु, अने तीनी मे झाड़का से के नी। अने तमु हीम्‌मत राखीन चालो, अने तीहया देस नी मेर मे गेथु थोड़ुक लेता बी आवजो।” तीहया दाड़ा पेल्‌ली वार ना अंगुर पाकवा नी टेम हती।

21करीन तीहया चाल देदा, अने सीन नाम ना जंगल मे गेथा लगाड़ीन रहोब ह़ेर तक, जे हमात घाटी नी वाट्‌ये से, आखा देस ने देखी-भाळीन जानकारी ली लेदा। 22तीहया नेगेब देस हय्‌न चाल्‌या, अने हेब्‌रोन तक ज्‌या; ता अहीमन, सेसे, अने तल्‌मे नाम ना अनाक कुळ वाळा रेता हता। हेब्‌रोन मीस्‌र देस ना सोवन ह़ेर गेथु ह़ात साल पेले वहाड़लु हतु। 23ता तीहया एसकोल नाम नु कोतड़ु तक ज्‌या, अने तां गेथी एक डाळ अंगुर ना घोड़ भेळ तोड़ लेदा, अने बे माणहु तीने एक लाकड़ी पोर टांगीन उचलीन चाल पड़्‌या; अने तीहया अनारु अने अंजीरु मे गेथा बी थोड़ाक-थोड़ाक फोळ लेता आया। 24ईस्‌रायली तां गेथा अंगुर नो घोड़ तोड़ीन ली आवला हता, करीन तीहया जागा नु नाम एसकोल1 कोतड़ु पाड़्‌या।

25चाळीह दाड़ान अळतेण तीहया ते देस ना बारा मे जानकारी लीन पासा आवती र्‌या। 26अने पारान जंगल ना कादेस नाम ना जागा मे मुसा, हारुन अने ईस्‌रायल नी आखी मंडळीन्‌तां पुग्‌या; अने तीहया तीमने मतलब आखा माणहु ने खबर आप्‌या, अने तीहया देस ना फोळ तीमने देखाड़्‌या। 27तीहया मुसा ह़ाते आहयु कीन वात कर्‌या, “जे देस मे तु आमु ने मोकल्‌लो तीनी मे आमु ज्‌या; तीहया देस मे ह़ाचलीन दुद ना अने मोद ना झोरु वये, अने तीमनी मेर मे गेथा आहयात फोळ से। 28पण तीहया देस मे रेवा वाळा ताखत वाळा से, अने तीना ह़ेर कीला वाळा से अने घणा मोटा से; अने अळतेण आमु तां अनाक कुळ वाळा ने बी देख्‌या। 29दखणाव देस मे अमालेकी कुळ वाळा वह र्‌या; अने बड़ा वाळा देस मे हीत्‌ती, यबुसी, अने एमोरी री र्‌या; अने दर्‌या ना काठे-काठे अने यरदन नंदी नी धेड़े कनानी माणहु वहला से।”

30पण कालेब मुसा अगळ माणहु ने होगा राखवा ना वीच्‌यार सी केदो, “आमु हमणेत झुमाय्‌न हीय्‌या देस ने आपणु बणाय लीया; काहाके पक्‌का आपणी मे आसम करवा नी सक्‌ती से।” 31पण जे माणहु तीमनी ह़ाते जेला तीहया केदा, “तीहया माणहु पोर हामलो करवा नी सक्‌ती अमारी मे नी हय; काहाके तीहया अमारी गेथा ताखत वाळा से।” 32अने तीहया ईस्‌रायली अगळ तीहया देस नी जीना बारा मे जानकारी लेदला हता आहयु कीन वाक बी काड्‌या, “तीहयु देस जीना बारा मे आमु जानकारी लेवा करीन जेला आवु से, जे आह़फा ना रेण्‌या ने गळ जाय; अने जेतरा माणहु आमु तीनी मे देख्‌या तीहया आखान आखा उचला अने मोटा डील ना से। 33अळतेण आमु तां नपीली ने, मतलब नपीली कुळ वाळा अने अनाक कुळ वाळा ने देख्‌या;2 अने आमु अमारी नींगा मे तीमनी अगळ टीड्‌या ह़रका देखाव पड़ता हता, अने आसमेत तीमनी नींगा मे मालम पड़ता हता।”