Skip to content
BibleKenya

Paliya Bible

लुका 14

अराम ना दाड़े ईसु आरगा करे

अळतेण ईसु अराम छोटोत ना दाड़े फरीसी माणहु ना एक मुखी ना घोर खाणु खावा ज्‌यो: अने तीहया माणहु ईसु भणी झाकीन भाळ र्‌या हता। अने देखो, एक माणेह ईसु अगळ हतो, तीने एक रोग लाग रेलो, तीहया रोग ने पाणीझेलो केय। अने ईसु युहदी-धरम ना मास्‌तर्‌या अने फरीसी माणहु ने केदो; “अराम करवा ना दाड़े मांदलु माणेह ने आरगु करवा वारु हय, के नी हय?”

पण तीहया होगात र्‌या। ता ईसु तीहयु मांदलु माणेह ने सीमीन आरगु कर देदो, अने तीने जवा देदो। 1अने ईसु तीमने केदो, “तमारी माय्‌न एवु कोय से, जीनो सोरो नीता बोळद्‌यो अराम करवा ना दाड़े कुवा मे पड़ जाय, अने तीहयो अराम ना दाड़े तत्‌यारुत तीने बाहर नीकाळीन नी लावे?”

अने आहयी वात ह़मळीन तीहया ईसु ने कानो बी जपाप नी आप सक्‌या।

भोळो अने पोरणा

पोरणा ने सोटात वारु बहवा नो जागो टाळत्‌ला देखीन ईसु तीमने एक दाखलो केदो, “जत्‌यार बी तने कोय छाकपेड़ु मे नेवतु आपीन बोलावे, ता तु आखान पेल्‌ना जागे जाय्‌न नी बह जे। कदीम आसम ते नी हय जाय नेवतु आपण्‌यो तार गेथा बी जादा मोटा ने नेवतु आपीन पोरणो बोलायो हय। अने तीहयो बी आय लागे ता तमने बेम जणा ने बोलावण्‌यो आवीन तने केय, ‘आने आनो जागो आपो’ अने तने लजवाय्‌न आखा नी पसळ जाय्‌न बहवा पड़े। पण जत्‌यार तने नेवतु आपीन बोलावे, ता तु आखान पाछला जागा पोर जाय्‌न बह। जीनी सी नेवतु आपीन पोरणो बोलावण्‌यो आवीन तने आहयु केय, ‘ए दोस्‌तीदार! अगो आवीन बह जा।’ आहयी रीते तने आखा पोरणा अगळ ईज्‌जत जड़हे अने तारु आबरु री जहे। 2काहाके जे आह़फा ने मोटो ह़मजे, तीने नानो बणाय देहे, अने जे कोय आह़फा ने नानु ह़मजे, तीने आखा गेथो मोटो बणाय देहे।”

जे ईसु ने नेवतु आपीन खावा बोलावलो हतो तीने बी ईसु केदो, “जत्‌यार बी तु दीहु नीता राते खावा माणहु ने पंगात बहाड़े, ता आह़फा ना दोस्‌तीदार ने, आह़फा ना सग्‌गा भायु ने, अने तारा भाय-बेटा ने, अने आड़े-धेड़े वाळा मालदार ने नी बोलावजे, काहाके कदीम आसम नी हय जाय के तीहया बी तने नेवतु आपीन बोलाय लेय अने पासी पंगात मे खवाड़ीन बदलो चुकाड़ देय। पण जत्‌यार तु खावा नी पंगात राखे, ता गरीब ने, लुल्‌ला ने, लंगड़ा ने, अने आंदळा ने बोलावजे। अने तु जुगाळो हय जही काहाके पासु आपवा जुगु तीमनी पांह कंय बी नी हय, पण धरमी माणहु मर्‌या-ह़र्‌या मे गेथा जीवता हयहे ता भगवान हीय्‌या काम नु फोळ आपहे।”

खाणु नी पंगात नी लारे ईसु ह़ीकापण आपे

(मत्‌ती 22:1-10)

ईसु ह़ाते खावा वाळा मे गेथो कानो ईसु नी वात ह़मळीन ईसु ने केदो, “तीहया जुगाळा से, जे भगवान ना राज मे खाणु खाहे।”

ईसु तीने केदो, “कानु माणेह घण मोटी खातरी कर्‌यो अने एक घण मोटी पंगात पाड़्‌यो, अने तीहयो घणा ढेरका माणहु ने नेवतु आप्‌यो। जत्‌यार खाणु बण ज्‌यु, ता पंगात नी टेमे तीहयो एक गुलाम पावर्‌या ने नेवतु आपलो तीमनीन्‌तां आहयु की मोकल्‌यो, हाव आखु खाणु तीयार से खाणु खावा चालो।” पण तीहया आखान-आखा ढोंगड़ा करीन माफी मांगवा बाज ज्‌या; पेले वाळो केदो, “मे हमणेत एक खेतर वेचातु लेदलो से, अने तीहयु खेतर देखवा करीन जवा से: एतरे मे रावण्‌या करीन वीन्‌ती करु के मने नी अवाये, मने माफ कर दे।” बीजो केदो, “मे पांच जोड़ी बोळद्‌या वेचाता लेदलो से, अने तीमने जोपीन देखवा से। एतरे मे वीन्‌ती करु के मने नी अवाये, मने माफ कर दे।” अने तीसरो केदो, “हमणेत मारा वेवा हयला से, एतरे मने नी अवाये।”

गुलाम पावर्‌यो पासो आयो अने तीहयो आह़फा ना मालीक ने आहयी वात देखाड़ देदो। आहयी वात ह़मळीन मालीक घण-जबर रीहवाय ज्‌यो। तत्‌यार तीहयो आह़फा ना गुलाम पावर्‌या ने हुकम आप्‌यो ह़ेर मे अने गळ्‌या-गळ्‌या मे छोटोत जाय्‌न गरीब ने, आंदळा ने अने पांगळा ने बोलाय लावो। अने तीहयो गुलाम पावर्‌यो मालीक ने पासो आवीन केदो, “ए मालीक! जेम तु केदो तेमेत मे माणहु ने बोलाय लायो। ते बी माणहु बहवा नो जागो वाच र्‌यो।” तत्‌यार मालीक आह़फा ना गुलाम पावर्‌या ने केदो, “ह़ड़के अने खेतर नी वाड़ी मे जा, अने तां वाळा माणहु ने बी पंगात मे बोलाय लाव। मारु घोर माणहु सी भराय जवा जोवे। मे आनी करते केम के, जे माणहु ने मे पेले बोलावलो हतो, तीमनी माय्‌न कोय बी आहयी खातरी नु खाणु नी चाखवा जोवे।”

ईसु ना चेला बणवा नी कीमत

(मत्‌ती 10:37-38)

ईसु ह़ाते एक घण मोटो मेळो जवा बाज र्‌यो हतो, ता ईसु पासो फीरीन माणहु ने केदो, 3“कदीम कोय मारी ह़ाते आवे, अने आह़फा ना आय्‌ह-बाहा, घोरवाळी ने, आह़फा ना सोरा-सोरी ने अने भाय-बेन्‌या ने अने आह़फा ना जीव ने मारी गेथो जादा मोंग करे ता तीहयो मार चेलो नी बण सके। 4जे कोय आह़फा नु कुरुस ने नी उचले; अने मार पसळ नी आवे; तीहयो बी मार चेलो नी बण सके।”

“तमारी मे आसवु कोय से, जे मोट्‌लु घोर बंदाड़वा हीन्‌डे, पण पेले बहीन खरचा नो हीसाब नी जोड़े के घोर बंदाड़वा जुगु मार पांह पय्‌हा हय के नी हय? कदीम आसम नी हय जाय के पायो खोदीन दगड़ा नो पायो बणाय लेय पण पुरु नी हये ता आखा देखवा वाळा आहयु केता जाय्‌न तीनी हाही उड़ावह़े, के ‘आहयो माणेह बंदाड़वा ते बाज ज्‌यो पण पुरु घोर नी बणाय सक्‌यो?’”

“अने एवो कानो राजो हहे के, तीहयो बीजा राजा ह़ाते लड़ाय करवा जतो हय, अने पेले बहीन आहयु वीच्‌यार नी करे के, जे वीह़-हजार नी फोज लीन मार भणी आव्‌वा बाज र्‌यो, तीनी ह़ाते मे दह़ हजार फोज लीन लड़ाय लड़ीन जीक जही ह़ु? कदीम तीने लड़ायवा मे जीक जड़ जहे ईसम भरहो नी हय ता तीहयो सेटोत रीन तीनीन्‌तां आहयु की मोकले के आपणु नी झुमायता पण मेळ कर लेता।” “आहयीत रीते तमारी मे जे कोय आह़फा नु आखु कंय मार जुगु आप नी देय, तांह लग तीहयो मारो चेलो नी हय सके।”

खारलु मीठु ना दाखला नी लारे ईसु ह़ीकाड़े

(मत्‌ती 5:13; मरकुस 9:50)

“खारलु मीठु वारु से, बाखीन तीहयु मीठु नु खारापण बगड़ जाय, ता तीने कानी चीज वेर पासु खारु नी कर सके? तीहयु खारलु मीठु नी ते खेतर मे काम आवे, नी ते खातर मे काम आवे: तीहयु खारलु मीठु ने माणहु बारथु कादा मे ली जाय्‌न नाख देय। जीनी पांह ह़मळवा ना कान्‌टा हय, तीहयो ह़मळी लेय।”

Source notes (4)
  1. Cross-reference मत्‌ती 12:11
  2. Cross-reference मत्‌ती 23:12; लुका 18:14
  3. Cross-reference मत्‌ती 10:37
  4. Cross-reference मत्‌ती 10:38; 16:24; मरकुस 8:34; लुका 9:23

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.