Paliya Bible
लुका 18
नीयाव करन्यो अने रंडायली बयर नो दाखलो
दाड़ीन वळ-वळीन वीन्ती करवा जोवे, अने हीय्या नी सोड़वा जोवे, आहयु ह़ीकाड़वा करीन, ईसु आह़फा ना चेला ने आहयो दाखलो ह़मळायो, “काना ह़ेर मे एक नीयाव करन्यो हतो, जे, नी ते भगवान ने बीहत्लो, अने नी ते काना माणहु नी परवाय करत्लो। अने तीहयात ह़ेर मे एक रंडायली बयर बी हती। तीहयी ते नीयाव करन्यान्तां आवीन कीया करती हती, नीयाव करीन मार पोर गुनो लगाड़न्या सी बचाड़ अने मने नीयाव अपाड़। अने तीहयो घणा दाड़ा लग नी मान्यो अळतेण तीहयो आह़फा ना मन मे वीच्यारीन केदो, ‘मे नी ते भगवान सी बीहु, अने नी माणहु नी परवाय करु’ ते बी आहयी रंडायली बयर वळ-वळीन आवे, अने मने दम्या करे; एतरे मे आनो नीयाव करही, जीनी सी हीय्यी, पासी वळ-वळीन नी दमे तेम।”
मालीक ईसु केदो, “ह़मळ्या के आहयो वण-धरमी नीयाव करन्यो माणेह ह़ु केदो? एतरे भगवान आह़फा ना टाळला माणहु जुगु, नीयाव करवा वार मे वार लगाड़हे ह़ु? जे रात ने दाड़ो आड़ी-आड़ीन तीनी पांह रावण्या करीन वीन्ती कर्या करे ह़ु तीहयो तीना बारा मे वार लगाड़हे ह़ु? मे तमने केम; तीहयो छोटोत तीमनी जुगु नीयाव करहे। पण जत्यार मनख्या नो सोरो आवह़े, ता तीहयो धरती पोर माणहु मे भरहो बच रेलो देखहे ह़ु?”
फरीसी अने फाळो लेण्या माणेह नो दाखलो
अने ईसु तीमने बी केदो, जे माणहु आह़फा पोर आहयो भरहो करता हता के आमु घणा धरमी से, अने बीजा ने कंय नी ह़मजता हता। तीहया माणहु ने आहयो दाखलो ह़मळायो। “बे माणहु वीन्ती करवा करीन मंदीर मे ज्या, तीमनी माय्न एक फरीसी माणेह हतो, अने बीजो फाळो लेवा वाळो हतो।”
“फरीसी माणेह एक धेड़े उबो हय्न आह़फा ना मन मे आसम वीन्ती करवा बाज ज्यो, ‘ए भगवान, मे तने घणो वारु केम, काहाके मे बीजा नी तेम लालच्यो, बीजा ने ठगण्यो अने बीजा नी बयर ह़ाते छीनाळु करन्यो नी हय, अने आहया फाळो लेवा वाळा नी तेवो बी नी हय। मे हप्ता मे बे काव उपाह़ पाळु, अने जे कंय बी मे कमायु, तीनो दसवो वाटो तने आपु।’”
पण फाळो लेवा वाळो सेटोत उबो री र्यो, अने ह़रग भणी भाळ्यो लग नी। पण तीहयो दुख मे आह़फा नी छाती ठोकी-ठोकीन केदो, “ए भगवान, मे पापी से। तु मार पोर दया कर!” 1मे तमने केम, “फाळो लेवा वाळो तीहयुत कर्यो, जे भगवान ने गमत्लु। तीहयो भगवान नी दया सी धरमी बणीन ज्यो। जे कोय आह़फा ने मोटो ह़मजे, भगवान तीने नानो कर देहे। पण जे आह़फा ने भोळो ह़मजे, भगवान तीने मोटो बणाय देहे।”
सोरा ने ईसु बरकत आपे
(मत्ती 19:13-15; मरकुस 10:13-16)
एक दाड़े माणहु नान्ला सोरा पोर ईसु नो हात मेकाड़वा करीन ईसुन्तां लाया। चेला आहयु देखीन माणहु ने वड्या। बाखीन ईसु सोरा ने आह़फा नी ह़ाते बोलायो अने चेला ने केदो, “आहया नान्ला सोरा ने मारीन्तां आव्वा देवो, हीमने ना रोको; काहाके भगवान नु राज हीमनी ह़ारका नु से। मे तमने ह़ाचलीन केम के, जे कोय आहया नान्ला सोरा नी तेम भगवान नु राज नी आवरे, तीहयो भगवान ना राज मे कदी नी भराय सके।”
मालदार जुवान्यो ईसुन्तां आवीन अमर जीवाय नी वात पुसे
(मत्ती 19:16-30; मरकुस 10:17-31)
एक युहदी माणहु नो एक पुडारी ईसु ने आहयु पुछ्यो, “ए वारला मास्तर! अमरकाय जीवाय हात करवा करीन मने ह़ु करवा पड़हे?”
ता ईसु तीने केदो, “तु मने वारलो काहा केय? कोय बी वारलु नी हय। पण भगवान एतरोत वारलो से। तु हुकम ते जाणतो हहे, के छीनाळु नी करजो, खुन नी करजो, चोरी नी करजो, अने कोय नी झुटी गवा नी देजो, आह़फा ना आय्ह़-बाहा नी ईज्जत करीन आबरु राखजो।”
तीहयो युहदी पुडारी जपाप आप्यो, “आहया आखा कायदा ने ते मे नानो हतो तां गेथोत पाळ्तो आय र्यो।”
ईसु आहयु ह़मळीन तीने केदो, के “हजु तारी मे एक वात नी कसर से, तारु जे कंय से, तीहयु आखु वेचीन गरीब ने वाट दे, अने तने ह़रग मे धन जड़हे। पण हाव तु आवीन मार पसळ चाल अने मारो चेलो बण जा।” तीहयो पुडारी आहयु ह़मळीन घणो ह़ोह़वाय ज्यो, काहाके तीहयो घणो मालदार हतो।
ईसु आहयु देखीन पुडारी ने केदो, “मालदार माणहु जुगु भगवान ना राज मे भरायवु घणु काठु से! ह़ोय ना डुचा मे हतीन उटड़ा ने नीकळवा नु जादा वारु से, बाखीन मालदार ने भगवान ना राज मे भरायवा घणु काठु से।”
पण एतरा मे ह़मळवा वाळा बीजा माणहु केदा, “ता कोयने छुटकारो जड़हे?”
ता ईसु केदो, “माणहु ने नी बणे, तीहयु भगवान सी हय सके।”
ता पतरस ईसु ने केदो, “देख, आमु अमारु आखु कंय सोड़ीन तार कीया मे चालवा वाळा बण जेला से।”
ईसु तीमने केदो, “मे तमने ह़ाचलीन केम एवु कोय बी नी हय, जे भगवान ना राज जुगु घोरबार अने आह़फा नी घोरवाळी, भायु ने आय्ह़-बाहा अने सोरा-सोरी ने सोड़ देदु हय। अने तीने आंया आहयी कळी मे कंय नी जड़्यु हय, तीने आंया बी घण-जबर जड़हे अने ह़रग मे बी तीने अमरकाय जीवाय जड़हे।”
ईसु तीसरी कावा आह़फा नी मोत ना बारा मे केय
(मत्ती 20:17-19; मरकुस 10:32-34)
ईसु बारे चेला ने बीजा गेथो सेटो ली ज्यो अने तीमने केदो, “ह़मळो आपणु यरुसलेम जवा बाज र्या। यरुसलेम एक एवो जागो से जां ह़ारीक मारा वारा मे, होव मनख्या ना सोरा ना बारा मे, भगवान वगे गेथा केण्या माणहु नी लारे लीखली आखी वात पुरी हयती जाय्न वीतहे। काहाके मे तीहया माणहु ना हात मे अपाय जही, जे युहदी नी हय। तीहया मारी हाही उड़ावह़े, मने वेला पाड़ीन मारु नामबद्दी करहे, अने मारी पोर थुपहे। अने तीहया तीने ह़ड़के करीन ठोकहे, अने तीने मार नाखहे। पण तीहयो तीसरा दाड़े पासो जीवतो हय जहे।”
पण ईसु ना चेला ने आहयी वात कंय बी नी ह़मजायी। अने आहयी वात तीमनी सी ह़तायली र्यी। तीमने नी ह़मजायु के ईसु तीमने ह़ु केवा बाज र्यो हतो।
आंदळा भीकारी माणेह ने ईसु वारु करे
(मत्ती 20:29-34; मरकुस 10:46-52)
जत्यार ईसु यरीहो ह़ेर नी ह़ातेत आव्वा बाज र्यो हतो, ता एक आंदळो ह़ड़क धेड़े तां माय्न आव्वा-जवा वाळा सी भीक मांगवा बाज र्यो हतो। माणहु ने जत्ला अने पोग नी चाल ह़मळीन तीहयो आंदळो माणहु ने पुछवा बाज ज्यो, “आहयु आखु ह़ु हयवा बाज र्यु?”
माणहु तीहया आंदळा ने वात देखाड़्या, के “ईसु नासरी आंखर माय्न जवा बाज र्यो।”
एतरे तीहयो आंदळो आहयु केतो जाय्न ज्योरेत आड़ पड़्यो, “ए ईसु! दावुद नी अवल्यात! मार पोर गीण कर।”
जे तीहया आंदळा ना अगळ-अगळ जवा बाज र्या हता, तीहया ते आंदळा ने होगो रे, करीन वडता हता, बाखीन तीहयो आंदळो अळी ज्योरेत आड़ीन केदो, “ए दावुद नी अवल्यात! मार पोर गीण कर।”
तत्यार ईसु उबो रीन माणहु ने हुकम आप्यो के हीने मारीन्तां ली आवो, अने जत्यार तीहयो ह़ाते आयो, ता ईसु तीने पुछ्यो, “तने ह़ु जोवे? मे तार जुगु ह़ु करु?” तीहयो आंदळो केदो, “ए मालीक! मे अळी देखवा हींडु।”
ईसु तीने केदो “ता हाव गेथो तु देख, अने जा, तारो भरहो तारो छुटकारो करलो से।”
तेतरीत घड़ी तीहयो देखवा बाज ज्यो। अने तीहयो भगवान ना गुण गावतो जाय्न ईसु ना पसळ चाल पड़्यो। अने आहयु देखीन माणहु भगवान ना गुण गाया।
Source notes (1)
- Cross-reference मत्ती 23:12; लुका 14:11
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.