Skip to content
BibleKenya

Paliya Bible

मरकुस 10

लाडी सोड़वा ना बारा मे ईसु नी ह़ीकापण

(मत्‌ती 19:1-12; लुका 16:18)

अळतेण ईसु कफरनहुम ह़ेर गेथो नीकळीन युहद्‌या देस माय्‌न यरदन नंदी ना ह़ेली धेड़े ज्‌यो, अने अळी मेळो तीनीन्‌तां भेळो हय ज्‌यो, अने तीहयो आह़फा नी रीती ना अनसारे तीमने ह़ीकाड़वा बाज ज्‌यो।

तत्‌यार फरीसी दलवाळा तीनीन्‌तां आवीन पारखवा करीन पुछ्‌या, “अदमी वाटु आह़फा नी बयर ने सोड़वा वारु से ह़ु?”

तीहयो तीमने जपाप आप्‌यो, “भगवान वगे गेथो वात केण्‌यो मुसो तमने ह़ु हुकम आपलो से?” 1

फरीसी दलवाळा केदा, “मुसो ते झगड़ो भांगवान चीट्‌ठी लीखीन लाडी ने सोड़वा नो हुकम आपलो से।”2

ईसु तीमने केदो, “तमारा आड़ा-बुड़ान मन नी ठटाय जाणीन मुसा आहयो हुकम लीखीन आप्‌यो। तमारु मन बी तीमनीन तेम ठटायलु से। पण भगवान कळ घड़्‌यो तां गेथोत तीमने एक बयर अने एक अदमी करीन बणायो।3 आनी लेदे माणेह आह़फा ना आय्‌ह़-बाह गेथो आंग्‌येत हय्‌न, आह़फा नी बयर ह़ाते जोड़ाय्‌न रेहे, अने तीहया बे जणा एक डील4 बण जहे। एतरे भगवान नी नींगा मे हमणे गेथा तीहया बे डील नी, पण एक डील से। एतरे जीमने भगवान जोड़लो से, तीमने माणहु अलग नी करवा जोवे।”

अने जत्‌यार ईसु अने चेला घोर मे पासा ज्‌या ता चेला अळी आहयी वात ना बारा मे ईसु ने पुछ्‌या। 5अने तीहयो तीमने केदो, “जे कोय माणेह पेल्‌नी लाडी ने सोड़ीन बीजी लाडी बणावे, तीहयो पेल्‌नी लाडी ना वीरोद मे बीजी ह़ाते छीनाळु करे, अने कदीम लाडी आह़फी ना लाडा ने सोड़ीन झगड़ो भंगाड़ीन बीजो लाडो करे, ता तीहयी छीनाळु करे।”6

ईसु नान्‌ला सोरा ने संयबरकत आपे

(मत्‌ती 19:13-15; लुका 18:15-17)

अळी आय्‌ह़-बाह आह़फा ना सोरा-सोरी ने ईसुन ता लाया; के ईसु सोरा-सोरी पोर आह़फा नो हात मेके, पण चेला तीमने वड्‌या। ईसु चेलाम ने वडत्‌लो देखीन, रीह करीन, अने तीमने हुकम आपीन केदो, “हीमने ना रोको, सोरा-सोरी ने मारीन्‌तां आव्‌वा देवो; काहाके भगवान नु राज हीमनी ह़ारका नु से।” 7मे तमने ह़ाचलीन केम, “जे कोय भगवान ना राज ने नान्‌ला सोरा-सोरीन तेम भरहो करीन नी रेय, ता तीने भगवान ना राज मे कदी नी जवाये।”8 अने ईसु सोरा ने खोळा मे लेदो अने तीमनी पोर हात मेकीन संयबरकत आप्‌यो।

मालदार माणेह

(मत्‌ती 19:16-30; लुका 18:18-30)

अळतेण जत्‌यार ईसु यरुसलेम भणी जवा करीन वाट्‌ये लाग्‌यो, ता एक माणेह तीनीन्‌तां दवड़ीन आयो, अने तीना पोगे पड़ीन तीने पुछ्‌यो, “ए वारला मास्‌तर, अमरकाय नी जीवाय हात करवा करीन मे ह़ु करु?”

अने ईसु तीने केदो, “तु मने वारलो काहा केय?” भगवान ने सोड़ीन कानो बी वारलो नी हय, भगवान एतरोत वारलो से। तु आहया हुकम ते जाणे, खुन नी करजे, छीनाळु नी करजे, चोरी नी करजे, झुटी गवा नी देजे, कोयने नी ठगजे, आह़फा ना आय्‌ह-बाहा नी ईज्‌जत करजे।9

अने तीहयो ईसु ने केदो, “ए मास्‌तर, आहया आखा हुकम ते मे जुवान हतो तत्‌यार गेथोत मान्‌तो आय र्‌यो।”

अने ईसु तीनी भणी घणा मोंग सी भाळ्‌यो, अने तीने केदो, “तारी मे एक वात नी कमी से; जा, जेतरु बी तारु से, तीने वेचीन गरीब ने आखु आप दे, अने अळतेण मारी ह़ाते आवजे। ईसम करही, ता तने ह़रग मे धन जड़हे।” तीहयो माणेह ते घण-जबर मालदार हतो। एतरे ईसु नी वात ह़मळीन तीहयो घण फीकर मे पड़ ज्‌यो, अने दुखी हय्‌न जत र्‌यो।

ईसु च्‌यारो-मेर भाळीन आह़फा ना चेला ने ह़मजाड़तो जाय्‌न केदो, “मालदार माणहु ने भगवान ना राज मे भरायवा घणु जबर काठु से।”

धन नु जखम

आहयी वात चेला ह़मळीन वहराय ज्‌या। पण ईसु अळी तीमने केदो, “ए सोरा! भगवान ना राज मे भरायवा घणु काठु से! भगवान ना राज मे मालदार माणेह ने भरायवा गेथु, उटड़ा ने ह़ोय ना डुचा मे भरायवा सरल से।”

चेला घणा जबर वहराय्‌न आह़फात केवा बाज ज्‌या; “मालदार माणहु ने लग छुटकारो हात करवा काठु से, ता कोयने छुटकारो जड़हे?”

ईसु चेला भणी भाळीन केदो, “आसम बचाड़वा माणहु ने नी बणे, पण भगवान वाटु आखु कंय बण जाय।”

पतरस ईसु ने केवा बाज ज्‌यो, “देखो आमु ते आखु कंय सोड़ीन तार ह़ाते आय र्‌या।”

ईसु केदो, “मे ह़ाचलीन केम, जे कोय मार वाटु अने खुस-खबर ना काम वाटु घोर ने नीता खेतर ने नीता भाय-बेन्‌या ने नीता आय्‌ह-बाह ने नीता सोरा-सोरी ने सोड़ देदो हय, तीने आहयी कळी मेत ह़ोव गुणा पासु जड़हे। घोरु भायु अने बेन्‌या अने आय्‌ह-बाहा अने सोरा अने खेतरु पण आहया आखा भेळ माणहुन तेम वेला बी झेलवा पड़हे, ते बी आव्‌वा वाळी कळी मे तीहयो अमरकाय जीवाय बी हात करहे। 10ईसम बी फोम राखजो, पण घणा माणहु जे हमणे पेले से, तां तीहया पसळ हय जहे, अने जे हमणे पसळ से, तां तीहया अगळ हय जहे।”11

ईसु तीसरी कावा दुख भुगत्‌वान अने जीवतो हयवान बारा मे केय

(मत्‌ती 20:17-19; लुका 18:31-34)

हाव ते ईसु अने तीना चेला यरुसलेम भणी जवा बाज र्‌या हता, ते बी आखा नी अगळ ईसु चालतो हतो। करीन तीना चेला चकरायता हता अने पसळ-पसळ चालन्‌या बीजा माणहु बी बीहवा बाज ज्‌या। एतरे ईसु बारे नेवताळा ने अळी आग्‌ये ली जाय्‌न तीमने आह़फा पोर जे वीतवा वाळु हतु, तीहयो केवा बाज ज्‌यो। “ह़मळो, आपणु यरुसलेम जवा बाज र्‌या, अने मे मनख्‌या नो सोरा ने धरीन मंदीर ना डायला पुंजारा नी अने युहदी-धरम ह़ीकाड़न्‌या ना हात मे आप देहे, अने तीहया तीने गुनाळ्‌ळो ठेरावीन मोत नो डंड आपीन आड़जात्‌या माणहु ना हात मे ह़ोप देहे। अने तीहया तीनी हाही उड़ावह़े, अने तीनी पोर थुपहे, अने तीने ह़ड़का देहे, अने मार देहे, अने अळतेण तीहयो तीन दाड़ा मे मर्‌या-ह़र्‌या मे गेथो पासो जीवतो हय जहे।”

याकुब अने युहन्‌ना नी वीन्‌ती

(मत्‌ती 20:20-28)

तत्‌यार जब्‌दी ना सोरो याकुब अने युहन्‌ना ईसुन्‌तां आवीन केदो, “ए मास्‌तर, अमारी हेर आहयी से के, जे बी आमु तार पांह मांगहु, तीहयुत आमने आप देजे।”

तीहयो तीमने केदो, “तमारी ह़ु हेर से जे मे तमारी वाटु पुरु करु?”

तीहया ईसु ने केदा, “जत्‌यार तु तारी बड़ाय भेळ राज करवा करीन, राजगादी पोर बठही, ता अमारी मेनो एक जणो तारी जमणी धेड़े अने एक जणा ने तार डाखरी धेड़े बहाड़जे।” 12

पण ईसु तीमने केदो, “तमु जे मांगवा बाज र्‌या तीहयी वात नु मतलब तमने मालम बी नी हय। जे दुख नो पीयालो मे पीवा वाळो से, तीहयो पीयालो तमु पीहु ह़ु? अने जे दुख नो बपतीस्‌मा मे लेवा वाळो से, तीहयु बपतीस्‌मा तमु लेहु ह़ु?”13

तीहया तीने केदो, “तु केय तेम आमु करहु।” अने ईसु तीमने केदो, “जे दुख नो पीयालो मे पीवा वाळो से, तीहयो पीयालो तमने बी पीवा पड़हे, होव जे दुख नो बपतीस्‌मा मे लेवा वाळो से, तीहयो बपतीस्‌मा तमने बी लेवा पड़हे पण मारी जमणी धेड़े अने डाखर्‌या धेड़े कोयने बहाड़वा से, आहयी वात मे मारो हक नी हय। पण आहयो जागो तीमने जड़हे, जीमनी वाटु भगवान तीयार करलो से।”

चाकरी नो भाव

याकुब अने युहन्‌ना नी वात ह़मळीन, बीजा दह़ नेवताळा तीमनी पोर रीहवाय पड़्‌या। 14ईसु तीमने आखा ने ह़ाते बोलावीन केदो, “तमु जाणो के आखी जाती ना माणहु पोर राज करन्‌यो नामह़ाद्‌यो पुडारी, आह़फा असामी पोर हक जमाड़ीन राज करे, अने तीहया हक जमाड़न्‌या पोर अळी बीजा मोट्‌ला माणहु हक जमाड़े। 15पण तमारी मे एवो हक वाळो कायदो नी रेवा जोवे। जे तमारी मे मोटो हयवा हींडे, तीहयो तमारो पावर्‌यो बणवा जोवे।16 अने जे कोय बी तमारी मेनो आखा नो डायलो बणवा हींडे, तीहयो आखा नो गुलाम पावर्‌यो बणाव्‌वा जोवे। 17 काहाके मे मनख्‌या नो सोरो बी आहयी कळी मे आह़फा नी सेवा-चाकरी कराव्‌वा नी, पण आह़फोत सेवा-चाकरी करवा अने ढेरेत जणा नो जीव सोड़ाव्‌वा करीन अने आह़फा नो जीव ह़ाटे करवा आवलो से।”

आंदळा ने डोळा आपवा

(मत्‌ती 20:29-34; लुका 18:35-43)

ईसु अने तीना चेला यरीहो ह़ेर मे पुग ज्‌या; अने जत्‌यार ईसु अने चेला तां गेथा यरुसलेम जवा करीन नीकळ्‌या ता तां गेथो माणहु नो एक मोट्‌लो मेळो बी तीमनी ह़ाते चाल पड़्‌यो। ता तां ह़ारीक एक आंदळो भीकारी रोहा धेड़े बह र्‌यो हतो। तीहयो भीकारी तीमाय नो सोरो बरतीमाय हतो। तीहयो आहयु ह़मळ्‌यो आञे ह़ारीक नासरत गाम वाळो ईसु आव्‌वा बाज र्‌यो, ता तीहयो आंदळो आड़ी-आड़ीन केदो, “ए दावुद नी अवल्‌यात ईसु मार पोर गीण कर।”

घणा माणहु तीने होगो रे करीन वडवा बाज ज्‌या, पण तीहयो अळी ज्‌योरेत आड़ीन केवा बाज ज्‌यो, “ए दावुद नी अवल्‌यात, मार पोर गीण कर।”

तत्‌यार ईसु उबो रीन हुकम आपीन केदो, “हीने आञे बोलावो” अने माणहु तीने बोलावीन केदा, “हीम्‌मत राख” अने “उठ, तने ईसु बोलावे।”

तीहयो आह़फा नु चादरु नाखदीन छोटोत उठ्‌यो, अने ईसुन्‌तां ज्‌यो।

ईसु तीने केदो, “तु मारी पांह ह़ु कराव्‌वा हींड र्‌यो?” आंदळो तीने केदो, “ए मास्‌तर, मे अळी देखवा हींड र्‌यो।”

ईसु तीने केदो, “जा” तारो भरहो तने वारु कर देदो, अने तीहयो तत्‌यारुत देखवा बाज ज्‌यो, अने वाट्‌ये ईसु पसळ चाल पड़्‌यो।

Source notes (17)
  1. Cross-reference मत्‌ती 5:31
  2. Cross-reference वेवस्‌थावीवरन 24:1-4; मत्‌ती 5:31
  3. Cross-reference उबजणाय कीताप 24:1-4; मत्‌ती 5:31
  4. Cross-reference उबजणाय कीताप 2:24
  5. Cross-reference मत्‌ती 5:32; 1 कुरन्‌थी 7:10,11
  6. Cross-reference मत्‌ती 5:32; 1 कुरन्‌थी 7:10-11
  7. Cross-reference मत्‌ती 18:3
  8. Cross-reference मत्‌ती 18:3
  9. Cross-reference नीरगमन 20:12-16; वेवस्‌थावीवरन 5:16-20
  10. Cross-reference मत्‌ती 20:16; लुका 13:30
  11. Cross-reference मत्‌ती 20:16; लुका 13:30
  12. Cross-reference लुका 12:50
  13. Cross-reference लुका 12:50
  14. Cross-reference लुका 22:25,26
  15. Cross-reference मत्‌ती 23:11; मरकुस 9:35; लुका 22:26
  16. Cross-reference लुका 22:25-26
  17. Cross-reference मत्‌ती 23:11; मरकुस 9:35; लुका 22:26

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.