गीनती 12

मरीयम ने डंड आपणु

1मुसो एक कुसी घोराणा नी बयर ह़ाते वेवा कर लेदलो हतो। करीन मरीयम अने हारुन तीहयी कुसी घोराणा नी बयर ना कारण सी तीनो वाक काडवा बाज ज्‌या; 2तीहया केदा, “ह़ु यहोवा मुसा ह़ाते एतरोत वात करलो से? ह़ु तीहयो अमारी ह़ाते बी वात नी कर्‌यो।” तीमनी आहयी वात यहोवा ह़मळ्‌यो। 3मुसो धरती पोर ना रेवा वाळा आखा माणहु गेथो घण जादा नीचळा वेहवार नो हतो। 4एतरे यहोवा उचकालेत मुसा ने अने हारुन ने अने मरीयम ने केदो, “तमु तीनोव मेल-मीलाप वाळा तम्‌बुन्‌तां नीकळ आवो।” ता तीहया तीनोव नीकळी आया। 5ता यहोवा वादळा ना खम्‌बा मे उतरीन तम्‌बु ना झापले उबो हय्‌न हारुन अने मरीयम ने बोलायो; अने तीहया तीनीन्‌तां नीकळ आया। 6ता यहोवा केदो, “मारी वात ह़मळो: कदीम तमारी मे कोय भगवान वगे गेथी वात केवा वाळो हय, ता तीनी पोर मे यहोवा दरसन नी लारे खुद ने उजन्‌तो करही, नीता ह़पना मे तीनी ह़ाते वात करही। 7पण मारो चाकर्‌यो मुसो एवो नी हय; तीहयो ते मारा आखा घोराणा मे भरहा नी लायक से।1 8तीनी ह़ाते मे ह़ताय्‌न नी, पण आमने-सामने अने चोखाझण बोलु सी वात करु;2 अने तीहयो यहोवा नो मुख ह़जाड़े। एतरे तमु मारा चाकर्‌या मुसा नो वाक काडवा काहा नी बीह्‌या।”

9ता यहोवा तीमनी पोर खीजवाय पड़्‌यो, अने तीहयो जत र्‌यो; 10ता तीहयु वादळु तम्‌बु पोर गेथु सेटु हय ज्‌यु, अने मरीयम कोड़ नी मंदवाड़ सी बरप ने तेम धोळीसप हय जी। अने हारुन मरीयम भणी भाळ्‌यो। अने देख्‌यो के मरीयम कोड़ मंदवाड़ वाळी हय जी। 11ता हारुन मुसा ने केवा बाज ज्‌यो, “ए मारा मालीक, आमु जे गंडाय मतलब पाप बी कर्‌या, आहयो पाप अमारी पोर ना लागवा देय। 12अने मरीयम ने तीहया मरलान तेम ना रेवा देय, जीनु डील आह़फा नी आय्‌ह ना पेट मे गेथु नीकळतेत अरदु ओगळ्‌ळु रेय।” 13ता मुसो आहयु कीन यहोवा ने आड़्‌यो, “ए भगवान दया कर, अने मरीयम ने आरगी कर।” 14यहोवा मुसा ने केदो, “कदीम तीनो बाह तीना मोडा पोर थुपलो रेतो, ता ह़ु ह़ात दाड़ा तक तीहयी लाजे नी पड़ती? एतरे तीहयी ह़ात दाड़ा तक पड़ावा गेथी बारी रेय। तीनीन अळतेण तीहयी पड़ावा मे मोय आव्‌वा जोवे।”3 15अने मरीयम ह़ात दाड़ा तक पड़ावा गेथी बारी री, अने जत्‌यार तक मरीयम पासी नी आय सकी तांह तक माणहु अगा नी बड़्‌या। 16तीनीन अळतेण तीहया हसेरोत गेथा अगा बड़ीन पारान नाम ना जंगल मे आह़फाम ना पड़ावा उबा कर्‌या।