Paliya Bible
लुका 2
ईसु नु पयदा हयवा
(मत्ती 1:18-25)
तीहया दाड़ा मे रोमी राजा नो राजा अगस्तुस एक एवो राज हुकम नीकाळ्यो, के आखी कळी ना माणहु ने कीताप्या मे आह़फा नु नाम लीखाड़वा करीन आपणा-आपणा ह़ेर मे जवा पड़हे। आहयी पेलीत कावा माणहु नी गीनती हती: जत्यार क्वीरीनीयुस सीरीया मे राज करतो हतो। आखा माणहु नाम लीखाड़वा करीन आपणा-आपणा ह़ेर मे ज्या।
युसुफ, राजा दावुद नी अवल्यात मे नो हतो, एतरे युसुफ गलील जीलान नासरत ह़ेर मे गेथो यहुदा जीलान बेतलहम गाम मे ज्यो, जे दावुद नी पयदावारी नु ह़ेर हतु। तीहयो मरीयम ह़ाते नाम लीखाड़वा करीन तां ज्यो, जीनी ह़ाते तीनी जोड़ावणी हय जेली हती, जत्यार मरीयम अने युसुफ बेतलहम गाम मे हता, ता मरीयम नु सोरु पयदा हयवा नी टेम आय लागी। तां काना बी धरमसाहळा मे तीमनी वाटु जागो नी जड़्यो। एतरे तीहया एक ढुरवाड़ा मे जत र्या। मरीयम तांत पेली कावा फोवरी हयी, अने तीनो एक सोरो हयो, अने तीहयी ते सोरु ने लुगड़ा मे ढाकीन ढुरु ने चारो घालन्या गमण मे ह़ुवाड़ देदी।
ह़रगदुत ईसु नी पयदावारी नी खबर गुवाळ्या ने आपे
अने तीहया मुलक मे राते थोड़ाक गाडरा गुवाळ्या बारथा आंगणा मे आह़फाम ना गाडरा नी रखवाळी करता हता। भगवान नो ह़रगदुत तीमनीन्तां आवीन उबो हय ज्यो, अने मालीक नो ह़ेक तीमनी च्यारो-मेर पपलवा बाज ज्यो अने तीहया घणा बीही ज्या। पण ह़रगदुत तीमने केदो, “बीहो ना; ह़मळो, मे तमने घण-जबर खुसी नी खुस-खबर ह़मळावु, जे आखा माणहु जुगु रेहे। काहाके तमने सोड़ाव्वा वाळो दावुद ना ह़ेर बेतलहम मे पयदा हयलो से; आहयोत मालीक अने मसी से। तीहयु सोरु ने ओळखवा नी सेलाणी आहयी से, तमु तीने लुगड़ु मे गुचव्लो अने ढुरु ने चारो घालन्या गमण मे पड़ रेलो देखहु।”
अने उचकाहलात तीहया ह़रगे वाळा ह़रगदुत ह़ाते ह़रगे वाळा ह़रगदुत नो एक मेळो आहयु केतो जाय्न भगवान ना गुण गावत्लो देखाव पड़्यो।
“आखा मे उचा ह़रग मे भगवान नी बड़ाय वदती जाय अने धरती पोर रेण्या तीहया माणेह ने सांती जड़े, जीमनी सी भगवान खुस से!”
जत्यार ह़रगदुत पासा ह़रग मे जत र्या, ता गुवाळ्या आंबा-सांबा केदा, “चालो आपणु बेतलहम जता अने मालीक जे वात आपणु ने केदलो से, तीहयी डोळे देख्या।”
एतरे तीहया उतवाळ्या चाल पड़्या अने मरीयम अने युसुफ ने देख्या, अने सोरु ने गमण मे ह़ुवाड़ मेकलु देख्या। जत्यार गाडरा गुवाळ्या ईसु ने देख्या, तत्यार तीहया मरीयम ने अने युसुफ ने, ह़रगदुत सोरु ना बारा मे केदलो तीहयु आखु की देदा। गुवाळ्या सोरु ना बारा मे तीमने केदा ता, तीहयी वात ह़मळीन तां हता तीहया आखा माणहु वहराय ज्या। पण मरीयम आहयी आखी वात फोम करीन आहयी वात ना बारा मे वीच्यार करतीत री। गुवाळ्या ने ह़रगदुत जेम केदला हता तेम ने तेम देखीन अने ह़मळीन तीहया पासा बारथा गाडरान तां भगवान ना गुण गावता जाय्न जत र्या।
ईसु नु नाम पाड़वा
ह़ात दाड़ा हय ज्या अने अळतेण आंठवे दाड़े चोखु करवा नी टेम आयी, ता तीनु नाम ईसु पाड़्या, जे ह़रगदुत ईसु मरीयम ना कोख मे नी आयो अने पेले केदलो हतो।
ईसु ने मंदीर मे भगवान ना हात मे ह़ोपे
ता मुसा ना कायदान लारे सोरु ने चोखु करवा ना दाड़ा पुरा हया ता, युसुफ अने मरीयम ईसु ने यरुसलेम ह़ेर मे मालीक भगवान नी अगळ लाया। जीसम मालीक भगवान ना कायदा मे आसम लीख मेक्यु: “माणहु अने जानवरु डीट पेले पयदा हयलु मालीक भगवान ना लेदे ह़ोप देदा।” मालीक भगवान ना कायदा मे आसम बी लीखलु से: “बोतकुकड़ा नी एक जोड़ी नीता पारवा ना बे बच्चा मारीन बादा चड़ाव्वा जोवे।”
सीमीयोन नु गीत
ते वखत यरुसलेम मे सीमीयोन नाम नो एक धरमी अने भगत माणेह रेतो हतो। अने तीहयो ईस्रायली माणहु ने सोड़ावीन सांती आपवा वाळा नी वाट जोवतो हतो। अने चोखली आत्मा तीनी पोर छवाय रेती हती। अने चोखली आत्मा तीनी अगळ आहयी वात उजन्ती करली हती “मालीक भगवान वगे गेथो मसी ने देख्या वगर तु नी मरे।” ईसु ना आय्ह़-बाहा ईसु वाटु भगवान ना कायदा नी रीती-भाती पुरी करवा करीन मंदीर मे लाय रेला। तत्यार सीमीयोन तीहयीत चोखली आत्मा नी लारे मंदीर मे आयो। ता सीमीयोन ईसु ने आह़फा ना हात मे धर लेदो, अने भगवान ना गुण गावतो जाय्न केदो: “ए मारा मालीक भगवान तारा हुकम नी अनसारे अने जे तारो गुलाम चाकर्यो से; हाव मने सांती सी मरवा दे। काहाके मारा डोळा तारा छुटकारा ने देख लेदला से, आने तु आखा देस ना माणहु वाटु तीयार करलो से। आहयो बीजी जाती ना माणहु वाटु ह़ाचली ने उजन्तु करन्यु वीजाळु से, अने आहयो तारा असामी ईस्रायल वाटु बड़ाय करे एवो से।”
सोरु ना बारा मे केदली वात ह़मळीन ईसु ना आय्ह़-बाहा वहराय्न वीच्यार मे पड़ ज्या। सीमीयोन, ईसु ना आय्ह़-बाहा ने बरकत आप्यो, अने ईसु नी आय्ह़ मरीयम ने आहयु केदो, “देखो, आहयु सोरु नी लेदे ईस्रायली माणहु भगवान वगा वळ जहे, अने घण झाजा माणहु भगवान ने सोड़ देहे। आहयो एक सेलाणी से जीनी माणहु वीरोद करहे। ईसम करीन घणा ढेरका माणहु ना मन गलत वीच्यार उजन्ता हय जहे, अने तने आसम लागहे के तारा जीव मे लग तलवार भराय जी।”
हन्ना नी गवाय
अने तां ह़ारीक हन्ना नाम नी एक भगत हती, अने तीहयी भगवान वगे हय्न वात केवा वाळी हती। तीहयी आसेर कुळी नी हती, अने तीना बाह नु नाम फनुयल हतु। तीहयी घणी डायी हय जेली हती। अने वेवा करीन ह़ांतेक साल आह़फा ना धणी ह़ाते रेली हती। तत्यार गेथीत तीहयी रंडायलीत री। अने हमणे तीनी उमर अस्सी ने च्यार साल हती, तीहयी मंदीर मेत रेत्ली। अने उपाह़ अने वीन्ती करती जाय्न रात ने दाड़ो भगवान नीत पुजा-पाट कर्या करती हती। अने जत्यार मरीयम अने युसुफ मंदीर मे हता तत्यार हन्ना तां आवीन भगवान ना गुण गाव्वा बाज जी। अने जे माणहु यरुसलेम ह़ेर ना छुटकारा नी वाट जोय र्या हता, तीहया आखा ने तीहयु सोरु ना बारा मे केवा बाज जी।
नासरत ह़ेर मे ईसु पासो जाय
मालीक भगवान ना कायदा नी अनसारे युसुफ अने मरीयम आखी रीती-भाती कर लेदा, अने अळतेण गलील जीला ना नासरत ह़ेर मे पासा जत र्या। अने सोरु मोटु हयतु ज्यु, अने ताखत वाळु हयतु ज्यु, अने अक्कल मे मोटु हयतु ज्यु; अने भगवान नी दया तीनी पोर हती।
ईसु मंदीर मे
अने ईसु ना आय्ह़-बाहा हर साल फसह नो तीवार वाळवा यरुसलेम जता हता। जत्यार ईसु बारे साल नो हयो ता तीहयो बी तीवार वाळवा नी रीतीन अनसारे यरुसलेम ह़ेर मे ज्यो। तीवार वाळवा ना दाड़ा पुरा हय ज्या, अने अळतेण पासा घोर जवा करीन यरुसलेम गेथा चाल पड़्या। ता तीहयो सोरो ईसु यरुसलेम मे री ज्यो; अने ईसु पसळ री ज्यो हीय्यी वात तीना आय्ह़-बाहा ने नी मालम हती। अने आसम वीच्यार कर्या के ईसु तीहया माणहु ना टोळा मेवतो हहे, जे पासा घोर आव्वा बाज र्या हता, तीहया पुरा एक दाड़ा नी चाल-चाल लेदला हता, तत्यार तीहया ईसु ने तीमना ह़गाय-ह़ाय मे अने दोस्तीदार्यान्तां ह़ोदवा बाज ज्या; पण ईसु तीमने नी जड़्यो; ता तीहया ईसु ने ह़ोदवा करीन पासा यरुसलेम आया। अने तीन दाड़ा हय ज्या अने ईसु तीमने मंदीर मे जड़्यो; ईसु युहदी-धरम ना मास्तर ह़ाते बह रेलो, अने तीमनी वात ह़मळवा बाज रेलो, अने तीमने सवाल पुछवा बाज रेलो देखाव पड़्यो। तीना अक्कल भर्या जपाप ह़मळीन तीहया आखा ह़मळन्या माणहु वहराय ज्या। अने ईसु ना आय्ह़-बाहा बी तीने तां देखीन वहराय ज्या; तीनी आय्ह़ तीने केदी, “ए बेटा! तारो बाह अने मे तार जुगु घण फीकर मे पड़ जेला; आमु तने आखा जागे ह़ोद्या! तु अमारी ह़ाते आवो वेहवार काहा कर्यो?”
पण ईसु जपाप आप्यो, “तमु मने काहा ह़ोदता हता? तमने मालम नी हतु ह़ु? के मने मारा बाह ना घोर मे रेवा तालेत से।” पण ईसु ना आय्ह़-बाहा ईसु नी केदली वात ने नी ह़मज्या।
अळतेण ईसु आह़फा ना आय्ह़-बाहा ह़ाते आह़फा ना नासरत ह़ेर मे पासो आवती र्यो, अने तीहयो आखी वात मे आय्ह़-बाहान हुकम मान्तो र्यो; अने तीमना हक मे र्यो; अने तीनी आय्ह़ मरीयम आहयी आखी वात ने फोम राखी, अने तीना बारा मे आह़फी ना मन मे सोचती वीच्यारती री। अने जेम साल वीत्ता ज्या, ईसु अक्कल मे अने डील मे बड़तो ज्यो, अने भगवान नी अने माणहु नी दया तीनी पोर हती।
Source notes (2)
- Cross-reference लुका 1:31
- Cross-reference मत्ती 2:23
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.