Skip to content
BibleKenya

Paliya Bible

मरकुस 14

ईसु ने मार नाखवा नी चाल

(मत्‌ती 26:1-5; लुका 22:1-2; युहन्‌ना 11:45-53)

बे दाड़ा मे फसह नो तीवार अने खमीर वगर रोट्‌ला बणाव्‌वा नो तीवार आव्‌वा वाळो हतो।1 मंदीर ना डायला पुंजारा अने युहदी-धरम ह़ीकाड़न्‌या, ईसु ने ठगीन धराव्‌वा नो वीच्‌यार काडवा करीन भेळा हया। पण तीहया केता हता, “के तीवार ना दाड़े नी मरावता, कदी ईसम नी हय जाय के माणहु मे दंगो हय जाय।”

बेतन्‌या मे ईसु ने तेल रेचवीन तीयार करे

(मत्‌ती 26:6-13; युहन्‌ना 12:1-8)

2

जत्‌यार ईसु बेतन्‌या गाम मे सीमोन कुड़ावा ना घोर मे खावा बह र्‌यो हतो, तत्‌यार एक बयर मोगला दगड़ा नी ह़ीही मे पीवर ईत्‌तर लीन आयी; अने ह़ीहो फोड़ीन ईत्‌तर ईसु ना मुंडा पोर रेचवी देदी।3 पण काना आह़फाम ना मन मे रीहवाय्‌न केवा बाज ज्‌या, “आहयी आहयु ईत्‌तर ने काहा बगाड़ देदी? काहाके आहयु ईत्‌तर एक साल नी दाड़की ना पय्‌हा गेथु बी मोगु वेचाय जतु, अने तीहया पय्‌हा गरीब ने वाट देता।” अने तीहया तीनो वाक काडीन वडवा बाज ज्‌या।

ईसु हुकम आपीन केदो, “ईने काहा वेला पाड़ र्‌या; रेवा देवो? हीय्‌यी ते मार जुगु वारलुत काम करली से। गरीब ते जलम तमारी ह़ाते रेहे, अने जत्‌यार गमे तत्‌यार तीमनी भलाय करवा नो मोखो तमारी पांह से;4 पण मे तमारी ह़ाते जलम नी रेम। जे बी बण्‌यु तीहयु, हीय्‌यी करी, हीय्‌यी मारा डील पोर मने मरवान पेले गेथीत ईत्‌तर रेचवीन मने वगे करवा नी तीयारी करली से।” मे तमने ह़ाचलीन केम, “आखी कळी मे जां-जां खुस-खबर नु परच्‌यार हयहे, तां-तां माणहु आना आहया काम ने बी फोम करीन नामल्‌हे।”

यहुदो ईसु ने धराव्‌वा तीयार हये

(मत्‌ती 26:14-16; लुका 22:3-6)

तत्‌यार यहुदा ईस्‌करीयोती जे ईसु ना बारे चेला मेनो एक हतो, आहयोत चेलो मंदीर ना डायला पुंजारान्‌तां जीन केदो के “मे ईसु ने धराव्‌वा मे तमारो सात देही।” ता तीहया तीनी वात ह़मळीन घण-जबर खुस हय ज्‌या, अने तीने आनी बदले पय्‌हा आपवा करीन वायदो कर देदा। अने तीहया ईसु ने धोको दीन धराव्‌वा नो मोखो ह़ोदवा बाज ज्‌या।

ईसु अने चेला फसह तीवार नी तीयारी

(मत्‌ती 26:17-25; लुका 22:7-14,21-23; युहन्‌ना 13:21-30)

खमीर वगर रोट्‌ला बणाव्‌वा नो तीवार ना पेल्‌ना दाड़े, ते दाड़े तीहया फसह ना तीवार नु गाडरु मारीन बादा चड़ावता हता, ता ईसु ना चेला ईसु ने पुछ्‌या, “तु अमारी ह़ाते फसह तीवार नु खाणु कां ह़ारीक खावा हय र्‌यो, तां ह़ारीक आमु जीया अने फसह तीवार खावा नी तीयारी करीया?”

ता ईसु तीहया चेला मेना बे जणा ने आहयु कीन मोकल्‌यो, “ह़ेर मे जावो, अने एक माणेह वटळा मे पाणी भरीन जत्‌लु तमने भेटहे, तीनी ह़ाते जजो।” अने तीहयो जे बी घोर मे जाय, ते घोर ना मालीक ने केजो; “मास्‌तर ईसम पुछ र्‌यो, पोरणा ने खवाड़वा नो कोपरो कां से, तां ह़ारीक मे मारा चेला ह़ाते वण-खमीर रोट्‌ला नो फसह तीवार वाळीन खाणु खाम?” तीहयो तमने घोर नी बीजी मंजली पोर, वारु जमाड़ीन अने आथरीन तीयार करलो एक मोट्‌लो कोपरो देखाड़हे। तां तमु आपणी जुगु खावा नु तीयार करजो।

अने तीहया बे चेला ह़ेर मे ज्‌या, अने जीसम तीहयो तीमने केदलो हतो, तेम ने तेम तीमने जड़्‌यु, अने तीहया फसह तीवार नु खाणु तीयार कर्‌या।

जत्‌यार ह़ांतु हय ज्‌यु, ता ईसु बारे नेवताळा नी भेळतो तां ह़ारीक ज्‌यो।

अने जत्‌यार तीहया खावा बाज रेला, ता ईसु आह़फा ना बारे नेवताळा ने केदो, “मे तमने ह़ाचलीन केम, तमारी माय्‌न एक जणो, जे मार ह़ाते खावा बाज र्‌यो, तीहयो मने धरावहे।”5

अने तीहया आखा ह़ोह़वाय ज्‌या अने एक-एक जणो, “मे नी हय, कनी?” करीन केवा बाज ज्‌या।

तीहयो तीमने केदो, “बारे जणा मे गेथो एक जणो से, जे मारी ह़ाते एकीत थाळी मे गेथो हेड़ीन खावा बाज र्‌यो, जीसम तीना बारा मे लीखलु से, मे मनख्‌या नो सोराम ने मरवुत से; पण तीहया अदमी जुगु घणी दुख नी वात से, मनख्‌या ना सोरा ने धरावहे। तीहयो पयदा नी हयतो, ता तीहया अदमी जुगु वारु रेतु।”

भगवान नु चोखलु खाणु

(मत्‌ती 26:26-30; लुका 22:14-20; 1 कुरन्‌थी 11:23-25)

जत्‌यार तीहया खावा बाज रेला, ता ईसु हात मे रोट्‌लो धर्‌यो, अने रोट्‌ला जुगु भगवान ने, तु घणो वारु से कीन रोट्‌लो भागीन आह़फा ना चेला ने आपतो जीन केदो, “लेवो, आहयो रोट्‌लो खावो, आहयो रोट्‌लो मारु डील से।”

आहयी रीते रोट्‌लो खायलीन ईसु अंगुर नो रोह भरला पीयाला जुगु भगवान ने तु घणो वारु से कीन चेला ने आप्‌यो अने तीहया आखा तीनी मे गेथो पीदा। आहयु तीहयो तीमने केदो, “आहयो अंगुर नो रोह नो पीयालो, मारा लोय मे बोली करला नवला वायदा नी सेलाणी से, आहयु लोय मे तमारी जुगु वयाड़वा वाळो से।”6 मे तमने ह़ाचलीन केम, “मे अंगुर नो रोह तीहया दाड़े लग कदी नी पीम जत्‌यार लग भगवान ना राज मे नवलो अंगुर नो रोह नी पी लेम।”

अळतेण तीहया भगवान नो भजन गावीन जेतुन नाम ना बड़े जवा बाज ज्‌या।

पतरस ईसु नो नीकारो करे

(मत्‌ती 26:31-35; लुका 22:31-34; युहन्‌ना 13:36-38)

तत्‌यार वाट्‌ये ईसु तीमने केदो, “तमु आखा मने सोड़ीन वीरखी जहु, काहाके लीखलु से: ‘मे गुवाळ्‌या ने मार नाखही, अने गाडरा रीवण्‌या-तीवण्‌या हय जहे।’7 8पण मे जीवतो हय्‌न अळतेण तमारी गेथो पेले गलील जीला मे जही।”9

पतरस ईसु ने केदो, “आखा तने सोड़ीन भले वीरखाय जाय ता वीरखाय जाय, पण मे कदी नी वीरखायु।”

ईसु पतरस ने केदो, “मे तने ह़ाचलीन केम, तु आज राते बे कावा कुकड़ा वाहवा ना पेले, तीन कावा मारो नीकारो करही।”

पण पतरस अळी हीमम्‌त करीन केदो, “तारी ह़ाते मने मरवा बी पड़े, ते बी मे तारो नीकारो कदी नी करु।” अने बीजा आखा चेला एमेत हीमम्‌त करीन केदा।

गतसमनी मे ईसु नी वीन्‌ती

(मत्‌ती 26:36-46; लुका 22:39-46)

अळतेण तीहया जेतुन बड़ी पोर गतसमनी नाम नी एक वाड़ी मे पुग ज्‌या, अने तीहयो आह़फा ना चेला ने केदो, “मे वीन्‌ती करीन आवु, तत्‌यार लग तमु आञेत बहजो।” अने तीहयो पतरस ने, अने याकुब ने अने युहन्‌ना ने अगो ली ज्‌यो, अने तां जाय्‌न तीहयो घणो दुखी हय्‌न घबरावा बाज ज्‌यो। अने तीहयो तीमने केदो, मारु मन घणु दुखी से; एतरे मारो जीव नीकळवात हींडे, एतरे तमु आञेत रेवो, अने चेतीन रीन जागला रेवो।

अने तीहयो जरीक अगो ज्‌यो, अने आह़फोत अगमुह्‌या पड़ ज्‌यो अने कदीम हय सके ता आहयी दुख नी टेम मारी पोर गेथी सेटी हय जवा जोवे करीन तीहयो आहयी वीन्‌ती करवा बाज ज्‌यो, “ओ डायला बाह! ओ बाह! तारी सी आखु कंय हय जाय; एतरे आहया दुख ना पीयाला ने मारीन्‌तां गेथो सेटो कर ले: ते बी मारी मरजीन अनसारे नी पण तारी मरजीन अनसारे हयवा दे।”

अळतेण ईसु तीहया तीन चेलान्‌तां पासो ज्‌यो, अने तीमने ह़ुवत्‌ला देखीन सीमोन पतरस ने केदो; “ए सीमोन, तु ह़ुव्‌वा बाज र्‌यो ह़ु? तने जरीक वार लग नी जगायु ह़ु? जीव ते तीयार से, पण डील ते कमजोर से। एतरे तमु पारख मे नी पड़वा जोवे करीन जागता रीन वीन्‌ती करता रेवो।”

अने तीहयो एखलो पासो जत र्‌यो, अने तीहयीत वात कीन वीन्‌ती कर्‌यो। अने अळी पासो जीन तीहयो तीन जणा ने ह़ुवत्‌ला देख्‌यो। तीहया ते घणा नींदराळा हता, अने ईसु ने ह़ु केवा अने ह़ु नी? तीहयी वात तीमने ह़मज मे नी आयी।

अळी तीसरी कावा बी ईसु पासो तीमनी ह़ाते ज्‌यो, ता ईसु तीमने केदो, “हाव ह़ुवता रेवो अने थाको पीता रेवो बस हेतरुत, हमणे टेम आय जेली से, देखो मे मनख्‌यान सोरो पापी माणहु ना हात मे धराय जही। उठो, आपणु जता, देखो मने धोको दीन बीजा ना ह़ात मे ह़ोपवा वाळो ह़ातेत आय र्‌यो।”

ईसु ने सीपायड़ा ना हात मे ह़ोपे

(मत्‌ती 26:47-56; लुका 22:47-53; युहन्‌ना 18:3-12)

ईसु आह़फा ने धराव्‌वा वाळा ना बारा मे आहयु केवात बाज रेलो तीहयीत टेमे यहुदा ईस्‌करीयोती तीहयो बारे चेला मे गेथो एक हतो, तीनी ह़ाते ढेरेत माणहु आया, तीहया तलवार्‌या अने डींगा ली र्‌या हता। ईमने मंदीर ना डायला पुंजारा, अने युहदी-धरम ह़ीकाड़न्‌या अने पुडार्‌या मोकल्‌ला हता। अने ईसु ने धराव्‌वा वाळो यहुदा तीमने आहयी सेलाणी आप्‌लो हतो के “मे जीने कुको देही तीहयोत ईसु से, तीने धरीन चेतीन रीन लीज्‌जो।”

तेमेत जत्‌यार तीहया तां पुग्‌या, ता यहुदा ईस्‌करीयोती ईसुन्‌तां छोटोत आवीन तीने केदो, “ए मास्‌तर” अने तीने कुको देदो। अने तत्‌यारुत तीहया ईसु ने धर लेदा। पण ईसु नो एक चेलो10 तीहयो तां उबो हय र्‌यो हतो तीहयो मीयान मे गेथी तलवार नीकाळीन आखान डायला पुंजारा ना पावर्‌या ने झाटको दीन तीनो कान्‌टो तोड़ देदो। ईसु तीमने केदो, “तमु मने चोट्‌टो ह़मजीन मारी भणी तलवार्‌या अने डींगा लीन आय र्‌या ह़ु? 11मे ते दाड़ीन मंदीर मे तमारी ह़ाते रीन ह़ीकापण ह़ीकाड़तो हतो, तत्‌यार तमु मने नी धर्‌या,12 पण हमणे एम करीन धरवा आय र्‌या के मारा बारा मे खरला सास्‌तर मे लीखलु से, तीहयु पुरु हये तेम।”13

अने अळतेण आखा चेला ईसु ने सोड़ीन नाह पड़्‌या।

अने तां ह़ारीक एक जुवान्‌यो आह़फा ना डील पोर लुंगी एतरीत ओडीन ईसु पसळ-पसळ जतो हतो; अने ईसु ने लीजण्‌या माणहु तीने धर पाड़्‌या। पण तीहयो लुंगी तीमना हात मे रेवा दीन नांगरलोत नाह पड़्‌यो।14

युहदी माणहु नी बठक मे ईसु ने लीजवा

(मत्‌ती 26:57-68; लुका 22:54-55,63-71; युहन्‌ना 18:13-14,19-24)

तीहयो ईसु ने मंदीर ना आखान डायला पुंजारा तां ली ज्‌या; अने मंदीर ना बीजा डायला पुंजारा, अने पुडार्‌या, अने युहदी-धरम ह़ीकाड़न्‌या बी तां ह़ारीक भेळा हय ज्‌या। पतरस सेटोत रीन तीनी पसळ-पसळ आखान डायला पुंजारा ना आंगणा मे ज्‌यो, तीहया रखवाळ्‌या पावर्‌या नी ह़ाते बहीन आक्‌ठु तापवा बाज ज्‌यो। मंदीर ना डायला पुंजारा अने युहदी जाती ना आखी पंचु, ईसु ने मारवा करीन गवा-पुरावा ह़ोद्‌ता हता पण तीमने गवा-पुरावा नी जड़्‌या। काहाके घणा ढेरका माणहु ईसु नी वीरोद मे झुटी गवाय देदा, पण तीमनी गवाय एक रंगी नी हती।

सेल्‌ली कावा जरीक बीजा माणहु उबा हय्‌न ईसु नी वीरोद मे आहयी गवाय देदा के 15“आमु आहया ईसु ने केतलो ह़मळला से, माणहु ना हात वेर बणावला आहया मंदीर ने ओदार देही, अने तीन दाड़ा मे बीजो मंदीर बणाय देही, तीहयो हात वेर बणावलु नी रेय।”16 पण ते बी तीमनी गवाय एक रंगी हय्‌न भेट नी खादी

तत्‌यार मंदीर नो आखा नो डायलो पुंजारो वच मे उबो रीन ईसु ने पुछ्‌यो, “आहया माणहु कानी बी गवाय दी र्‌या, तीनु जपाप तु काहा नी आप्‌तो?”

पण ते बी ईसु होगो हय र्‌यो, अने कंय बी जपाप नी आप्‌यो आखा नो डायलो पुंजारो अळी तीने पुछ्‌यो, “तु जुगाळा भगवान नो सोरो मसी से ह़ु?”

ईसु केदो, “होव मेत से। अने तमु मनख्‌या ना सोरा ने आखाम जोरभर्‌या भगवान ना जमणी धेड़े बह रेलो, अने ह़रग गेथो वादळा मे आवत्‌लो देखहु।”17

अने तत्‌यार मंदीर नो आखा नो डायलो पुंजारो लुगड़ा फाड़ीन केदो, “तमुत ईने भगवान नु नामबद्‌दी करत्‌लो ह़मळी लेदला से, एतरे हाव आमु ने अळी गवा-पुरावा नी जोवता। तमारो ह़ु वीच्‌यार से।” तीहया आखा ईसु ने गुनाळ्‌ळो ठेरावीन केदा, “आने मोत नो डंड जड़वात जोवे।”18

तत्‌यार तीमनी माय्‌न काना ईसु ना मोडा पोर थुप्‌या, अने तीना मोडे पाटो बांदीन, काना ढीक देवा बाज ज्‌या। अने काना तीनी हाही उडाड़ीन केवा बाज ज्‌या “भगवान भणी गेथी वात देखाड़।” अने मंदीर ना रखवाळ्‌या पावर्‌या तीने ली जाय्‌न थपड़ाट्‌या।

पतरस ईसु नो नीकारो करे

(मत्‌ती 26:69-75; लुका 22:56-62; युहन्‌ना 18:15-18,25-27)

जत्‌यार पतरस हेटो आंगणा मे हतो, ता आखा ना डायला पुंजारा नी एक जुवानाय पावर्‌याण तीनीन्‌तां आवी। अने पतरस ने तापत्‌लो देखीन तीहयी एक डीट्‌याण भाळी अने केदी, “तु बी तीहया ईसु नासरी ह़ाते रेत्‌लो।”

पतरस नीकारो करीन केदो, “काय जाणु, तु ह़ु की री, तीहयु मने ह़मज मे नी आवतु।” आहयु कीन तीहयो अळी झापला नी पयड़ी पोर ज्‌यो; अने कुकड़ो वाह देदो।

तीहयी जुवानाय पावर्‌याण पतरस ने अळी देखीन, तां उबा हय रेला माणहु ने केदी, “आहयु माणेह बी तीमनी मे गेथो एक जणो से।” पण तीहयो अळी नीकारो कर देदो। जरीक वार मे तां उबा हय रेला माणहु पतरस ने केदा, “ह़ाचलीन तु तीमनी मे गेथो एक से, काहाके तु बी गलील वाळोत से।”

तत्‌यार पतरस भगवान नी ह़ाम खाय्‌न केवा बाज ज्‌यो, “मे तीहया माणेह ने जाणु तक नी तीना बारा मे तमु वात कर र्‌या, कदीम मे झुट मेल र्‌यो हय ता मारी पोर गरा आय पड़वा जोवे।”

अळतेण तत्‌यारुत बीजी कावा कुकड़ो वाह देदो; तीने तीहयी वात फोम आयी, जे वात ईसु तीने केदलो, के “बे कावा कुकड़ो वाहवा नी पेले, तु मारो नीकारो तीन कावा करही।” अने पतरस आहयी वात ने फोम करीन फुकु-फुकु रड़वा बाज ज्‌यो।

Source notes (18)
  1. Cross-reference नीरगमन 12:1-27
  2. Cross-reference लुका 7:37,38
  3. Cross-reference लुका 7:37,38
  4. Cross-reference वेवस्‌थावीवरन 15:11; मत्‌ती 26:11; युहन्‌ना 12:8
  5. Cross-reference भजन सहीता 41:9; मत्‌ती 26:23; लुका 22:21; युहन्‌ना 13:18
  6. Cross-reference नीरगमन 24:8; यीरम्‌या 31:31-34
  7. Cross-reference जकर्‌याह 13:7
  8. Cross-reference मत्‌ती 28:16
  9. Cross-reference मत्‌ती 28:16
  10. Cross-reference युहन्‌ना 18:10
  11. Cross-reference लुका 19:47; 21:37
  12. Cross-reference लुका 19:47; 21:37
  13. Cross-reference यसाया 53; जकर्‌याह 13:7
  14. Cross-reference आमोस 2:16
  15. Cross-reference युहन्‌ना 2:19
  16. Cross-reference युहन्‌ना 2:19
  17. Cross-reference दानीयल 7:13
  18. Cross-reference लेव्‌यवेवस्‌था 24:16

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.